Say Karakpan na Palsa nen Jehova

‘Sika so Manuna nen say Palpalandey’

SAY pakaimaton ed ibubutay na agew manlapud toktok na Palandey Fuji et sakey ya agnalingwanan ya eksperiensya. Ompepelnak ed liwang so agew a singa kolor-apoy, a manliliwawa ed amputin niebe tan kolor-dapol a baton lava. Legan ya onggagapo so balon agew, say mabitabitar ya anino na palandey so maples ya onnanatnat ed ararawin pukpukdol tan lawak.

Say ataragey a palpalandey a singa say Palandey Fuji, a no nisulat ed saray karakter et mankabaliksay “anggapoy kapara,” so lawas makapadinayew ed sikatayo. Agayla so kinaabeba tayo no ikompara ed kinaatagey na saratan! Ontan lan katagey iray palandey a panisiaan na dakel a totoo a saray sankaatageyan ed saratan, a mabetbet a sasakbongan na kelpa tan lurem, so panaayaman na dirios.

Say alenleneg a Dios a peteg ya idadayew na saray atagey a palandey et say onsianon Amalsa ed saratan, si Jehova. Sikato lambengat so ‘Managgawa ed saray palandey.’ (Amos 4:13) Ngalngalin kakapat na dalin et nipalpalandey, tan sanen pinalsa na Dios so planeta tayo, inletneg to iray puersa a saratan so ultimon mamapawala na makapadinayew a pukpukdol tan kapalandeyan. (Salmo 95:4) Singa bilang, panisiaan a saray kapalandeyan na Himalayas tan Andes so aporma lapud angkakabaleg a panguuman ed dalem na dalin tan say igagalaw na saray akintapew a parte na dalin.

Bilang totoo, mairap tayon natalosan no panon tan akin a linmesa iray palandey. On, agtayo naebatan iray tepet ya impaarap ed matunong a si Job: “Iner so kawalaan mo sanen inggaton ko [nen Jehova] so saray panangipaletnegan ed dalin? . . . Ed tapew no iner so nigatonan na saray panangiletnegan to?”​—Job 38:4-6.

Balet, amta tayo a mandedependi so bilay tayo ed saray palandey. Saratan so tatawagen a simpenan na danum na palsa, lapud amin a danum na angkakabaleg ya ilog so manlalapud palandey tan kapaldua ed populasyon na dalin so mandedependi ed danum a manlalapud palandey. (Salmo 104:13) Unong ed magasin a New Scientist, “anemira ed 20 a manuna iran tagano a tanaman ed interon mundo et manlalapud palandey.” Diad balon mundo ya insipan na Dios, a balanse la iray kipapasen ed ekolohya, ‘niwala so daakan ya ilik ed tapew na dalin tan ed tapew na toktok na saray palandey.’​—Salmo 72:16; 2 Pedro 3:13.

No nasalambit so nipaakar ed palpalandey, nanonotan na dakel a totoo so ataragey a palpalandey ed Europa. Sarayan palandey, a pati say Palandey Civetta a nipanengneng dia, so alay abig a mamaneknek a wala so Manamalsa. (Salmo 98:8) Saratan so mangidadayew ed si Jehova, ya ‘angiletneg ed saray palandey lapu ed biskeg to.’​—Salmo 65:6. *

Talagan makapakelkelaw so karakpan na ataragey a palpalandey, a pati saray toktok tan pukpukdol na saratan a napnoy yelo, saray alosadsar ya asakbongan na niebe, saray lawak tan kulos, tan saray karikaan na saratan. Impabidbir nen Arin David si Jehova a ‘Sikato so mamapatubo na dika ed tapew na saray palpalandey.’​—Salmo 147:8.

Saray atalunton a pukdol​—a singa sarayan pukdol diad Guilin, Tsina​—so nayarin agmipara ed inkaekstra-ordinaryo na ataragey  a palpalandey, balet saratan so marakdakep. Diad gilig na Ilog Li et pandinayewan na saray bisita so karakpan na saray arasig a baton-dena a walaan na mautok a toktok. No naimatonan na sakey so iyaagus na saray malinlinew a danum diad sarayan makelpan pukdol, nipanonot ed sikato iray salita na salmista: “Sikato [si Jehova] ibaki to so saray subosubol ya onloob ed saray lawlawak; ya onagus ed leeleet na saray palpalandey.”​—Salmo 104:10.

Peteg a sikatayo so mandinayew ed saray palandey lapud bibidbiren tayo iratan bilang manunan kabiangan na maaron probisyon na Manamalsa parad pankaabigan tan panliketan na katooan. Balet, anggaman makapakelaw so palpalandey, saratan so agmakapipara ed inkatalonggaring nen Jehova. Sikato so peteg a ‘manuna nen saray palpalandey.’​—Salmo 76:4.

[Paimano ed leksab]

[Kahon/Litrato ed pahina 9]

Samploran porsiento ed populasyon na mundo so manaayam ed kapalandeyan. Balet aliwa itan a baleg a babeng ed saramay mangiyaabawag na maong a balita nipaakar ed Panarian na Dios. Sarayan Kristianon ministro so okupadon tuloy a mankikimey ed dakel iran rehyon a nipalandey. Tan “agayla so kalimgasan ed tapew na saray palandey so saray sali na mangiyakar na saray maong a balita, a mangibawag na deen, a mangiyakar na saray maong a balita na kaabigan, a mangibawag na kilalaban.”​—Isaias 52:7.

“Saray atagey a palpalandey sikara so sakey ya apireng ya onkana ed saray kanding ya atap,” so inkanta na salmista. (Salmo 104:18) Saray atap a kanding, a singa say Nubian ibex a walaan na marakdakep a saklor, so kabiangan ed saray sankasekderan a sali ed amin a manaayam ed palandey. Saratan so manaakar-akar ed saray masupit a tambib ya ompatnag ya agnadalan. Sarasarag na ibex so manbilay ed saray agnasabin lugar. Nayarin lapud inkagawa na saray kuko na satan. Saray sengat na kuko ra so nayarin ompinat lapud belat na kanding, pian makapeket itan sano onalagey odino onkutdang ed masupit a tambib na bato. Petepeteg a say ibex et sakey ya obra-maestra a desinyo.

[Litrato ed pahina 9]

Palandey Fuji, Honshu, Hapon