‘Sumpal Yo so Ministeryo Yo’

“Nagnap mon gawaen so serbisyom.”​—2 TIMOTEO 4:5, Byington.

1, 2. Anggaman amin a Kristiano et ebanghelisador, anto so Makasulatan a kakaukolanen ed saray mamatatken?

 KASIN sakey kayon manangiyabawag na Panarian? No ontan, pisalamatan si Jehova a Dios ed sayan alay abig a pribilehyo. Kasin sakey kayon matatken ed kongregasyon? Kaaruman itan a pribilehyo manlapud si Jehova. Balet agtayo nepeg a lingwanan ya aliwan say sekular ya edukasyon odino maong ya abilidad ed panagsalita so mangikualipika ed siopaman ed sikatayo diad ministeryo odino ed panangasikaso ed kongregasyon. Si Jehova so nagnap ya angikualipika ed sikatayo diad ministeryo, tan lapud say arum a lalaki ed limog tayo so akakapet ed espisipiko iran Makasulatan a kakaukolanen kanian apribilehyoan ira a manlingkor bilang manangasikaso.​—2 Corinto 3:5, 6; 1 Timoteo 3:1-7.

² Susumpalen na amin a dedikadon Kristiano so kimey na saray ebanghelisador, balet nagkalalo la a nakaukolan ed saray manangasikaso, odino mamatatken, a mangipatnag ed maabig ya alimbawa ed ministeryo. Saray mamatatken a ‘mansasagpot ed salita tan dia ed panagbangat’ so naiimano na Dios tan si Kristo, ontan met ed saray kapara ran Tasi nen Jehova. (1 Timoteo 5:17; Efeso 5:23; Hebreos 6:10-12) Diad amin a sirkumstansya, say panagbangat na sakey a matatken so nepeg a makapabiskeg ed espiritual, lapud oniay imbaga nen apostol Pablo ed manangasikason si Timoteo: “Onsabi so panaon ya agda nitepel so maabig a bangat; noag ingen dia ed kiwala na gatel ed layag da mantipon ira ed saray managbangat ed sikara, unong ed saray dilin kaalakan na laman da; et itaynan da so saray pandengel da ed tua, tan sikara so pandengel da ed saray labilabir. Et ingen sika manpaga ka ed saray ami-amin a bengatla, mantepel ka ed saray ir-irap, gawam so gawa na ebanghelista, sumpal mo so ministeryom.”​—2 Timoteo 4:3-5.

3. Antoray nakaukolan a gawaen ta pian saray palson bangat so agmameligro ed espiritualidad na kongregasyon?

³ Pian naseguro ya anggapo iray palson bangat a mameligro ed espiritualidad na kongregasyon, nepeg a tumboken na sakey a manangasikaso so simbawa nen Pablo: “Magmaliw a limpio ed amin a pamaakaran, . . . nagnap mon gawaen so serbisyom.” (2 Timoteo 4:5, Byington) On, say sakey a matatken so nakaukolan a ‘[nagnap a] manumpal ed ministeryo to.’ Sikato so nepeg a mangisumpal ed satan diad nagnap odino sigpot a paraan. Say sakey a matatken a sigpot a manusumpal ed ministeryo to so mangiimanon maong ed amin a responsabilidad to, ya anggapoy napapaulyan to odino agto sigpot a nagagawaan. Satan a too et matoor ed anggan saray angkelag a bengatla.​—Lucas 12:48; 16:10.

4. Anto so makatulong ed sikatayo pian sigpot tayon nasumpal so ministeryo tayo?

⁴ Say sigpot a pakasumpal tayo ed ministeryo so aglawas mankaukolan na dakerakel a panaon, balet nakaukolan ya epektibo so pakausaran na panaon tayo. Say asimbang tan tuloytuloy a kurang so makatulong ed amin a Kristiano pian nasumpal da iray bengatla diad ministeryo. Pian mas dakel nin panaon so nausar to diad lawak na kimeyan, say sakey a matatken so nakaukolan a walaan na maabig a personal a panangorganisa pian nabalanse so eskedyul to tan amta to no anto so ipabtang to ed arum tan no panon ton gawaen itan. (Hebreos 13:17) Siempre, gagawaen met na respetadon matatken so dilin betang to, a singa si Nehemias, ya akibiang a mismo ed panagpaalagey lamet ed saray padir na Jerusalem. (Nehemias 5:16) Tan amin a lingkor nen Jehova so nepeg a regular a mibiang ed panangipulong ed Panarian.​—1 Corinto 9:16-18.

5. Panon tayon nepeg a moriaen so ministeryo tayo?

⁵ Agaylan makapaliket so ganggan ed sikatayo bilang manangiyabawag na niletneg lan  mangatatawen a Panarian! Maseguron papablien tayo so pribilehyo tayon makapibiang ed panangipulong na maong a balita diad interon panaayaman a dalin sakbay ya onsabi so anggaan. (Mateo 24:14) Anggaman ag-itayo ayadyari, napaseseg itayo ed saray salita nen Pablo: “Wala so sayan [ministeryo a] kayarian tayo ed baso a pitek, pian say sankatageyan ya inkabaleg na pakayari kien komon na Dios, ya agmanlapu ed sikatayo.” (2 Corinto 4:7) On, nayarian tayo so mangisaklang na naabobonan a serbisyo​—balet diad panamegley lambengat na biskeg tan kakabatan ya inter na Dios.​—1 Corinto 1:26-31.

Panangisindag ed Gloria na Dios

6. Anto so pandumaan na silalaman ya Israel tan espiritual ya Israel?

⁶ Diad impanukoy nen Pablo ed alanaan iran Kristiano, imbaga to a say Dios so ‘nanggawa ed inkasusto min manangasikaso [o ministros] na balon sipan.’ Impareng na apostol so balon sipanan ed espiritual ya Israel panamegley nen Jesu-Kristo dia ed daan lan sipanan ed Ganggan ed silalaman ya Israel panamegley nen Moises. Inyarum nen Pablo a sanen linmeksab si Moises manlapud Palandey Sinai ya awit to iray tinapyas a bato ya akasulatan na Samploran Ganggan, masmasnag so lupa to kanian agmakanengneng ed sikato iray Israelita. Ingen ta sinmabi so panaon, a wala ni so mas seryoson bengatla ya agawa lapud “saray kaisipan da kinmigtel” tan asakbongan so kapusoan da. Balet nakal itan a sakbong sanen inmasingger ira ed si Jehova tekep na interon-puson debosyon. Diad tinmumbok ya impanukoy nen Pablo ed ministeryo a niiter ed saramay kabiangan ed balon sipanan, oniay inkuan to: “‘Sikatayon amin, ya ag-asakbongan so lupa, nengnengnengen tayo a singa dia ed sakey a salming so gloria na Katawan.” (2 Corinto 3:6-8, 14-18; Exodo 34:29-35) Say ‘arum a karnero’ nen Jesus natan so apribilehyoan met a mangisindag ed gloria nen Jehova.​—Juan 10:16.

7. Panon a nisindag na saray totoo so gloria na Dios?

⁷ Panon a nisindag na saray makasalanan a totoo so gloria nen Jehova, anta anggapo so too a makanengneng ed lupa to tan nabilay? (Exodo 33:20) Bueno, nilikud ed mismon gloria nen Jehova, wala met so maglorian gagala to pian iyalangon so inkasoberano to panamegley na Panarian to. Saray katuaan a misiglaotan ed Panarian so manunan kabiangan ed “saray makapakelaw a gawa na Dios” a ginmapon inyabawag na saramay apagamoran na masanton espiritu nen Pentecostes 33 K.P. (Gawa 2:11) Diad panangiwanwan na espiritu, sigpot dan nasumpal so ministeryo a nimatalek ed sikara.​—Gawa 1:8.

8. No nipaakar ed ministeryo, anto so determinadon ginawa nen Pablo?

⁸ Determinado si Pablo ya anggapon balot so makaamper ed sigpot a pakasumpal to ed ministeryo to. Insulat to: “Bangta wala ed sikami so panangasikaso [“ministeryo,” NW], unong ed agamoran mi a panangasi, agkami onkapuy. Noag ingen impulisay mi so saray maamot a bengatla ran makapabaing; ya agkami manakar ed kasiliban tan agmi pikeweten so salita na Dios; noag ingen diad inkipaliwawa na katuaan imatalek mi sikamin dili ed konsiensia na balang too ed imaton na Dios.” (2 Corinto 4:1, 2) Diad impanalambit nen Pablo ed sayan “ministeryo,” say katuaan so niparungtal tan say espiritual a liwawa so nisindag ed nanduruman pasen.

9, 10. Panon a posible so pangisindag ed gloria nen Jehova?

⁹ Nipaakar ed Lapuan na pisikal tan espiritual a liwawa, oniay insulat nen Pablo: “Say Dios so nankuan:  Say silew onsindag ed saray kabilungetan, a sikato so anindag ed saray kapusoan tayo, a mangiter ed silew na karunongan na gloria na Dios ed lupa nen Jesu-Kristo.” (2 Corinto 4:6; Genesis 1:2-5) Lapud niiter ed sikatayo so agnaparaan a pribilehyo ed pagmaliw a ministros na Dios, mansiansia itayon malinis ta pian singa itayo saray salming a mangisisindag ed gloria nen Jehova.

¹⁰ Saray totoon walad espiritual a kabilungetan so agmakanengneng ed gloria nen Jehova odino ed walan isisindag na satan manlapud si Jesu-Kristo, say Babaleg a Moises. Balet bilang lingkor nen Jehova, nagamoran tayo so maglorian liwawa manlapud Kasulatan tan nisindag tayo itan ed arum. Ta pian niliktar iramay walad espiritual a kabilungetan manlapud kadederal, nakaukolan da so liwawa a manlapud Dios. Tekep na pirmin liket tan inkaseseg, sirin, unoren tayo so ganggan na Dios ya isindag so liwawa ed kabilungetan diad kigloriaan nen Jehova.

Pasindagen Yoy Liwawa Yo Diad Saray Iyaaralan na Biblia

11. Anto so imbaga nen Jesus nipaakar ed panangisindag ed liwawa tayo, tan anto so sakey a paraan a nagawaan iya diad ministeryo tayo?

¹¹ Oniay inkuan nen Jesus ed saray patumbok to: “Sikayo so silew na mundo. Say sakey a syudad a nipasen ed tapew na sakey a pukdol agnayarin yamot. Tan agmet selselan na totoo so sakey a lamparaan, et insan da iyan ed silong na salop, noag dia ed panangitoonan; et sindagan toray amin a wala ed loob na abung. Ontan met pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mateo 5:14-16) Lapud maabig a kondukta tayo, arum so napapakiwas a mangigloria ed Dios. (1 Pedro 2:12) Tan say nanduruman aspekto na panag-ebanghelyon kimey tayo so mangiter ed sikatayo na dakel a pankanawnawa pian nisindag so liwawa tayo. Say manunan gagala tayo et say pangiwandag ed espiritual a liwawa a manlalapud Salitay Dios diad panamegley na saray epektibon panangiyaral na Biblia. Saya so importantin tuloy a dalan pian sigpot tayon nasumpal so ministeryo tayo. Antoran suhestion so nayarin makatulong ed sikatayo pian say panangiyaral tayo na Biblia et mamakiwas ed kapusoan na saray manaanap na katuaan?

12. Panon a misiglaotan so pikakasi ed saray panangiyaral na Biblia?

¹² Say pampikasi ed si Jehova nipaakar ed saya so mangipatnag ed pampipilalek tayo a mangiyaral ed Biblia. Ipapatnag met na satan a natetebek tayo so kaimportantian na panulong ed arum pian makagamor na pikakabat ed Dios. (Ezequiel 33:7-9) Si Jehova so seguradon onebat ed saray pikakasi tayo tan bendisyonan to iray maseseg a sagpot tayo ed ministeryo. (1 Juan 5:14, 15) Balet agtayo lambengat ipipikasi so pakaromog na iyaralan na Biblia. No wala lay niletneg tayon panangiyaral na Biblia, say pikakasi tan panagdalepdep nipaakar ed saray espisipikon pankaukolan na saray iyaaralan so ontulong ed sikatayon mangikondukta ed kada sesyon diad epektibon paraan.​—Roma 12:12.

13. Anto so ontulong pian epektibo so pakapangiyaral tayo na Biblia?

¹³ Pian epektibo so pakapangiyaral tayo na Biblia, nepeg itayon manparaan a maong parad kada sesyon. No bilang ta iisipen tayo ya aliwa itayon epektibo, makatulong so panimano ed paraan na panangikondukta na manangasikaso ed Panagaral na Kongregasyon ed Libro diad leksion ed kada simba. No maminsan et nayarian tayo so miulop ed saray manangipalapag na Panarian a maabig iray resulta na panangiyaral da ed Biblia. Siempre, say awawey tan saray paraan na panagbangat nen Jesu-Kristo so nagkalalo lan makanepegan a konsideraen.

14. Panon tayon nasabi so puso na iyaaralan na Biblia?

¹⁴ Nanliketan nen Jesus so impanggawa ed linawa na mangatatawen ya Ama to tan diad impangitongtong to ed arum nipaakar ed Dios. (Salmo 40:8) Sikato so mauyamo tan matalonan anabi ed kapusoan na saramay dinmengel ed sikato. (Mateo 11:28-30) Komon ta pambanikelan tayon sabien so kapusoan na saray iyaaralan tayo na Biblia. Ta pian nagawaan tayo itan, nakaukolan a manparaan itayo ed kada panagaral, a sinononot itayo ed saray kipapasen na iyaaralan. Singa bilang, no sikato so walaan na kultura ya agmikabisado ed Biblia, nayarin nakaukolan a sikatoy kombinsien a say Biblia et tua. Diad ontan a kipapasen, mapatnag a nakaukolan tayo so mangibasa na dakel a teksto tan ipaliwawa iratan.

 Tulongan Iray Iyaaralan Pian Natalosan Da Iray Ilustrasyon

15, 16. (a) Panon tayon natulongan so iyaaralan ya agmakatalos ed sakey ya ilustrasyon na Biblia? (b) Anto so nagawaan tayo no inusar na sakey ed saray publikasyon tayo so ilustrasyon a mairap a talosan na sakey ya iyaaralan na Biblia?

¹⁵ Nayarin agkabisado na sakey ya iyaaralan na Biblia so sakey ya ilustrasyon a nausar ed Kasulatan. Alimbawa, nayarin agto natalosan so labay ya ibaga nen Jesus nipaakar ed pangiyan na silew ed kandeleryo. (Marcos 4:21, 22) Say tutukoyen nen Jesus et say kadaanan a lamparaan a nampabilo. Satan a silew so ikakarga ed sakey a nikabiig a tapewan kanian naliwawaan to so sakey a pasen na abung. Say pansukimat ed saray tema a “Lamp” tan “Lampstand” diad publikasyon a singa say Insight on the Scriptures so nayarin nakaukolan pian nipalinew so ilustrasyon nen Jesus. * Balet agaylan makapatumang no akaparaan itayon mangiyaral na Biblia ta pian say pangipaliwawa tayo et natalosan tan panggayagaan na iyaaralan!

¹⁶ Say sakey a katulongan ed panangiyaral na Biblia so nayarin angusar na ilustrasyon ya agtanton natalosan na iyaaralan. Ipanaon so pangipaliwawa ed satan, odino mangusar na sananey ya ilustrasyon a walaan na miparan punto. Nayarin idadanet na sakey a publikasyon a say matukoy a kapareha tan pantutulongan et importante ed panamaley. Pian niyilustra iya, nayarin saglawien so nipaakar ed gagawaen na sakey a sirkero a manbaballog (odino manbabalyog) panamegley na sakey a trapeze, insan onikban, tan manilalo ed sananey a sirkero a manampat ed sikato. Bilang pampilian, nayarin iyilustra so pankaukolan na maong a kapareha tan pantutulongan dia ed saray trabahador a manaalawatan na kahon sano mangiyeepas ed kargamento na bapor.

17. Anto so naaralan tayo ed si Jesus nipaakar ed saray ilustrasyon?

¹⁷ Say pangusar ed sananey ya ilustrasyon so mankaukolan na masakbay a panagparaan. Ingen, satan so paraan a nipatnag tayo so personal ya interes ed iyaaralan na Biblia. Inusar nen Jesus iray simplin ilustrasyon pian ipalinew iray mairap a tema. Say Sermon to ed Palandey so mangiter na saray alimbawa ed satan tan ipapabitar na Biblia a say panagbangat to so walaan na maabig ya epekto ed saray onderengel ed sikato. (Mateo 5:1–7:29) Si Jesus so maanos ya angipaliwawa ed saray bengatla lapud sikato so interesadon tuloy ed arum.​—Mateo 16:5-12.

18. Anto so nirekomenda nipaakar ed saray tekston nisitas ed saray publikasyon tayo?

¹⁸ Say interes tayo ed arum so mamakiwas ed sikatayo a ‘mankatunongan ed Kasulatan.’ (Gawa 17:2, 3, NW) Saya so mankaukolan na masimoon a panagaral tan makabat a pangusar ed saray publikasyon ya intarya na ‘napanmatalkan a managpaga.’ (Lucas 12:42-44) Singa bilang, say libron Pikakabat a Mangitonton ed Andi-anggaan a Bilay so angaon ed dakel a teksto. * Lapud limitado so espasyo ed libro, arum a teksto so nisitas lambengat. Legan na panangiyaral na Biblia, importante a basaen tan ipaliwawa so anggan pigara ed saratan a nisitas a teksto. On, lapud say ibabangat tayo et nibase ed Salitay Dios, tan walaan itan na biskeg. (Hebreos 4:12) Naynay a bukayen so Biblia diad kada panagaral, a mabetbet ya usaren iray teksto a naromog ed saray parapo. Tulongan so iyaaralan pian natalosan to so ibabaga na Biblia nipaakar ed sakey a tema odino ed sakey a kiwas. Panggunaetan ya ipamoria ed sikato a makagunggona so itulok ed Dios.​—Isaias 48:17, 18.

 Mamalesa na Makapatenyeg-Kanonotan Iran Tepet

19, 20. (a) Akin a nepeg ya usaren iray tepet a pakaamtaan na panmoria na sakey sano mangiyaaral na Biblia? (b) Anto so nayarin gawaen no nakaukolan ed sakey a tema so kaaruman nin pangonsidera?

¹⁹ Si Jesus so marundunong ya angusar ed saray tepet pian natulongan iray totoo a mankatunongan. (Mateo 17:24-27) No tepetan tayo so iyaaralan tayo na Biblia no anto so panmoria to diad paraan ya agmamabaing ed sikato, nayarin ompatnag ed saray ebat to no anto so nononoten to nipaakar ed sakey a tema. Nayarin naamtaan tayo a wala niray agmakasulatan a panmoria to. Alimbawa, nayarin panisiaan to ni so Trinidad. Diad kapitulo 3, say libron Pikakabat so mangipapabitar ya agnaromog ed Biblia so salitan “Trinidad.” Satan a libro so angaon tan angisitas ed saray teksto a mangipapabitar a mandumaan si Jehova tan si Jesus, tan say masanton espiritu et aktibon puersa na Dios, aliwan sakey a persona. Nayarin magenap la so pamasa tan paningbat ed saratan a teksto na Biblia. Balet panon to no agni magenap itan? Nayarin diad ontumbok a sesyon kasumpal na regular a panagaral et usaren so pigaran minuto diad makagunggonan paningbat ed sayan tema a kinobrian ed sananey nin publikasyon na saray Tasi nen Jehova, a singa say brosyur a Should You Believe in the Trinity? Kayari na satan, ituloy tayo so panagaral ya usaren so libron Pikakabat.

²⁰ Ipasen pa a makapabigla odino makapadismaya ni ingen so ebat na sakey ya iyaaralan nipaakar ed panmoria to ed sakey a tema. No nalalanor so panagsigarilyo, odino arum niran sensitibon tema, nayarin isuheri tayo ya ituloy ni so aaralen tan singbaten la itan a pamaakaran ed onsaginonor a panaon. Diad pakaamtan say iyaaralan et mansisigarilyo nin siansia so ontulong ed sikatayo a mananap na nipalapag ya impormasyon a makatulong ed sikato ya onaligwas ed espiritual. Legan tayon panggugunaetan a sabien so puso na iyaaralan, nayarin ipikasi tayo ed si Jehova a sikatoy natulongan ya ombulaslas ed espiritual.

21. Anto so nayarin nagawa no iyadapta tayo iray paraan na panagbangat tayo ed espisipiko iran pankaukolan na iyaaralan na Biblia?

²¹ Diad maong a panagparaan tan tulong nen Jehova, maseguron niyadapta tayo iray paraan na panagbangat tayo pian mitukoyan ed saray espisipikon pankaukolan na iyaaralan na Biblia. Diad ilalabas na panaon, nayarin sikatoy natulongan tayo a makabayubo ed aralem a panangaro ed Dios. Nayarin ontalona itayo met diad pangipurek ed panagrespeto tan panamabli to ed organisasyon nen Jehova. Tan agaylan makapaliket sano bidbiren na saray iyaaralan na Biblia a ‘say Dios et wala ed sikatayo’! (1 Corinto 14:24, 25) Komon ta makapangikondukta itayo na epektibo iran panangiyaral na Biblia tan gawaen tayo so anggaay nayarian tayo pian natulongan so arum a magmaliw a babangatan nen Jesus.

Sakey a Kayamanan a Nepeg a Pablien

22, 23. Anto so nakaukolan pian sigpot tayon nasumpal so ministeryo tayo?

²² Pian sigpot tayon nasumpal so ministeryo tayo, nepeg itayon manmatalek ed biskeg ya inter na Dios. Sanen tinukoy to so ministeryo, oniay insulat nen Pablo ed saray kapara ton alanaan a Kristiano: “Wala so sayan kayarian tayo ed baso a pitek, pian say sankatageyan ya inkabaleg na pakayari kien komon na Dios, ya agmanlapu ed sikatayo.”​—2 Corinto 4:7.

²³ Balanglan kabiangan itayo na saray alanaan odino ‘arum a karnero,’ singa itayo lupok a basehan pitek. (Juan 10:16) Ingen ta si Jehova so mangiiter ed sikatayo na biskeg a nakaukolan pian nasumpal tayo iray asainmin tayo antokaman so pananesdes ya onsabi ed sikatayo. (Juan 16:13; Filipos 4:13) Komon ta manmatalek itayon maong ed si Jehova, pablien tayo so kayamanan a serbisyo tayo, tan sigpot tayon sumpalen so ministeryo tayo.

[Saray paimano ed leksab]

Panon Yon Ebatan?

• Anto so nagawaan na saray mamatatken pian sigpot dan nasumpal so ministeryo ra?

• Panon tayon napaaligwas so inkaepektibo tayo ed panangiyaral na Biblia?

• Anto so gawaen yo sano agnatalosan na sakey ya iyaaralan na Biblia so sakey ya ilustrasyon odino nakaukolan to so kaaruman ya impormasyon nipaakar ed sakey a tema?

[Tepetepet Parad Panagaral]

[Litrato ed pahina 16]

Manbabangat iray Kristianon mamatatken ed loob na kongregasyon tan ipapasal da iray kapananisiaan da diad ministeryo

[Litrato ed pahina 18]

Say epektibon panangiyaral ed Biblia et sakey a paraan pian nisindag tayo so liwawa tayo