Tepetepet Manlapud Saray Managbasa

Anto so agawa diad insidentin nikurit ed Exodo 4:24-26, tan siopan bilay so niiyan ed kaatapan?

Si Moises so mamapaarap ed Ehipto a kaibay asawa to, si Sefora, tan saray ilalak ton lalaki, a si Gersom tan Eliezer, sanen agawa so onggendan ya insidente: “Agawa ed dalan ed pasen a darawesan, a si Jehova inabe’to et sikato so inanap to a pateyen. Bang si Sefora angala na bato a pamingki, et ginalsiman to so supot na laman na anak to, et say asalger intupak to ed sali to tan inkuan to, Peteg a sika so nobyok ed dala. Dia ed ontan say Dios agto siningsingliw. Saman la inkua’nen Sefora, Sika nobyo ka ed dala lapu ed panaggalsim.” (Exodo 4:20, 24-26) Anggaman aliwan malinew iyan teksto tan mairap a naseguro so kabaliksan na satan, say Kasulatan so mangiiter na pigaran panamalinew ed sarayan bersikulo.

Ag-espesipikon imbaga na salaysay no siopan bilay so niiyan ed kaatapan. Balet, makatunongan tayon nibaga ya aliwan say bilay nen Moises, lapud kapkapangawat to ni ed asainmin to a nanlapud Dios ya ipaway to iray Israelita manlapud Ehipto. (Exodo 3:10) Agnayari a diad pamapaarap nen Moises a manumpal ed asainmin to et igagaem na anghel na Dios so bilay to. Kanian maseguro a say bilay na sakey ed saray ilalak to. Oniay indatak na ganggan nipaakar ed panaggalsim a niiter ed si Abraham diad asasakbay: “Say ag-agalsiman ya ugaw a laki, salanti say ag-agalsiman ed supot na laman to, niarawi naani so satan a laki ed saray kabaleyan to; ta sikato sinunggay to so sipan ko.” (Genesis 17:14) Mapatnag ya agginalsiman nen Moises so ilalak to, kanian say ugaw so inggagaem a pateyen na anghel nen Jehova.

Siopan sali so diniwit nen Sefora kayari ton sinegat so supot na laman na anak ton laki pian ipetek to so pamaakaran? Samay anghel nen Jehova a walaan na pakayarin mamatey ed ag-agalsiman ya anak to. Sirin, makatunongan ya intupak nen Sefora so supot na laman ed saray sali na anghel, ya inyan to itan ed arap to bilang paneknek a tinulok to so sipanan.

Say imbalikas nen Sefora a “sika so nobyok ed dala” et nikadkaduma. Anto so ipapatnag na satan nipaakar ed sikato? Diad intulok to ed saray kakaukolanen ed sipanan nipaakar ed panaggalsim, si Sefora so angawat ed sipanan a pisisiglaotan ed si Jehova. Say Ganggan a sipanan ya akibiangan na saray Israelita ed saginonor so angipatnag a diad sipanan a pisisiglaotan et nayarin ipasen si Jehova bilang asawan laki tan saray Israelita et asawan bii. (Jeremias 31:32) Kanian, diad impanawag to ed si Jehova (panamegley na manangilaman to ya anghel) bilang ‘nobyo ed dala,’ mapatnag a binidbir nen Sefora so dilin panagpasakop to ed saray kakaukolanen ed satan a sipanan. Singano sikato so inmabuloy bilang asawan bii diad sipanan nipaakar ed panaggalsim, a si Jehova a Dios so asawan laki. Antokaman so kipapasen, lapu ed sigpot a katutulok to ed kakaukolanen na Dios, nilegyas ed kaatapan so bilay na anak to.