666—Aliwa Labat a Misteryo
666—Aliwa Labat a Misteryo
“Anggapo so makayari a manaliw tan manlako, noag say wala so tanda to, salanti say ngaran na ayep o say bilang na ngaran to. Nia so kakabatan. Say walaan na pakatalos, bilangen to komon so bilang na ayep; ta sikato so bilang na too: et say bilang to anem a lasus tan anemaplo tan anem.”—Apocalipsis 13:17, 18.
WALA so pigaran tema ed Biblia a pirmin pakasasagyatan tan panuumamengan a singa say propesiya nipaakar ed misteryoson tanda, odino ngaran, na “[atap ya] ayep”—say numeron 666. Diad telebisyon tan diad Internet, ontan met ed saray pelikula, libro, tan magasin, say tanda na ayep so pangiyaapasakeyan na agmanganggan panagpalbeng.
Panisiaan na arum a say 666 et tanda na anti-kristo a sinalambit na Biblia. Ibabaga na arum ya ipapatnag na satan so sakey a nengneng na kapilitan a panangipabidbir, a singa sakey a tattoo odino sakey ya insaksak a microchip a walaay digital code a mangipapabidbir ed sakey a too bilang aripen na ayep. Panisiaan ni ingen na arum a say 666 et tanda na Katolikon inkapapa. Diad impangisalat da na saray Roman numeral ed saray letra a singa ed opisyal a titulo na papa a Vicarius Filii Dei (Bikaryo na Anak na Dios), tan diad samet ya impanguman da ed saray numero, apawala ra so 666. Ibabaga na arum a nayarin kalkulaen itan a numero manlapud Latin a ngaran na Romanon Emperador a si Diocletian tan manlapud Hebreon bersion na ngaran a Nero Caesar. *
Balet, sarayan bunga-bungay isip tan inimbenton interpretasyon so midumaan a tuloy ed ibabagan mismo na Biblia nipaakar ed tanda na ayep, unong a naimano tayo diad onggendan ya artikulo. Ipaparungtal na Biblia a saramay walaan na tanda so managmak na sanok na Dios sano panganggaen to la so peles a sistema na bengabengatla. (Apocalipsis 14:9-11; 19:20) Sirin, say pakatalos ed kabaliksan na 666 so nagkalalo ni nen say basta pakasolbar ed makapainteres a misteryo. Makapaliket ta agpinaulyanan nen Jehova a Dios, say sankatalonggaringan ya ehemplo na aro tan say Lapuan na espiritual a liwawa, iray lingkor to a magmaliw ya ignorante ed sayan importantin pamaakaran.—2 Timoteo 3:16; 1 Juan 1:5; 4:8.
[Paimano ed leksab]
^ par. 4 Parad impaningbat ed numerolohiya, nengnengen so Awake!, Setyembre 8, 2002.