Kasin Sika so Mangiyaapasakey ed Tumang?

KALKALNA ya onkakayat so sakit. Diad gapo et pamelagen na satan so kinaawang na pakanengneng na sakey a too. No agnapaabig, nayarin onkayat itan ed sentro na pakanengneng. Diad kaunoran et sigpot lan naandi so pakanengneng. Anto itan a sakit? Glaucoma​—say manunan pansesengegan na pakabulag.

No panon a say literal a pakanengneng tayo so nayarin nabalang a kalkalna tan agnaliklikas, nayarin nabalang tayo met so nagkalalon importantin klase na pakanengneng​—say espiritual a pakanengneng tayo. Kanian, makana a pansiansiaen tayon akasentro a maong so pakanengneng tayo ed saray espiritual a bengatla.

Pansiansian Niyapasakey ed Tumang

Kabiangan ed ‘saray bengatlan agnanengneng’ na literal a mata tayo et say maglorian tumang a maandon bilay, ya iyoopresi nen Jehova ed saraman so matoor ed sikato. (2 Corinto 4:18) Siempre, say manunan rason a manlilingkor ed Dios iray Kristiano et lapud sikatoy inaro ra. (Mateo 22:37) Anggaman kuan, kaliktan nen Jehova a manilalo itayo ed tumang tayo. Kaliktan ton natebek tayo a sikatoy mabunlok ya Ama a “mananumang ed saray mananap ed sikato.” (Hebreos 11:6) Kanian, saraman so peteg a mikabat ed Dios tan mangaaro ed sikato so mamapabli ed saray insipan ton bendisyon tan manpipirawat ed pakasumpal na saratan.​—Roma 8:19, 24, 25.

Dakel a manbabasa ed sayan dyurnal tan say Awake!, a kaiba na saya, so manggagayaga ed alay dakep a panangilitrato ed onsabin Paraison dalin. Siempre, agtayo amta ya eksakto no anto so nengneng naani na Paraison dalin, tan saray nipapalapag a litrato et artistikon panangiyilustra lambengat ya imbase ed saray teksto ed Biblia a singa diad Isaias 11:6-9. Anggaman ontan, oniay inkuan na sakey a Kristianon bii: “Sano nanengneng ko iray litrato na arapen a Paraiso diad Say Panag-Bantayan tan Awake!, uusisaen kon maong iratan, a singa ed panguusisa met na sakey ed brosyur a mangililitrato ed saray panagpasyaran. Sasalien kon isipen a wadman ak lapud diman so peteg ya iilaloan kon panayaman diad aturon panaon na Dios.”

Ontan met so alikna nen Pablo nipaakar ed ‘tawag to ed tagey.’ Agto impasen a singano agamoran to la itan, lapud kaukolan to nin paneknekan a sikatoy matoor anggad kasampotan. Balet intultuloy to a ‘dinampot iray bengatla a wala ed unaan.’ (Filipos 3:13, 14) Ontan met, si Jesus so nansungdo anggad ipapatey diad panamairapan a kiew “lapud gayaga a niyan ed arap to.”​—Hebreos 12:2.

Nanduaruwaan mo ta la no kasin makaloob ka ed balon mundo? Peteg a maabig so agpagmaliw ya alabas a makompiyansa, lapud say pakaawat tayo ed tumang a bilay so akadepende ed pansiansia tayon matoor anggad kasampotan. (Mateo 24:13) Balet, no gagawaen tayo so anggaay nayarian tayo a manumpal ed saray kakaukolanen na Dios, makapankompiyansa itayo a nagamoran tayo so tumang. Tandaan a si Jehova et “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) No manmatalek itayo ed si Jehova, tulongan  to itayon makadampot ed kalat tayo. On, agmitunosan ed linawa to so pananap na saray rason pian nadiskualipika iramay masimoon a mamapaliket ed sikato.​—Salmo 103:8-11; 130:3, 4; Ezequiel 18:32.

Say pakaamta ed no panon so panmoria nen Jehova ed totoo to so mangiter ed sikatayo na ilalo​—sakey ya importantin kalidad a singa say pananisia. (1 Corinto 13:13) Say Griegon salita ya impatalos ed Biblia bilang “ilalo” so mankabaliksan na magunaet a “pantalaran ed maabig.” Oniay insulat nen apostol Pablo, a sankanonot to itan ya ilalo: “Pampirpirawatan mi a balang sakey ed sikayo ipanengneng to so onman a seet nipaakar ed inkapno na andi-kaatapan ya ilalo angga ed kasampotan: Ya agkayo mangiras, noag ingen umaalig ed saraman so lapu ed pananisia tan anos tawiren da so saray sipasipan.” (Hebreos 6:11, 12) Imanoen a no mantultuloy itayon matoor a manlingkor ed si Jehova, makaseguro itayo a nasumpal so iilaloan tayo. Aliwan singa ed minumundon pirpirawat, sayan ilalo so “agmangibabaing.” (Roma 5:5) Kanian panon tayon napansiansian masnag tan niyapasakey ed nonot tayo so ilalo tayo?

No Panon Tayon Napaaligwas so Espiritual a Pakanengneng Tayo

Say literal a mata tayo so agnayarin iteen a bansag ed duaran bengatla. Tua met itan ed espiritual a pakanengneng tayo. No iyapasakey tayo so pakanengneng tayo ed saray bengatla ed kaplesan a sistema, seguradon agtayo niteen so kanonotan tayo ed insipan na Dios a balon mundo. Diad kaunoran, sayan aburagas, maawang a nenengnengen so aliwa lan makapasagyat ed sikatayo tan kalkalna lan naandi ed pakanengneng tayo. Agaylan makapasinagem itan! (Lucas 21:34) Kanian, importante a pansiansiaen tayo so ‘maralus a mata’ odino simplin mata​—samay lawas niyapasakey ed Panarian na Dios tan ed tumang a bilay ya andi-anggaan!​—Mateo 6:22.

Aliwan naynay a mainomay so pamasiansia ed simplin mata. Saray inagew-agew a problema so mankaukolan na imano tayo, tan nayarin nipaarap ed sikatayo iray pakasbelan tan saray pakatuksoan ni ingen. Diad oniaran kipapasen, panon itayon makapansiansia ya akaapasakey ed Panarian tan ed insipan na Dios a balon mundo ya agnapapaulyan iray arum nin makanan aktibidades? Konsideraen tayo so taloran paraan.

Inagew-agew ya aralen so Salita na Dios. Ontulong ed sikatayo so regular a panagbasa ed Biblia tan panagaral ed saray publikasyon a nibase ed Biblia pian napansiansia tayon niyapasakey so nonot tayo ed saray espiritual a bengatla. Tua a nayarin abayag itayo lan manaaral na Salita na Dios, balet nepeg tayon itultuloy ya aralen itan, no panon a kaukolan tayoy mantultuloy a mangan na pisikal a tagano ta pian nasustuni so bilay tayo. Ag-itayo ontundan mangan lapu lambengat ta aminlibo tayo lan angan diad apalabas. Kanian anggan panon lay pikabisado tayo ed Biblia, kaukolan tayo so tuloytuloy tan regular a pangan na espiritual a tagano manlapud satan ta pian napansiansia tayon masnag so ilalo tayo tan mabiskeg so pananisia tan aro tayo.​—Salmo 1:1-3.

Maapresyan dalepdepen so Salita na Dios. Akin ya importante so panagdalepdep? Lapu ed duaran rason. Unona, ontulong ed sikatayo so panagdalepdep pian natalosan so binasa tayo tan nabayuboan so aralem ya apresasyon parad  satan. Komadua, say panagdalepdep so ontulong ed sikatayo pian agtayo nalingwanan si Jehova, saray makapakelaw a kimey to, tan say ilalon intarya to a parad sikatayo. Bilang pangiyilustra: Saray Israelita a pinmaway ed Ehipto a kaiba nen Moises so akanengneng a mismo ed saray impangipatnag nen Jehova na makapakelkelaw a pakapanyari to. Naeksperiensya ra met so maaron pananalimbeng to legan na impangitonton to ed sikara diad tawiren da. Ingen, kasabin tuloy na saray Israelita diad kalawakan a mamaarap ed Insipan a Dalin, sikaray nanreklamo, ya impatnag da so pirmin kakulangan na pananisia. (Salmo 78:11-17) Antoy problema ed sikara?

Insuawi na baley so nonot da manlapud si Jehova tan ed alay abig ya ilalo ya intarya to parad sikara tan inteen da itan ed saray temporaryon pakainawaan tan kalkaliktan na laman. Anggaman ed saray mamilagron tanda tan pakelaw a naimatonan dan mismo, dakel ya Israelita so nagmaliw ya andiay-pananisian managreklamo. “Alingwanan da ed saman ya aganggano so gawagawa [nen Jehova],” so inkuan na Salmo 106:13. Satan ya agnikatunongan a panangibaliwala so nansumpal ed ag-impakaloob na satan a kailalakan diad Insipan a Dalin.

Kanian, sano babasaen mo so Kasulatan odino saray katulongan ed panagaral ed Biblia, ontundan magano pian dalepdepen so abasam. Makana itan a panagmolimoli parad espiritual a bunigas tan iyaaligwas mo. Alimbawa, sano babasaen so Salmo 106, ya inaon ed tagey so kabiangan na satan, dalepdepen iray kalidad nen Jehova. Imanoen no panoy inkaanos tan inkamapangasi to ed saray Israelita. Tebeken no panon ton ginawa so amin a posiblin nagawaan to pian natulongan iran makasabi ed Insipan a Dalin. Imanoen no panon a nantultuloy iran nanrebelde ed sikato. Isipen so sanok tan ot-ot ya alikna nen Jehova unong a say panangasi tan anos to so sinubok a maong na saray totoon andiay panangapresya. Niarum ni, diad pandalepdep ed bersikulo 30 tan 31, ya aneskribe ed mapekder tan makpel a talindeg nen Phinehas parad inkatunong, napaseguroan itayo ya aglingwanan nen Jehova iramay matoor ed sikato tan sikato so daakan a manumang ed sikara.

Iyaplika iray prinsipyo na Biblia diad bilay mo. Legan tayon tutumboken iray prinsipyo na Biblia, natebek tayon mismo ya epektibo so simbawa nen Jehova. Oniay ibabaga na Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Nonoten pa no panon a say imoral a kabibilay na dakel a totoo et nansumpal ed saray problema ed mental, emosyonal, tan pisikal. Diad inkigalet da ed temporaryon likeliket, asagmak na saratan a totoo so sinagem ed loob na saray taon tan ed legay bilay ni ingen. Diad pidumaan a tuloy, naeeksperiensya la na saramay mankukurang ed ‘mainget a dalan’ so nengneng na bilay diad balon sistema, tan saya so mamapaseseg ed sikara a mantultuloy ed dalan ya ompugta ed bilay.​—Mateo 7:13, 14; Salmo 34:8.

Nayarin makapaangat so pangiyaplika ed saray prinsipyo na Biblia. No maminsan, say agmakasulatan a solusyon so nayarin ompatnag a pakaromogan na tampol a pakainawaan diad makapasubok a situasyon. Alimbawa, legan na panaon na kairapan ed pinansyal, nayarin makapatukso so pangipasen ed intereses na Panarian a segundaryo  lambengat. Balet, saramay onkikiwas tekep na pananisia tan mansiasiansian akaapasakey ed espiritual so napaseguroan a diad kaunoran et ‘maong so pansumpalan na saray antakot ed tuan Dios.’ (Eclesiastes 8:12) Nayarin sagpaminsan a man-overtime ed trabaho so sakey a Kristiano, balet sikato so agbalot magmamaliw a singa si Esau, a nanmudmora ed espiritual iran bengatla, ya impasen to iratan bilang andian na kakanaan.​—Genesis 25:34; Hebreos 12:16.

Impalinew a maong nen Jesus iray responsabilidad tayo bilang Kristiano. Nepeg tayon ‘anapen nin unona so panarian tan say inkatunong na Dios.’ (Mateo 6:33) No ontan so gawaen tayo, ipatnag nen Jehova so singa-aman panangaro to ed sikatayo diad pangiseguro ton niwala ed sikatayo iray materyal a pankaukolan tayo. Seguradon agto kaliktan a nabelatan itayo diad pampaga ed saray bengatla ya insipan ton asikasoen to. Say ontan ya alablabas a kapagaan et singa espiritual a glaucoma​—no napaulyanan et kalkalnan onmelag so pakanengneng tayo ya anggad satan so akateen lambengat ed saray kapagaan ed materyal tan diad kaunoran et mamulag ed sikatayo diad espiritual. No mansiansia itayo ed satan a kipapasen, onsabi ed sikatayo so agew nen Jehova “a singa sakey a patit.” Agaylan makapasinagem itan!​—Lucas 21:34-36.

Mansiansian Niyapasakey a Singa si Josue

Mansiansia itayo komon a niyapasakey ed maglorian ilalo tayo ed Panarian, ya ilugar ed dugan pasen so arum niran responsabilidad. Diad pantultuloy ed sakey a rotina na panagaral, panagdalepdep, tan panangiyaplika ed saray prinsipyo na Biblia, makapanmatalek itayo ed ilalo tayo a singa si Josue. Kayari ton indaulo iray Israelita ya onloob ed Insipan a Dalin, oniay inkuan to: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.”​—Josue 23:14.

Komon ta say ilalo ed Panarian so mamabiskeg ed sika, tan mamasayaksak ed sika unong a napatnagan itan diad saray kanonotan, liknaan, desisyon, tan kimkimey mo.​—Uliran 15:15; Roma 12:12.

[Litrato ed pahina 21]

Nanduaruwaan mo ta la no kasin makaloob ka ed balon mundo?

[Litrato ed pahina 22]

Say panagdalepdep so makanan kabiangan na panagaral ed Biblia

[Saray litrato ed pahina 23]

Mansiansian niyapasakey ed intereses na Panarian