Liberia​—Inlaknab na Panarian Anggaman ed Bakal

SAY guerra sibil so pinmalalo ed Liberia diad loob na masulok a samploy taon. Diad kapegleyan na 2003, saray rebelde so linmusob ed kabiseran syudad a Monrovia. Dakel ed saray Tasi nen Jehova so apaskar a tinmaynan ed saray ayaman da, a no maminsan et maminpigapiga. Saray kayarian da so aminpiga met a sinasamsam.

Makapaermen ta leleg na panlalaban diad kabisera, nilibon totoo so inaatey. Kabiangan ed saratan so duaran Tasi, sakey a laki tan sakey a bii. Panon ya inarap na arum ya agagi itan a kairapan, tan anto so ginawa pian natulongan ira?

Tulong ed Saramay Mankaukolan

Kaleganan na krisis, say sangan opisina na saray Tasi nen Jehova ed Liberia so angorganisa na itutulong ed saramay mankaukolan. Intarya so tagano, saray makanan uusaren ed abung, tan saray suplay na tambal. Diad saman a panaon a kontrolado na saray rebelde so daongan, kinmisir so tagano. Sayan agawa so inilaloan la na sanga diad gapo kanian walaan la ra na akaparaan iran abasto parad duan libo a Tasi a binmatik ed saray Kingdom Hall diad interon syudad. Saray agagi so angirasyon na tagano kanian agnaupot so abasto angga ed alukasan lamet so daongan. Saray sanga ed Belgium tan Sierra Leone so angipawit na saray suplay a tambal panamegley na eroplano, tan saray sanga ed Britanya tan Pransya so angipatulor na saray suplay na kawes.

Anggaman ed makapagonigon a situasyon, saray agagi tayo so nansiansian positibo tan masayaksak. Say komento na sakey ya amitlon tinmaynan ed ayaman to so mipara met ed komento na dakel. Oniay inkuanto: “Saraya la so kipapasen ya ipupulong tayo; manbibilay itayo la ed kaunoran iran agew.”

Inkiwas ed Maong a Balita

Anggaman ed inkagulo ed interon bansa, saray Tasi so nantultuloy ya awalaan na alay abig iran resulta diad lawak. Niwala so sankatageyan a pantok a 3,879 a manangipalapag na Panarian nen Enero 2003, tan nen Pebrero et awalaan ira na 15,227 ya iyaaralan na Biblia.

Onkikiwas a tampol iray totoo ed maong a balita. Sakey lan alimbawa et say agawa ed sakey a baryo ed abalaten-bukig na bansa. Implano na sakey a kongregasyon so panselebra ed Memoryal na impatey nen Kristo diad maawang a baryo na Bewahn, a manga limay-oras ya akaren manlapud datin pantitiponan da. Sakbay a linma iray agagi diad baryo pian imbitaan ed Memoryal iray totoo, naikdan la na imbitasyon so mayor na Bewahn. Sanen naawat to itan, inala to so Biblia to, insan linma ed saray kabaryoan to, tan imbasa to so teksto a walad imbitasyon, a pinaseseg to ira ya onatendi ed Memoryal. Kanian sanen sinmabi iray manangipalapag, naamtaan da ya asumpal la so gawaen dan kimey! Say mayor, a kaiba to so ananak to tan say duaran asawa to, so inmatendi ed Memoryal. Wala so dagup a 27 totoo ya inmatendi. Manlapud saman, say mayor so inmekal la ed Methodist Church, impaiyaralan la ed saray Tasi, tan angiyopresi na lote a pangipaalageyan na Kingdom Hall.

 Impanguman na Awawey

Say kondukta na saray agagi tayo so nagmaliw met ya epektibo pian manguman so panmoria na saray onsusumpa ed katuaan. Konsideraen so alimbawa na sakey a lakin manngaran na Opoku. Sikato so akatongtong na sakey ya espisyal payunir diad lawak na kimeyan tan inopresian to na magasin a Panag-Bantayan. Nainteresan si Opoku ed sakey ya artikulo ed magasin balet anggapo so kuarta to. Impaliwawa na payunir ya anggapo so bayar na satan, tan intilak to ed sikato so magasin tan inyarunsa to ya ompawil lamet. Sanen pinmawil so payunir, sikatoy tinepetan nen Opoku: “Kabat mo ta no siopa ak? Siak so kabat na maslak a kaparam a Tasi diad baley na Harper. Siak imay mangeekal ed saray Tasin ugugaw ed eskuelaan!” Insan to impaliwawa a sikato so sakey a prinsipal na haiskul diad baley tan pinasegsegang to iray ananak na saray Tasi nen Jehova lapud agda pansaludo ed bandira.

Balet, apakiwas si Opoku a mangusisa lamet ed awawey to makasengeg ed taloran alimbawa na Makristianon panangaro ya impatnag na saray Tasi nen Jehova. Unona, anengneng to iray Tasi ya angasikaso ed espiritual ya agi ra a walaan na graben sakit. Sikato ni ingen so impatambal da diad biek a bansa. Abaloan nen Opoku a “prominentin too” ed limog na saray Tasi imay mansasakit ya agi balet naamtaan ton sakey labat manaya ya ordinaryon Tasi. Komadua, legan na dekaday 1990, si Opoku et sakey a refugee diad Côte d’Ivoire. Sakey ya agew sanen sikato so napgaan, sikato so linma a manaliw na danum ed sakey a malangwer a laki. Baleg so kantidad na kuarta nen Opoku, tan anggapoy nipasungsong na laki ed satan, kanian agto la impabayaran so danum ed si Opoku. Sanen inyawat to so danum ed si Opoku, oniay intepet na malangwer a laki: “Diad padesir yo, kasin onsabi ni so panaon a saray totoo a singa sikayo tan siak so maniiteran la na saray bengatla ya anggapoy bayar?” Pinadesiran nen Opoku a sikato so sakey a Tasi nen Jehova, tan pinekderan na malangwer a laki a tua itan. Say inkamabunlok tan kaabigan na sayan agi so nandinayewan to. Diad kaunoran, say inkamabulos na payunir ya iter la ed sikato so magasin ya anggapoy bayar so angombinse ed si Opoku a lingo so panmoria to ed saray Tasi tan kinaukolan to so manguman. Sikato so inmaligwas ed espiritual tan sakey la natan ya agbautismadon manangipalapag.

Anggaman saray agagi ed Liberia so mantutultuloy a nidudunget ed agaylay irap iran kipapasen, sikara so manmamatalek ed Dios tan matoor a mangiyaabawag na maong a balita nipaakar ed magmaong a panaon diad matunong ya uley na Panarian na Dios. Agbalot nalingwanan nen Jehova so pansasagpot da tan say aron ipapatnag da nisesengeg ed ngaran to.​—Hebreos 6:10.

[Saray mapa ed pahina 30]

(Parad aktual a format, nengnengen so publikasyon)

MONROVIA

[Saray litrato ed pahina 31]

Diad panaon na krisis, saray totoo nen Jehova so ontutulong ed saramay mankaukolan diad espiritual tan materyal a paraan