Pamidbir ed Atap ya Ayep tan say Tanda na Satan

KASIN maliket ka a manolbar ed sakey a misteryo? Pian nagawaan itan, anapen mo iray pamatnagan ya ontulong ed sikan naromog so solusyon ed satan. Diad impuyan a Salita to, say Dios so angitarya na makana iran pamatnagan nipaakar ed numeron 666, say ngaran, odino tanda, na atap ya ayep diad Apocalipsis kapitulo 13.

Diad sayan artikulo, usisaen tayo so apatiran manunan panagkatunongan​—saray makanan pamatnagan​—a mangiparungtal ed kabaliksan na tanda na ayep. Konsideraen tayo (1) no panon a pipilien no maminsan iray ngaran ed Biblia, (2) no anto so atap ya ayep, (3) no antoy kabaliksan na 666 a “bilang na too,” tan (4) say kabaliksan na numeron 6 tan no akin ya amitlo itan a naulit, salanti, 600 ya aruman na 60 tan aruman na 6, odino 666.​—Apocalipsis 13:18.

Kangaranan ed Biblia​—Aliwa Labat a Ngaran

Saray ngaran ed Biblia so mabetbet a walaan na nikaduman kabaliksan, nagkalautla sano inter iratan na Dios. Alimbawa, lapud si Abram so magmaliw ya ama na saray nasyon, sinalatan na Dios so ngaran na patriarka na Abraham, a mankabaliksay “Ama na Karaklan.” (Genesis 17:5) Imbaga na Dios ed si Jose tan si Maria a say ingaran da ed magmaliw ya anak nen Maria et Jesus, a mankabaliksay “Si Jehova so Kilalaban.” (Mateo 1:21; Lucas 1:31) Mitunosan ed satan a makabkabaliksan a ngaran, ginawa nen Jehova a posible so kilalaban panamegley na ministeryo tan masakripisyon impatey nen Jesus.​—Juan 3:16.

Kanian, say inter na Dios a numeron-ngaran a 666 so mangisisimbolo ed ipapasen na Dios a nidumaruman awawey na ayep. Siempre, pian natalosan iratan a walna, kaukolan tayon bidbiren so ayep a mismo tan aralen so nipaakar ed saray gagawaen na satan.

Niwalwal so Ayep

Say libro na Biblia a Daniel so mangipaparungtal na dakel ya impormasyon nipaakar ed kabaliksan na simbolikon ayayep. Lugan na kapitulo 7 so mabitar a deskripsion na ‘apatiran ayep ya angkabaleg’​—sakey a leon, sakey ya oso, sakey a leopardo, tan sakey a makapataktakot ya ayep a walaan na angkabaleg a ngipen a balatyang. (Daniel 7:2-7) Imparungtal nen Daniel ed sikatayo a sarayan ayep so mangirerepresenta ed saray “arari,” odino mapolitikan panpanarian, a mantutumbokan a manuley ed angkakabaleg ya empiryo.​—Daniel 7:17, 23.

Nipaakar ed say ayep ed Apocalipsis 13:1, 2, impabitar na The Interpreter’s Dictionary of the Bible a “pinantetekep na satan so amin a pakabidbiran na apatiran ayep ed pasingawey nen Daniel . . . Kanian, sayan primero ya ayep [ed Apocalipsis] so mangirerepresenta ed nantetekep a puersa na amin a mapolitikan uley diad mundo a sumpa ed Dios.” Satan so pinekderan na Apocalipsis 13:7, a manutukoy ed ayep: “Naikdan met [itan] na pakauley ed amin a poli tan baley tan salita tan nasyon.” *

Akin ya uusaren na Biblia so ayayep a mangisimbolo ed pananguley na too? Lapu ed duaran rason. Unona, lapu ed inaayep a rekord na panagpaagus na dala a ginawa na saray gobierno diad saray  apalabas a siglo. “Say bakal so naynay lan kabiangan ed awaran,” so insulat na saray manag-awaran a si Will tan Ariel Durant, “tan ag-itan kinmepa diad inkiletneg na sibilisasyon tan demokrasya.” Petepeteg a say “too [et] walaan na pakayari ed sananey pian kaugsan to”! (Eclesiastes 8:9) Say komaduan rason et “say dragon [si Satanas] inter to ed sikato [ayep] so pakapanyari to, tan say trono to, tan say baleg a pakauley.” (Apocalipsis 12:9; 13:2) Kanian, say pananguley na too so ginawa na Diablo, a mangipapatnag ed inaayep, singa-dragon ya awawey to.​—Juan 8:44; Efeso 6:12.

Balet, agkabaliksan na satan a direktan uusaren nen Satanas so amin a toon manuley. On, diad sakey a pantalos, saray gobierno na too so manseserbi bilang “ministro na Dios,” a pinagkaseklang na sosyedad na too, a no anggapo itan et ontalona so gulo. Tan iyaagel na arum a lider iray manunan kanepegan na too, a pati say kanepegan a mibiang ed tuan panagdayew​—sakey a bengatlan aglabay nen Satanas. (Roma 13:3, 4; Esdras 7:11-27; Gawa 13:7) Anggaman kuan, lapud panangimpluensya na Diablo, anggapo so too odino institusyon na too a makapangitarok na magnayon a kareenan tan kaligenan ed totoo. *​—Juan 12:31.

“Sakey a Numero na Too”

Say komatlon pamatnagan ed kabaliksan na 666 et say katuaan a tatawagen itan a “bilang na too,” odino unong ya impatalos na The Amplified Bible, “sakey a numero na too.” Sayan balikas so agnayarin ontukoy ed indibidual a too, lapud si Satanas​—aliwan siopaman a too​—so walaan na pakauley ed ayep. (Lucas 4:5, 6; 1 Juan 5:19; Apocalipsis 13:2, 18) Imbes, say impakawalaan na ayep na “sakey a numero na too,” odino tanda, so mangisusuheri a walaan itan na kalareker na too, aliwan espiritu odino demonyo, kanian ipapatnag na satan so pigaran walna na too. Anto kasi iratan? Onia so pangeebat na Biblia: “Amin [a totoo] nankasalanan, tan makulang ira ed gloria na Dios.” (Roma 3:23) Sirin, say impakawalaan na ayep na “sakey a numero na too,” so mangipapabitar a saray gobierno so mangipapatnag na makabos a kipapasen na too, say tanda na kasalanan tan ag-inkayadyari.

Satan so papaneknekan na awaran. “Amin a niletneg a sibilisasyon so abuyak diad kaunoran,” so inkuan nen Henry Kissinger, datin Sekretaryo na Estado ed E.U. “Say awaran et sakey a salaysay nipaakar ed saray sinmaew a sagpot, nipaakar ed saray ag-asumpal a pirawat . . . Kanian, bilang sakey a manag-awaran, kaukolan lan bidbiren na sakey so liknaan ya agpakapaliis ed trahedya.” Say matuan impanmoria nen Kissinger so mamapaneknek ed sayan manunan katuaan ed Biblia: “Aliwa a wala ed too a manakar a mangitonton ed saray kurang to.”​—Jeremias 10:23.

 Natan ta abidbiran tayo la so ayep tan atebek tayo la no panon a momoriaen na Dios itan, nayarian tayo lan usisaen so unor a kabiangan na misteryo​—say numeron sais tan no akin ya amitlo itan a naulit​—salanti, 666, odino 600 ya aruman na 60 tan aruman na 6.

Sais ya Amitlon Naulit​—Akin?

Diad Kasulatan, pigaran numero so walaan na simbolikon kabaliksan. Alimbawa, say numero siete so mabetbet ya uusaren pian isimbolo so bengatlan kompleto, odino naspot, ed imaton na Dios. Singa bilang, say sakey simba ya impamalsa na Dios so tugyopen na pitoran ‘agew,’ odino andukey a peryodo na panaon, a legan na satan et sigpot a sinumpal na Dios so gagala na panamalsa to diad dalin. (Genesis 1:3–2:3) “Saray salita” na Dios et singara pilak ya “inanosan [odino dinalisay] ya aminpito,” kanian agogolan a nasnaspot. (Salmo 12:6; Uliran 30:5, 6) Si Naaman ya akating so ingganggan a manames a maminpito diad Ilog Jordan, a kayari na satan et sikatoy sigpot ya apaabig.​—2 Arari 5:10, 14.

Say anemira et kulang na sakey ed pitora. Agta satan so matukoy a mangisimbolo ed bengatlan ag-ayadyari, odino makulang, ed imaton na Dios? Petepeteg! (1 Awaran 20:6, 7) Sakey ni, say amitlon impangisulat ed sais, salanti 666, so pirmin mangidadanet ed satan ya ag-inkayadyari. Sayan suston panmoria et susuportaan na katuaan a say 666 et “sakey a numero na too,” unong ya akonsidera tayo la. Kanian, say awaran na ayep, say “numero na too” na satan, tan say numeron 666 a mismo so mangidadanet ya amin ed sakey a seguradon konklusyon​—sigpot a kakulangan tan isasaew diad imaton nen Jehova.

Say impangilitrato ed saray kakulangan na ayep so mangipanonot ed sikatayo ed walan nibaga ed si Arin Belsasar na kadaanan a Babilonia. Diad panamegley nen Daniel, oniay inkuan nen Jehova ed satan a manuley: “Sika so asimbang ed simbangan, tan aromog ka a kulang.” Diad satan lanlamang a labi et pinatey si Belsasar, tan nagba so mabiskeg ya Empiryo na Babilonia. (Daniel 5:27, 30) Mipadpara, say panangukom na Dios ed mapolitikan ayep tan ed saraman so walaan na tanda na satan so mankabaliksan na pangangga na ayep tan saray onsusuporta ed satan. Balet, diad sayan kipapasen, panampoten na Dios so aliwa labat a sakey a mapolitikan sistema noagta amin a pakasuysoyan na uley na too. (Daniel 2:44; Apocalipsis 19:19, 20) Agaylan importante sirin a paliisan tayo so pakawalaan na makapatey a tanda na ayep!

Abidbiran so Tanda

Kayarin tuloy na impangiparungtal ed numeron 666, sinalambit na Apocalipsis so 144,000 a papatumbok na Kordero, si Jesu-Kristo, a nisulat ed kamolingan da so ngaran to tan say ngaran na Ama to a Jehova. Sarayan ngaran so mangipapabidbir ed totoon walaan na satan a ngaran a kayarian ira nen Jehova tan say Anak to, a saraya so malikeliket dan tatasian. Ontan met, iyaabawag na saramay walaan na tanda na ayep a sikaray  manlilingkor ed satan ya ayep. Kanian diad piguratibon salita et say tanda, balanglan walad kawanan a lima odino moling, so sakey a simbolo a mangipapabidbir ed toon walaan na satan a tanda a sikato so mandadayew tan manusuporta ed singa-ayep a mapolitika iran sistema na mundo. Saramay walaan na tanda so mangiiter ed si “Cesar” na saray bengatlan parad Dios lambengat. (Lucas 20:25; Apocalipsis 13:4, 8; 14:1) Panon? Diad pangidadayew tan pangigagalang da ed mapolitikan estado, saray simbolo na satan, tan saray puersa militar na satan, a saraya so paniilaloan da parad kilalaban. Angga labat ed salita so antokaman a panangidayew da ed tuan Dios.

Diad pisunian, oniay ipapaseseg ed sikatayo na Biblia: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong. Say panlinlinawa to ompaway, ompawil ed dalin to; dia ed satan lanlamang ya agew saray nonot to natawtaw ira.” (Salmo 146:3, 4) Agnadismaya iramay ontatalineng ed satan a makabat a simbawa sano agnatoor na saray gobierno so sipasipan da odino sano naekal ed posisyon so papangulo a walaan na makaayat a personalidad.​—Uliran 1:33.

Agkabaliksan na saya a saray tuan Kristiano so magmaliw ya agmanginenen nipaakar ed paniirap na katooan. Imbes, sikaray aktibon mangiyaabawag ed sakey a gobierno a magano lan manolbar ed saray problema na katooan​—say Panarian na Dios, ya irerepresenta ra.​—Mateo 24:14.

Panarian na Dios​—Alenleneg ya Ilalo na Katooan

Sanen wadiad dalin si Jesus, ginawa to a manunan tema na panagpulong to so Panarian na Dios. (Lucas 4:43) Diad modelon pikakasi to, a tatawagen no maminsan a Pikakasi na Katawan, imbangat nen Jesus iray patumbok to ya ipikasi ran onsabi itan a Panarian tan nagawa so linawa na Dios diad dalin. (Mateo 6:9, 10) Say Panarian et sakey a gobierno a manuley ed sankadalinan, ya agmanlapu ed pigaran kabisera na dalin, noagta manlapu ed tawen. Kanian, tinukoy nen Jesus itan bilang “say panarian na tawen.”​—Mateo 11:12.

Siopa ni so mas matukoy a magmaliw ya Ari ed satan a Panarian noag si Jesu-Kristo, ya inatey nisesengeg ed saray uleyan to ed arapen? (Isaias 9:6, 7; Juan 3:16) Agla manbayag et sayan ayadyarin Manuley, a natan et mabiskeg lan espiritun persona, so mangibasileng ed ayep, saray arari, tan saray armada na satan diad “dayat na apoy a mandarlang ed asupre,” a simbolo na sigpot a kadederal. Balet agni anampot ed satan. Si Jesus so mamagit met ed si Satanas, sakey a bengatlan agnagawaan na too.​—Apocalipsis 11:15; 19:16, 19-21; 20:2, 10.

Say Panarian na Dios so mangitarok na kareenan ed amin a matulok ya uuleyan na satan. (Salmo 37:11, 29; 46:8, 9) Say ermen, ot-ot, tan ipapatey so naandi met la. Agaylan maglorian arapen parad saramay mansiasiansian andian na tanda na ayep!​—Apocalipsis 21:3, 4.

[Saray paimano ed leksab]

[Kahon ed pahina 5]

Saray Pamatnagan ed Kabaliksan na 666

1. Mabetbet ya ipaparungtal na saray ngaran ed Biblia so nipaakar ed ug-ugali tan bilay na akanngaran, a singa si Abraham, si Jesus, tan dakel nira. Ontan met, say numeron-ngaran na ayep so mangirerepresenta ed saray pakabidbiran na satan.

2. Diad libro na Biblia a Daniel, say nanduruman ayep so mangirerepresenta ed saray mantutumbokan a panarian, odino empiryo, na too. Say ayep met diad Apocalipsis 13:1, 2 so mangisisimbolo ed sankamundoan a mapolitikan sistema, a papabiskegen tan babanlongan nen Satanas.

3. Say impakawalaan na ayep na “bilang na too,” odino “sakey a numero na too,” so mangipapabitar a walaan itan na kalereker na too, aliwan demonyo. Kanian, ipapatnag na satan iray isasaew na too bilang epekto na kasalanan tan ag-inkayadyari.

4. Diad imaton na Dios, say numeron sais, ya unong ed Biblia et kulang ed kompleto, odino naspot, a numeron siete, so mangipapabitar ed ag-inkayadyari. Satan a kakulangan so indanet na tandan 666 diad amitlon impangulit ed bilang.

[Saray litrato ed pahina 6]

Say pananguley na too so apaneknekan a sinmaew, a matukoy ya isisimbolo na numeron 666

[Credit Line]

Narnarasan ya ugaw: UNITED NATIONS/Photo by F. GRIFFING

[Saray litrato ed pahina 7]

Si Jesu-Kristo so mangitarok na ayadyarin pananguley diad dalin