Resistian so Espiritu na Manguuman a Mundo

“Inawa’tayo, aliwan say espiritu na mundo, noag say espiritu a manlapu ed Dios.”​—1 CORINTO 2:12.

1. Diad antoran paraan so inkapalikdoan nen Eva?

 “SAY uleg pinalingo to ak.” (Genesis 3:13) Diad saratan a salita, nanggunaetan ya impaliwawa na primeron bii, si Eva, no akin a sikatoy nanrebeldi ed si Jehova a Dios. Tua so imbaga to, balet ag-itan mangikatunongan ed ginawa ton kasalanan. Oniay nipuyan ed si apostol Pablo ya isulat to ed saginonor: “[Si Eva] atilaan.” (1 Timoteo 2:14) Sikato so atilaan a manisia a say gawa na katutunganga, salanti, say pangan na insebel a bunga, so mangunggona ed sikato, a sikatoy magmaliw a singa Dios. Sikato met so atilaan ed no siopa imay amalikdo ed sikato. Agto amta a say uleg et pinagkasangiyan lambengat nen Satanas a Diablo.​—Genesis 3:1-6.

2. (a) Panon so pamapalikdo nen Satanas ed totoo natan? (b) Anto so “espiritu na mundo,” tan antoran tepet so konsideraen tayo natan?

² Manlapu la’d panaon nen Adan tan Eva, si Satanas so nantultuloy ya amalikdo ed totoo. Diad tua et ‘tinilaan to so lapag a sankamundoan.’ (Apocalipsis 12:9) Agni anguman iray taktika to. Anggaman agla manguusar na literal ya uleg, siansia nin iyaamot to so pakabidbiran ed sikato. Diad panguusar to ed panligliwaan, media, tan arum niran paraan et papalikdoen nen Satanas so totoo a manisia ya agda nakaukolan odino ag-ira nagunggonaan ed maaron panangidirehi na Dios. Say tuloytuloy a pamapalikdo na Diablo so amawala ed totoo na espiritu na panagrebeldi sumpad saray ganggan tan prinsipyo na Biblia. Say Biblia so anawag ed satan bilang “say espiritu na mundo.” (1 Corinto 2:12) Sayan espiritu so mabiskeg a mangiimpluensya ed saray sisiaen, awawey, tan walna na saramay agmikabat ed Dios. Panon so kipapatnag na satan ya espiritu, tan panon tayon naresistian so makaderal ya impluensya na satan? Nengnengen tayo.

Onaabeba Iray Estandarte ed Moral

3. Akin a “say espiritu na mundo” so lalon napapatnagan ed modernon panaon?

³ Diad modernon panaon, “say espiritu na mundo” so lalon napapatnagan. (2 Timoteo 3:1-5) Maseguron naiimano yo so iyaabeba na saray estandarte ed moral. Ipapaliwawa na Kasulatan  no akin ya ontan so nagagawa. Sanen niletneg so Panarian na Dios nen taon 1914, walay bakal ya agawa ed tawen. Atalo si Satanas tan saray demonyon angheles to tan nibasileng ira ed kaliberliber na dalin. Lapud sanok to, lalon nansagpot si Satanas a mamalikdo ed interon mundo. (Apocalipsis 12:1-9, 12, 17) Diad amin lan nayarian to, nambanikelan ton ‘ibalang, no nayari, pati saray pinili.’ (Mateo 24:24) Bilang totoo na Dios, sikatayo so manunan pupuntiryaen to. Panggugunaetan ton deralen so espiritualidad tayo ta pian naandi ed sikatayo so panangabobon nen Jehova tan say ilalo ya andi-anggaan a bilay.

4. Panon so panmoria na saray lingkor nen Jehova ed Biblia, tan panon so panmoria na mundo ed satan?

⁴ Papaugesen nen Satanas so Biblia, say mablin libro a mangibabangat ed sikatayo nipaakar ed maaron Manamalsa. Say Biblia so aaroen tan papablien na saray lingkor nen Jehova. Amta tayo a satan so apuyanan a Salitay Dios, aliwan salita na totoo. (1 Tesalonica 2:13; 2 Timoteo 3:16) Balet, kaliktan na mundo nen Satanas ya umanen so panmoria tayo ed Biblia. Alimbawa, oniay balikas ed paunan-salita na sakey a libro a mangaataki ed Biblia: “Anggapo so bengatlan ‘masanto’ nipaakar ed Biblia, nisay ‘salita itan na Dios.’ Ag-itan insulat na saray sasanto a pinuyanan na Dios, noagta saray pari a manpipirawat na pakayari.” Saramay manisia ed saratan a balikas so mainomay a nabiktima ed palson ideya a bulos ira a mandayew ed Dios diad antokaman a paraan a labayen da​—odino ag-iran balot mandayew ed sikato.​—Uliran 14:12.

5. (a) Anto so inkuan na sakey ya autor nipaakar ed saray relihyon a manguusar na Biblia? (b) Panon a nikompara so pigaran kaslakan ya ideya na mundo ed walan ibabaga na Biblia? (Ilaktip so kahon ed ontumbok a pahina.)

⁵ Saray direkta tan agdirektan panangataki ed Biblia, pati say relihyoson pansimpisimpitan na saramay mankuan a mangiyaalibansa ed satan, so nansumpal ed ompapalalon pambusol ed relihyon, pati ed saray relihyon a manguusar na Biblia. Naaataki so relihyon diad saray balita ed media tan ed limog na saray de-aral. Oniay inkuan na sakey ya autor: “Aliwan paborabli so panmoria ed Judaismo tan Inkakristiano a mangiimpluensya ed popular a kultura. Anggano sankaabigan ni so panmoria na sakey a too ed saratan, ipapasen iratan a kadaanan la; tan no moriaen ya agtanton maabig, ipapasen iratan ya apalabas lan punto de bista a mangaamper ed intelektual tan sientipikon iyaaligwas. Diad apalabas iran taon, say panagbalaw so nagmaliw lan panagludlurey tan parungtalan a panagbusol.” Satan a panagbusol so mabetbet a manlalapu ed saramay mangibuburi ed kiwawala na Dios tan nagmaliw a “maapa ed panagkatunongan da.”​—Roma 1:20-22.

6. Anto so panmoria na mundo ed seksual iran agamil a kokondenaen na Dios?

⁶ Aliwan makapasurprisa, sirin, no akin a lalon onkakasipa iray totoo ed estandarte na Dios nipaakar ed walna. Alimbawa, dedeskribien na Biblia iray homoseksual a relasyon bilang ‘panaglawan’ odino kabandayan. (Roma 1:26, 27) Idadalatdat met na satan a saramay mangaagamil na pilalawanan tan pikakalugoran so agmakatawir ed Panarian na Dios. (1 Corinto 6:9) Ingen ta diad dakel a daldalin et saratan a seksual ya agamil so aglambengat ipapasen a naabobonan noagta makapasagyat met la iratan ya ipaparungtal  ed saray libro, magasin, kanta, pelikula, tan palabas ed telebisyon. Saramay manusuppiat ed saratan ya agamil so ipapasen a makisir-kanonotan, makritiko, tan agmakakapibansag ed modernon kaisipan. Imbes a moriaen da iray estandarte na Dios bilang pakapatnagan na maaron panangiyansakit, saratan so momoriaen na mundo bilang babeng ed personal a kawayangan tan liket.​—Uliran 17:15; Judas 4.

7. Antoray nepeg tayon itepet ed inkasikatayo?

⁷ Diad sayan mundo a lalon onsusumpa ed Dios, makabat so panusisa ed dilin awawey tan saray estandarte tayo. Panapanaon, nepeg a masimoon tan simamatua tayon usisaen so inkasikatayon dili pian naseguro tayon ag-itayo kalkalnan onkakasipa ed panag-isip tan estandarte nen Jehova. Alimbawa, nayarin oniay itepet tayo ed inkasikatayo: ‘Kasin makapainteres la’d siak natan iray tema ya ipupulisay ko nensaman? Kasin aawaten ko laray agamil a kokondenaen na Dios? Kasin walaan ak lay tendensian manleglemew ed saray espiritual a bengatla? Kasin napapatnagan ed paraan na panagbilay ko ya iyuunak so intereses na Panarian?’ (Mateo 6:33) Ontulong ed sikatayo so ontan a panagmorekdek pian naresistian tayo so espiritu na mundo.

‘Agbalot Onkakasipa’

8. Panon a nayarin onkasipa so sakey manlapud si Jehova?

⁸ Oniay insulat nen apostol Pablo ed saray kapara ton Kristiano: “Nepeg ya imatleken tayo ed baleg a seseg so saray bengatlan nadngel tayo, ta ompan lamang no niagus [“nikasipa,” NW] itayo.” (Hebreos 2:1) Say sakey a bapor a niyaanor so agmakasabi ed destinasyon to. No agmaimano so kapitan ed dagem tan agus, say bapor to so nayarin mainomay a niyanor, ya agmakasabi ed maligen a daongan tan onsadsar itan ed mabaton baybay. Mipadpara, no ag-itayo maimano ed saray mablin katuaan na Salitay Dios, nayarin mainomay itayon onkasipa ed si Jehova tan nasagmak tayo so kaderal na espiritualidad tayo. Agnakaukolan a sigpot tayo nin ipulisay so katuaan pian nasagmakan itan. Diad tua, wala iramay agtampol tan agsigagagalan angipulisay ed si Jehova. Mas mabetbet et sikaray kalkalnan nigalet ed sakey a bengatla ya angisuawi ed pangiimano ra ed Salitay Dios. Agda naam-amtaan et nidunget la ra ed kasalanan. Singa say kapitan ya akaugip, agnaliing iratan ya indibidual anggad atrasado la.

9. Diad antoran dalan a benendisyonan nen Jehova si Solomon?

⁹ Nodnonoten pa so impanbilay nen Solomon. Inmatalek nen Jehova ed sikato so pakauley ed Israel. Inabuloyan na Dios si Solomon a mangipaalagey ed templo tan sikatoy niganggan a mangisulat ed pigaran kabiangan na Biblia. Amiduan akisalita ed sikato si Jehova tan sikatoy pinagamoran To na kayamanan, inkabantog, tan mareen a pananguley. Manuna ed amin, si Solomon so pinalaboan nen Jehova na malaknab a kakabatan. Oniay ibabaga na Biblia: “Say Dios inikdan to si Solomon na kakabatan tan pakatalos a mapalalo ed karakel tan malawig a puso, a singa say buer a wala ed gilig na dayat. Et say kakabatan nen Solomon tinalonaan to so kakabatan na saray amin ya anak ed bukig, tan amin a kakabatan na Ehipto.” (1 Arari 4:21, 29, 30; 11:9) Nayarin isipen na sakey a no walay mansiansian matoor ed Dios, si Solomon iman. Ingen ta si Solomon so niyanor ed apostasya. Panon itan ya agawa?

10. Anton ganggan so ag-inunor nen Solomon, tan anto so nansumpalan?

 ¹⁰ Kabisado tan atalosan a maong nen Solomon so Ganggan na Dios. Maseguron nikadkaduma so interes to ed saray nidatak a bilin parad saramay nagmaliw ya arari na Israel. Kabiangan ed saraman a bilin et samay nidatak a: “[Say ari] agto met parakelen so bibii ya asawa to, pian say puso to agkomon onsian.” (Deuteronomio 17:14, 17) Anggaman ed satan a malinew a ganggan, awalaan si Solomon na pitonlasus ya asawa, tan talonlasus a kabit. Karaklan ed sarayan bibii so mandadayew ed palson dirios. Agtayo amta no akin a dakdakel so inasawa nen Solomon, tan agtayo met amta no anto so katunongan to no akin a ginawa to itan. Say amta tayo et agto tinulok so mabitar a ganggan na Dios. Say resulta et samay malinlinew ya impasakbay nen Jehova a nagawa. Oniay nabasa tayo: “Saray asawa [nen Solomon] so kalkalna . . . ya anangguyor ed puso to ya ontumbok ed arum a dirios.” (1 Arari 11:3, 4, NW) “Kalkalna”​—balet ta segsegurado​—a kinmapuy so maridios a kakabatan to. Sikato so kinmasipa. Sinmabi panaon, say pilalek nen Solomon a mamaliket ed saray paganon asawa to so angekal ed pilalek ton mangunor tan mamaliket ed Dios. Agaylan makapasinagem itan lapud akadkauna lan insulat nen Solomon iray salitan: “Ana’ko, onkabat ka, tan paliketen mo so pusok, pian naebatan ko so mamalaw ed siak”!​—Uliran 27:11.

Mabiskeg so Espiritu na Mundo

11. Panon a naapektaan so panag-isip tayo ed walan ikakarga tayo ed kanonotan tayo?

¹¹ Say alimbawa nen Solomon so mangibangat ed sikatayo a mapeligro so pangikatunongan a lapud amta tayo la so katuaan et agtanton naapektoan so kaisipan tayo ed saray impluensya na mundo. No panon a say pisikal a tagano et mangapekta ed laman tayo, say ikakarga tayo ed isip tayo so mangapekta met ed kanonotan tayo, a mangimpluensya ed paraan na panag-isip tan awawey tayo. Bilang pamidbir ed katuaan na satan, manggagastos iray korporasyon na binilyon a dolyar ed kada taon pian ipatalastas iray produkto ra. Saray matalonan patalastas so manguusar na makaayat iran salita tan litrato pian sagyaten so pampirawat tan pilalek na saray managsaliw. Amta met na saray managpatalastas a say maminsan odino mamiduan pakanengneng labat ed patalastas so agtanton makatangguyor ed totoo a manaliw a tampol na produkto ra. Balet, diad ilalabas na panaon et maabig lay pangipasen na saray managsaliw ed sakey a produkto no maminpigapiga ran nanengneng itan. Epektibo so panagpatalastas​—ta no andi et anggapo so manpuonan ed satan. Walaan itan na mabiskeg ya impluensya ed panag-isip tan awawey na publiko.

12. (a) Panon so pangiimpluensya nen Satanas ed panag-isip na totoo? (b) Anto so mangipanengneng a nayarin naimpluensyaan iray Kristiano?

¹² Singa say managpatalastas, iyaalibansa nen Satanas iray ideya to diad makapasagyat a paraan, ya amta ton diad ilabas na panaon et nakombinse to so totoo a mangawat ed paraan na panag-isip to. Panamegley na panagligliwaan tan arum niran paraan, papalikdoen nen Satanas so totoo a manisia a say maong et mauges tan say mauges et maong.  (Isaias 5:20) Anggan saray tuan Kristiano so nabibiktima ed pangikakayat nen Satanas na palson impormasyon. Oniay ipapasakbay na Biblia: “Say espiritu kuan to ed maliwawa, a dia ed saray arapen a panaon saray arum onsian ira ed pananisia, a dengelen da so saray espiritu a manangilawan tan saray bangat na saray demonyo. A mansalita ra a mankinon-simpit na tila, ya amarkaan so dilin konsiensia ra a singa say balatyang a mandarlang.”​—1 Timoteo 4:1, 2; Jeremias 6:15.

13. Antoray mauges a kaulop, tan panon itayon naapektoan ed saray kaulop tayo?

¹³ Amin tayo so nayarin naapektoan na espiritu na mundo. Mabiskeg iray impluensya tan masilib a puersa na sistema nen Satanas. Oniay makabat ya insimbawa na Biblia: “Agkayo patitilaan: Saray mauges a kaulop deralen da so saray maong ya ug-ugali.” (1 Corinto 15:33) Kabiangan ed saray mauges a kaulop so antokaman odino siopaman​—anggan diad loob na kongregasyon​—a mangipapatnag ed espiritu na mundo. No ikatunongan tayo ya ag-itayo naapektoan na mauges iran kaulop, agta singa ibabaga tayo met ya agmakatulong ed sikatayo iray maong a kaulop? Pirmin lingo itan! Malinew ya isasalaysay na Biblia so pamaakaran sanen inkuanton: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.”​—Uliran 13:20.

14. Diad antoran dalan a naresistian tayo so espiritu na mundo?

¹⁴ Pian naresistian so espiritu na mundo, nepeg itayon milimog ed makabat a totoo​—saramay manlilingkor ed si Jehova. Nepeg tayon panoen so kanonotan tayo na saray bengatlan mamabiskeg ed pananisia tayo. Oniay insulat nen apostol Pablo: “Ganagana ’ray bengatlan matua, ganagana ’ray bengatlan gagalangen, ganagana ’ray bengatlan matunong, ganagana ’ray bengatlan malinew, ganagana ’ray bengatlan nababalita a maong: no wala so antokaman a kasimpitan, no wala so antokaman a daydayewen, morekdek yo so sarayan bengatla.” (Filipos 4:8) Lapud walaan itayo na kawayangan a mandesisyon, nayarian tayon pilien iray bengatlan morekdeken tayo. Komon ta lawas tayon pilien a morekdeken iray bengatlan mamaapit ed sikatayo ed si Jehova.

Mas Mabiskeg so Espiritu na Dios

15. Panon a midumaan iray Kristiano ed kadaanan a Corinto ed arum a manaayam ed satan a syudad?

¹⁵ Aliwan singa saramay napapalikdo ed espiritu na mundo, saray tuan Kristiano so igigiya na masanton espiritu na Dios. Sinulat nen Pablo so kongregasyon ed Corinto: “Inawa’tayo, aliwan say espiritu na mundo, noag say espiritu a manlapu ed Dios; ta pian nakabatan tayo so saray bengatla a niiter a mabulos ed sikatayo ed Dios.” (1 Corinto 2:12) Say kadaanan a Corinto et sakey a syudad ya aliktob na espiritu na mundo. Mabanbanday so kagagawa na maslak ed saray manaayam ditan kanian niwala so balikas a “man-Corinto” a mankabaliksan na “mangagamil na imoralidad.” Binulag nen Satanas so kanonotan na totoo. Kanian, agda tanton natalosan odino agda sigpot a natalosan so nipaakar ed tuan Dios. (2 Corinto 4:4) Ingen, diad panamegley na masanton espiritu to, nilukasan nen Jehova so kamataan na arum ed saray taga-Corinto, a tinulongan to ira a makagamor na pikakabat ed katuaan. Say espiritu to so amakiwas tan angigiya ed sikara a manggawa na baleg a pananguman ed kabibilay da ta pian nagamoran da so panangabobon tan panamendisyon to. (1 Corinto 6:9-11) Anggaman mabiskeg so espiritu na mundo, mas mabiskeg so espiritu nen Jehova.

16. Panon tayon nagamoran tan napansiansia ed sikatayo so espiritu na Dios?

¹⁶ Tua met itan natan. Say masanton espiritu nen Jehova so sankabiskegan a puersa ed uniberso, tan mabulos to itan ya ipagamor ed amin ya onkerew ed satan tekep na pananisia. (Lucas  11:13) Balet, pian nagamoran so espiritu na Dios, aliwa lambengat a say panresisti ed mundo so nepeg tayon gawaen. Nepeg met a maparanay tayon aralen tan iyaplika so Salitay Dios ed kabibilay tayo ta pian say espiritu tayo​—say awawey na kanonotan tayo​—so makapitunosan ed panag-isip to. No gawaen tayo itan, pabiskegen itayo nen Jehova a manalona ed taktika a nayarin usaren nen Satanas a maneral ed espiritualidad tayo.

17. Diad antoran dalan a makapaseseg ed sikatayo so eksperiensya nen Lot?

¹⁷ Anggaman agkabiangan na mundo iray Kristiano, wala ira ed mundo. (Juan 17:11, 16) Anggapo ed sikatayo so sigpot a makaarawi ed espiritu na mundo, lapud mantratrabaho itayo odino kalimog tayo ni ingen iramay agmangaaro ed Dios odino ed saray dalan to. Kasin nalilikna tayo met so alikna nen Lot, ya “apaermen a tuloy,” ya agonigon ni ingen, ed mauges iran gawa na saray totoo ed Sodoma, a panaayaman to? (2 Pedro 2:7, 8) No ontan et napaseseg itayo. Sinalimbengan tan inliktar nen Jehova si Lot, tan ontan met so gawaen to ed sikatayo. Naiimatonan tan amta na maaron Ama tayo iray kipapasen tayo, tan nayarian ton iter ed sikatayo so tulong tan biskeg a nakaukolan tayo ta pian mansiansia so espiritualidad tayo. (Salmo 33:18, 19) No ompapeg itayo ed sikato, manmatalek ed sikato, tan ontawag ed sikato, tulongan to itayo a manresisti ed espiritu na mundo, anggan panon lay kairap na kipapasen tayo.​—Isaias 41:10.

18. Akin a nepeg tayon pablien so relasyon tayo ed si Jehova?

¹⁸ Diad mundo a nisian ed Dios tan apalikdo nen Satanas, sikatayoran totoo nen Jehova so apalaboan na pikakabat ed katuaan. Kanian naeeksperiensya tayo so gayaga tan kareenan ya anggapo ed mundo. (Isaias 57:20, 21; Galacia 5:22) Panliliketan tayo so alay abig ya ilalon andi-anggaan a bilay diad Paraiso, a naandi la ditan so espiritu na sayan manpapanabos a mundo. Komon ta pablien tayo so mablin relasyon tayo ed Dios tan lawas itayon akabantay a mangipetek ed antokaman a tendensian onkasipa ed espiritual. Mas lalon onapit itayo ed si Jehova, pian tulongan to itayon manresisti ed espiritu na mundo.​—Santiago 4:7, 8.

Kasin Nipaliwawa Yo?

• Diad antoran dalan a tinilaan tan pinalikdo nen Satanas iray totoo?

• Panon tayon napaliisan so ikasipa ed si Jehova?

• Anto so mangipatnag a mabiskeg so espiritu na mundo?

• Panon tayon nagamoran tan napansiansia ed sikatayo so espiritu a manlalapud Dios?

[Tepetepet Parad Panagaral]

[Tsart ed pahina 11]

MINUMUNDON KAKABATAN KONTRA MARIDIOS A KAKABATAN

Aliwan absoluto so katuaan​—saray totoo so manggagawa ed dilin katuaan da.

“Say salita [na Dios] sikato so katuaan.”​—Juan 17:17.

Pian nibiig so maptek ed mauges, manmatalek ka ed liknaan mo.

“Say puso manamalingo alabas nen saray amin a bengatla.”​—Jeremias 17:9.

Gawam so labay mo.

“Aliwa a wala ed too a manakar a mangitonton ed saray kurang to.”​—Jeremias 10:23.

Say kayamanan et tombok ed liket.

“Say aro ed pilak sikato so sakey a lamot na saray amin a nengneng na mauges.”​—1 Timoteo 6:10.

[Litrato ed pahina 10]

Kinmasipa si Solomon ed tuan panagdayew tan tinmunbok ed palson dirios

[Litrato ed pahina 12]

Singa sakey a managpatalastas, iyaalibansa nen Satanas so espiritu na mundo. Kasin reresistian yo itan?