Tepetepet Manlapud Saray Managbasa

Akin a sinalambit na 1 Corinto 10:8 a 23,000 ya Israelita so atigway ed sakey agew lapud impilawanan, bangta 24,000 so bilang a sinalambit na Numeros 25:9?

Wala so pigaran makapangipaliwawa ed pandumaan na saray bilang ya asalambit ed sayan duaran teksto. Say sankasimplian et nayarin say aktual a bilang so walad pamegleyan na 23,000 tan 24,000, a diad ontan et naabuloyan itan ya umanen pian magmaliw a tibukel a bilang balanglan memelag odino babaleg.

Konsideraen so sananey nin posibilidad. Insulat nen apostol Pablo so salaysay nipaakar ed saray Israelita diad Setim pian panmadmaran na saray Kristiano ed kadaanan a Corinto, sakey a syudad a kabkabat lapud imoral a panagbilay ditan. Oniay inkuan to: “Tan ag-itayo met manlawan, a singa arum ed sikara a manggawa ra, tan naplag ed sikara ed sanagew so duamplo tan talon libo.” Diad impangibiig to ed saraman so pinatey nen Jehova lapud impilawanan da, inter nen Pablo so bilang a 23,000.​—1 Corinto 10:8.

Balet, ibabaga ed sikatayo na Numeros kapitulo 25 a “say Israel tinmipon ed Baal-peor: et say sanok nen Jehova ed Israel adangatan.” Insan, ingganggan nen Jehova si Moises a pateyen so “amin a manunaan na katooan.” Kayari na satan et imbilin nen Moises ed saray ukom a sumpalen da itan a ganggan. Diad kaunoran, sanen kinmiwas a tampol si Phinehas pian pateyen so Israelita ya angiloob na Midianita ed kampamento, ‘tinmunda so salot.’ Oniay impanampot na salaysay: “Saray inatey ed salot duamplo tan apat a libo ra.”​—Numeros 25:1-9.

Mapatnag a say bilang a niiter diad Numeros et kabiangan iray “manunaan na katooan” a pinatey na saray ukom tan saramay direktan pinatey nen Jehova. Posiblin wala so sanlibo ed saraman a manunaan a pinatey na saray ukom, kanian niwala so dagup a bilang a 24,000. Balanglan saraya a manunaan, odino manangigaulo, so akilawanan, akibiang ed saray piesta, odino angonsenti ed saramay nanggawa ed satan, sikara so nankasalanan diad ‘impitipon da ed Baal-peor.’

Nipaakar ed salitan “tinmipon,” impaliwawa na sakey a reperensya na Biblia a nayarin mankabaliksan itan na “pisiglaot na sakey a too ed sananey.” Saray Israelita et totoon nidedika ed si Jehova, balet sanen ‘akitipon ira ed Baal-peor,’ pinakset da so dedikadon pisisiglaotan da ed Dios. Kayari na manga 700 a taon, oniay inkuan nen Jehova nipaakar ed saray Israelita diad panamegley nen propetan Oseas: “Linma ra ed Baal-peor, tan inkonsagra ra so inkasikara lanlamang ed kababaingan, et nagmaliw ira a kadimlaan a singa satan so inaro ra.” (Oseas 9:10) Amin iramay nanggawa ed satan so makanepegan na pirmin panangukom na Dios. Kanian, oniay impanonot nen Moises ed saray anak na Israel: “Saray mata yo anengneng da so ginawa nen Jehova nisengeg ed kinen Baal-peor; ta amin a lalaki a tinmumbok ed kinen Baal-peor, dineral ira nen Jehova a Dios yo ya inekal ed pegley mo.”​—Deuteronomio 4:3.