Impormal a Panagtasi ed Lawak na Mexico a Mansasalitay Ingles

DIAD impanganamot to ed panaon legan na panaalagar to ed saray kaiba ton managbaroy diad Atenas, si apostol Pablo so nantasi ya impormal. Oniay inreport na Biblia: “Sikatoy ginmapon akikatunongan . . . a kada-agew ed tindaan diad saramay nibanbanan wadman.” (Gawa 17:17, NW) Diad impanbaroy to manlapud Judea angga ed Galilea, si Jesus so nantasi ya impormal ed sakey a Samaritana diad abay na bobon. (Juan 4:3-26) Kasin aanamoten yo met so amin a pankanawnawa a mangitongtong ed maong a balita na Panarian na Dios?

Say lawak ed Mexico a mansasalitay Ingles so nagkalalo lan matukoy parad impormal a panagtasi. Saray turista so ompapasyar ed saray resort, naynay a walaray balon estudyante ed unibersidad, tan saray dayo a nanretiro ed Mexico so mabetbet ed saray parki tan restawran. Dakel ed saray Tasi nen Jehova a makapansalitay Ingles so marundunong a mangigapo na pitotongtong ed saratan a totoo. Diad tua et sikaray aliston mitotongtong ed siopaman a dayo odino mansasalitay Ingles. Imanoen tayo no panon dan gagawaen itan.

Mabetbet a saramay nanlapud arum a bansa a manlilingkor ed lawak a mansasalitay Ingles so mangipakabat labat ed inkasikara ed saramay mapatnag a dayo tan tepeten da no taga-iner ira. Saya so kaslakan lan mangitonton ed pantepet da ed Tasi no anto so gagawaen to ed Mexico tan mangiter la itan ed sikato na pankanawnawa pian inabang iray Makristianon sisiaen. Alimbawa, naeksperiensya nen Gloria, a manlilingkor diad Ingles a lawak ed Oaxaca a walaay baleg a pankaukolan, a main-inomay a nigapo iray tongtongan diad ontan a paraan. Sanen pasempet la kayari ton nampulong ya impormal diad plasa, si Gloria so inasinggeran na sanasawan taga-Inglatera. Oniay inkuan na bii: “Agak makapanisia a walay nanengneng kon andeket a biin manaakar dia ed saray karsada na Oaxaca!” Imbes a nasakitan, si Gloria so akalek, insan da nantongtongan no akin a sikatoy walad Mexico. Intagar na bii si Gloria diad abung to pian mankape. Kayari ton insipan ya ompawil, inyopresi nen Gloria iray magasin a Watchtower tan Awake!, balet ag-inawat iratan na bii, ya inkuan ton sikatoy ateista. Inkuan nen Gloria a labalabay toy mitongtong ed saray ateista tan labay ton naamtaan so opinyon na bii ed say artikulon “Saray Pasen a Panagdayewan​—Kasin Kaukolan Tayo Iratan?” Inawat itan na bii, a kuanto: “No nakombinse mo ak, talagan nayari ka la.” Nantultuloy so pigaran makapainteres a tongtongan legan iran mankakape. Diad saginonor et pinmawil ed Inglatera so sanasawa, balet mantutultuloy iray diskusyon da panamegley na e-mail.

Si Gloria so akapitongtong met ed si Saron, sakey ya estudyante a taga-Washington,  D.C., a boluntaryon mantratrabaho diad Oaxaca a kaiba iray bibiin tubo ditan pian nakompleto so master’s degree to. Kayari ton kinomendaan si Saron ed saray sagpot to, impaliwawa nen Gloria no akin a sikatoy walad Mexico. Nansumpal iya ed maabig a tongtongan nipaakar ed Biblia tan no anto so gawaen na Dios ya aliwa labat a parad saray mairap-bilay noagta parad amin. Inkuan nen Saron ya agton balot inilaloan a Tasi nen Jehova so sakey ed saray primeron akatongtong to ed Mexico lapud agto nin balot akapitongtong ed saray Tasi diad Estados Unidos! Inawat nen Saron so panangiyaral ed Biblia tan sikatoy inmatendi a tampol diad Makristiano iran pantitipon.

Dakel so ondadayo diad saray resort ed baybay na Mexico, diad pampilalek da ed paraison ayaman. Inanamot iya nen Laurel pian nigapo iray tongtongan diad Acapulco, a tetepetan to so totoo no kasin mala-paraiso ni so Acapulco nen say lugar a nanlapuan da tan no antoy agustoan da ditan. Insan to impaliwawa ya agmanbayag et magmaliw lan tuan paraiso so interon dalin. Sayan paraan na pitotongtong ya inusar ed sakey a biin taga-Canada ya akabat to ed opisinay beterinaryo so angitonton ed panangiyaral na Biblia. Kasin epektibo met iyan paraan na pitotongtong diad lugar yo?

‘Diad Saray Karsada tan Plaza’

Mabetbet a nigapo so tongtongan diad saray karsada tan plaza diad pangitepet na: “Makapansalita kayo na Ingles?” Makapansalita so dakel a Mexicano lapud propesyon da odino lapud akapanayam ira diad Estados Unidos.

Inasinggeran na sanasawan Tasi so sakey ya akulaw ya aka-wheelchair ya itutulak na sakey a nars. Tinepetan da so akulaw no sikatoy makapansalita na Ingles. Sikatoy inmesel lapud sikato so abayag a nanayam diad Estados Unidos. Inawat to so The Watchtower tan Awake!, a saraya so agto ni abasa a balot, tan inter to ed sikara so ngaran to, a Consuelo, tan say address to. Sanen sikatoy dinalaw da kayari na apat agew, naamtaan da a sakey manaya itan a nursing home ya ipapakurang na saray Katolikon madre. Diad primero et mairap so pakapitongtong ed si Consuelo lapud saray madre so maniinap tan inkuan dan ag-ira nayarin patuloyen nen Consuelo. Pinilit na sanasawa iray madre ya ipaamta ra ed si Consuelo a wadman ira tan labay dan komustaen. Say sanasawa so pinaloob a tampol nen Consuelo. Manlapu la’d saman et panggagayagaan la na sayan 86-años a bii so regular a panagaral na Biblia, anggaman ed negatibo iran komento na saray madre. Sikatoy akaatendi met la ed arum iran Makristianon miting.

Oniay ibabaga na Uliran 1:20: “Say kakabatan mankelyaw a maksil ed pulong; ibesngaw to so boses to ed mapalaway a pasen.” Imanoen no panon ya agawa itan diad plaza na San Miguel de Allende. Aminsan a kabkabuasan, inasinggeran nen Ralph so sakey a laki a walad kapegleyan ya edad a manyudyurong ed bangko. Nikelawan a maong so laki sanen inopresian na The Watchtower tan Awake! insan to inistorya ed si Ralph so nipaakar ed bilay to.

Sikatoy sakey a beterano ed Vietnam ya awalaan na nervous breakdown makasengeg ed inkagonigon na emosyon to diad impakanengneng to ed dakdakel ya inaatey legan na impansundalo to. Primero et sikatoy impatara ed bakalan insan diad kawalaan na kampo. Sikatoy niasain ditan a manuras ed saray bangkay na sundalo pian iparaan ya ipatulor ed Estados Unidos. Anggad natan, a  30 taon lay apalabas, sikatoy siansia nin nababangungot tan natataktakot. Diad saman a kabuasan, legan ya akayurong diad plaza, sikatoy mareen a manpipikasi parad tulong.

Inawat na beterano so literatura ontan met ed imbitasyon ya onatendi diad Kingdom Hall. Kayari ton inmatendi ed miting, inkuan to a kaleganan na saman a duay oras diad Kingdom Hall, alikna to so deen diad inmunan pankanawnawa ed loob na 30 a taon. Pigaran simba labat so impanpirmi na sayan laki diad San Miguel de Allende, balet nanggayagaan to so aminpigan impanaral ed Biblia tan inyatendi ed amin a miting ya anggad sikatoy sinmempet la. Ginawa iray uksoyan pian nitultuloy so panagaral to.

Impormal a Panagtasi Diad Pantratrabahoan tan Eskuelaan

Kasin ipapakabat yoy inkasikayo diad pantratrabahoan yo a sakey kayon Tasi nen Jehova? Ontan so ginawa nen Adrián, a manpapaabang na saray apartment a bakasyonan diad Cape San Lucas. Bilang resulta et oniay insalaysay na katrabahoan ton si Judy: “Taloy taon ni labat so apalabas, no bilang ta imbaga na sakey ed siak a magmaliw ak a Tasi nen Jehova, ibagak ed sikaton, ‘Andin balot!’ Balet denesidik a basaen a bukor so Biblia. Inisip ko ya, ‘Panon a mairap itan, anta labalabay koy manbasa?’ Balet, agko ni asumpal ya abasa ed saman so anemiran pahina, amoriak a nakaukolan ko so tulong. Say naisip ko lambengat a toon makatulong ed siak et samay katrabahoan ko a manngaran na Adrián. Labalabay koy mitongtong ed sikato lapud sikato labat so peteg a desentin too diman.” Inyopresin tampol nen Adrián so ondalaw a kaiba so nobya ton si Katie, tan inebatan da so amin a tepet nen Judy. Sikatoy ginapoan nen Katie ya inyaralan na Biblia, tan ag-abayag et si Judy so nagmaliw a bautismadon Tasi.

Komusta balet so panagtasin impormal diad eskuelaan? Manaaral na Español so duaran Tasi diad sakey ya unibersidad balet aminsan ya agew et linmiwat ira pian onatendi ed Makristianon asamblea. Kapawil da ed klase, impaisalaysay ed sikara diad salitan Español no anto so ginawa ra. Inanamot da so pankanawnawan makapantasi ed anggaan na nayarian da diad salitan Español. Say maestra, a si Silvia, so nainteresan a maong ed propesiya na Biblia. Inawat to so panangiyaral na Biblia ed Ingles tan sakey la natan a manangipalapag na maong a balita. Manaaral met la so pigaran membro na pamilya to. Oniay inkuan nen Silvia: “Aromog ko la so aanapen ko ed interon bilay ko.” On, say impormal a panagtasi so makapawala na maabig a bunga.

Impanganamot ed Arum Niran Pankanawnawa

Say inkamaparawes so mangitonton met ed pakapantasi. Apaneknekan nen Jim tan si Gail, a manlilingkor ed San Carlos, Sonora, a tua itan. Sakey a bii a mangipapasyar ed aso to diad 6:00 na kabuasan so tinmunda tan mandinayew ed sular na abung da. Sikatoy pinaloob nen Jim tan Gail pian pankapien. Diad primeron pankanawnawa ed loob na 60 a taon, nadngel to so nipaakar ed si Jehova tan say ilalon andi-anggaan a bilay. Nigapo so panangiyaral na Biblia.

 Si Adrienne so mangipapatnag met na kaabigan ed saray agto kabat. Sikatoy mamangan diad sakey a restawran ed Cancún sanen sikatoy inasinggeran na sakey ya ugaw a laki tan tinepet to no sikatoy taga-Canada. Sanen sikatoy inmesel, insalaysay na ugaw a sikaran san-ina so ontutulong ed agi ton bii ed panggagawa na sakey a report ed eskuelaan nipaakar ed saray taga-Canada. Insan inmasingger so ina, a makapansalitay Ingles. Kayari na maanos ya impangebat to ed saray tepet nipaakar ed saray taga-Canada, oniay inkuan nen Adrienne: “Balet walay importantin tuloy a rason no akin a linma ak dia manlapud Canada​—pian tulongan so totoo a makaaral ed Biblia. Kasin interesado kayo ed satan?” Inmebat so bii a sikatoy interesado. Sikato so samploy taon lan inmekal ed relihyon to tan manaaral lan bukor na Biblia. Inter to ed si Adrienne so address tan numero na telepono to, tan nigapo so makapenek a panagaral ed Biblia.

‘Ibantak Mo so Tinapay Mo ed Saray Danum’

Say pitongtong nipaakar ed katuaan na Biblia diad kada pankanawnawa so mabetbet a manreresulta ed maabig a pakapantasi ed totoo a walaan na daiset odino andian na pankanawnawan makarengel ed mensahe na Panarian. Diad sakey a matoon café ed daongan diad baley na Zihuatanejo, pinayurong na sakey a biin Tasi ed lamisaan to so sanasawa a dayo, lapud napno na too so café. Sayan sanasawa so pitoy taon lan manlalayag ed nanduruma a pasen. Imbalikas da iray negatibon panmoria ra ed saray Tasi nen Jehova. Kayari na impankabat da diad café, dinalaw na Tasi so sanasawa diad baloto ra tan sikaray inimbitaan to diad abung to. Masulok a 20 magasin tan 5 libro so inawat da tan insipan da ya anapen da iray Tasi diad onsublay a pandaongan da.

Diad sakey a food court ed sentro na panagsaliwan ed Cancún et naimano nen Jeff tan si Deb so sakey a pamilya a walaan na magangganan kapangiyanak a bii. Sanen nankomento ira nipaakar ed ugaw, saray ateng to so angiyopresi ed sikaran mangan na pizza. Sayan pamilya et taga-India manaya. Agda nin balot arengelan so nipaakar ed saray Tasi nen Jehova, tan agmet nira akanengneng na literatura tayo. Inmalis ira ed saman a panagsaliwan a sankaawit da so pigaran publikasyon tayo.

Ontan met so agawa diad sakey ya isla manlapud baybay na Yucatán. Kinerew na balon sanasawa a Tsino ed si Jeff a litratoen to ira, a malikeliket ton ginawa. Naamtaan to ya anggaman nanayam ira diad Estados Unidos diad apalabas a 12 taon, anggapon balot so akatongtong da odino nadngel da nipaakar ed saray Tasi nen Jehova! Agawa so makapaliket a tongtongan. Pinaseseg ira nen Jeff ya anapen da iray Tasi sano ompawil la ra’d ayaman da.

Nayarin walaray espisyal ya ebento ed lugar yo a makapangiter na pankanawnawan mantasi ya impormal. Sanen binmisita so presidente na Estados Unidos ed presidente na Mexico diad rantso to ya asingger ed Guanajuato, saray reporter a nanlalapud interon mundo so linma pian subaybayan so ebento. Denesidi na sakey a pamilyan Tasi ya anamoten so pankanawnawa pian manpulong ed salitan Ingles. Maabig iray resulta. Alimbawa, walay sakey a reporter ya akapansubaybay la ed pigaran pambabakal, a singa saray bakal ed Kosovo tan Kuwait. Inatey so sakey a kaiba to ed trabaho sanen apaltog. Sanen naamtaan na reporter so nipaakar ed kioli, sikatoy akanangis tan akisalamat ed Dios lapud impangiyabuloy To ed sikaton nakabatan a wala manaya so gagala na bilay. Inkuan to ya anggaman agto la napinengnengan lamet so sanasawan Tasi, agton balot nalingwanan iyan maong a balita ed Biblia.

Unong a naimano tayo, mabebet ya agnaseguro no anto so unor a pansumpalan na saraman ya impantasi. Balet, oniay inkuan nen makabat ya Arin Solomon: “Ibantak mo so tinapay mo ed tapew na saray danum; ta sikato so naromog mo ed kayari na saray dakel ya agew.” Inkuan to met: “Dia ed kabuasan itanem mo so binim, tan dia ed labi agmo ipiko’so limam; ta agmo amta no anto so onaligwas, no saya kasi odino saman, no sikara kasi nampadpara naani a maong.” (Eclesiastes 11:1, 6) On, pansesegan mon ‘ibantak so tinapay mo’ diad saray danudanum tan mabunlok mon ‘itanem so binim’, a singa ginawa nen Pablo tan si Jesus tan sarayan modernon-agew a Tasi ed lawak na Mexico a mansasalitay Ingles.