Kasin Nagagawa la so Linawa na Dios?

“Nagawa komon so linawam, unong ed tawen, ontan met ed dalin.”​—Mateo 6:10.

SI Julio tan si Christina so atalagnaw a manim-imaton legan a napopoolan ya anggad inatey so apatiran ananak da. Atalapos na abuek a drayber so akaparadan kotsi ra, tan satan so linmiab. Say komaliman anak da, a si Marcos, so nisalba ed manliob ya apoy, balet apulpuldakan so laman to, a permanentin aneral la ed itsura to. Siamira ni labat so taon to. Say tatay to so maer-ermen. Niligliwa toy inkasikato tan say pamilya to ed oniaran salita: “Saya so linawa na Dios, nepeg tayon talosan itan, maabig o mauges man so resulta.”

Sano nagawa so onian makapasinagem ya ebento, parepareho so reaksion na dakel a totoo. Ikakatunongan dan, ‘No say Dios et makapanyarin-amin tan mangiyaansakit ed sikatayo, say agawa et nayarin pankaabigan tayo ed sakey a paraan, anggaman mair-irap itan a talosan.’ Kasin onabobon ka?

Say panmoria ya antokaman a nagagawa, maabig man odino mauges, et linawa na Dios, so mabetbet ya ibabase ed saray salita nen Jesus ed say tatawagen a Pikakasi na Katawan ya inaon ed tagey. Agta say linawa na Dios et nagagawa la ed tawen? Diad pangipipikasin, ‘Nagawa komon so linawam diad dalin,’ agta aawaten tayo a linawa na Dios iray nagagawa diad dalin?

Dakel so manduaruwa ed satan a panmoria. Parad sikara et ililitrato na satan a say Dios so agmangiyaansakit ed liknaan na totoon pinalsa to. ‘Panon a say maaron Dios et kaliktanen ton nagawa so makapasinagem ed inosentin totoo?’ so itetepet da. ‘No wala man bilang so leksion a naaralan, anto kasi itan?’ Nayarin ontan met so isipen mo.

Nipaakar ed satan, oniay insulat nen babangatan a Santiago, ya agi nen Jesus ed ina: “Agkomon ibaga na too no natukso a, tinukso ak na Dios: ta say Dios agnayari a tuksoen na mauges tan agmet manukso na siopaman a too.” (Santiago 1:13) Aliwan say Dios so pansesengegan na mauges. Malinew sirin ya aliwan amin a nagagawa diad dalin et linawa na Dios. Sasaglawien met na Kasulatan so nipaakar ed linawa na too, linawa na saray nasyon, pati say linawa na Diablo. (Juan 1:13; 2 Timoteo 2:26; 1 Pedro 4:3) Kasin onabobon ka a say agawa ed pamilya nen Julio tan Christina et aliwan linawa na maaron mangatatawen ya Ama tayo?

Kanian, anton talaga so labay ya ibaga nen Jesus sanen imbangat to ed saray babangatan to ya ipikasi ran: ‘Nagawa komon so linawam?’ Kasin ipipikasi lambengat itan pian onsalet so Dios ed partikular iran kipapasen, odino kasin ibabangat itayo nen Jesus a mangipikasi na bengatlan mas importante tan magmaong, sakey a pananguman a napanilaloan na amin? Usisaen tayo nin nagkalalo so ibabaga na Biblia.

[Picture Credit Lines ed pahina 3]

Kotsi: Dominique Faget-STF/AFP/Getty Images; ugaw: FAO photo/B. Imevbore