Nepeg ya Aroen na Totoo na Dios so Kaabigay-linawa

“Anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay-linawa, tan manakar a mauy-uyamo ed Dios mo?”​—MIQUEAS 6:8.

1, 2. (a) Akin ya agtayo pankelawan ya iilaloan nen Jehova so totoo to a mangipatnag na kaabigay-linawa? (b) Antoran tepet nipaakar ed kaabigay-linawa so manepeg a konsideraen tayo?

 SI Jehova so Dios na kaabigay-linawa. (Roma 2:4; 11:22) Maseguron inapresya nensaman na inmunan sanasawa, si Adan tan si Eva, so kaabigay-linawa na Dios ed sikara! Diad hardin na Eden et aliber ira na nanengneng iran pinalsa a mangipapatnag ed kaabigay-linawa na Dios ed totoo, a walaan met na pakasarag a manggayaga ed saratan. Tan intultuloy na Dios ya impatnag so kaabigay-linawa ed amin, anggan ed saray malamang tan marelmeng a totoo.

² Lapud apalsa iray totoo unong ed indengan na Dios, saray totoo so walaan na abilidad a mangipatnag ed maridios iran kalidad. (Genesis 1:26) Agpankelawan sirin no akin ya iilaloan nen Jehova ya ipatnag tayo so kaabigay-linawa. Unong ed inkuan na Miqueas 6:8, saray totoo na Dios so nepeg a “mangaro na kaabigay-linawa.” Balet anto so kaabigay-linawa? Panon itan a misiglaotan ed arum niran maridios a kalidad? Lapud nayarian na totoo ya ipatnag so kaabigay-linawa, akin a maruksa tan agmakaaro so mundo? Bilang Kristiano, akin a nepeg tayon panggunaetan ya ipatnag so kaabigay-linawa diad pidedeneng tayo ed arum?

Anto so Kaabigay-linawa?

3. Panon yon ukeran so kaabigay-linawa?

³ Nipatnag so kaabigay-linawa diad pakawalaan na aktibon interes ed pankaabigan na arum. Nipatnag itan diad saray gawa na pananulong tan makonsidera iran salita. Say pangipatnag na kaabigay-linawa et mankabaliksay panggawa na kamaongan imbes a manggawa na antokaman a makapasakit. Say toon walaan na kaabigay-linawa et makaaro, matamoy, masimpatiya, tan maomaong. Sikato so walaan na mabunlok tan makonsideran awawey ed arum. Oniay insimbawa nen apostol Pablo ed saray Kristiano: “Manpales kayo [na] . . . sakey a puso a maabagey, maong a linawa, kauyamoan, kareenan, kasungdoan.” (Colosas 3:12) Sirin, say maong a linawa odino kaabigay-linawa et kabiangan na piguratibon kawes na tuan Kristiano.

4. Panon so impangipatnag lan unona nen Jehova ed kaabigay-linawa to ed katooan?

⁴ Impatnag lan unona nen Jehova so kaabigay-linawa. Unong ed inkuan nen Pablo, sanen “nipatnag so kaabigan na Dios a Manangilaban tayo, tan say aro to ed saray totoo” et “inlaban to itayo ed panamegley na panag-urasan na kauman a kianak tan say panamasimbalo na espiritu santo.” (Tito 3:4, 5) ‘Inurasan,’ odino nilinisan na Dios iray alanaan a Kristiano diad panamegley na dala nen Jesus, ya iyaaplika to ed sikara so merito na dondon bagat nen Kristo. Sikara so apasimbalo met panamegley na masanton espiritu, a nagmaliw ira a “balon pinalsa,” bilang atagibi na espiritu ya ananak na Dios. (2 Corinto 5:17) Niarum ni, nipapatnag met so kaabigay-linawa tan panangaro na Dios ed “baleg ya ulop,” ya “inurasan da so kawekawes da, tan sikara so pinaputi ra ed dala na Kordero.”​—Apocalipsis 7:9, 14; 1 Juan 2:1, 2.

5. Akin a nepeg ya ipatnag na saramay iwawanwan na espiritu na Dios so kaabigay-linawa?

⁵ Say kaabigay-linawa so kabiangan met ed bunga na masanton espiritu, odino aktibon puersa na Dios. Inkuan nen Pablo: “Say bunga na espiritu et aro, liket, deen, andukey a panagtepel, kaabigay-linawa, kamaongan, sisia, tayadno, dangka. Anggapo so ganggan ya onsumpa ed saratan a bengatla.” (Galacia 5:22, 23, NW) Lapud petepeteg itan, agta nepeg met ya ipatnag na saramay iwawanwan na espiritu na Dios so kaabigay-linawa ed arum?

 Aliwan Kaleteyan so Pangipatnag na Tuan Kaabigay-linawa

6. Kapigan magmaliw a kaleteyan so kaabigay-linawa, tan akin?

⁶ Momoriaen na arum a totoo a say kaabigay-linawa et kaleteyan. Isipen da a say too et nepeg a masebeg, a maruksa ni ingen no maminsan, ta pian ipatnag ed arum so inkabiskeg to. Balet diad tua et mankaukolan na tuan biskeg so pangipatnag na kaabigay-linawa tan say ipaliis ed lingon kaabigay-linawa. Lapud say tuan kaabigay-linawa et kabiangan na bungay espiritu na Dios, aliwa itan ya awawey a maletey, a mikokompromiso ed mauges a kondukta. Diad biek a dapag, say lingon kaabigay-linawa et sakey a kaleteyan a pagmaliwen to so sakey a makonsenti ed gawan-mauges.

7. (a) Panon ya impatnag nen Eli so panagkonsenti? (b) Akin a nepeg a panalwaran na saray mamatatken so pangipatnag na lingon kaabigay-linawa?

⁷ Alimbawa, konsideraen pa so atagey a saserdote a si Eli. Agto didisiplinaen iray ilalak to, si Hophni tan Phinehas, a mankikimey bilang saserdote diad tabernakulo. Lapud ag-ira kontento ed nipabtang ed sikaran kabiangan na bagat unong ed indatak na Ganggan na Dios, igaganggan da so sakey a katambayan ya onkerew na karne ed mangiyaapay sakbay a poolan ed altar so taba na bagat. Saray ilalak nen Eli so walaan met na imoral a pirerelasyon ed saray bibii a manlilingkor diad wangalan na tabernakulo. Balet, imbes ya ekalen to si Hophni tan si Phinehas ed posisyon da, anlemew lambengat so impamaat nen Eli ed sikara. (1 Samuel 2:12-29) Agpankelawan a say “salita nen Jehova sikato so mabli [odino, matalag] ed saraman ya agew”! (1 Samuel 3:1) Nepeg a manalwar iray Kristianon mamatatken pian agda nipatnag so lingon kaabigay-linawa ed saray managgaway-mauges a nayarin maneral ed espiritualidad na kongregasyon. Say tuan kaabigay-linawa et agmangibabaliwala ed mauges iran salita tan gawa a sumlang ed saray estandarte na Dios.

8. Panon ya impatnag nen Jesus so tuan kaabigay-linawa?

⁸ Say Ehemplo tayo, si Jesu-Kristo, so agbalot naakusa ya angipatnag na lingon kaabigay-linawa. Sikato so sankaabigan ya ehemplo na tuan kaabigay-linawa. Singa bilang, ‘inabagey toray totoo lapud maermen tan abuybuyak ira a singa saray karnero ya anggapoy pastol da.’ Saray matuan-impanpuson totoo so agmasuyat ya onasingger ed si Jesus, ya inawit da ni ingen ed sikato iray angkelag ya ananak da. Isipen pa so kaabigay-linawa tan panangabagey ya impatnag to sanen “inala to ra ed saray taklay to, tan benendisyonan to ra, ya intapew to so saray lima to ed sikara.” (Mateo 9:36; Marcos 10:13-16) Anggaman maomaong si Jesus, sikato balet so mapekder ed no anto so maptek ed imaton na mangatatawen ya Ama to. Agton balot kinonsenti so kaugsan; sikato so walaay biskeg ya inter na Dios a mangondena ed saray mansimpisimpitan a relihyoson pangulo. Unong a nipabitar diad Mateo 23:13-26, aminpiga ton inulit so panangiyanunsio a: “Kasi kayo la, ya eskribas tan Fariseos, a mansimpisimpitan!”

Say Kaabigay-Linawa tan Arum Niran Maridios a Kalidad

9. Panon a misiglaotan so kaabigay-linawa ed andukey a panagtepel tan kamaongan?

⁹ Say kaabigay-linawa so misiglaotan ed arum niran kalidad a papawalaen na espiritu na  Dios, a singa say “andukey a panagtepel” tan “kamaongan.” On, say toon mamabayubo ed kaabigay-linawa so makapangipatnag ed satan a kalidad diad pakawalaan to na andukey a panagtepel. Sikato so maanos anggan ed saray maruksan totoo. Say kaabigay-linawa so misiglaotan ed kamaongan kanian mabetbet itan a nipapatnag diad panamegley na makatulong iran gawa pian nagunggonaan so arum. No maminsan, say Griegon salita a nausar ed Biblia parad “kaabigay-linawa” so nayarin ipatalos a “kamaongan.” Lapud ipapatnag na saray inmunan Kristiano itan a kalidad, sikara so nandinayewan a maong na saray pagano kanian, unong ed si Tertullian, tinawag da iratan a patumbok nen Jesus bilang ‘totoo a pakapatnagan na kaabigay-linawa.’

10. Panon a mansiglaotan so kaabigay-linawa tan say aro?

¹⁰ Wala so pansiglaotan na kaabigay-linawa tan aro. Nipaakar ed saray patumbok to, oniay inkuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:35) Tan nipaakar ed sayan aro, oniay inkuan nen Pablo: “Say aro manangitepel, tan mauyamo [odino, maabig-linawa].” (1 Corinto 13:4) Say kaabigay-linawa so nisiglaot met ed aro diad salitan ‘maaron-kaabigan,’ a mabetbet a nausar ed Kasulatan. Saya so kaabigay-linawa a papawalaen na matoor ya aro. Say Hebreon noun a nipatalos a ‘maaron-kaabigan’ so aglambengat mankabaliksan na matamoy a panamabli. Satan so kaabigay-linawa a maaron mangisisiglaot ed inkasikato diad sakey a bengatla anggad nasumpal so gagala na satan. Say maaron-kaabigan, odino matoor ya aro nen Jehova, so nipapatnag ed nanduruman dalan. Singa bilang, satan so napatnagan ed saray ginawa ton panangiliktar tan pananalimbeng.​—Salmo 6:4; 40:11; 143:12.

11. Anton panamaseguro so itatarya ed sikatayo na maaron-kaabigan na Dios?

¹¹ Say maaron-kaabigan nen Jehova so manasagyat ed totoo ya onasingger ed sikato. (Jeremias 31:3) Sano nakaukolan na saray matoor a lingkor na Dios so kililiktar odino tulong, amta ra a say maaron-kaabigan to so peteg a matoor ya aro. Ag-itan manismaya ed sikara. Kanian, nayarian day manpikasi tekep na pananisia, unong ya inkuan na salmista: “Balet ta nanmatalek ak ed panangabagey mo; say pusok manggayaga ed panangilaban mo.” (Salmo 13:5) Lapud say aro na Dios et matoor, saray lingkor to so sigpot a makapanmatalek ed sikato. Walaan ira na sayan panamaseguro: “Si Jehova agto ibantak so baley to, nisay ikaindan to so tawir to.”​—Salmo 94:14.

Akin a Marukruksa so Mundo?

12. Kapigan tan panon a ginmapo so maruksan pananguley?

¹² Say ebat ed sayan tepet so misiglaotan ed agawa diad hardin na Eden. Diad gapo na awaran na too, sakey ya espiritun pinalsa a nagmaliw a masiblet tan mapaatagey so nanggetman magmaliw a manuley na mundo. Bilang resulta, sikato so nagmaliw a “prinsipe [odino, manuley] na sayan mundo,” a talagan marukruksan manuley. (Juan 12:31) Sikato so akabat bilang Satanas a Diablo, say manunan sumusumpa ed Dios tan ed too. (Juan 8:44; Apocalipsis 12:9) Kayarin tuloy na inkapalsa nen Eva, niwalwal so masiblet a getma to a mangiletneg na pananguley pian milaslasan ed maabig a pananguley nen Jehova. Kanian, ginmapo’d saman so mauges a pananguley sanen pinili nen Adan so dalan a biig ed pananguley na Dios, a sigpot ton impulisay so kaabigay-linawa To. (Genesis 3:1-6) Imbes a magmaliw ya independente, si Adan tan Eva so diad tua et nisilong ed masiblet tan mapaatagey ya impluensya na Diablo, a nagmaliw iran sakop na pananguley to.

13-15. (a) Anto so pigara ed saray nansumpalan na impangipulisay ed matunong a pananguley nen Jehova? (b) Akin a marukruksa iyan mundo?

¹³ Konsideraen pa so pigara ed saray nansumpalan. Apapaway si Adan tan Eva ed satan a paraison pasen na dalin. Asalatan na mair-irap a kipapasen diad paway na hardin na Eden so ayaman dan matanaman a parki a wadtan so masustansian pising tan prutas. Oniay inkuan na Dios ed si Adan: “Nisengeg ed sika et dinengel mo so boses nen bii ya asawam, tan angan ka ed kiew, ya anta imbilin ko ed sika a kuan ko, Agka mangakan ed satan: Nisamba so dalin lapu ed sika; dia ed kairapan mangan ka na nabodbor ed sikato ed leleg na amin ya agew a pambilay mo. Saray sabitan met tan saray sisanyas manbunga ra ed sika.” Say kabaliksan na samba ya inyabawag sumpad dalin et onirap la so pamayubo ed dalin. Saray epekto na  insamban dalin, a walaan na saray sabsabitan, so naeksperiensyan tuloy na saray poli nen Adan kanian sinalambit na ama nen Noe, a si Lamec, so ‘nipaakar ed saray kimey tan sagpot na limalima ra, nisengeg ed dalin ya insamba na Dios.’​—Genesis 3:17-19; 5:29.

¹⁴ Insalat met di Adan tan Eva so kareenan ed gonigon. Inkuan na Dios ed si Eva: “Parakelen to a mapalalo so kairapan mo tan say panaglukon mo; manpasakit ka a mangiyanak na saray anak; tan say pirawat mo naani say nipaakar ed asawam, tan sikato so manguley ed sika.” Diad saginonor, si Cain, say panguloan ya anak di Adan tan Eva, so maruksan amatey ed agi ton si Abel.​—Genesis 3:16; 4:8.

¹⁵ “Say sankamundoan mandukdukol ed kaugsan,” so inyabawag nen apostol Juan. (1 Juan 5:19) Singa say manuley na satan, napatnagan ed mundo natan so mauges iran awawey a mangilaktip ed inkasiblet tan inkamapaatagey. Agpanduaruwaan a satan so napno na karuksaan! Balet, aliwan magnayon ya ontan. Seguroen nen Jehova a say kaabigay-linawa tan panangabagey, imbes a say karuksaan, so ontalona diad silong na Panarian to.

Malaknab a Nipatnag so Kaabigay-linawa Diad Silong na Panarian na Dios

16. Akin a say pananguley na Dios panamegley nen Kristo Jesus so pakabidbiran na kaabigay-linawa, tan anton kiwas so kakaukolanen na saya ed sikatayo?

¹⁶ Kakaukolanen nen Jehova tan say tinuro ton Ari na Panarian To, si Kristo Jesus, ya ipatnag na saray sakop da so kaabigay-linawa. (Miqueas 6:8) Si Jesu-Kristo so angiter ed sikatayo na pagpauna no panon a say pananguley ya inmatalek ed sikato nen Ama to so pakabidbiran na kaabigay-linawa. (Hebreos 1:3) Saya so naimano ed saray salita nen Jesus ya angiwalwal ed palso iran relihyoson papangulo, ya amairap ed totoo panamegley na ambelat iran totontonen. Inkuanto: “Dago kayo’d siak, amin yon nasasagpotan tan nabebelatan, et ikdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.” (Mateo 11:28-30) Dakerakel a manuley ed dalin, relihyoso man odino andi, so mamapairap ed totoo panamegley na saray makapabelat tan dakerakel a totontonen tan makapaingongot iran obligasyon. Ingen, say kakaukolanen nen Jesus ed saray patumbok to so mamepenek ed saray pankaukolan tan nayarian dan gawaen. Talagan makaparepresko tan maabig itan a pako! Agtayo kasi napakiwas a mangalig ed sikato diad pangipanengneng na kaabigay-linawa ed arum?​—Juan 13:15.

17, 18. Akin a makapanmatalek itayo a saramay miuley ed si Kristo diad tawen tan saray mangaraldalin a manangilaman to so mangipatnag na kaabigay-linawa?

¹⁷ Saray makatantandan balikas nen Jesus ed saray apostol to so mangipabitar ed pidumaan a tuloy na pananguley na Panarian na Dios ed uley na too. Oniay ibabaga na Biblia: “Agawa met ed sikara [saray babangatan] so sakey a siblangan no siopa ed sikara so nibilang a kabalbalgan. Et inkuan to ed sikara, Saray arari na saray Gentiles walay inkakatawan da ed sikara, et saray walaan na pakauley ed sikara natawag ira a Mapalangkap.  Ingen sikayo aliwan ontan; ingen say balbaleg ed sikayo, sikato so magmaliw a singa kayugtanan; et say manunaan, sikato so singa aripen. Ta siopa so babaleg, say ondungo ed dulang ono say manserbi? Aliwa kasi a say ondungo ed dulang? Ingen wala ak ed pegley yo a singa sakey a manserbi.”​—Lucas 22:24-27.

¹⁸ Panggugunaetan na saray totoon manuley so magmaliw a matalonggaring, a labay day ‘pakatawan’ ed totoo tan mangawat na atatagey a titulo, a singano pakabidbiran itan a mas atagey ira nen saray uuleyan da. Balet inkuan nen Jesus a say peteg ya inkatalonggaring so manlapu ed panagserbi ed arum​—a maseet tan tuloytuloy dan lilingkoran so arum. Amin na saramay miuley ed si Kristo ed tawen odino manlingkor bilang mangaraldalin iran manangilaman to so nepeg a mangalig ed alimbawa to a mapaabeba tan walaan na kaabigay-linawa.

19, 20. (a) Panon ya impalinew nen Jesus so laknab na kaabigay-linawa nen Jehova? (b) Panon tayon aligen si Jehova diad panangipatnag na kaabigay-linawa?

¹⁹ Imanoen tayo so sakey nin maaron simbawa nen Jesus. Diad impangipabitar to ed laknab na kaabigay-linawa nen Jehova, oniay inkuan nen Jesus: “No aroen yo so saray mangaro ed sikayo, anto a salamat so naala yo? Ta anggan saray makasalanan aroen da so saray mangaro ed sikara. Et no manggawa kayo na maong ed saray manggawa na maong ed sikayo, anto a salamat so naala yo? Ta anggan saray makasalanan ontan met so awaten da. Et no pabayesen yo so saray ilaloan yo a pangawatan, anto a salamat so naala yo? Anggan saray makasalanan, mamabayes ira met ed saray makasalanan, pian ontan met so awaten da. Balet aroen yo so saray kabusol yo, tan manggawa kayo na maong ed sikara, tan mamabayes kayo, ya agkayo manalagar anggan kapigan; et say gunggona yo baleg naani, et sikayo so saray anak naani Sankatageyan; ta sikato mapangako [odino, maabig-linawa] ed saray malamang tan mauges. Mapangasi kayo komon, unong a mapangasi so Ama yo.”​—Lucas 6:32-36.

²⁰ Aliwan sinisiblet so maridios a kaabigay-linawa. Ag-itan mankakaukolan tan maniilalo na bales. Si Jehova et ‘pabubutayen to so banwa to ed saray mauges tan maong, tan papepelagen toy uran ed saray matunong tan aliwan matunong’ diad maabig a paraan. (Mateo 5:43-45; Gawa 14:16, 17) Bilang pangalig ed mangatatawen ya Ama tayo, agtayo lambengat papaliisan so pamasakit  ed saray malamang a totoo noagta ipapatnag tayo ed sikara so kaabigan, anggan ed saramay mamubusol ed sikatayo. Diad pangipapatnag tayo na kaabigay-linawa, papaneknekan tayo ed si Jehova tan si Jesus a labay tayo so manbilay ed silong na Panarian na Dios, sano ontalona so kaabigay-linawa tan arum niran maridios a kalidad ed amin a siglaotan na totoo.

Akin ya Ipatnag Tayo so Kaabigay-linawa?

21, 22. Akin a nepeg tayon ipatnag so kaabigay-linawa?

²¹ Parad sakey a tuan Kristiano, importantin tuloy so pangipatnag na kaabigay-linawa. Pakapatnagan itan a walaan itayo na espiritu na Dios. Niarum ni, sano ipatnag tayo so tuan kaabigay-linawa, aaligen tayo si Jehova a Dios tan si Kristo Jesus. Say kaabigay-linawa so kakaukolanen met ed saramay magmaliw a sakop na Panarian na Dios. Nepeg sirin ya aroen tayo so kaabigay-linawa tan aralen so pangipatnag ed satan.

²² Anto so pigaran praktikal a paraan a nipatnag tayo so kaabigay-linawa ed inagew-agew a panagbilay tayo? Sayan tema so singbaten ed ontumbok ya artikulo.

Panon Yon Ebatan?

• Anto so kaabigay-linawa?

• Akin a marukruksa so mundo?

• Panon tayon naseguro ya ontalona so kaabigay-linawa diad silong na uley na Dios?

• Akin a say pangipatnag ed kaabigay-linawa so importante ed amin na saramay manpipilalek a manbilay ed silong na Panarian na Dios?

[Tepetepet Parad Panagaral]

[Litrato ed pahina 13]

Panggugunaetan na saray Kristianon mamatatken so pangipatnag na kaabigay-linawa ed pidedeneng da ed pulok

[Litrato ed pahina 15]

Say maaron-kaabigan nen Jehova so agmanismaya ed saray lingkor to diad mairap iran panaon

[Saray litrato ed pahina 16]

Tekep na kaabigan a pabubutayen nen Jehova so banwa tan papepelagen to so uran ed amin a totoo