Rebeca​—Sakey a Makulin Bii a Tinmakot ed Dios

ISIPEN pa a sikay makapampili na asawaen na anak mon laki. Anton klase na bii so pilien mo? Antoran kualipikasyon so nakaukolan ton kapeten? Kasin mananap ka na sakey a maganggana, intelihente, maomaong, tan makuli? Odino wala ni so arum a bengatla a manunan anapen mo?

Nidunget si Abraham ed onian kipapasen. Insipan nen Jehova a nabendisyonan iray kapolian to diad panamegley na ilalak ton si Isaac. Gapoan tayo so salaysay diad punto a si Abraham et masiken la, balet ta balolaki nin siansia so ilalak to. (Genesis 12:1-3, 7; 17:19; 22:17, 18; 24:1) Lapud si Isaac so manginabang ed saray bendisyon a kaibay magmaliw ya asawa to tan siopaman ya ilalaken da, inyarunsa nen Abraham so pananap na matukoy ya asawaen nen Isaac. Manuna ed amin, sikatoy nepeg a lingkor nen Jehova. Lapud anggapo so ontan a bii diad Canaan, a panaayaman nen Abraham, kaukolan to so mananap ed arum a pasen. Say bii ya apili diad kaunoran et si Rebeca. Panoy impakaromog ed sikato? Kasin sikatoy maespiritual a bii? Antoy naaralan tayo diad pangonsidera ed alimbawa to?

Impananap ed Sakey a Kualipikadon Bii

Imbaki nen Abraham so sankamasikenan ya aripen to, a nayarin si Eliezer, diad arawin Mesopotamia pian mamili na nobya nen Isaac diad saray kakanayon nen Abraham, a mandadayew met ed si Jehova. Seryoson tuloy so pamaakaran lapud nibilibilin ed si Eliezer ya agto mangaala na sakey a Canaanita a magmaliw ya asawa nen Isaac. Makatantanda so impangipurpurek nen Abraham ed sayan pamaakaran.​—Genesis 24:2-10.

Kasabi nen Eliezer ed syudad na kakanayon  nen Abraham, inyakar to so samploran kamelyo to ed kawalaan na bobon. Ilitrato yo pa ed kanonotan yo so eksena! Labi la ed saman, tan nampikasi si Eliezer: “Nengneng mo, manalalagey ak dia ed abay na subol na danum; tan saray bibii ya anak na totoo ed syudad ompapaway ira a manasol: Et gawam komon a say marikit a pangibagaan ko naani onia, Yepas mo so buyog mo, pikasik ed sika, ta pian makapiinom ak; et ibaga to pa naani, Inum ka tan painumen ko so saray kamelyos mo met: sikato’tan pa so bii a tinurom a nipaakar ed aripen mo ya Isaac.”​—Genesis 24:11-14.

Singa kabat la na balang bii a taga-diman, say napgaan a kamelyo et dakdakel so nainum to (anggad 100 a litro) a danum. Kanian say bii a mangiyopresin mamainum ed samploran kamelyo so kaukolan ya akaparaan parad impasyan kimey. Say panggawa to ed satan legan a walaray maniimaton balet ag-ontutulong so peteg a pakapatnagan na inkabiskeg, inkaanos, inkamapaabeba, tan inkamapangasi to ed too tan ayep.

Anto so agawa? “Sanen agni asumpal a mansasalita, et nia, ta si Rebeca pinmaway, a sikato so nianak ed Batuel, a laki ya anak nen Melca, a bii ya asawa nen Nacor, ya agi nen Abraham, a sangkasakba’to so buyog to. Et say marikit marakep nensaman a nengnengen, sakey a birhen, . . . et sikato linmasur ed subol, tan pinano to so buyog to insan tinmatdang. Et say aripen binmatik ya onabet ed marikit, tan inkuan to, Pikasik ed sika, ta painum mo ak na daiset a danum ed buyog mo. Et say marikit inkuan to, Inum kayo labat, katawan ko: et nansiglat, tan inyepas to so buyog to, tan inampato’to, insan to pinainum so aripen.”​—Genesis 24:15-18.

Kasin Kinmualipika si Rebeca?

Si Rebeca et apo nen Abraham ed kaanakan, tan nilikud ed inkaganggana to, sikato so masimsimpit. Sikatoy agmasuyat a mitongtong ed sakey a sankaili, ingen sikatoy ag-alablabas a makaaro. Pinainum to si Eliezer sanen kinmerew na danum. Iilaloan lambengat itan, lapud satan so kaslakan lan kortesiya. Komusta balet so komaduan kabiangan na subok?

 Inkuan nen Rebeca: “Inum kayo labat, katawan ko.” Balet aliwan satan labat. Oniay inkuan ni nen Rebeca: “Onasol ak met ni inumen na saray kamelyos mo, ya angga ed kasumpal da ya oninum.” Inyopresi to so mas ni nen say gendat ya iilaloan. Tekep na inkagunaet, ‘sikatoy nan-ganat, tan inkalbo to so danum na buyog to ed atotong, insan binmatik lamet ed bobon pian onasol tan intultuloy ton inyasolan so amin a kamelyo na too.’ Sikatoy makulikuli a nanggawa ed kimey. Inkuan na salaysay a ‘say too so ag-akaskasel ya angim-imano ed bii.’​—Genesis 24:19-21.

Sanen naamtaan ton pikanayonan nen Abraham so marikit, dinmakmomo si Eliezer ya akisalsalamat ed si Jehova. Tinepet to no kasin wala ni so pasen ed abung nen ama to a napandawesan to tan saray kaiba to legan na labi. Positibon inmebat si Rebeca tan binmatik ed abung pian ibalita so nipaakar ed saray sankaili.​—Genesis 24:22-28.

Kayari ran dinengel so insalaysay nen Eliezer, atebek na agi a laki nen Rebeca, a si Laban, tan say ama to, a si Batuel, ya iwawanwan na Dios iray bengatla. Segurado a si Rebeca so tinuro a parad si Isaac. “Sikato so alam, insan ka onla,” so inkuan da, “tan nagawa ya asawa na laki ya anak nen katawan mo, unong a sinalita nen Jehova.” Anto so liknaan nen Rebeca? Sanen tinepetan no sikatoy mila a tampol, sikatoy inmebat ed sakey a salita ed Hebreo, a mankabaliksay: “Siak so mabulos ya onla.” Sikato so ag-inobligan mangawat ed sayan proponi. Saya so impalinew nen Abraham diad pangibulos ed si Eliezer ed samba to “no aglabay na bii” so mila. Balet atebek met nen Rebeca a say Dios so mangiwawanwan ed pamaakaran. Kanian agla nanabala a tinaynan to so pamilya to pian miasawa ed sakey a laki ya agto nin balot akabat. Satan a makpel a desisyon et sakey a matalonggaring a panangipatnag na pananisia. Talagan  sikato so manepeg a pilien!​—Genesis 24:29-59.

Sanen abeten la nen Isaac, sinakbongan nen Rebeca so ulo to bilang pangipatnag na panagpasakop to. Sikatoy inasawa nen Isaac, tan andi-duaruwan sikato so naaron maong nen Isaac lapud alay abig iran kalidad to.​—Genesis 24:62-67.

Lason ya Ilalak

Nansiansian lepes si Rebeca ed loob na ngalngalin 19 a taon. Diad kaunoran et sikatoy nanlukon na lason, balet mairap so impanlukon to, lapud sikaray manpupuligesgesan ed loob na eges to, a sengegan na inyakis nen Rebeca ed Dios. Nayarin ontan met so gawaen tayo diad makapagonigon a tuloy a panaon ed bilay tayo. Dinengel nen Jehova si Rebeca tan pinaseguroan to. Sikato so magmaliw ya ina na duaran nasyon, tan “say panguloan naani manlingkor ed yugtan.”​—Genesis 25:20-26.

Nayarin aliwan saratan labat a salita so makasengeg no akin a mas pinabli nen Rebeca so yugtan ya anak to, a si Jacob. Mandumaan iratan a lalaki. Si Jacob et “mareen [“anggapoy pakabalawan,” NW],” balet si Esau et andian na panamabli ed espiritual iran bengatla lapud inlako to’d si Jacob so inkapanguloan to, salanti, say kanepegan ton manawir ed saray sipan na Dios, parad sakey labat a nakan. Say impangasawa nen Esau ed duaran Hiteo a bibii so mangipatnag ya agto nirespeto​—a minudmora to ni ingen​—iray espiritual a bengatla, a pirmin angonigon ed saray ateng to.​—Genesis 25:27-34; 26:34, 35.

Impakagamor nen Jacob ed Panamapalar

Ag-ibabaga na Biblia no kasin amta nen Isaac a nepeg a manlingkor si Esau ed si Jacob. Antokaman so kipapasen, amta nen Rebeca tan si Jacob a kien to so panamapalar. Kinmiwas a tampol si Rebeca sanen nadngel to a ginetma nen Isaac a papalaren si Esau sano sikatoy mangala na sakey ya ulsa a siraen nen ama to. Say inkadesidido tan inkaseseg nen Rebeca sanen kalangweran to so agnaandi ed sikato. ‘Ingganggan’ to si Jacob a sikatoy iyalaan to na duaran kilaw a kanding pian sikatoy manluto na siraen a paborito nen masiken to. Insan si Jacob so nepeg a mankunkunwarin si Esau pian nagamoran to so panamapalar. Ag-onabobon si Jacob. Ompan lamang no naamtaan na ama to so pakana et sikatoy ayewen to! Balet impilit nen Rebeca. “Dia ed siak ondapo so kaayew mo ana’ko,” so inkuan to. Diad ontan et nanluto na siraen, impankukunwari toy Jacob, tan imbaki to ed masiken to.​—Genesis 27:1-17.

Agnisalaysay no akin ya ontan so inkiwas nen Rebeca. Dakel so mangokondena ed inkiwas to, balet ag-itan kinondena na Biblia, nisay kinondena itan nen Isaac sanen asukayan ton si Jacob so angawat na panamapalar. Imbes, sikatoy lalon pinapalar nen Isaac. (Genesis 27:29; 28:3, 4) Kabat nen Rebeca so impasakbay nen Jehova nipaakar ed ananak to. Kanian sikatoy kinmiwas pian seguroen a si Jacob so makagamor ed panamapalar a talagan kanepegan to. Malinew a saya so mitunosan ed linawa nen Jehova.​—Roma 9:6-13.

Imbaki si Jacob ed Haran

Natan et inamper nen Rebeca iray getma nen Esau diad impangiganggan to ed si Jacob ya ombatik angga ed onkepa so sanok na agi to. Sikatoy kinmerew na panangabobon nen Isaac ed plano to balet mapangasin pinaliisan to so panalambit ed pamapasnok nen Esau. Imbes, sikatoy mataktikan akikasi ed masiken to diad impangibalikas to na kapagaan to ya ompan si Jacob et mangasawa na Canaanita. Satan a mismon ideya so amakiwas la ed si Isaac pian bilinen si Jacob a paliisan so ontan a panangasawa tan ibaki to ed pamilya nen Rebeca pian mananap na asawan matakot ed Dios. Agla nikurit no kasin apinengnengan ni nen Rebeca si Jacob, balet say inkiwas to so amawala na daakan a bendisyon parad arapen a nasyon na Israel.​—Genesis 27:43–28:2.

Say akabatan tayo nipaakar ed si Rebeca so mamakiwas ed sikatayon mandinayew ed sikato. Sikato so magangganan bii, balet say tuan ganggana to et say maridios a debosyon to. Ontan so inanap nen Abraham ed sakey a manugang. Nayarin apalumbasan ni na arum a maabig ya ugali to so amin ya iilaloan ed sikato nen Abraham. Say pananisia tan inkakpel ton manumbok ed panangiwanwan na Dios tan say inkaseseg, inkasimpit, tan mabunlok a panamarawes to so kalidades a nepeg ya aligen na amin a Kristianon bibii. Saraya so kalidad ya aanapen a mismo nen Jehova ed sakey a biin peteg a napanuliranan.