Sano Nagawa la Diad Dalin so Linawa na Dios

SANEN imbangat nen Jesus iray babangatan to ya ipikasi ran, “Nagawa komon so linawam, unong ed tawen, ontan met ed dalin,” sikatoy mansasalita bilang sakey a nambilay ed tawen a kaiba to so Ama. (Mateo 6:10; Juan 1:18; 3:13; 8:42) Sakbay a nagmaliw a too si Jesus, naeksperiensya to so panaon ya amin a bengatlan agawa ed tawen tan diad dalin et mitunosan ed linawa na Dios. Saraman so makapalikliket a panaon na itatalona tan inkapnek.​—Uliran 8:27-31.

Inmunan pinalsa na Dios iray espiritun persona, “[saray] angheles to, a mabiskeg, a manguunor na salita to.” Sikara so lawas a ‘ministros to, a manggagawa na kaliktan to.’ (Salmo 103:20, 21) Kasin wala so kawayangan na balang sakey ed sikara a manpili? On, tan sanen apalsa so dalin, sarayan ‘anak na Dios so inmeyag lapu ed liket.’ (Job 38:7) Satan a panangirayew da so angipatnag ed personal a panliket da ed linawa na Dios, tan intunos da so linawa ra ed linawa to.

Kayari na impamalsa ed dalin, imparaan na Dios itan pian panayaman na too tan diad kaunoran et pinalsa to so inmunan laki tan bii. (Genesis, kapitulo 1) Agta manepeg met iyan irayew? Oniay ibabaga na impuyan a salaysay: “Et say Dios anengneng to so amin a bengatla a ginawa to, et nia maong iran tuloy,” on, andian na kabalawan tan naspot.​—Genesis 1:31.

Anto so linawa na Dios ed saray inmunan ateng tayo tan ed ilalak da? Unong ed Genesis 1:28, satan so maong met a tuloy: “Say Dios benendisyonan to ra, tan inkuan na Dios ed sikara, Manbunga kayo tan ondakel kayo, tan makmakan yo so dalin, tan sikato so patuloken yo: tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.” Ta pian nasumpal itan ya alay abig a kimey, say sankaunaan ya atateng tayo so kaukolan a mantultuloy a manbilay​—a maando​—ontan met ed saray ilalak da. Anggapoy pakapatnagan na trahedya, ag-inkahustisya, ot-ot, odino ipapatey.

Saya imay panaon a nagagawa so linawa na Dios ed tawen tan diad dalin. Saramay manusumpal na linawa to so malikeliket diad panggagawa ra ed satan. Anto kasi so nagmaliw a problema?

Linmesa so ag-inilaloan ya angat ed linawa na Dios. Balet, nasolbar a siansia itan. Anggaman ontan, pinawala na satan so andukey a panaon na sakit na linawa tan kaermenan a sengegay pirmin pakawewetwet nipaakar ed linawa na Dios ed katooan. Amin tayo so nalalanor ed saya. Anto itan ya angat?

Say Linawa na Dios Legan na Impanrebeldi

Anengneng na sakey ed saray espiritun “anak na Dios” so posibilidad na isalet to ed linawa na Dios parad too, a say getma to et gunggonaan so inkasikato. Diad lalon impannonot ed satan na sayan espiritun pinalsa, lalon pinmatnag a posible tan lalon makapasagyat itan. (Santiago 1:14, 15) Nayarin inkatunongan to a no natangguyor to so inmunan paris na too ya ondengel ed sikato imbes a dia ed Dios, sirin napaskar so Dios a mangiyabuloy na kalaslasan ed inkasoberano. Nayarin inisip to a sikaray agpateyen na  Dios, lapud mankabaliksan itan na isaew na gagala To. Imbes, kaukolan nen Jehova a Dios ya iyadapta so gagala to, ya iyabuloy to so relatibon pakauley na sayan espiritun anak a tutuloken la natan na totoon pinalsa To. Matukotukoy a tinawag itan a rebelde diad saginonor bilang Satanas, a mankabaliksay, “Sumusumpa.”​—Job 1:6.

Diad inkiwas to unong ed pilalek to, sininggeran nen Satanas so bii. Sinagyat to so bii ya ibaliwala so linawa na Dios tan magmaliw ya independente ed moral, a kuanto: “Agkayo ompatey. . . . Singa kayo Dios, ya amta yo so maong tan mauges.” (Genesis 3:1-5) Inisip na bii a makapangiter itan ed sikato na kawayangan, tan sinisia to a singano satan so magmaong a dalan na bilay. Diad saginonor, tinangguyor toy asawa to a minonong ed sikato.​—Genesis 3:6.

Aliwan ontan so linawa na Dios ed sanasawa. Linawa ra itan a bukor. Tan makapadesyang iray pansumpalan na satan. Imbaga la na Dios ed sikara ya ompatey ira no ontunganga ra. (Genesis 3:3) Ag-ira pinalsa a magmaliw a matalona ya independente ed Dios. (Jeremias 10:23) Niarum ni, magmaliw iran ag-ayadyari, tan nipatawir ed saray ilalak da so ag-inkayadyari tan ipapatey. (Roma 5:12) Agnauman nen Satanas irayan epekto.

Kasin sarayan pananguman so magnayon lan mangapekta ed gagala, odino linawa, na Dios parad katooan tan ed dalin? Andi. (Isaias 55:9-11) Balet amalesa iratan na saray isyu a kaukolan a naresolbi: Kasin say katooan et magmaliw a ‘singa Dios, a makaamta ed maong tan mauges,’ unong ya imbaga nen Satanas? Diad arum a panangibaga, no sikatayoy naikdan na magenap a panaon, kasin nadetermina tayon bukor no anto so maong tan mauges, no anto so makagunggona tan makaderal, ed amin ya aspekto na bilay? Kasin kanepegan na Dios so sigpot a katutulok tayo, lapud sankaabigan so paraan na pananguley to? Kasin manepeg a sikatayoy sigpot a mitunosan ed linawa to? Panon yon ebatan iratan?

Wala so alenleneg a paraan pian naresolbi irayan isyu diad imaton na amin ya intelihentin pinalsa: Paulyanan iraman so malabay a magmaliw ya independente no kasin ontalona ira. Say pamatey a tampol ed sikara so agmanresolbi ed saray linmesan isyu. Say pangiyabuloy ed sankatooan a manggegemtan na independentin kurang diad loob na magenap a panaon so manresolbe ed saray pamaakaran lapud napatnagan iray resulta na satan. Impabitar na Dios a resolbien to iray pamaakaran ed ontan a paraan sanen inkuan to ed bii a sikatoy nawalaan na saray ilalak. Diad ontan et onggapo so pamilya na too. Lapud saya et mabilay itayo natan!​—Genesis 3:16, 20.

Balet, agkabaliksan na saya ya abuloyan na Dios so totoo tan say rebeldin espiritun anak a gawaen da lan amin so labay da. Ag-intalirak na Dios so inkasoberano to, nisay inkaindan to so gagala to. (Salmo 83:18) Saya so impalinew to diad impangipasakbay to a diad kaunoran et mekmeken to so angisugsog na panagrebeldi tan paandien to so amin a mauges ya epekto. (Genesis 3:15) Kanian, nanlapu la’d gapo et nisipan la ed pamilya na too so pakainawaan.

Kaleganan na satan, insian na inmunan atateng tayo so inkasikara tan saray magmaliw ya ilalak da manlapud pananguley na Dios. Pian naamper na Dios so amin a makapaermen a pansumpalan na desisyon da, kaukolan ton ipaakseb ed sikara so linawa to ed amin a kiwas da. Mipadpara itan ed ag-impangiyabuloy ed sikaran manggunaet a manbilay ya independente ed Dios.

 Siempre, nayarian na saray indibidual a pilien so pananguley na Dios. Nayarian dan aralen no anto so linawa na Dios parad totoo legan na sayan panaon tan maapit iran makapitunosan ed satan anggad posible. (Salmo 143:10) Anggaman ontan, sikaray agnipuera ed saray problema legan ya agni aresolbi so isyu nipaakar ed sigpot ya inka-independente na katooan.

Saray epekto na personal a panagpili so apatnagan la diad gapo na awaran na too. Say panguloan ed pamilya na too, si Cain, so amatey ed agi ton si Abel lapud “saray gawa to mauges ira, sara balet so gawa nen agi to matunong.” (1 Juan 3:12) Aliwa iyan linawa na Dios, lapud si Cain so pinasakbayan la na Dios tan dinusa To diad saginonor. (Genesis 4:3-12) Pinili nen Cain so inka-independente ed moral ya inyopresi nen Satanas; kanian sikato so “betang na maramsak.” Ontan met so ginawa na arum.

Diad apalabas a 1,500 a taon ed awaran na too, ‘say dalin so inmuges ed arap na Dios, tan say dalin so napno na karawalan.’ (Genesis 6:11) Kinaukolan so determinadon ikiwas pian naamper so dalin manlapud kaderal. Kinmiwas so Dios diad impangitarok to na sankagloboan a delubio tan inyagel to so sakey a matunong a pamilya a manbibilay ed saman​—si Noe, say akulaw to, saray ilalak to, tan saray kaasawaan da. (Genesis 7:1) Amin tayo so kapolian da.

Manlapu la nensaman diad awaran na too, say Dios so mangiwawanwan ed saraman so masimoon a manpilalek a nakabatan so linawa to. Pinuyanan to iray matoor a lalaki a mangikurit ed saray mensahe a kaliktan ton ipasabi ed siopaman a malabay a paiwanwan ed sikato. Sarayan mensahe so nikurit diad Biblia. (2 Timoteo 3:16) Sikatoy maaron angiyabuloy ed matoor a totoo a makapisiglaotan ed sikato, a magmaliw ira ni ingen a kakaaro to. (Isaias 41:8) Tan sikatoy mangitatarya ed sikara na biskeg a nakaukolan da pian nasungdoan iray mairap a subok a sasagmaken na katooan legan na sarayan milenyo na inka-independente. (Salmo 46:1; Filipos 4:13) Agaylan misalsalamat itayo ed amin na saya!

‘Nagawa Komon so Linawam’​—Diad Sigpot a Paraan

Say gagawaen na Dios ya anggad natan et aliwa nin sigpot a kasumpalan na linawa to parad katooan. Oniay insulat na Kristianon apostol a si Pablo: “Unong ed sipan to alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Sayan simbolikon balikas so ontutukoy ed sakey a balon gobierno a manuley ed katooan tan sakey a balon sosyedad na too ya uleyan na satan a gobierno.

Diad impangusar nen propeta Daniel na mabitar iran balikas, oniay insulat to: “Dia ed saray agew na saratan ya arari, say Dios na tawen mamaalagey naani na sakey a panarian ya anggan kapigan agnaani naderal . . . Balet buybuyaken to naani tan upoten to naani so saraya ya amin a panarian et sikato so mansiansia lawas.” (Daniel 2:44) Sayan propesiya so mangipapasakbay ed pangangga na sayan agla naapiger a sistema na bengabengatla tan salatan itan na Panarian, odino gobierno, na Dios. Talagan saya so maong a balita! Onsabi so panaon a saray panlalaban tan inkasiblet a sengegan na pirmin ikakayat na karawalan tan manesesga lamet a maneral ed dalin et agla nanonotan.

Kapigan nagawa irayan bengatla? Oniay intepet na saray babangatan nen Jesus: “Kapigan so kagawa na sarayan bengatla? Tan anto kasi so tanda ed isabim tan say anggaan na mundo?” Bilang kabiangan na ebat nen Jesus, oniay inkuan to: “Tan saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.”​—Mateo 24:3, 14.

Kabkabat lan tuloy a sayan panagpulong a kimey so nagagawa natan ed sankamundoan. Nayarin naiimanom itan diad lugar yon mismo. Diad libro ton These Also Believe, oniay insulat nen Propesor Charles S. Braden: “Literal ya akobrian la na saray Tasi nen Jehova so dalin lapud panagpulong da. . . . Anggapo lay relihyon ed mundo ya angipatnag na ontanlan inkaseseg tan inkakuli a mangikayat ed maong balita na  Panarian nen saray Tasi nen Jehova.” Saray Tasi so aktibon mangiyaabawag ed sayan maong a balita diad masulok a 230 a daldalin tan ed ngalngalin 400 a lenguahe. Sayan nipasakbay a kimey so agnin balot agawa nensaman diad interon globo. Sakey itan ed dakel ya ebidensya ya asingsingger la so panaon pian salatan na satan a Panarian iray gobierno na too.

Say panarian ya imbaga nen Jesus a nipupulong et samay mismon imbangat to ed sikatayo ya ipikasi diad modelon pikakasi to ya: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:10) On, satan a Panarian so instrumento na Dios pian sumpalen so gagala to, say linawa to, parad katooan tan ed dalin.

Anto so kabaliksan na satan? Abuloyan ya onebat so Apocalipsis 21:3, 4: “Nadngel ko so sakey a baleg a boses ed tawen, a kuanto, Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” Diad ontan et sigpot lan nagawa so linawa na Dios diad dalin tan ed tawen. * Agmo ta labay so magmaliw a kabiangan na satan?

[Paimano ed leksab]

[Litrato ed pahina 5]

Say pangipulisay ed linawa na Dios so makadesyang