Kasin Napapabiskeg Ka na Salitay Dios?

SANO nidunget ka ed saray problema, panon mon aarapen iratan? Sanen nidunget si Jesus ed saray pananubok nen Satanas, ninonot to so matukoy a teksto tan akatulong itan ed sikato. (Mateo 4:1-11) Ontan met, sanen nidunget si Arin David ed personal a subsubok, sikato so pinabiskeg na Salitay Dios. Oniay inkuan to: “Dia ed kinaraklan na saray kanonotan ko ed loob ko saray ligliwam pinaliket da so kamarerwak.”​—Salmo 94:19.

Mipadpara, say pannonot ed saray paborito tayon teksto so nayarin manligliwa odino mamabiskeg ed sikatayo sano nidudunget itayo ed saray subok. Alimbawa, si Rex, ya 89 años la natan, so wala la’d sigpot-panaon a panag-ebanghelyo nanlapu la nen 1931. Ingen, oniay ikuan to: “Mebetbet kon liknaen ya agak kualipikado sano naikdan ak na espisyal ya asainmin diad ministeryo.” Panon ton inarap itan? “Ninonot ko imay paboritok a teksto, ya Uliran 3:5, a mangibabagan: ‘Manmatale’ka ed Jehova ed simoon a pusom, tan agka onsaral ed tapew na dili a pakatalos mo.’ Say impannonot tan impangiyaplikak ed sayan teksto so tinmulong ed siak pian nagawaan ko a maaligwas iray asainmin ko.”

Nagugunggonaan met iray kalangweran lapud pakakawalaan da na paboriton teksto. Inkuan na anem-taon a si Jack a paborito ton teksto so Mateo 24:14. Sayan teksto so mamapakiwas ed sikaton mila ed saray ateng to a manpulong. Oniay inkuan to: “Labalabay ko so mila ed si nanay, tatay, tan si atsik a manpulong kada Sabado.”

Singa si Jesus, kasin nidudunget ka no maminsan ed saray direktan pananubok ed pananisiam? Sirin, say Filipos 4:13 so nayarin gawaen mon sakey ed saray paboritom a teksto. Singa si Arin David, kasin ‘nagogonigon so kanonotan’ mo? Diad ontan et makatulong ed sika so pannonot ed Filipos 4:6, 7 pian natalonaan itan. Kasin pampapagaan mo no maminsan ya aliwan mabunga so serbisyom ed Dios? Sirin, say pannonot ed 1 Corinto 15:58 so mamabiskeg ed sika.

Diad pangipatlep ed saray matukoy a teksto, aabuloyan tayo so Salitay Dios a mangimpluensya ed kabibilay tayo. (Hebreos 4:12) Saratan a paboriton teksto so makapabiskeg tan makaligliwa ed sikatayo.​—Roma 15:4.