Manpakpel a Singa si Jeremias

“Manalagar ka ed Jehova: ibalap mo so pusom et sikato pabiskegen to so pusom: on, manalagar ka ed Jehova.”​—SALMO 27:14.

1. Anton daakan a bendisyon so panggagayagaan na saray Tasi nen Jehova?

 MANBIBILAY iray Tasi nen Jehova diad sakey ya espiritual a paraiso. (Isaias 11:6-9) Diad sayan magulogulon mundo, panggagayagaan da so nikaduman espiritual a kaliberliber a kaiba iray kapara ran Kristiano, a walaan na pikakareenan ed si Jehova a Dios tan ed balang sakey. (Salmo 29:11; Isaias 54:13) Tan onlalaknab so espiritual a paraiso ra. Amin a ‘manggagawa ed kaliktan na Dios a manlapu ed puso’ so walaan na betang diad pananginatnat ed satan. (Efeso 6:6) Panon? Diad pambibilay da unong ed saray prinsipyo na Biblia tan diad pangibabangat da ed arum a mangiyaplika ed saratan, naiimbitaan da met so arum a nagunggonaan ed daakan iran bendisyon na satan a paraiso.​—Mateo 28:19, 20; Juan 15:8.

2, 3. Anto so kaukolan a sungdoan na saray tuan Kristiano?

² Anggaman ontan, say pambilay ed espiritual a paraiso et agmankabaliksan ya agtayo la makaeksperiensya na saray subok. Siansian ag-itayo ni ayadyari tan manasagmak tayo na saray ot-ot na sakisakit, itatakken, tan diad saginonor et ipapatey. Niarum ni, naiimatonan tayo so kasumpalan na saray propesiya nipaakar ed “saray kaunoran ya agew.” (2 Timoteo 3:1) Saray bakal, krimen, sakisakit, eras, tan arum niran pirmin kairapan so mangaapekta ed amin a katooan, tan agnipuera ed saratan iray Tasi nen Jehova.​—Marcos 13:3-10; Lucas 21:10, 11.

³ Nilikud ed saratan, kabkabat tayo ya anggaman walay kaligenan ed espiritual a paraiso, nasasagmak tayo nin siansia so mabiskeg ya isusumpa. Pinasakbayan nen Jesus iray patumbok to: “Lapud aliwa kayo a taga mundo, noag say pinili ta kayo ed mundo, kanian say mundo busolen to kayo. Pakanonoten yo so salita ya inkuan ko ed sikayo, Say aripen aliwan babaleg nen say katawan to. No pinasegsegang da ak, pasegsegangen da kayo met.” (Juan 15:18-21) Mipadpara met itan natan. Siansian agnatatalosan odino agpapablien na maslak a totoo so nengneng na panagdayew tayo. Arum so mamabalaw, manluludlurey, odino mamubusol ni ingen ed sikatayo​—unong ya impasakbay la nen Jesus. (Mateo 10:22) Sikatayo so mabetbet a puntirya na panagpauges tan mauges iran propaganda panamegley na media. (Salmo 109:1-3) On, amin tayo so nipapaarap ed makapaangat iran kipapasen, tan arum ed sikatayo so nayarin nadismaya. Panon itayon makapansungdo?

4. Siopa so kerewan tayo na tulong pian makapansungdo?

⁴ Tulongan itayo nen Jehova. Oniay nipuyan ya insulat na salmista: “Amayamay so pakapaermenan na matunong: balet si Jehova iliktar to ya ipaway ed saraya ya amin.” (Salmo 34:19; 1 Corinto 10:13) Napaneknekan na dakel ed sikatayo a sano sigpot itayon manmatalek ed si Jehova, ikdan to itayo na biskeg pian nasungdoan so antokaman a kairapan. Say aro tayo ed sikato tan say liket a niiyan ed arapan tayo so makatulong pian natalonaan tayo so pakadismaya tan takot. (Hebreos 12:2) Kanian, anggaman ed saray kairapan, mantultuloy itayon mansungdo.

Apabiskeg si Jeremias ed Salitay Dios

5, 6. (a) Antoran alimbawa so walad sikatayo nipaakar ed saray tuan managdayew ya akapansungdo? (b) Anto so reaksion nen Jeremias sanen sikatoy niganggan a manpropeta?

⁵ Diad interon awaran, saray matoor a lingkor nen Jehova so akaromog na gayaga anggaman ed mairap iran kipapasen. Arum so nambilay legan na saray panaon na panangukom sanen indapo nen Jehova so sanok to ed saray agmatoor. Kabiangan ed saratan a matoor a managdayew si  Jeremias tan pigara ed saray kapanaonan to, ontan met iray Kristiano nen inmunan siglo. Nikurit ed Biblia iratan a maawaran ya ehemplo pian pakapasesegan tayo, tan dakel so naamtaan tayo no aralen iratan. (Roma 15:4) Bilang alimbawa, konsideraen tayo pa si Jeremias.

⁶ Diad malangwer ya edad, si Jeremias so niganggan a manlingkor bilang propeta ed Juda. Mairap itan ya asainmin. Dakel so mandadayew ed palson dirios. Anggaman matoor si Josias, ya ari sanen inggapo nen Jeremias so ministeryo to, amin a tinmumbok ya arari so agnanmatoor, tan maslak ed saramay responsablin mangibangat ed totoo​—saray propeta tan saserdote​—so ag-angitandoro ed katuaan. (Jeremias 1:1, 2; 6:13; 23:11) Anto sirin so liknaan nen Jeremias sanen sikato so ingganggan nen Jehova a manpropeta? Sikato so tinmakot! (Jeremias 1:8, 17) Anonotan nen Jeremias so inmunan reaksion to: “Saman la inkuan ko, O Katawan a Jehova! Nia, agko amta so mansalita; ta ugaw ak.”​—Jeremias 1:6.

7. Anton reaksion so nabet nen Jeremias diad teritorya to, tan panon so inkiwas to?

⁷ Maslak a totoo diad teritorya nen Jeremias et ag-ondengel, tan sikatoy mabetbet a nidunget ed mabiskeg ya isusumpa. Diad aminsan ya inkagawa et sikato so pinoniti tan impaipangaw nen Fasur, a saserdote. Oniay inkuan nen Jeremias nipaakar ed alikna to ed saman a panaon: “Say ngaran [nen Jehova] agko naani uliten, agak met mansalita la naani dia ed ngaran to.” Nayarin ontan met no maminsan so liknaan yo, a labay yo lay ontunda. Imanoen pa so akatulong ed si Jeremias pian makapansungdo. Inkuanto: “Wala sirin dia ed pusok so [salita odino mensahe na Dios] singa mandarlang ya apoy ya akapotan ed saray pukel ko et nakesawan ak a mantepel et agko nitepel.” (Jeremias 20:9) Kasin ontan met so epekto ed sikatayo na Salitay Dios?

Saray Kaiba nen Jeremias

8, 9. (a) Anton kaleteyan so impatnag nen propeta Urias, tan antoy resulta na satan? (b) Akin ya adismaya si Baruc, tan panon a sikatoy atulongan?

⁸ Agbukbukor nen Jeremias ed mapropetikon kimey to. Walaray kakaiba to, tan satan so akapasesegan to. Balet, walaray panaon ya agmakabat so inkiwas na saray kakaiba to. Alimbawa, say kapara ton propeta a si Urias so okupadon mangipapasabi ed saray pasakbay sumpad Jerusalem tan Juda “unong ed amin a salita nen Jeremias.” Balet, sanen ingganggan nen Arin Jehoiakim a pateyen si Urias, sikato so kinmuyat ed Ehipto. Balet ag-itan angiliktar ed sikato. Sikato so inusilan na saray sundalo na ari, inerel da, tan insempet da ed Jerusalem, a diman da pinatey. Agaylan makapatalagnaw itan parad si Jeremias!​—Jeremias 26:20-23.

⁹ Say sananey nin kaiba nen Jeremias et say sekretaryo ton si Baruc. Sikato so maabig a katulongan nen Jeremias, balet diad sakey ya inkagawa et naandi so maespiritual a panmoria to ed saray kipapasen to. Sikato so ginmapo lan nanreklamo, a kuanto: “Abagey ak la! Natan ta si Jehova inyarum to so ermen ko ed irap ko; naksawan ak ed pantagleey ko, et agak makaromog na painawa.” Lapud dismayado si Baruc, naandi so  apresasyon to ed espiritual iran bengatla. Balet ta si Jehova so mapangasin angiter na makabat a simbawa ed si Baruc, tan sikato so nipetek. Diad ontan et sikato so apaseguroan a naliktaran to so kaderal na Jerusalem. (Jeremias 45:1-5) Apaseseg a tuloy si Jeremias sanen binmiskeg lamet si Baruc diad espiritual!

Tinulongan nen Jehova so Propeta To

10. Antoray insipan nen Jehova a panulong ed si Jeremias?

¹⁰ Sankaimportantian, ag-inkaindan nen Jehova si Jeremias. Atalosan to so liknaan na propeta to kanian inikdan to na biskeg tan tulong a nakaukolan to. Alimbawa, sanen imbalikas nen Jeremias iray panduaruwa to ed saray kualipikasyon to diad gapo na ministeryo to, oniay inkuan nen Jehova ed sikato: “Agka antakot nisengeg ed sikara; ta wala ak ed sika pian ilaban ta ka, kuan nen Jehova.” Insan, kayari ton inter ed propeta so impormasyon nipaakar ed asainmin to, oniay kuan nen Jehova: “Mibakal ira naani ed sika; balet agda ka naani taloen; ta siak wala ak ed sika, kuan nen Jehova, pian ilaban ta ka.” (Jeremias 1:8, 19) Agaylan makapaligliwa itan! Tan tinoor nen Jehova so sipan to.

11. Panon tayon naseguro a tinoor nen Jehova so insipan to a tulongan to si Jeremias?

¹¹ Kanian, sanen sikatoy nipangaw tan niludlurey na totoo, oniay matalek ya inkuan nen Jeremias: “Si Jehova wala ed siak a singa sakey a makapanyari tan sakey a makapataktakot: kanian saray manguusil ed siak nabaktar, et ag-ira naani ontalona; sikara nibabaing ira naani a sigpot.” (Jeremias 20:11) Diad sinmaginonor iran taon sanen walaray gagaem a pamatey ed si Jeremias, nantultuloy si Jehova a tinmulong ed sikato, tan singa si Baruc, akaliktar si Jeremias ed inkaderal na Jerusalem bilang bulos a too, bangbalet saramay amasegsegang ed sikato  tan saramay angibaliwala ed saray pasakbay to so balanglan inatey odino akautibo diad Babilonia.

12. Anggaman ed saray pansesengegan na pakadismayaan, anto so nepeg tayon tandaan?

¹² Singa si Jeremias, dakel a Tasi nen Jehova natan so mansusungdo ed saray kairapan. Unong ya asalambit la ed akadkauna, say pansesengegan na arum ed saratan a kairapan et say mismon agtayo inkayadyari, magulon kipapasen na mundo, tan saramay onsusumpa ed kimey tayo. Makapadismaya so ontan iran kairapan. Singa si Jeremias, nayarin nanumamengan tayo la no kasin makapantultuloy tayo ni. On, panapanaon et nadismaya itayo. Say pakadismayaan so manubok ed kaaralem na panangaro tayo ed si Jehova. Kanian agtayo aabuloyan so pakadismaya a mangikasipa ed sikatayo ed serbisyo tayo ed si Jehova a singa ginawa nen Urias. Imbes, aligen tayo si Jeremias tan manmatalek ed tulong nen Jehova.

No Panon Tayon Nadaeg so Pakadismaya

13. Panon tayon aligen so alimbawa nen Jeremias tan si David?

¹³ Si Jeremias et naynay a nampikasi ed si Jehova a Dios, ya imbesngaw ton amin so walad liknaan to tan kinmerew na biskeg. Satan so maabig ya alimbawa ya aligen. Oniay insulat nen David nensaman, a nanilalo ed parehon Lapuan na biskeg: “Talineng mo so saray salitak, O Jehova, umameng mo so dalepdep ko, dengelen mo so boses na akis ko, Arik, tan Dios ko; ta dia ed sika mikakasi ak.” (Salmo 5:1, 2) Satan ya apuyanan a salaysay nipaakar ed bilay nen David so mangipatnag ed aminpigan inyebat nen Jehova ed saray pikakasi nen David diad inkerew to na tulong. (Salmo 18:1, 2; 21:1-5) Diad mipadparan paraan, sano mairap iray pakadesdesan odino singa agnaresolbi iray problema tayo, makaligliwan tuloy so itupleg ed si Jehova diad pikakasi tan ibesngaw tayo ed sikato so nalilikna tayo. (Filipos 4:6, 7; 1 Tesalonica 5:16-18) Mabulos si Jehova ya ontalineng ed sikatayo. Papaseguroan to itayo ya ‘asikasoen to itayo.’ (1 Pedro 5:6, 7) Balet, agta agmakatunongan no manpikasi itayo ed si Jehova balet ta agtayo dengelen so ibabaga to?

14. Anto so epekto na saray salita nen Jehova ed si Jeremias?

¹⁴ Panon so pitotongtong nen Jehova ed sikatayo? Nodnonoten pa lamet si Jeremias. Lapud sakey a propeta si Jeremias, direktan mitatalosan ed sikato si Jehova. Deneskribe nen Jeremias so epekto na saray salita na Dios ed puso to: “Saray salitam aromog ira, et kinan ko ra; et saray salitam sikara nensaman ed siak so sakey a liket tan gayaga na pusok: ta natawag ak ed panamegley na ngaran mo, O Jehova, Dios na saray ehersito.” (Jeremias 15:16) On, nanliketan nen Jeremias so katuaan a sikato so tinawag unong ed ngaran na Dios, tan pinabpabli to iray salita na Dios. Kanian, singa si apostol Pablo, si Jeremias so mabulos ya angiyabawag ed mensahe a nimatalek ed sikato.​—Roma 1:15, 16.

15. Panon tayon nipaslep iray salita nen Jehova diad puso tayo, tan antoray nodnonoten tayo a manggawa’d sikatayon determinado ya agmansiansian andi-esel?

¹⁵ Natan et agla direktan mitatalosan si Jehova ed siopaman. Balet, wala la’d sikatayo iray salita na Dios a nikurit ed Biblia. Kanian, no masimoon itayo ed panagaral ed Biblia tan dadalepdepen tayon maong so naaaralan tayo, saray salita na Dios so magmaliw met a “liket tan gayaga” na puso tayo. Tan maliket itayon mangakbibit ed ngaran nen Jehova sano onla itayon manginabang ed saratan a salita diad arum. Agtayon balot lilingwanan so katuaan ya anggapo lay arum a totoo ed sayan mundo a mangiyaabawag ed ngaran nen Jehova. Saray Tasi to lambengat so mangiyaabawag ed maong a balita na niletneg a Panarian na Dios tan mangibabangat ed saray mauyamo a magmaliw a babangatan nen Jesu-Kristo. (Mateo 28:19, 20) Agaylan abendito itayo! No nodnonoten tayo so maaron inmatalek nen Jehova ed sikatayo, panon itayon makapansiansian andi-esel?

Manalwar Itayo ed Saray Kalimog Tayo

16, 17. Anto so panmoria nen Jeremias ed saray kaulop, tan panon tayon aligen so panmoria to?

¹⁶ Wala ni so inreport nen Jeremias ya  akatulong ed sikato a magmaliw a makpel. Inkuanto: “Agak yinmurong ed tipon na saray nanliket, tan agak met nanliket; yinmurong ak a saksakey nisengeg ed limam; ta pinano mo ak ed sanok.” (Jeremias 15:17) Mas labay nen Jeremias so manbukbukor nen say naimpluensyaan na mauges iran kaulop. Ontan met so panmoria tayo natan. Agtayon balot lilingwanan so pasakbay nen apostol Pablo a “saray mauges a kaulop deralen da so saray maong ya ug-ugali,” anggan saray maabig ya ugali tayo ed loob la na dakel a taon.​—1 Corinto 15:33.

¹⁷ Lapud saray mauges a kaulop, nayarin nadutakan na espiritu na mundo so panag-isip tayo. (1 Corinto 2:12; Efeso 2:2; Santiago 4:4) Ipasal tayo sirin so pakayari tayon manebek pian nibiig tayo iray makaderal a kalimog tan sigpot tayo iran napaliisan. (Hebreos 5:14) No mabilay natan si Pablo, anto so isipen yon ibaga to ed sakey a Kristiano a manbabantay na imoral odino marawal iran pelikula odino isport? Panon ton simbawaen so sakey ya agi a mikakaaro ed agto kabkabat a totoo diad Internet? Anto so isipen to ed sakey a Kristiano a manguusar na dakel ya oras ed panaggalaw na video games odino panagbantay na telebisyon balet ta anggapo so maabig a personal a panagaral to?​—2 Corinto 6:14b; Efeso 5:3-5, 15, 16.

Mansiansia ed Espiritual a Paraiso

18. Anto so ontulong ed sikatayo pian mansiansia itayon mabiskeg ed espiritual?

¹⁸ Papablien tayo so espiritual a paraiso. Anggapo lay pipadparaan na satan ed mundo natan. Anggan saray agmananisia et mandinayew ed aro, panangonsidera, tan kaabigay-linawa na saray Kristiano ed balang sakey. (Efeso 4:31, 32) Anggaman ontan, mas kakkaukolan tayo natan a labanan so pakadismaya. Say maong a kaulop, pikakasi, tan maong ya ugali ed panagaral so makatulong ed sikatayo pian mansiansian mabiskeg ed espiritual. Saratan so mamabiskeg ed sikatayo a mangarap ed antokaman a subok tekep na sigpot a panagmatalek ed si Jehova.​—2 Corinto 4:7, 8.

19, 20. (a) Anto so ontulong ed sikatayo pian makapansungdo? (b) Siopa iray nasaglawi ed ontumbok ya artikulo, tan makapainteres itan ed siopa?

¹⁹ Agtayon balot abuloyan iramay manggula ed mensahe tayo manlapud Biblia a mamatalaw ed sikatayo tan mamaletey ed pananisia tayo. Singa saray kakabusol ya amasegsegang ed si Jeremias, saramay milaban ed sikatayo so diad tua et milalaban ed Dios. Ag-ira ontalona. Si Jehova, a mas mabiskeg ni nen saray mamubusol ed sikatayo, so angibaga: “Manalagar ka ed Jehova: ibalap mo so pusom et sikato pabiskegen to so pusom: on, manalagar ka ed Jehova.” (Salmo 27:14) Lapud pirmin nilamot ed puso tayo so paniilalo ed si Jehova, komon ta determinado itayon ag-onsuko a manggawa na maabig. Singa si Jeremias tan Baruc, manmatalek itayo a manani itayo no ag-itayo nakesawan.​—Galacia 6:9.

²⁰ Say panalona ed pakadismayaan so tuloytuloy a pipupuligesgesan parad dakel a Kristiano. Balet, saray kalangweran so nagkalalo lan nipapaarap ed saray subok. Balet walaan met ira na alay abig iran pankanawnawa. Say ontumbok ya artikulo so direktan manasaglawi ed saray tobonbalon walad limog tayo. Makapainteres met itan ed saray atateng tan ed amin a dedikadon wala la’d edad diad loob na kongregasyon a makatulong ed saray kalangweran ed kongregasyon diad panamegley na salita, alimbawa, tan direktan suporta ra.

Panon Yon Ebatan?

• Akin a nailaloan tayo iray makapadismayan kipapasen, tan siopa so nepeg a kerewan tayo na tulong?

• Panon ya atalonaan nen Jeremias so pakadismayaan anggaman ed mairap ya asainmin to?

• Anto so manggawa ed kapusoan tayo a ‘maliket tan magayaga’ anggaman ed saray kairapan?

[Tepetepet Parad Panagaral]

[Litrato ed pahina 9]

Inisip nen Jeremias a sikatoy uga-ugaw ni tan ag-eksperiensyado pian magmaliw a propeta

[Litrato ed pahina 10]

Anggaman napapasegsegang, amta nen Jeremias a walad dapag to si Jehova a “singa sakey a makapanyari tan sakey a makapataktakot”