Manpapapabiskegan Kayo

“Sarayan mismo et nagmaliw a makapabiskeg a tulong ed siak.”​—COLOSAS 4:11, NW.

1, 2. Anggaman ed saray kapeligroan, akin a si Pablo so binisita na saray kaaro to diad prisoan?

 MAPELIGRO so pagmaliw a kaaro na sakey a maniirap diad prisoan​—anggano say kaaro yo et agmakatunongan a nipriso. Nayarin paninapan kayo na saray opisyal na prisoan, ya iimanoen da so kada kiwas yo pian naseguro ra ya agkayo manggawa na krimen. Kanian, nakaukolan so pakpel diad maparanay a pitalosan yo ed kaaro yo tan sano bisitaen yo diad prisoan.

² Ingen, ontan so ginawa na arum ed saray kaaro nen apostol Pablo manga 1,900 a taon lay  apalabas. Ag-ira tinmakot ya ombisita ed si Pablo diad inkipangaw to pian mangiter ed sikato na nakaukolan a ligliwa tan panamaseseg tan pian sikatoy napabiskeg diad espiritual a paraan. Siopa irayan matoor a kakaaro? Tan anto so naaralan tayo ed inkakpel, katooran, tan pikakaaro ra?​—Uliran 17:17.

“Makapabiskeg a Tulong”

3, 4. (a) Siopa imay limaran kakaaro nen Pablo, tan anto so ginawa ra parad sikato? (b) Anto so “makapabiskeg a tulong”?

³ Pawilen tayo pa imay taon a 60 K.P. Nipriso si apostol Pablo diad Roma lapud palson panamakasalanan a sikatoy onsusumpa ed pakauley. (Gawa 24:5; 25:11, 12) Sinansakey a sinalambit nen Pablo so limaran Kristiano a tinmulong ed sikato: si Tiquico, say personal ya ibabaki to a nanlapu ed distrito na Asia tan ‘kaiban managlingkor ed Katawan’; si Onesimo, “say matoor tan inararo ya agi” a nanlapud Colosas; si Aristarco, sakey a taga-Macedonia a nanlapud Tesalonica tan aminsan ya ‘akaiba nen Pablo a nipangaw’; si Marcos, kapinsan na misionaryon kaiba nen Pablo a si Bernabe tan say managsulat na Ebanghelyo a ningaran ed sikato; tan si Justo, sakey ed saray kakimeyan na apostol “nipaakar ed panarian na Dios.” Oniay inkuan nen Pablo nipaakar ed sikaran lima: ‘Alimbawa ira bilang sakey a ligliwa [“makapabiskeg a tulong,” NW] ed siak.’​—Colosas 4:7-11.

⁴ Angusar si Pablo na mapuersan balikas nipaakar ed impanulong ed sikato na saray matoor a kakaaro to. Inusar to so salitan Griego (pa·re·go·riʹa) a nipatalos a “makapabiskeg a tulong,” a dia labat ed sayan bersikulo so pakaromogan ed satan diad Biblia. Sayan salita so walaan na dakel a kabaliksan tan nagkalalo lan inusar ed pantalos a panagpaabig. * Nipatalos itan a ‘tambayo, pamakepa, ligliwa, odino pakainawaan.’ Kinaukolan nen Pablo so ontan a nengneng na panamabiskeg, tan intarya itan na saraman a limaran lalaki.

No Akin a Kinaukolan nen Pablo so “Makapabiskeg a Tulong”

5. Anggaman ed impagmaliw ton apostol, anto so kinaukolan nen Pablo, tan anto so panapanaon a nakaukolan tayon amin?

⁵ Nayarin nasurprisa so arum no akin a kinaukolan nen Pablo, bilang sakey ya apostol, so panamabiskeg. On, talagan nakaukolan to itan. Tua, si Pablo so walaan na mabiskeg a pananisia, tan asungdoan to so pirmin panamairap ed pisikal, “saray lewet linmabas ed sukat,” “dia ed saray patey mabetbet,” tan arum niran ot-ot. (2 Corinto 11:23-27) Anggaman kuan, sikato so too lambengat, tan amin so mankaukolan no maminsan na ligliwa tan pakapabiskegan na pananisia ra diad tulong na arum. Tua itan anggan diad biang nen Jesus. Diad samay unor lan labi to, pinmatnag ed sikato so sakey ya anghel diad Getsemani tan “amabiskeg ed sikato.”​—Lucas 22:43.

6, 7. (a) Diad Roma, siopa so anismaya ed si Pablo, tan siopa so amaseseg ed sikato? (b) Anton nengneng na tulong so intarya na saray Kristianon agagi nen Pablo diad Roma, a pinaneknekan da so pagmaliw a “makapabiskeg a tulong”?

⁶ Nakaukolan met nen Pablo so panamabiskeg. Sanen sikato so sinmabi ed Roma bilang priso, sikato so ag-inabrasa na saray totoon ka-rasa to. Maslak ed saratan a Judio so agdinmengel ed mensahe na Panarian. Kayari na imbisita na manunaan a lalaki na saray Judio diad pasen ya inkipangawan nen Pablo, oniay inkuan na salaysay ed Gawa: “Saray arum anisia ra ed saray salita to, et saray arum ag-ira anisia. Et sanen ag-ira nankakasakey; tinmaynan ira.” (Gawa 28:17, 24, 25) Agaylay inkagonigon nen Pablo ed kakulangan day apresasyon ed agkanepegan a panangasi nen Jehova! Say mabiskeg a liknaan to ed sayan pamaakaran so apatnagan diad sulat to ed kongregasyon na Roma pigaran taon ed asasakbay: “Wala ed siak so baleg a kaermenan tan naynay a sakit ed pusok. Ta pampirawatan ko a siak a dili komon so nipulisay a manlapu ed Kristo nisengeg ed saray agagik [saray Judio], saray kakanayon ko unong ed laman.” (Roma 9:2, 3) Balet, diad Roma et aromog to iray matoor tan matuan kakaiba ya anambayo ed puso to lapud inkakpel  tan panangaro ra. Sikara so peteg ya espiritual ya agagi to.

⁷ Panon a pinaneknekan na saratan a limaran agagi so pagmaliw a makapabiskeg a tulong? Agda inabuloyan iray gulonggulong nen Pablo ed pangawan a mangamper ed itulong da ed sikato. Imbes, sikara so bulos-linawa tan maaron angitarya na personal a tulong ed si Pablo, a ginawa da iray kimey ya agto nagawaan a mismo lapud inkapriso to. Alimbawa, inmakto ira bilang mensahero tan intulor da iray sulat tan bilin nen Pablo ed nanduruman kongregasyon; impasabi da iray makapaseseg a report ed si Pablo nipaakar ed kipapasen na saray agagi ed Roma tan ed arum a pasen. Maseguron intaryaan da si Pablo na saray bengatlan nakaukolan to, a singa say kawes a parad panaon ya ambetel, saray lukot, tan uusaren ed panagsulat. (Efeso 6:21, 22; 2 Timoteo 4:11-13) Amin na saratan a pananulong so amabiskeg tan amaseseg ed nipangaw ya apostol kanian sikato, bilang resulta, so nagmaliw a “makapabiskeg a tulong” ed arum, kalaktip lay amin a kongregasyon.​—Roma 1:11, 12.

No Panon so Pagmaliw a “Makapabiskeg a Tulong”

8. Anton leksion so naaralan tayo ed mapaabeban impangawat nen Pablo ed pankaukolan to na “makapabiskeg a tulong”?

⁸ Anto so naaralan tayo ed sayan salaysay nen Pablo tan say limaran kakimeyan to? Imanoen tayo so sakey a leksion: Nakaukolan so panagpakpel tan dilin-panagsakripisyo diad itulong ed arum sano naeeksperiensya ra so kairapan. Niarum ni, nakaukolan so kapaabebaan pian bidbiren a nakaukolan tayo so tulong ed panaon na kagogonigon tayo. Aglambengat inaksobi nen Pablo a nakaukolan to so tulong noagta maapresya ton inawat so tulong tan kinomendaan to iramay angiter ed satan. Agto impasen a tanda na kaleteyan odino kababaingan so pangawat ed tulong na arum, kanian ontan met so nepeg a panmoria tayo. No ibaga tayon agtayon balot nakaukolan so makapabiskeg a tulong, kabaliksan na satan a mabiskeg itayo nen say too. Tandaan, ipapabitar na ehemplo nen Jesus ya anggan say ayadyarin too et nayarin sagpaminsan ya onkerew na tulong.​—Hebreos 5:7.

9, 10. Anto so nayarin maabig a resulta sano bidbiren na sakey a too so pankaukolan to na tulong, tan anto so nayarin epekto na satan ed arum a kabiangan na pamilya tan diad kongregasyon?

⁹ Saray maabig a resulta so onsabi sano awaten na saramay walad responsablin posisyon a sikara so walaan na saray limitasyon tan sikara so akadepende ed tulong na arum. (Santiago 3:2) Say ontan iran panamabidbir so mamabiskeg ed relasyon na saramay walad autoridad tan saramay manpapasakop ed satan ya autoridad, a mangiyaalibansa na makaaro tan bulos a pitatalosan. Say kapaabebaan na saramay mabulos a mangawat ed tulong so onkanan pakaaralan na arum a walad mipadparan kipapasen. Ipapatnag na satan a saramay mangidadaulo et totoo tan mainomay ya asinggeran.​—Eclesiastes 7:20.

¹⁰ Alimbawa, nayarin mainomay parad ugugaw so pangawat ed tulong na atateng diad pangarap ed saray problema tan tukso sano amta ra a nidunget met so atateng da diad mipadpara iran problema sanen ugugaw ni ra. (Colosas 3:21) Say maong a pitatalosan so lukas sirin ed baetan na ateng tan ugaw. Saray Makasulatan a solusyon so ninabang a mas epektibo tan lalon awaten. (Efeso 6:4) Mipadpara, saray membro na kongregasyon so mas akaparaan a mangawat ed tulong na saray mamatatken sano namoria ran aarapen met na saray mamatatken iray problema, katatakotan, tan pakagonigonan. (Roma 12:3; 1 Pedro 5:3) Ontan met, niwala so maong a pitatalosan, ninabang so Makasulatan a simbawa, tan manresulta itan ed kapabiskeg na pananisia. Tandaan, saray agagi tayo so mankaukolan na panamabiskeg natan nen say kapiganman.​—2 Timoteo 3:1.

11. Akin a dakerakel natan so mankaukolan na “makapabiskeg a tulong”?

¹¹ Inerman so panaayaman tayo, siopa itayo man, odino kaunongan lay edad tayo, amin tayo so managmak no maminsan na saray pakadesdesan ed bilay. Kabiangan la itan ed sayan mundo. (Apocalipsis 12:12) Saray makapadismayan kipapasen ed pisikal tan emosyonal so manubok ed kalidad na pananisia tayo. Nayarin onlesa iray makapasubok a kipapasen diad trabaho, diad eskuelaan, diad loob na pamilya, odino diad kongregasyon.  Nayarin say sengegan met na satan et seryoson sakit odino apalabas a trauma. Sano say sakey a kapareha, matatken, odino kaaro so mapangasin mangiter na panamaseseg tekep na makonsidera iran salita tan pananulong​—makapaabig itan a tuloy! Agayla, singa itan ipupuyok ed linmarag a baog! Kanian, no naimano yo so sakey ed saray agagi yo a naeermenan, magmaliw kayon makapabiskeg a tulong. No walay makapabelat a tuloy a problema yo, onkerew na tulong ed saramay maespiritual.​—Santiago 5:14, 15.

No Panon a Makatulong so Kongregasyon

12. Anto so nagawaan na kada sakey diad loob na kongregasyon pian napabiskeg iray agagi to?

¹² Amin diad kongregasyon, pati saray kalangweran, so makapabiskeg ed arum. Alimbawa, baleg so nagawaan na inkamaparanay yo ed saray miting tan diad lawak na kimeyan pian napabiskeg so pananisia na arum. (Hebreos 10:24, 25) Say pantultuloy yo ed sagradon panaglingkor so pakapatnagan na katooran yo ed si Jehova tan mangipatnag a mansiasiansia kayon aliing ed espiritual anggaman ed saray kairapan a nayarin pipupuligesgesan yo. (Efeso 6:18) Say ontan ya inkamaparanay so nayarin mamabiskeg ed arum.​—Santiago 2:18.

13. Akin a nayarin magmaliw ya inaktibo so arum, tan anto so nagawaan pian natulongan ira?

¹³ No maminsan, saray pakadesdesan ed bilay odino arum niran kairapan so nayarin mamatayer odino pansengegan na pagmaliw ya inaktibo na arum diad lawak na serbisyo. (Marcos 4:18, 19) Nayarin agtayo naiimano iray inaktibo diad saray aral ed kongregasyon. Ingen ta wala nin siansia so panangaro ra ed Dios diad puso ra. Anto so nagawaan pian napabiskeg so pananisia ra? Nayarin mangiyopresi iray mamatatken na maabig a tulong diad ibisita ed sikara. (Gawa 20:35) Nayarin kerewen met so itulong na arum a membro na kongregasyon. Say ontan a maaron ibibisita so nakaukolan a remedyo pian napabiskeg iramay maletey ed pananisia.

14, 15. Anto so insimbawa nen Pablo nipaakar ed panamabiskeg ed arum? Mangiter na alimbawa na sakey a kongregasyon ya angiyaplika ed simbawa to.

¹⁴ Say Biblia so manisimbawa ed sikatayo ya “ibalap yo so apunaw ed puso, tagano yo so saray makapuy.” (1 Tesalonica 5:14) Nayarin onkapuy iramay “apunaw ed puso” tan agda natalonaan iray babeng ya aarapen da no anggapoy ontulong ed sikara. Sarag yo kasi so ontulong? Say balikas a “tagano yo so makapuy” so nipatalos a “bembenan a malet” odino “ompeket ed” saray makapuy. Papablien tan aaroen nen Jehova so amin a karnero to. Agto ira momoriaen a singano anggapoy kakanaan da, tan agto labay a wala so onkasipa. Sarag yo kasi so ontulong ed kongregasyon a ‘mamemben a malet’ ed saramay makapuy ed espiritual anggad ombiskeg ira?​—Hebreos 2:1.

¹⁵ Dinalaw na sakey a matatken so sanasawa ya anem taon lan inaktibo. Oniay insulat na matatken: “Say maabig tan maaron panangiyansakit ya impatnag ed sikara na interon kongregasyon so walaan na mabiskeg ya epekto kanian pinmawil ira ed pulok.” Anto so liknaan na datin inaktibon agin bii nipaakar ed saray imbisita na saray membro na kongregasyon? Oniay inkuan to: “Say akatulong ed sikami pian magmaliw ya aktibo lamet et agbalot angipanengneng  na panaghusga odino makritikon awawey iramay agagin lalaki a binmisita ed sikami odino saray agagin bibii a kaiba ra. Imbes, sikara so makatalos tan angiter na Makasulatan a panamaseseg.”

16. Siopa so lawas akaparaan ya ontulong ed saramay mankaukolan na panamabiskeg?

¹⁶ On, panliliketan na sakey a masimoon a Kristiano so pagmaliw a makapabiskeg a tulong ed arum. Tan lapud panguuman na saray kipapasen ed bilay tayo, sikatayon mismo so nayarin makagamor na panamabiskeg manlapud saray agagi tayo. Balet, diad realistikon paraan et posible ya anggapo so toon makatulong ed sikatayo diad sakey a panaon na pankaukolan. Anggaman kuan, wala so sakey a Lapuan na biskeg a lawas akaparaan, lawas mabulos ya ontulong​—si Jehova a Dios.​—Salmo 27:10.

Si Jehova​—so Alenleneg a Lapuan na Biskeg

17, 18. Diad antoran dalan a pinabiskeg nen Jehova so Anak to, si Jesu-Kristo?

¹⁷ Sanen sikatoy akapasak ed kiew, oniay inkelyaw nen Jesus: “Ama, dia ed saray limam imatale’ko so espirituk.” (Lucas 23:46) Insan sikatoy inatey. Pigara nin oras sakbay ya agawa itan, sikato so inerel tan saray sankaapitan a kakaaro to so angikaindan ed sikato tan pinmayakot ira. (Mateo 26:56) Si Jesus so ataynan a manbukbukor a walaan lambengat na alenleneg a Lapuan na biskeg​—say mangatatawen ya Ama to. Balet, aliwan maapa so impanmatalek to ed si Jehova. Say katooran nen Jesus ed Ama to so atumangan na matoor a pananulong ed sikato nen Jehova.​—Salmo 18:25; Hebreos 7:26.

¹⁸ Diad interon ministeryo nen Jesus diad dalin, intarya nen Jehova ed Anak to so nakaukolan to pian napansiansia to so katooran to anggad patey. Singa bilang, kayarin tuloy na inkabautismoan nen Jesus, a gapoan lay ministeryo to, nadngel to so boses na Ama to a mangibabalikas na panangabobon tan panamaseguro na aro To ed sikato. Sanen kinaukolan nen Jesus so tulong, angibaki si Jehova na saray anghel pian mamabiskeg ed sikato. Sanen nipaarap si Jesus ed sankabalegan a subok ed sikato diad anggaan na mangaraldalin a bilay to, paborablin dinengel nen Jehova iray ey-ey tan pikakasi to. Maseguro ya amin na satan et makapabiskeg a tulong ed si Jesus.​—Marcos 1:11, 13; Lucas 22:43.

19, 20. Panon tayon naseguro a pabiskegen itayo nen Jehova diad panaon na pankaukolan?

¹⁹ Kaliktan nen Jehova so magmaliw a manunan Lapuan na biskeg tayo met. (2 Awaran 16:9) Say tuan Lapuan na amin a dinamikon biskeg tan pakapanyari so magmaliw a makapabiskeg a tulong ed sikatayo diad panaon na pankaukolan tayo. (Isaias 40:26) Say bakal, inkaduka, sakisakit, ipapatey, odino say agtayo inkayadyari so nayarin mangonigon ed sikatayon maong. Sano ompatnag a mairap lan tuloy iray subok ed bilay a singa la “mabiskeg a kabusol,” si Jehova so nayarin magmaliw a biskeg tan kasil tayo. (Salmo 18:17; Exodo 15:2) Sikato so walaan na mabiskeg a tulong ed sikatayo​—say masanton espiritu to. Diad panamegley na espiritu to, nayarian nen Jehova ya iter so “pakayari ed makapuy” ta pian sikato so ‘mamaatagey ya akapayak a singa agila.’​—Isaias 40:29, 31.

²⁰ Say espiritu na Dios so sankabiskegan a puersa ed uniberso. Oniay inkuan nen Pablo: “Nayarian ko a gawaen so ganagana ed saman so mamabiskeg ed siak.” On, say maaron mangatatawen ya Ama tayo so makapangiter ed sikatayo na “sankatageyan ya inkabaleg na pakayari” ta pian nasungdoan tayo so amin a makapaot-ot a problema ya anggad gawaen ton ‘balo so amin a bengatla’ diad insipan a Paraiso ya asingsingger la.​—Filipos 4:13; 2 Corinto 4:7; Apocalipsis 21:4, 5.

[Paimano ed leksab]

Kasin Natandaan Yo?

• Panon a pinaneknekan na agagi ed Roma a sikara so “makapabiskeg a tulong” ed si Pablo?

• Diad antoran paraan a magmaliw itayon “makapabiskeg a tulong” ed kongregasyon?

• Panon a si Jehova so alenleneg a Lapuan na biskeg?

[Tepetepet Parad Panagaral]

[Litrato ed pahina 18]

Pinaneknekan na agagi a sikara so “makapabiskeg a tulong” ed si Pablo diad impangiter da ed sikato na matoor a suporta, panamaseseg, tan personal a pananulong

[Litrato ed pahina 21]

Idadaulo na mamatatken so panamabiskeg ed pulok