Abraham tan Sara​—Naalig Yo so Pananisia Ra!

SIKATO so atawag ya “ama na amin day manisia.” (Roma 4:11) Walaan met na ontan a kalidad so inad-aro ton asawa. (Hebreos 11:11) Saray tutukoyen dia et say sanasawan matakot ed Dios, si patriarkan Abraham tan si Sara. Akin ya ontan lan napanuliranan ira ed pananisia? Anto so pigara ed saray subok a sinungdoan da? Tan antoy nagunggona tayo manlapud istorya na bilay da?

Impatnag nen Abraham so pananisia sanen sikatoy ingganggan na Dios a taynan so abung to. Inkuan nen Jehova: “Paway ka dia ed dalin mo, tan onarawi ka ed saray kakanayon mo, taynan ka ed abung nen amam ta onla ka ya angga ed sakey a dalin ya iturok ed sika.” (Genesis 12:1) Tinmulok so matoor a patriarka, lapud nibaga ed sikatayo: “Lapu ed pananisia si Abraham, sanen atawag, pian onla ed sakey a pasen ya awaten ton singa tawir, tinmulok; tan pinmaway, ya agto amta no iner so laen to.” (Hebreos 11:8) Imanoen pa no anto so nalalanor ed iyalis to.

Si Abraham so manaayam nensaman ed Ur, a natan et diad abalaten ya Iraq. Say Ur et sakey a maaligwas a sentro na Mesopotamia ya akinegosyo ed saray daldalin na Persian Gulf tan nayarin pati ed say Indus Valley. Impaliwawa nen Sir Leonard Woolley, ya angidirehi ed sistematikon impangotkot ed Ur, a diad panaon nen Abraham et maslak a kaabungan ditan so gawa ed laryo, a saray dingding so pinalitadaan tan pinaputi. Singa bilang, say abung na sakey a mayaman a mibabaley et duaran grado a walaan na sementadon patio ed pegley. Diad leksab so ayaman na saray komikimey ed abung tan saray bisita. Diad tagey, say dingding so apaliberan na gawa ed tablan balkonahe, a dadalanan a paonla’d saray silir a para labat ed pamilya. Lapud walaan iratan na 10 anggad 20 a silir, saratan ya ayaman so “maawa-awang tan dugaruga parad desente tan mainawan bilay tan, unong ed estandarte na Bukig et magarbo,” so inkuan nen Woolley. Saratan so “matalonggaring a kaabungan na sibilisadon totoo tan amenek ed pankaukolan na maasenson bilay ed syudad.” No tinaynan nen Abraham tan Sara so ontan a klase na ayaman pian manayam ira ed saray kubong-kubong, baleg so insakripisyo ra pian unoren si Jehova.

Say primeron inalisan nen Abraham a kaibay pamilya to et diad Haran, a natan et diad amianen a Sirya, insan amaarap ira ed Canaan. Manga 1,600 kilometro so kaarawi na satan, a talagan makapakapuy a baroyen parad sakey a maedad lan sanasawa! Sanen tinmaynan ira ed  Haran, si Abraham so manedad na 75 tan si Sara et 65.​—Genesis 12:4.

Anto kasi alikna nen Sara sanen imparungtal nen Abraham a taynanan da so Ur? Nayarin nampagaan to so itaynan ed kaligenan na mainawan ayaman, iyalis ed dalin ya agda amta a nayarin maruksa ni, tan say pambilay a walay kairapan. Anggaman kuan, mapasakop si Sara, ya impasen to si Abraham bilang “katawan” to. (1 Pedro 3:5, 6) Ipapasen na arum ya iskolar a satan so pakapatnagan na “nipasal lan mapagalang ya awawey tan kakikiwas [nen Sara] ed sikato,” a mamaneknek ed “peteg a niyugali lan panagnonot tan liknaan.” Balet manuna ed amin, si Sara so nanmatalek ed si Jehova. Say inkamapasakop tan pananisia to so maabig ya ehemplo parad Kristianon kaasawaan a bii.

Tua, agkekerewen ed sikatayo a taynan so ayaman tayo pian tuloken so Dios, anggaman tinaynan na saray arum a sigpot panaon ya ebanghelisador so ayaman da pian nipulong so maong a balita diad sananey a bansa. Inerman so panseserbian tayo ed Dios, sikato so mangasikaso ed saray pankaukolan tayo, daput no iyuuna tayo ed bilay so intereses na Panarian.​—Mateo 6:25-33.

Agnagbabawian nen Sara tan si Abraham so desisyon da. “Tua a no nanonotan da komon so nanlapuan dan baley wala so baraan da komon ya ompawil,” so inkuan na apostol Pablo. Balet ag-ira pinmawil. Lapud matalek ira a si Jehova et “mananumang ed saray manaanap ed sikato,” anisia ira ed saray sipan to. Ontan met so gawaen tayo no labay tayoy mantultuloy ed sigpot-kamarerwan debosyon tayo ed si Jehova.​—Hebreos 11:6, 15, 16.

Espiritual tan Materyal Iran Kayamanan

Sanen akasabi lay Abraham ed Canaan, oniay imbaga na Dios ed sikato: “Dia ed ilalak mo so pangiteran ko naani ed sayan dalin.” Bilang kiwas, si Abraham so angipaalagey  na altar tan tinmawag “ed ngaran nen Jehova.” (Genesis 12:7, 8) Pinayaman nen Jehova si Abraham, tan dakerakel so walad kampamento to. Aminsan et tinugyop to so 318 a nipasal a lalaki, ariripen a nianak ed sankaabungan to, kanian nisuheri a say “karakel na ami-amin a walad kampamento to so inmabot ed masulok a sanlibo.” Diad antokaman a rason, sikatoy impasen na totoo a “prinsipe na Dios.”​—Genesis 13:2; 14:14; 23:6.

Indaulo nen Abraham so panagdayew, ya imbabangat to so sankaabungan to a “tontonen [da] so dalan nen Jehova a manggawa na kaalasan tan kaptekan.” (Genesis 18:19) Saray Kristianon ulo na pamilya natan so napaseseg ed ehemplo nen Abraham a matalona diad impangibangat ed saray membro na sankaabungan to a manmatalek ed si Jehova tan onkiwas a matunong. Agpankelawan sirin a say Ehipsion aripen a bii nen Sara a si Hagar, say sankamasikenan ya aripen na patriarka, tan say anak nen Abraham a si Isaac so nanmatalek ed si Jehova a Dios.​—Genesis 16:5, 13; 24:10-14; 25:21.

Managpareen si Abraham

Ipaparungtal na saray agawgawa ed bilay nen Abraham a sikato so walaan na maridios a personalidad. Imbes a paulyan to so kolkolan ed baetan na saray pastol to tan saray pastol nen kaanakan ton Lot, insuheri nen Abraham a pansianen la ray grupo ra tan impanpili to so mas malangwer a lakin si Lot na dalin a kaliktan to. Managpareen si Abraham.​—Genesis 13:5-13.

No bilang ta manpili itayo ya ipilit so kanepegan tayo odino manpalugar la pian napansiansia so kareenan, nonoten tayo ya agpinaulyan nen Jehova a manirap si Abraham lapud impamalugar to ed si Lot. Diad kasunian, insipan na Dios ed si Abraham tan ed bini to so amin a dalin a nabantag to. (Genesis 13:14-17) “Maliket iray managpareen,” so inkuan nen Jesus, ‘ta ingaran ira ya anak na Dios.’​—Mateo 5:9.

Siopa so Magmaliw a Mananawir nen Abraham?

Si Sara so nansiansian lepes anggaman ed saray sipan nipaakar ed bini. Imparungtal nen Abraham iyan pamaakaran ed Dios. Kasin say aripen ton si Eliezer so manawir ed amin a kayarian to? Andi, lapud inkuan nen Jehova: “Aliwan manawir naani ed sika so satan a laki; noag say manlapu naani ed loob mo sikato so mananawir naani ed sika.”​—Genesis 15:1-4.

Balet, anggapo ni so ilalak di Abraham tan Sara, tan say 75 años a Sara so naandian lay ilalon manlukon. Kanian, imbaga to ed si Abraham: “Si Jehova sinebelan to ak a mananak; kerewen ko ed sika ya onloob ka ed aripen ko; et nayari a wala naani ana’ko ed sikato.” Inala sirin nen Abraham si Hagar bilang komaduan asawa, akiakdol ed sikato, tan sikatoy nanlukon. Sanen naamtaan nen Hagar a sikatoy malukon, ginapoan ton binalaw so amo ton bii. Inmey-ey si Sara ed si Abraham insan to pinabaingan si Hagar, kanian sikatoy tinmaynan.​—Genesis 16:1-6.

Si Abraham tan Sara so kinmiwas unong ed papanisiaan dan susto, diad impangagamil na kurang a mitunosan ed saray kustombre ed panaon da. Balet, aliwan satan so paraan nen Jehova parad bini nen Abraham. Nayarin say kultura tayo so mangidikta a duga iray kiwas tayo diad nanduruman kipapasen, balet agto labay ya ibagan aabobonan itan nen Jehova. Nayarin duman tuloy so panmoria to ed kipapasen tayo. Kanian, kaukolan tayoy paiwanwan ed Dios, ya ipikasin ipaamta to ed sikatayo so paraan a labay ton ikiwas tayo.​—Salmo 25:4, 5; 143:8, 10.

Anggapo so Bengatlan “Mairap ed Jehova”

Diad kaunoran, angiyanak si Hagar ed si Abraham na sakey a laki a nginaranan na Ismael. Ingen, aliwan sikato imay insipan a Bini. Si Sara a mismo so mangiyanak ed satan a  mananawir, anggaman sikatoy akulaw la.​—Genesis 17:15, 16.

Sanen impaseguro na Dios a mangiyanak si Sara ed asawa to na sakey ya anak a laki, “si Abraham tinmuek tan inmelek insan to inkuan ed puso to, Nianak ni kasi sakey ya ugaw ed too a sanlasus taon to la? Tan si Sara a siamaplo so taon to la mananak ni kasi?” (Genesis 17:17) Nadngel nen Sara itan a mensahe sanen imbaga lamet na sakey ya anghel kanian sikatoy “akalek ed loob ton dili.” Balet ta anggapo so bengatlan “mairap ed Jehova.” Makapanmatalek itayon nagawaan to so antokaman a panlabayan to.​—Genesis 18:12-14.

Kanian ‘lapu ed pananisia, si Sara inawa’to so pakayari a mangilukon na sakey ya anak, sanen sikato so linmabas la ed taon, ta sinisia to a matoor so nanggawa na sipan.’ (Hebreos 11:11) Diad kaunoran, inyanak nen Sara si Isaac, a say ngaran to et mankabaliksay “Elek.”

Sigpot a Panagmatalek ed Saray Sipan na Dios

Impabidbir nen Jehova si Isaac bilang say abayag lan tatalaranan a mananawir. (Genesis 21:12) Kanian maseguron abigla si Abraham sanen kinerew ed sikato na Dios ya ibagat so anak to. Ingen, walay malet a basiyan nen Abraham pian sigpot a manmatalek ed Dios. Agkasi nayarian nen Jehova a paolien si Isaac? (Hebreos 11:17-19) Agta inmuna lan pinaneknekan nen Jehova so pakapanyari to diad mamilagron impangipawil to ed pakayari nen Abraham tan Sara a manilalak pian nianak si Isaac? Si Abraham so akaparaan ya ontulok lapud sikatoy kombinsido ed pakayari na Dios a manumpal ed saray sipan To. Tua a sikatoy pinugeran ed aktual a pamatey ed anak to. (Genesis 22:1-14) Anggaman ontan, say ginawa nen Abraham nipaakar ed saya so ontulong ed sikatayon natebek no panon kairap parad si Jehova a Dios ya ‘iter so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.’​—Juan 3:16; Mateo 20:28.

Lapud pananisia nen Abraham ed Dios, amta to ya agnayarin mangasawa na palson managdayew diad dalin na Canaan so mananawir ed saray sipan nen Jehova. Konsintien kasi na sakey a maridios ya ateng so piasawa na anak to ed siopaman ya agmanlilingkor ed si Jehova? Si Abraham sirin so nananap na matukoy ya asawa parad si Isaac diad limog na saray kakanayon to ed Mesopotamia, a masulok a 800 kilometro so kaarawi. Benendisyonan nen Jehova itan ya impansagpot diad impangipatnag ton si Rebeca so bii a pinili ton magmaliw ya asawa nen Isaac tan unonan ateng na Mesias. On, “pinapalar [nen Jehova] si Abraham diad ami’ ganagana.”​—Genesis 24:1-67; Mateo 1:1, 2.

Bendisyon ed Amin a Nasyon

Si Abraham tan Sara so napanuliranan diad impansungdo ra ed saray subok tan diad impangagamil da na pananisia ed saray sipan na Dios. Say kasumpalan na saratan a sipan so  makana ed magnayon ya ilalo na katooan, lapud oniay impaseguro nen Jehova ed si Abraham: “Ta dia ed ilalak mo so pakapikapalaranan na saray amin a nasyon dia; lapu ed tinulok mo so boses ko.”​—Genesis 22:18.

Siempre, si Abraham tan Sara so ag-ayadyari, a singa sikatayo met. Balet, sanen atalosan da so linawa na Dios, sikaray aliston angunor ed satan​—anggan panon lay kabaleg na isakripisyo ra. Kanian nonodnonoten si Abraham bilang “kaaro na Dios” tan si Sara bilang ‘masanton bii a nanilalo ed Dios.’ (Santiago 2:23; 1 Pedro 3:5) Diad panggunaet tayon mangalig ed pananisia nen Abraham tan Sara, napanggayagaan tayo so mablin pisisiglaotan ed Dios. Nagunggonaan itayo met ed saray mablin sipan nen Jehova ed si Abraham.​—Genesis 17:7.

[Litrato ed pahina 26]

Lapud pananisia ra, benendisyonan nen Jehova si Abraham tan Sara na sakey ya anak a laki anggaman matakken la ra

[Litrato ed pahina 28]

Say ehemplo nen Abraham so ontulong ed sikatayon natebek no anto so alikna nen Jehova diad impangiyabuloy to ed bogbogtong ya anak to ya ompatey