Nayarian Mon Paliketen so Dios

PETEG kasin naapektaan tayo so pakalikna na Dios? Kasin nayarian na Dios so manliket? Inukeran na sakey a diksionaryo so salitan “Dios” bilang “say supremo odino sankatageyan a persona.” Panon to no satan a makapakelkelaw a persona et sakey lambengat a puersa? Kasin nailaloan tayon manliket so sakey a puersa ya aliwan persona? Andin balot. Balet, imanoen so ibabaga na Biblia nipaakar ed Dios.

“Say Dios sikatoy sakey ya Espiritu,” so inkuan nen Jesu-Kristo. (Juan 4:24) Say espiritu et sakey a nengneng na bilay a miduma ed totoo. Anggaman agnanengneng na too, say espiritu so walaan na laman​—“laman ed inka-espiritu.” (1 Corinto 15:44; Juan 1:18) Diad impangusar ed saray piguratibon panagsalita, tinukoy met na Biblia a say Dios et walaan na saray mata, layag, lima, tan arum nira. * Walaan met na ngaran so Dios​—Jehova. (Salmo 83:18) Sirin, say Dios ed Biblia et sakey ya espiritun persona. (Hebreos 9:24) “Sikato so mabilay a Dios, tan andi-anggaan ya Ari.”​—Jeremias 10:10.

Bilang peteg a mabilay a persona, nayarian nen Jehova so mannonot tan onkiwas. Sikatoy walaan na saray kalidad tan liknaan, labay tan aglabay. Diad tua, dakerakel so balikas ed Biblia a mangipaparungtal ed saray bengatlan makapaliket tan agmakapaliket ed sikato. Bangta saray dirios tan talintao a ginaway-too so mangipapatnag lambengat ed ug-ugali tan saray kalidad na toon angimbento ed saratan, si Jehova, a makapanyarin-amin a Dios, so mismon Amawala na saray emosyon ya inyan to ed totoo.​—Genesis 1:27; Isaias 44:7-11.

Andi-duaruwan si Jehova et “maliket a Dios.” (1 Timoteo 1:11, NW) Agto labat panliliketan iray kimey to ed panamalsa noagta panliliketan to met so panumpal ed gagala to. Oniay inyabawag nen Jehova panamegley nen propeta Isaias: “Gawaen ko naani so amin a labay ko . . . On, sinalitak, gawaen ko naani ya onlabas met; ninonot ko, sikato naani met so gawaen ko.” (Isaias 46:9-11) Oniay inkanta na salmista: “Si Jehova manggayaga ed saray kimkimey to.” (Salmo 104:31) Balet wala ni so sananey a mamaliket ed Dios. Inkuan to: “Ana’ko, onkabat ka, tan paliketen mo so pusok.” (Uliran 27:11) Isipen pa so kabaliksan na satan​—nayarian tayon paliketen so Dios!

No Panon Tayon Napaliket so Dios

Konsideraen no panon ya apaliket nen patriarkan Noe si Jehova. “Si Noe [et] akagamor na grasya ed saray mata nen Jehova” lapud “[sikatoy] sakey a too a maptek tan nagnap ed saray kapolian to.” Diad pirmin pidumaan ed marelmeng a totoo ed saman a panaon, say pananisia tan katutulok nen Noe so amaliket a tuloy  ed Dios kanian nibaga a “si Noe [so] akiulop-ulop ed Dios.” (Genesis 6:6, 8, 9, 22) “Lapu ed pananisia si Noe . . . nensaman aragdag ed mapagalang a takot, angiparaan na sakey a biong a kilabanan na abung to.” (Hebreos 11:7) Apaliket si Jehova ed si Noe kanian sikato tan say pamilya to so benendisyonan To diad impangiliktar ed sikara diad saman a magulon panaon na awaran na too.

Kabkabat a tuloy nen patriarkan Abraham so liknaan nen Jehova. Apatnagan so aralem a pikakabat to ed kanonotan na Dios sanen impakabat nen Jehova ed sikato a deralen To so Sodoma tan Gomorra lapud kaugsan da. Talagan kabkabat nen Abraham si Jehova lapud nibaga to ya agmakatunongan a say Dios et pideral to so matunong a too ed marelmeng. (Genesis 18:17-33) Pigaran taon ed saginonor, bilang katutulok to ed bilin na Dios, “insaklang [nen Abraham] si Isaac,” lapud “momotekteken to ya anggan dia ed saray inatey ni, nayarian na Dios so mamaalagey ed sikato.” (Hebreos 11:17-19; Genesis 22:1-18) Si Abraham so mikabisadon tuloy ed liknaan na Dios tan impatnag to so mabiskeg a pananisia tan katutulok kanian ‘sikatoy ningaran a kaaro nen Jehova.’​—Santiago 2:23.

Say sananey nin too a nanggunaet a mamaliket ed Dios et si Arin David na kadaanan ya Israel. Oniay inkuan nen Jehova nipaakar ed sikato: “Nalmok si David, anak nen Jesse, laki a maunor ed pusok, a sikato so manggawa naani na amin a kaliktan ko.” (Gawa 13:22) Sakbay ya inmarap ed higanten Goliat, si David so sigpot a nanmatalek ed Dios tan oniay inkuan to ed Saul, ya ari na Israel: “Si Jehova ya angilaban ed siak ed sali na leon, tan ed sali na oso, ilaban to ak naani ed lima na saya a Filisteo.” Benendisyonan nen Jehova so impanmatalek nen David ed Sikato, a tinulongan Toy David a napatey si Goliat. (1 Samuel 17:37, 45-54) Kinaliktan nen David ya aliwan saray kiwas to labat noag pati ‘saray salita to tan dalepdep na puso to so naako ed pakanengneng nen Jehova.’​—Salmo 19:14.

Komusta itayo balet? Panon tayon napaliket si Jehova? Diad lalon pakaaral tayo nipaakar ed liknaan na Dios, lalon naamtaan tayo no anto so nagawaan tayo pian napaliket so Dios. Sirin, legan tayon babasaen so Biblia, importante a pansagpotan tayon aralen so liknaan na Dios ta pian ‘napano itayo na kakabatan na linawa to ed amin a karunongan a maespiritu tan pakatalos, a mankurang itayo a makana ed Katawan ya onarap ed amin a makapaliket.’ (Colosas 1:9, 10) Bilang resulta, say pikakabat so ontulong ed sikatayon ombiskeg ed pananisia. Saya so makana lapud “no anggapo so pananisia agnayarin paliketen [so Dios].” (Hebreos 11:6) On, diad pansagpot tayon pabiskegen so pananisia tayo tan diad pangitunos ed bilay tayo ed linawa nen Jehova, napaliket tayo so puso to. Ontan met, nepeg tayon alwaran ya agnasakitan so liknaan nen Jehova.

Agsasakitan so Liknaan na Dios

Say sakey ya alimbawa no panon ya asakitan so liknaan nen Jehova et naromog diad salaysay nipaakar ed panaon nen Noe. “Say dalin napno nensaman na karawalan. [Kanian] say Dios ninmengneng ed dalin et, nia, sikato so inmuges; ta amin a laman pinauges to so kagagawa to ed dalin.” Anto so alikna na Dios diad impakanengneng to ed kaugsan tan karawalan? ‘Si Jehova impangoli-oli to so linawa to a nanggawa ed too ed dalin,’ so kuan na Biblia, ‘tan amasinagel itan ed puso to.’ (Genesis 6:5, 6, 11, 12) Naermenan so Dios lapud inmuges a lalo so kondukta na totoo kanian kinaukolan ton umanen so awawey to ed saray marelmeng a kailalakan ed sakbay na Delap. Lapud apaermen a tuloy ed inkarelmeng da, say Dios a walaan na awawey a Manamalsa ed totoo so nagmaliw a managderal ed sikara.

Agonigon met si Jehova sanen nantultuloy ya imbaliwala na mismon totoo to, say  kadaanan a nasyon na Israel, so liknaan to tan say maaron panangidirehi to. Oniay intagleey na salmista: “Alay betbet na insunggay da ed sikato ed kalawakan, tan impamabarong da ed sikato ed kabueran a lawak! Lanti, binmeneg ira tan tinukso ra so Dios, tan pinasanok da so Santo na Israel.” Ingen, “sikato, bangta napno na sibeg, pinerdona to so kasulitan da, et agto ra ginaygay; lanti, aminpigapiga a pinaekal to so petang na ulo to, tan agto pinetdak so amin a sanok to.” (Salmo 78:38-41) Anggaman makatunongan a sinagmak na saray rebelyoson Israelita iray nansumpalan na dilin inkamakasalanan da, ibabaga ed sikatayo na Biblia a “dia ed amin ya irap da [say Dios] so apairap.”​—Isaias 63:9.

Anggaman ed dakel a pakapatnagan na matamoy a liknaan na Dios ed sikara, say baley na Israel et “niludlurey da so saray igaganggan na Dios, tan minudmora ra so saray salita to, tan binalaw da so saray propeta to, angga ed say sanok nen Jehova inmalagey sumpa ed baley to, angga ed anggapo so pamaakaran.” (2 Awaran 36:16) Diad kaunoran, lapud impantultuloy da ed panagrebeldi, “pinaermen da so masanto ya espiritu to” ya anggad punto ya abalang da so pabor nen Jehova. (Isaias 63:10) Anto so resulta? Say Dios so makatunongan ya angekal na pananalimbeng to ed sikara, tan sinagmak da so desyang sanen sinakop na saray taga-Babilonia so Juda tan dineral da so Jerusalem. (2 Awaran 36:17-21) Agaylan makapaermen sano lablabayen a gegemtanen na totoo so makasalanan a kurang na bilay a makapasakit tan makapagonigon ed Manamalsa ra!

Ipapalinew ed sikatayo na Biblia a pirmin nasakitan so Dios ed agmatunong a kondukta. (Salmo 78:41) Kabiangan ed saray bengatlan makapasakit​—a makapadimla ni ingen​—ed Dios et say inkamapaatagey, panagtila, panagpatey, panangagamil na mahika, panagparles, panagdayew ed inmunan atateng, mabanday iran moralidad, homoseksualidad, agkatooran ed asawa, insesto, tan panaglames ed mairap-bilay.​—Levitico 18:9-29; 19:29; Deuteronomio 18:9-12; Uliran 6:16-19; Jeremias 7:5-7; Malaquias 2:14-16.

Panon a momoriaen nen Jehova so idolatriya? Oniay ibabaga na Exodo 20:4, 5: “Agka manggawa na nipaakar ed sika na pinanday a talintao, odino say kapadpara na antokaman a nengneng na wala ed tawen ed tagey, odino wala dia ed dalin ed leksab, odino wala dia ed danum ed leksab na dalin. Agka ondakmomo ed sikara, nisay manlingkor ka ed sikara.” Akin? Lapud say talintao “so sakey a karimdimla ed si Jehova.” (Deuteronomio 7:25, 26) Oniay impasakbay nen apostol Juan: “Ana’ko ran ankekelag, arawian yo so saray kinon-diosdiosan.” (1 Juan 5:21) Tan oniay insulat nen apostol Pablo: “Inararok ira, ibatikan yo so saray talintao.”​—1 Corinto 10:14.

Anapen so Panangabobon na Dios

“Say pikakaaro [na Dios] wala ed maptek.” Saramay “ayadyari ed dalan da sikara so kalikliket to.” (Uliran 3:32; 11:20) Diad pisunian, saraman so mantutultuloy a mamapasakit ed Dios diad pangibabaliwala ra ed matunong a liknaan to so magano lan managmak na sanok na Dios. (2 Tesalonica 1:6-10) On, magano to lan panampoten so amin a karelmengan a kasmak la natan.​—Salmo 37:9-11; Sofonias 2:2, 3.

Balet, ipapabitar na Biblia a si Jehova et “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Mas lablabayen to so pangipatnag na panamabli ed matunong a totoon mangaaro ed sikato nen say pangipatnag to na sanok ed saraman so agmalabay a manguman. Manliket si Jehova, aliwan “[diad] ipapatey na marelmeng; noag ingen say marelmeng ompawil komon a manlapu ed dalan to tan manbilay.”​—Ezequiel 33:11.

Kanian anggapo so nakaukolan a magmaliw a puntirya na sanok nen Jehova. “[Si Jehova]  maabagey a tuloy, tan mapangasi.” (Santiago 5:11) Diad sigpot a panmatalek ed liknaan na Dios, nayarian yon ‘imatalek ya amin ed sikato so kapagaan yo, ta sikato asikasoen to kayo.’ (1 Pedro 5:7) Tandaan a saraman so mamapaliket ed Dios so walaan na alay abig ya ilalon manggayaga ed panangabobon tan pikakaaro to. Kanian, lalon inkaganatan la natan nen say kapiganman ya ‘anapen so kaliktan na Katawan.’​—Efeso 5:10.

Makapakelkelaw a tuloy a say Dios, diad agkanepegan a kaabigan to, so angiparungtal ed saray maglorian kalidad tan liknaan to! Tan nayarian mo a paliketen so puso to. No pilalek mon gawaen itan, pasesegen mi kan mitalosan ed saray Tasi nen Jehova diad lugar yo. Maliket dan ibangat ed sika so aromog dan praktikal tan sarag a dampoten diad panggugunaet dan napaliket so Dios.

[Paimano ed leksab]

[Kahon ed pahina 7]

Akin a Deneskribe na Biblia so Dios Diad Impangusar ed Atributos na Too?

Lapud say ‘Dios et sakey ya Espiritu,’ sikato so agtayo nanengneng diad saray literal a mata tayo. (Juan 4:24) Kanian angusar so Biblia na saray piguratibon panagsalita, a singa saray simile, metapora, tan anthropomorphism pian natalosan tayo so inkabiskeg, inkatalonggaring, tan saray kimey na Dios. Say anthropomorphism (“nengneng na too” diad Griego) et pananukoy ed bengatla ya aliwan too unong ed personalidad na too. Kanian anggaman agtayo amta no antoy itsura na espiritun laman na Dios, say Biblia so anukoy ed Dios bilang walaan na saray mata, layag, lima, taklay, gamet, sali, tan puso.​—Genesis 8:21; Exodo 3:20; 31:18; Job 40:9; Salmo 18:9; 34:15.

Satan a deskriptibon panagsalita so agmankabaliksan a mipara so nengneng na espiritun laman na Dios ed nengneng na saray kabiangan ed laman na too. Agnepeg a talosan so anthropomorphism diad literal a paraan. Ontulong lambengat iratan ed totoo pian natalosan da a nagkalalo so nipaakar ed Dios. No anggapo iratan a piguratibon panagsalita, nayarin mairap, no ag-imposible, a natalosan na totoo lambengat so antokaman a deskripsion nipaakar ed Dios. Balet, agkabaliksan na satan ya inimbento na totoo so personalidad nen Jehova a Dios. Ipapabitar na Biblia a pinalsa so too ya inyulibay ed Dios​—aliwa a say Dios so inyulibay ed too. (Genesis 1:27) Lapud saray managsulat na Biblia so ‘pinuyanan na Dios,’ diad tua et say impangilitrato ra ed personalidad na Dios so deskripsion to a mismo nipaakar ed dili iran kalidad to​—saray mismon kalidad ya inyan to ed toon pinalsa to diad nanduruman laknab. (2 Timoteo 3:16, 17) Imbes a saray kalidad na too so inyan ed Dios, saratan so peteg a kalidad na Dios ya inyan ed too.

[Litrato ed pahina 4]

Si Noe et akagamor na pabor ed imaton nen Jehova

[Litrato ed pahina 5]

Si Abraham so mikabisado ed liknaan na Dios

[Litrato ed pahina 6]

Si David so sigpot a nanmatalek ed si Jehova

[Litrato ed pahina 7]

Legan mon babasaen so Biblia, naaralan mo no panon a napaliket so Dios

[Picture Credit Line ed pahina 4]

Diad panangiyabuloy na Anglo-Australian Observatory, nilitrato nen David Malin