No Panon a Nagamoran so Andukey tan Maliket a Bilay

“IBABAGA na arum a totoo a balang sakey so malabay a manbilay na andukey, balet anggapoy malabay ya ontakken. Maniilalo so dakel a totoon magano lan manretiro a sikaray nawalaan na babaleg a panaon parad personal iran interes tan mas daiset iran responsabilidad. Ingen ta antakot da so magmaliw ya andian na direksion tan kakanaan. Antakot da met so manbukbukor, manermen, tan onkapuy ed bunigas.

Anto sirin so sekreto na maliket a bilay? Parehon mamaliket ed saray ugugaw tan maedad la so maong a kakaaro tan say maaron pamilya. Balet aliwan say nagawaan na arum a pamaliket ed sakey a maedad la so sankaimportantian. Say nagkalalon importante et say nagawaan na mas matakken ya indibidual parad arum.

Impanengneng na sakey ya abayag ya impanaral ed 423 a maedad lan sanasawa a say “inkamatulong ed arum a totoo so nayarin mamarukey na mismon bilay tayo.” Si Stephanie Brown, ya angidaulo ed panagaral, so angipaliwawa: “Ipapatnag na sarayan nalmoan ya aliwan say naaawat tayo ed pisisiglaotan ed arum so importante; noagta say niiiter tayo.” Nayarin laktipen na saya so panulong ed arum dia ed kimey ed abung, pangasikaso ed saray ugugaw, pagmaliw ya ibabaki, pangitaryay naluganan, odino italineng ed sakey a kaukolan to so mangibesngaw.

Ngalngali 2000 taon la so apalabas, oniay inkuan nen Jesu-Kristo: “Lalo a mapalar so mangiter nen say mangawat.” (Gawa 20:35) Say pakagamor ed andukey tan maliket a bilay so ag-akadepende ed pakawalaay baleg a kantidad na kuarta odino ed saray terapi tan dieta a pangontra ed itatakken. Imbes, akadepende itan diad pantultuloy ya aktibo tan pangiter na sakey ed panaon, kasil, tan biskeg to pian napaaligwas so bilay na arum.

Anggaman ontan, aliwan magenap so pangiter tayo na panaon, kasil, tan biskeg pian nipaliis itayo manlapud itatakken, sakit, tan ipapatey. Say Panarian na Dios labat so mamaandi ed saratan. Diad uley na satan, naandi la so sakit tan anggan say ‘ipapatey anggapo la naani.’ (Apocalipsis 21:3, 4; Isaias 33:24) Diad tua, saray matulok a totoo so manbilay a maliket ed ando lan ando diad paraison dalin. (Lucas 23:43) Maliket iray Tasi nen Jehova ya inabang ed arum iyan nibase’d Biblian paraan parad pakagamor na andukey tan maliket a bilay.