Saray Maedad la​—Mabmablin Kabiangan na Kristianon Impanaagi Tayo

“Sikara so nitanem ed loob na abung nen Jehova, onaligwas ira . . . Sikara manbunga ni ran siansia ed inkamasiken.”​—SALMO 92:13, 14.

1. Panon so panmoria na dakel a totoo ed saray maedad la?

 AAROEN nen Jehova so amin a matoor a lingkor to, kalaktip la iramay maedad la. Balet, unong ed sakey a kalkulasyon ed bansa na Estados Unidos, kada taon et ngalngali kapalduan milyon a maedad la so naaabuso odino papaulyanan. Ipapabitar na saray miparan report ed interon mundo a say panag-abuso ed saray maedad la et sankagloboan a problema. Tinukoy na sakey ya organisasyon a say sengegan na satan a problema et “say kasmak ya awawey ed limog na dakel a totoo . . . ya anggapo lay kakanaan, anggapo lay nagawaan tan akadepende la’d arum iray maedad la.”

2. (a) Panon so panmoria nen Jehova ed saray matoor a maedad lan lingkor to? (b) Anton makapaligsay-puson panangideskribe so naromog tayo ed Salmo 92:12-15?

² Papablien nen Jehova a Dios iray matoor a maedad lan lingkor to. Iyaapasakey to so imano to ed ‘loob ya inkatoo tayo’​—say kipapasen tayo ed espiritual​—imbes a diad saray limitasyon tayo ed pisikal. (2 Corinto 4:16) Diad Salita to, say Biblia, naromog tayo so onggendan a makapaligsay-puson panamaseguro: “Say matunong onsalindak a singa say kiew a palma: sikato ontubo a singa sakey a cedro ed Libano. Sikara so nitanem ed loob na abung nen Jehova, onaligwas ira ed arap na abung na Dios tayo. Sikara manbunga ni ran siansia ed inkamasiken; sikara makbol tan malambot ira. Sikato so pangipanengnengan a si Jehova et maptek.” (Salmo 92:12-15) Say pangonsidera ed sarayan bersikulo so mangiparungtal ed saray aspekto na makanakana iran tulong yo ed Kristianon impanaagi bilang maedad la.

“Manbunga ni Ran Siansia ed Inkamasiken”

3. (a) Akin a niyaliling iray matunong diad saray kiew a palma? (b) Panon a ‘manbunga iray maedad la ed inkamasiken da’?

³ Inyaliling na salmista iray matunong ed saray kiew na palma ‘a nitanem ed loob na abung na Dios tayo.’ Sikara so ‘manbubunga nin siansia ed inkamasiken da.’ Agkayo kasi mipakna a makapaseseg iyan kanonotan? Saray masanting tan maptek a kiew na palma et sakey labat ya ordinaryon nenengnengen diad saray patio ed Bukig nen panaon na Biblia. Nilikud ed panguusar ed satan bilang dekorasyon, papablien iray palma lapud dakel a bunga ra, ya arum ed saratan a kiew et mantultuloy a manbunga ed loob na masulok a sanlasus a taon. * Diad pansiansia yon niletneg ed tuan panagdayew,  sikayo met so “mamabunga ed ganaganan maabig a gawa.”​—Colosas 1:10.

4, 5. (a) Anton importantin bunga so nakaukolan a pawalaen na saray Kristiano? (b) Mangiter na Makasulatan iran alimbawa nipaakar ed saray maedad la ya amawala na “bunga na saray bibil.”

⁴ Iilaloan nen Jehova iray Kristiano a mamawala na “bunga na saray bibil”​—saray balikas na panangidayew ed sikato tan ed saray gagala to. (Hebreos 13:15) Kasin onaplika iya ed sikayo bilang maedad la? On.

⁵ Lugan na Biblia iray alimbawa na saray maedad la a makpel a nantasi nipaakar ed ngaran tan saray gagala nen Jehova. Masulok lan “pitomplo a taon” nen Moises sanen sikatoy ingganggan nen Jehova bilang propeta tan manangilaman to. (Salmo 90:10; Exodo 4:10-17) Say itatakken so ag-angamper ed si propeta Daniel pian makpel a makapantasi nipaakar ed inkasoberano nen Jehova. Nayarin masulok lan 90 años nen Daniel sanen sikatoy impatawag nen Belsasar a mangipatalos ed misteryoson sulat diad padir. (Daniel, kapitulo 5) Tan komusta so masiken lan si apostol Juan? Diad pansamposampot lay andukey a serbisyo to, sikato so nipangaw ed isla na Patmos ‘lapud pansasalita to nipaakar ed Dios tan ed impantasi nen Jesu-Kristo.’ (Apocalipsis 1:9) Maseguron nanonotan yo ni so dakel iran karakter ed Biblia ya amawala na “bunga na saray bibil” diad inkatakken da la.​—1 Samuel 8:1, 10; 12:2; 1 Arari 14:4, 5; Lucas 1:7, 67-79; 2:22-32.

6. Panon ya uusaren nen Jehova ‘iray mamasiken’ pian manpropesiya diad sarayan kaunoran ya agew?

⁶ Diad impangaon to ed say Hebreon propeta a si Joel, oniay inyabawag nen apostol Pedro: “Nagawa ed saray kaunoran ya agew, kuan na Dios, ‘Yibung ko so espirituk ed amin a laman [pati “saray mamasiken”] . . . et manpropeta ra naani.” (Gawa 2:17, 18; Joel 2:28) Mitunosan ed satan, diad sarayan kaunoran ya agew et uusaren nen Jehova iray maedad lan membro na alanaan a klase tan say “arum a karnero” pian iyabawag iray gagala to. (Juan 10:16) Arum ed sikara so matoor a mamapawala na bunga na Panarian diad dakel lan dekada.

7. Iyilustra no panon a nitultuloy na saray maedad la so pamawala na bunga na Panarian anggaman ed pisikal iran limitasyon da.

⁷ Konsideraen pa si Sonia, a nagmaliw a sigpot-panaon a manangipalapag na Panarian nen 1941. Anggaman ed abayag lan panaanos to ed graben sakit, sikato so maparanay a mangikokondukta na saray panangiyaral na Biblia diad abung to. “Kabiangan lay bilay ko so panangipulong ed maong a balita,” so insalaysay nen Sonia. “Diad tua, saya so bilay ko. Agko labay so ontunda.” Ag-abayag et innabang di Sonia tan say atsi ton si Olive so mensahe na ilalo a walad Biblia ed si Janet, sakey a pasyentin agetaran lay bilay to, ya akabat da ed panag-alagaran diad ospital. Say ina nen Janet, sakey a debotadon Katoliko, so nandinayew ed satan a maaron interes ya impatnag da ed anak ton bii kanian inawat to so panangiyaral na Biblia tan inmaligwas lan maong natan. Sarag yo kasin anamoten so mipadpara iran pankanawnawa pian mamawala na bunga na Panarian?

8. Panon ya impatnag nen masiken lan Caleb so panagmatalek to ed si Jehova, tan panon a naalig na saray maedad lan Kristiano so alimbawa to?

⁸ Diad makpel tan mapeleng a pangipupulong da ed Panarian anggaman ed saray limitasyon ya epekto na inkatakken da, tutumboken na saray maedad lan Kristiano iray alimbawa na matoor ya Israelitan si Caleb, ya angiba ed si Moises diad kalawakan ed loob na apataplon taon. Si Caleb so 79 años sanen bineltang to so Ilog Jordan pian onloob ed Insipan a  Dalin. Bilang sakey a sundalo ed armada na Israel a naynay lan manatalo diad loob na anem taon, nayarian to la komon so manpainawa. Balet ta andi, sikato so makpel a kinmerew na mairap ya asainmin a mangobkob ed “saray syudad a kinutaan” diad mapalandey a rehyon na Juda, lugar a panaayaman na saray Anakim, lalaki ya angkakabaleg. Diad tulong nen Jehova, si Caleb so ‘amaekal ed sikara, unong a sinalita nen Jehova.’ (Josue 14:9-14; 15:13, 14) Singa si Caleb nensaman, napaseguroan kayo met a walad dapag yo si Jehova legan yon itutultuloy so pamapawala na bunga na Panarian anggaman matakken kayo la. Tan sano manmatoor kayo, ikdan to kayo na sakey a pasen diad insipan ton balon mundo.​—Isaias 40:29-31; 2 Pedro 3:13.

“Sikara Makbol tan Malambot Ira”

9, 10. Panon a mansiansian mabunigas ed pananisia tan mabiskeg ed espiritual iray maedad lan Kristiano? (Nengnengen so kahon ed pahina 13.)

⁹ Diad impangipaimano to ed inkamabunga na saray maedad lan lingkor nen Jehova, oniay inkanta na salmista: “Say matunong onsalindak a singa say kiew a palma: sikato ontubo a singa sakey a cedro ed Libano. Sikara manbunga ni ran siansia ed inkamasiken; sikara makbol tan malambot ira.”​—Salmo 92:12, 14.

¹⁰ Panon yon napansiansia so biskeg yo ed espiritual anggaman matakken kayo la? Say manunan sengegan no akin ya agmanguuman so karakpan na kiew a palma et say tuloytuloy a suplay na tariwan danum. Ontan met, natagano kayo ed saray danum na katuaan na Biblia diad panaral yo ed Salitay Dios tan diad pilimog yo ed organisasyon to. (Salmo 1:1-3; Jeremias 17:7, 8) Say biskeg yo ed espiritual so mabmablin tulong ed saray kapananisiaan. Konsideraen no panon a tua iya ed kipapasen na masiken lan Atagey a Saserdote a si Joiada.

11, 12. (a) Anto so importantin betang a ginawa nen Joiada diad awaran na panarian na Juda? (b) Panon ya inusar nen Joiada so impluensya to pian iyalibansa so tuan panagdayew?

¹¹ Nayarin masulok lan 100 años nen Joiada sanen sinamsam nen ambisyosan Reyna Atalia so panangontrol ed Juda diad impamatey to ed saray mismon apo to. Anto so nagawaan nen masiken lan Joiada? Diad loob na anem taon et inyamot dan sanasawa diad templo so nakekeraan lan mananawir ed inkaari, si Joas. Insan, diad makapasurprisan inkiwas to, inyabawag nen Joiada so pitoy taon a si Joas bilang ari tan impapatey to si Atalia.​—2 Awaran 22:10-12; 23:1-3, 15, 21.

¹² Bilang say manangasikaso ed ari, inusar nen Joiada so impluensya to pian iyalibansa so tuan panagdayew. Sikato so “nanggawa na sipan ed sikato lanlamang, tan say amin a baley, tan say ari, a sikara komon so baley nen Jehova.” Diad ganggan nen Joiada, inggeba na totoo so abung na palson dios a si Baal tan inekal da iray altar, talintao, tan say saserdote na satan. Diad panangiwanwan met nen Joiada, impawil nen Joas iray serbisyo ed templo tan impagawa to so dakel nin aapigeren diad templo. “Si Joas ginawa to so maptek ed saray mata nen Jehova ed saray amin ya agew to ya impangibangat nen Joiada a saserdote ed sikato.” (2 Awaran 23:11, 16-19; 24:11-14; 2 Arari 12:2) Sanen sikatoy inatey ed edad a 130, naikdan si Joiada na nikaduma tan mapagalang a ponpon a singa ed saray arari lapud sikatoy “nanggawa na maong ed Israel, tan nipaakar ed Dios tan say abung to.”​—2 Awaran 24:15, 16.

13. Panon a ‘makapanggawa na maong ed Dios tan ed abung to’ iray maedad lan Kristiano?

¹³ Nayarin lilimitaan lay onkakapuy a bunigas odino arum niran sirkumstansya so nagawaan yo ed panangiyalibansa na tuan panagdayew. Anggano ontan so kipapasen yo, nayarian yo nin siansia so ‘manggawa na maong ed Dios tan ed abung to.’ Nipatnag yo so seseg ed espiritual ya abung nen Jehova diad iyatendi tan pibiang ed saray miting ed kongregasyon tan diad pibiang ed lawak na ministeryo kapiganman a posible. Say mabulos a pangawat yo ed simbawa na Biblia tan say matoor a suporta yo ed “matoor tan makabat ya aripen” tan say kongregasyon so walaan na makapabiskeg ya epekto ed Kristianon impanaagi. (Mateo 24:45-47) Nasagyat yo met iray kaparan managdayew dia “ed aro tan dia ed saray maabig a gawa.” (Hebreos 10:24, 25; Filemon 8, 9) Tan magmaliw kayon bendisyon ed arum no onkiwas kayon mitunosan ed simbawa nen apostol Pablo: “Saray masiken madangka  ra komon, matunong, makalakal, maksil ed pananisia, ed aro, ed anos: A saray akukulaw masimpit ira ed panagbilay da, aliwa ran managpauges, aliwa ran aripen na dakel ya alak, managbangat iray kaabigan.”​—Tito 2:2-4.

14. Anto so nagawaan na abayag la ran Kristianon manangasikaso pian niyalibansa so tuan panagdayew?

¹⁴ Kasin manlilingkor kayo bilang matatken ed kongregasyon diad dakel lan taon? Oniay bilin na sakey ya abayag lan matatken ed kongregasyon: “Mabulos yon usaren so kakabatan ya agamoran yo ed loob na dakel lan taon. Mangipabtang kayo na responsabilidad, tan inabang yo so eksperiensya yo ed arum a magunaet a makaaral . . . Amtaen so posiblin nagawaan na arum. Pabulaslasen tan bayuboan iratan. Manparaan parad arapen.” (Deuteronomio 3:27, 28) Say puron interes yo ed lawas onlalaknab a kimey nipaakar ed Panarian so manresulta ed dakel a bendisyon parad arum diad Kristianon impanaagi tayo.

‘Iyabawag a si Jehova et Maptek’

15. Panon a niyabawag na saray maedad lan Kristiano a si Jehova et maptek?

¹⁵ Maliket a susumpalen na saray maedad lan lingkor na Dios iray responsabilidad dan ‘iyabawag a si Jehova et maptek.’ No sakey kayon maedad lan Kristiano, saray salita tan kagagawa yo so makapangipatnag ed arum a si “Jehova so dampay yo, ya anggapo so kapikewetan ed sikato.” (Salmo 92:15, NW) Say kiew a palma so mareen a paneknek ed alay abig iran kalidad na Manamalsa. Balet inter nen Jehova ed sikayo so pribilehyon mantasi nipaakar ed sikato diad saramay mangaawat natan ed tuan panagdayew. (Deuteronomio 32:7; Salmo 71:17, 18; Joel 1:2, 3) Akin ya importante itan?

16. Anton alimbawa ed Biblia so mangiyilustra ed kaimportantian na ‘pangiyabawag a si Jehova et maptek’?

¹⁶ Sanen say Israelitan lider a si Josue so ‘masiken la tan naskey ed saray taon, impatawag to so amin ya Israel, saray mamasiken da tan saray uloen da, tan saray ukom da tan saray makauley da,’ tan pian ipanonot to ed sikara so nipaakar ed maptek iran pidedeneng na Dios. Inkuan to: “Anggapo so sakey a bengatla a linmiwat ed amin a maong a bengabengatla a si Jehova a Dios yo [et] sinalita to nipaakar ed sikayo; sikara so agawa ya amin ed sikayo.” (Josue 23:1, 2, 14) Diad sakey a peryodo na panaon, sarayan salita so amabiskeg ed determinasyon na totoo a mansiansian matoor. Balet, sanen inatey  lay Josue, walay “sananey a kailalakan ed kayari ra, ya agda inamta si Jehova, ya anggan say gawa a ginawa to nipaakar ed Israel. Et saray anak na Israel ginawa ra so mauges ed pakanengneng nen Jehova, tan nanlingkor ira ed saray Baal.”​—Uko-ukom 2:8-11.

17. Panon so pidedeneng nen Jehova ed totoo to diad moderno iran panaon?

¹⁷ Say inkamatoor na kaplesan a Kristianon kongregasyon so ag-akadepende ed insangin panagtasi na saray matakken lan lingkor na Dios. Balet ta napabiskeg so pananisia tayo ed si Jehova tan ed saray sipan to sano narengel tayon mismo iray salaysay na ‘baleg a kimey’ a ginawa to ed totoo to diad sarayan kaunoran ya agew. (Uko-ukom 2:7; 2 Pedro 1:16-19) No abayag kayo lan mililimog ed organisasyon nen Jehova, nayarin nanonotan yo so panaon sanen dagdaiset ni iray manangiyabawag na Panarian diad lugar odino bansa yo odino sanen say panagpulong a kimey so pirmin susumpaen. Diad inlabas na panaon, anengneng yo so impangekal nen Jehova ed pigaran babeng tan ‘pinapeles’ to so ibubulaslas na Panarian. (Isaias 54:17; 60:22) Naimano yo so inlinew na saray katuaan na Biblia tan naimatonan yo so progresibon inyaligwas na nanengneng a kabiangan na organisasyon na Dios. (Uliran 4:18; Isaias 60:17) Kasin panggugunaetan yon pabiskegen so arum diad panginabang yo ed sikara na eksperiensya yo nipaakar ed maptek iran pidedeneng nen Jehova? Agaylan makapasagyat tan makapabiskeg so epekto na satan ed Kristianon impanaagi!

18. (a) Iyilustra so manbayag ya epekto na ‘pangiyabawag ed arum a si Jehova et maptek.’ (b) Panon yon naeeksperiensya a mismo so kaptekan nen Jehova?

¹⁸ Komusta met iray inkagawa a naeksperiensya yo so maaron panangasikaso tan panangigiya nen Jehova diad mismon bilay yo? (Salmo 37:25; Mateo 6:33; 1 Pedro 5:7) Sakey ya akulaw lan agi a manngaray Martha so naynay a mamapaseseg ed arum diad pangibabaga toy: “Anggan antoy nagawa, agyon balot itatalirak si Jehova. Tulongan to kayo.” Sayan bilin so walaan na mabiskeg ya epekto ed si Tolmina, sakey ed saray iyaaralan nen Martha na Biblia ya abautismoan ed kasakbayan na dekaday 1960. Oniay nanonotan nen Tolmina: “Sanen inatey so masiken ko, kinmapuy a maong so liknaan ko, balet ta saratan a salita so akatulong ed siak pian magmaliw a determinado ya ag-onliwat ed anggan sakey ya aral. Tan talagan pinabiskeg ak nen Jehova pian mantultuloy.” Ontan met so imbilin nen Tolmina ed dakel iran iyaaralan to na Biblia diad dakel a taon. On, diad pangiter yo na panamaseseg tan ed pannodnonot yo ed maptek iran pidedeneng nen Jehova, baleg so nagawaan yo pian napabiskeg so pananisia na saray kapananisiaan.

Papablien nen Jehova Iray Matoor a Maedad la

19, 20. (a) Panon so panmoria nen Jehova ed saray gagawaen na saray maedad lan lingkor to? (b) Anto so konsideraen ed ontumbok ya artikulo?

¹⁹ Say mundo natan, a pakabidbiran na kakulangay pisasalamat, so agtanton mangikokonsidera ed saray maedad la. (2 Timoteo 3:1, 2) Sano  sikara so nanodnonotan, say mabetbet a rason et say apalabas iran agawaan da​—no anto ira nensaman, imbes a no anto ira natan. Midumaan so ibabaga na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.” (Hebreos 6:10) Siempre, nanonotan nen Jehova a Dios so apalabas a rekord na matoor iran gawa yo. Balet papablien to kayo met lapu ed say mantutultuloy a gagawaen yo diad panlilingkor ed sikato. On, momoriaen to iray matoor a maedad la bilang mabunga, mabunigas ed espiritual, tan mabiskeg iran Kristiano​—a mabilay a paneknek ed pakapanyari to.​—Filipos 4:13.

²⁰ Kasin momoriaen yo iray maedad lan membro na Kristianon impanaagi tayo unong ed panmoria met nen Jehova ed sikara? No ontan so gawaen yo, sikayo so napakiwas a mangipatnag na aro yo ed sikara. (1 Juan 3:18) Konsideraen ed ontumbok ya artikulo so pigaran praktikal a paraan a nipatnag so ontan ya aro diad pangasikaso ed saray nakaukolan da.

[Paimano ed leksab]

Anto Iray Ebat Yo?

• Panon so ‘pambubunga’ na saray maedad la?

• Akin a say espiritual a biskeg na saray maedad lan Kristiano et makanakanan tulong?

• Panon a niyabawag na saray maedad lan Kristiano a si Jehova et maptek?

• Akin a papablien nen Jehova iray abayag lan lingkor to?

[Tepetepet Parad Panagaral]

[Kahon ed pahina 13]

No Panon Iran Mansiasiansian Mabiskeg ed Pananisia

Anto so akatulong ed abayag la ran Kristiano pian mansiansia iran mabunigas ed pananisia tan mabiskeg ed espiritual? Nia so imbaga na arum:

“Importantin tuloy so pambasa ed saray teksto a mangidadanet ed relasyon tayo ed si Jehova. Nilabilabi lawari ya ibabalikas ko so impatlep kon Salmo 23 tan 91.”​—Olive, abautismoan nen 1930.

“Seseguroen ko a presente ak a naynay diad paliwawa parad bautismo tan ondedengel ak a maong, a singano agew itan na pampabautismok. Say lawas pannonodnonot ko ed impangidedikak so importantin kundang diad pansiasiansiak a matoor.”​—Harry, abautismoan nen 1946.

“Importante so inagew-agew a pikakasi​—a lawas onkekerew ak na tulong, proteksion, tan panamendisyon nen Jehova, a ‘diad amin a dalan tayo et sikato so bibidbiren tayo.’” (Uliran 3:5, 6)​—Antônio, abautismoan nen 1951.

“Say italineng ed saray eksperiensya na saramay siansian manmamatoor ed panaglingkor da ed si Jehova ed dakel lan taon so mamapasimbalo ed determinasyon kon mansiansian matoor ed sikato.”​—Joan, abautismoan nen 1954.

“Importante so pagmaliw a mapaabeba. Say amin a walad sikatayo et makasengeg ed agkanepegan a panangasi na Dios. No ontan so panmoria tayo, makapansiansia itayon akateen ed dugan direksion parad espiritual a tagano a nakaukolan tayo pian makapansungdo anggad kasampotan.”​—Arlene, abautismoan nen 1954.

[Litrato ed pahina 11]

Papawalaen na saray maedad la so mablin bunga na Panarian

[Litrato ed pahina 14]

Say espiritual a biskeg na saray maedad la so makanakanan tulong