Say Panggugunaet na Katooan a Paliketen so Dios

“SAY panisia ed Dios et lawas a kabiangan na antokaman a sosyedad na too, a mabetbet et papanisiaan dan sikato so mangokontrol tan Manamalsa ed amin. Tua itan anggan diad saray sosyedad a sigagagalan agmanisia ed Dios.” Ontan so inkuan nen John Bowker diad libro ton God​—A Brief History. Diad pigaran paraan, say panggugunaet a naromog so Dios tan nagamoran so pabor to et kasiporan la ed walna na too. Diad sankamundoan, dakel so masimoon a manpipilalek a napaliket so Dios. Siempre, nanduruma so paraan na panggagawa ra ed satan unong ed sisisiaen da.

Panisiaan na arum a say pambilay a maptek labat so nakaukolan pian nagamoran so pabor na Dios. Momoriaen na arum a nagamoran da so panangabobon na Dios diad panulong ed saray mairap-bilay diad materyal a paraan. Niarum ni, importante ed minilyon a totoo iray relihyoson seremonya tan ritual.

Diad biek a dapag, walaray manisia ya ag-iran balot makaasingger ed Dios​—a sikatoy arawdawi odino okupadon tuloy ed arum iran pamaakaran pian imanoen so ordinaryon totoo. Ibabaga a panisiaan nen pilosopon Epicurus na kadaanan a Gresya ya ‘arawin tuloy iray dirios pian manggawa ed sika na antokaman a bengatla.’ Anggaman kuan et relihyoso so dakel a walaan na ontan a kanonotan. Arum ni ingen so mangiyaapay na saray bagat tan manggagawa na saray ritual diad ilalo ran napareen iray inaatey ya inmunan atateng da.

Antoy nikuan mo? Peteg kasin iimanoen na Dios so pansasagpot tayon nagamoran so pabor to? Nayarian tayo kasin tenyegen so liknaan na Dios tan sikatoy napaliket?

 [Picture Credit Line ed pahina 2]

APIS: Diad panangiyabuloy na ROE/Anglo-Australian Observatory, nilitrato nen David Malin