Tepetepet Manlapud Saray Managbasa

• Panon tayon napaermen so masanton espiritu na Dios, anta aliwa itan a persona?

Si apostol Pablo so angisulat na: “Agyo paeermenen so espiritu santo na Dios.” (Efeso 4:30) Arum so mangipapasen ed sarayan salita bilang paneknek a say masanton espiritu et sakey a persona. Balet, saray publikasyon na ‘napanmatalkan a managpaga’ so mabetbet a mangitatarya na Makasulatan tan maawaran a paneknek ya ag-impasen na saray inmunan Kristiano so masanton espiritu bilang sakey a persona nisay sakey a dios a mipara ed Sankatagyan a kabiangan ed tatawagen a Trinidad. * (Lucas 12:42) Kanian agtutukoyen nen Pablo so masanton espiritu na Dios bilang sakey a persona.

Say masanton espiritu na Dios et agnanengneng ya aktibon puersa to. (Genesis 1:2) Nipasakbay a si Jesus so manbautismo ed ‘masanton espiritu,’ no panon a si Juan so nambautismo ed danum. (Lucas 3:16) Diad Pentecostes 33 K.P., saray 120 a babangatan so “napno ya amin na espiritu santo” kanian mapatnag ya ag-ira napno na persona. (Gawa 1:5, 8; 2:4, 33) Sarayan alanaan so angawat na mangatatawen ya ilalo, tan say espiritu na Dios so mangiwawanwan ed sikara a mangagamil na matoor a panagbilay. (Roma 8:14-17; 2 Corinto 1:22) Say espiritu so mamapawala na maridios a bunga tan ontutulong ed sikara a napaliisan iray makasalanan a “gawa na laman” a manresulta ed agpanangabobon na Dios.​—Galacia 5:19-25.

No matoor itayon lingkor na Dios a walaan na mangaraldalin ya ilalo, ag-itayo alanaan na masanton espiritu. Anggaman ontan, nawalaan itayo met na espiritu na Dios a singa ed saraman so walaan na mangatatawen ya ilalo. Kanian, napaermen tayo met so espiritu. Balet panon?

No ibaliwala tayo so Makasulatan a simbawa a nisulat diad panangiwanwan na masanton espiritu, nabayuboan tayo iray walna a manresulta ed ginagalan pankasalanan ed espiritu, pakabalang ed pabor nen Jehova, tan diad kaunoran et kadederal. (Mateo 12:31, 32) Nayarin ag-itayo ni akagawa na graben kasalanan, balet sikatayo lay onggagapo ed lingon dalan, a diad kaunoran et makapangitonton ed sikatayo diad sakey a direksion a sumlang ed dalan na espiritu. Diad ontan iran kipapasen, napaermen tayo so masanton espiritu.

Panon tayo sirin a napaliisan so pamaermen ed espiritu na Dios? Peteg a kaukolan tayon kontrolen iray kanonotan tan kiwas tayo. Diad sulat to ed Efeso, kapitulo 4, sinalambit nen apostol Pablo so nipaakar ed ipaliis ed saray tendensian mansalita na katilaan, mantultuloy a masanok, inkangiras, tan agmatukoy a panagsalita. No insulong tayo la so “balon personalidad” balet  aabuloyan tayoy inkasikatayon ompawil ed saratan a bengatla, anto kasi so gagawaen tayo? Sikatayoy onsusumlang ed pinuyanan na espiritun simbawa na Salitay Dios, say Biblia. Diad panggawa ed saya, sikatayo so mamapaermen ed masanton espiritu.

Diad kapitulo 5 na Efeso, nabasa tayo so simbawa nen Pablo nipaakar ed ipaliis ed mauges a pilalek ed pilalawanan. Pinaseseg met na apostol iray kapananisiaan to a paliisan so makapabaing a kondukta tan mabanday a panaglurey. No agtayo labay a napaermen so masanton espiritu na Dios, saya so nepeg tayon nodnonoten sano mamipili na saray panagligliwaan. Akin et ipatnag tayoy interes ed saratan a bengatla diad pangitongtong ed saratan, pambasa ed saratan, tan pambantay ed saratan diad telebisyon odino arum nin pasen?

Siempre, napaermen tayo so espiritu diad arum niran paraan. Say masanton espiritu nen Jehova so mangiyaalibansa na pankakasakey diad kongregasyon, balet ipasen pa a sikatayoy mangikakayat na makaderal a talabutob odino mangisusugsog na inkaapag-apag diad kongregasyon. Agtayo kasi susumlangen so panangiwanwan na espiritu nipaakar ed pankakasakey? Diad inkalapagan a paraan, napaermen tayo so masanton espiritu, a singa saraman so angisagyat na inkaapag-apag diad kongregasyon na Corinto. (1 Corinto 1:10; 3:1-4, 16, 17) Napaermen tayo met so espiritu no gagalaen tayon melmelagen so panagrespeto ed saray lalaki diad kongregasyon a tinuro na espiritu.​—Gawa 20:28; Judas 8.

Malinew sirin a nepeg tayon konsideraen so awawey tan kakikiwas tayo ed amta tayo iran panangiwanwan na masanton espiritu a nipatnag diad Biblia tan diad Kristianon kongregasyon. Sikatayo met so ‘mangipikasi ed masanton espiritu,’ a manpasakop ed panangiwanwan na satan tan lawas onkiwas a mitunosan ed ibabaga na nipuyan a Salita na Dios. (Judas 20) Gawaen tayo a determinasyon ya agtayon balot paermenen so espiritu noagta lawas paigiya ed satan diad kigalangan na masanton ngaran nen Jehova.

• Inkompara nen Jesu-Kristo so mairap a pakaloob na mayaman a too ed Panarian dia ed kamelyo a manasalin onlabot ed abot na dagum. Kasin literal a kamelyo tan peteg a dagum a panagdait so walad kanonotan nen Jesus?

Manpadpara so duara ed taloran Makasulatan a salaysay nipaakar ed saratan a balikas nen Jesus. Unong ed salaysay na Mateo, oniay inkuan nen Jesus: “Main-inomay ni ya onlabot so sakey a kamelyo ed abot na sakey dagum, nen say sakey a toon mayaman ya onloob ed panarian na Dios.” (Mateo 19:24) Mipadpara, oniay nabasa ed Marcos 10:25: “Magmainomay ni sakey a kamelyo ya onlabot ed abot na sakey a dagum, nen say sakey a too a mayaman ya onloob ed panariay Dios.”

Isusuheri na arum a reperensya a say “abot na sakey a dagum” et sakey a melag a wangalan ed sakey ed saray baleg a wangalan na Jerusalem. No akakapot so baleg a wangalan no labi, nayarin say melag a wangalan so akalukas. Papanisiaan a makaloob so kamelyo ed satan. Kasin saya so walad kanonotan nen Jesus?

Malinew ya andi. Mapatnag a say tutukoyen nen Jesus et say dagum a panagdait. Lapud saray kadaanan a dagum a pukel tan metal so aromog ed satan a rehyon, maseguro a kaslakan ya uusaren iratan diad saray kaabungan. Say Lucas 18:25 so mangekal ed antokaman a panduaruwa nipaakar ed saray salita nen Jesus, lapud sikatoy tinukoy na satan a mangibabagan: “Ta main-inomay ya onlabot so sakey a kamelyo ed abot na sakey a dagum, nen say sakey a mayaman ya onloob ed panariay Dios.”

Aabobonan na nanduruman leksikograpo so  patalos a “dagum a panagdait” a singa naromog diad New World Translation. Say Griegon salita parad ‘dagum’ diad Mateo 19:24 tan Marcos 10:25 (rha·phisʹ) so inaon ed verb a mankabaliksay “daiten.” Tan say Griegon termino a naromog diad Lucas 18:25 (be·loʹne) so inusar pian tukoyen so literal a dagum ya uusaren ed operasyon. Oniay ibabaga na Vine’s Expository Dictionary of Old and New Testament Words: “Ompatnag a moderno so ideyan panutukoy ed ‘abot na dagum’ bilang saray melag a wangalan; anggapo so kadaanan a pakasuysoyan ed satan. Say gagala na Katawan ed impanalambit to ed satan et pian ibalikas so bengatlan imposible ed too tan agla kaukolan so mansagpot pian napainomay so pamaakaran diad pangibagan say dagum so walaan na sananey a kabaliksan tan aliwan ordinaryon kagawaan.”​—1981, Tomo 3, pahina 106.

Isusuheri na arum a diad sarayan bersikulo, say “kamelyo” so kaukolan ya ipatalos a “lubir.” Saray Griegon salita parad lubir (kaʹmi·los) tan kamelyo (kaʹme·los) so manpadpara. Anggaman ontan, say Griegon salita a parad “kamelyo,” aliwan say salita a parad “lubir” so naromog diad Mateo 19:24 diad sankadaanan a Griego iran manuskrito na Ebanghelyo nen Mateo (say Sinaitic, Vatican No. 1209, tan say Alexandrine). Nibabaga ya insulat nin unona nen Mateo so Ebanghelyo to diad Hebreo insan to impatalos itan a bukor diad Griego. Sikatoy eksakton makaamta ed imbaga nen Jesus kanian inusar to so dugan salita.

No ontan sirin, say tutukoyen nen Jesus et sakey a literal a dagum a panagdait tan sakey a peteg a kamelyo. Sikatoy angusar ed saraya pian idanet so imposiblin kagawa na bengatla. Balet kasin labay ya ibaga nen Jesus ya anggapon balot so mayaman a makaloob ed Panarian? Andi, lapud say imbalikas nen Jesus so agginetma a talosan diad literal a paraan. Sikatoy angusar na hyperbole pian iyilustra a no panon ya agmakalabot so literal a kamelyo ed abot na aktual a dagum a panagdait, imposible met a makaloob ed Panarian so sakey a mayaman a too no sikatoy mantultuloy a manmatalek ed saray kayamanan to tan agto iyuna si Jehova diad bilay to.​—Lucas 13:24; 1 Timoteo 6:17-19.

Imbalikas iya nen Jesus kayarin tuloy ya impulisay na malangwer a manuley so baleg a pribilehyon magmaliw a patumbok nen Jesus. (Lucas 18:18-24) Say mayaman ya indibidual a walaan na babaleg a panangaro ed kaykayarian to nen saray espiritual a bengatla so agmakapanilalo a makagamor na andi-anggaan a bilay diad uksoyan na Panarian. Ingen, walaray mayaman a totoo a nagmaliw a babangatan nen Jesus. (Mateo 27:57; Lucas 19:2, 9) Kanian say mayaman a too a sinononot ed espiritual a pankaukolan to tan patutulongan ed Dios so makaawat na kilalaban a manlapud Dios.​—Mateo 5:3; 19:16-26.

[Paimano ed leksab]