Report na Saray Manangiyabawag na Panarian

‘Gala ta Tulongan Mo Kami’

NEN Hulyo 2000, nipasabi so imbitasyon diad Alemanya, Austria, tan Switzerland ed saray Tasin mansasalita na Aleman ya onalis ed Bolivia. Akin? Lapud diad nisulinek iran grupo na dumaralos ed nasasakopan na 300 kilometro a paliber na Santa Cruz, Bolivia et walaray Menonita ya Aleman ya interesadon maong ed Biblia.

Manga 140 a Tasi so angawat ed imbitasyon. Walara so nansiansia diman ed loob na pigaran simba, arum et diad loob na sakey taon odino masulok ni. Lapud satan ya inkiwas da, impatnag da so awawey a mipadpara ed saramay misionaryo nen inmunan siglo a tinmalineng ed tawag a: “Gala ed Macedonia et tulongan mo kami.”​—Gawa 16:9, 10.

Komusta so panagpulong ed satan a teritorya? Oniay insalaysay na sakey a matatken ed lokal a kongregasyon: “Say pambiahen mamaarap ed sakey ed 43 a grupo na Menonita et sabien toy anggad waloy oras diad marabok iran karsada panamegley na four-wheel-drive a luluganan. Mabetbet a nakaukolan so apatiran agew tan pigaran labi ya iyugip ed saray tolda pian nadalaw iray mas arawin pasen. Balet talagan makagunggona so impansagpot mi, lapud sarayan totoo so agnin balot akadngel na maong a balita.”

Diad primero, dakel ed saray Menonita so agmamatuloy. Balet lapud andi-tundan impansagpot, sikara so atulongan a makatebek ed iyoopresi na saray Tasi. Alimbawa, inkuan na sakey a dumaralos a sikatoy sakey taon lan manbabasa na magasin ya Awake! Insan inyarum to: “Amtak a dakel a totoo dia so agmipakna ed ibabaga yo, balet panisiaan kon satan so katuaan.” Diad sananey a grupo, oniay inkuan na sakey a laki: “Ibabaga na arum ed saray kakaabay ko a palson propeta kayo, ingen wala met iray mangibabaga a walad sikayo so katuaan. Labay kon amtaen a mismo.”

Wala la natan so sakey a kongregasyon a mansasalitay-Aleman diad Bolivia, a walaan na 35 a manangipalapag, a kaiba so 14 a sigpot-panaon ya ebanghelisador. Diad kaplesan et 14 la so nagmaliw a manangipalapag na Panarian a datin Menonita, tan 9 ni so onaatendi a regular diad saray miting. Oniay inkuan na sakey a masiken ya agano nin abautismoan: “Sankaimano mi so panangidirehi nen Jehova. Sikatoy angibaki na saray eksperiensyado tan makapansalitay-Aleman ya agagin lalaki tan bibii pian tulongan kami. Misalsalamat kami.” Oniay inyarum na 17 años ya anak a bii na masiken, ya abautismoan met la: “Makaalis so inkaligsa na saray kalangweran ya agagin lalaki tan bibii a linma dia. Maslak ed sikara et payunir, a manguusar na panaon tan kuarta ra pian ontulong ed arum. Labay ko met a gawaen itan.”

On, saraman so mansasagpot pian onla ya ontulong so manggagayaga tan napepenek a tuloy.