Kasin Nepeg Kan Mimembro ed Sakey a Relihyon?

‘AGKO la kaukolan so mimembro ed sakey a relihyon odino mimisa a naynay ta pian manisia ed Dios!’ Ontan so panmoria na dakel a totoo nipaakar ed pimemembro ed sakey a relihyon odino ed dinanman a relihyoson organisasyon. Diad tua et ibabaga na arum a mas onaapit ira ed Dios sano manpasyar ira pian panliketan so palsa nen say mimisa ira diad simbaan. Kaslakan la natan so opinyon ya agla nakaukolan so pimembro ed sakey a relihyon odino organisasyon pian manisia ed Dios.

Balet, duma so masimoon a panmoria na arum. Ikakatunongan da a say pimembro ed relihyon odino iyatendi so nakaukolan, a makana ni ingen, pian nagamoran na sakey so panangabobon na Dios. Kanian say isyu a no kasin peteg a nakaukolan so pimembro ed relihyon et aliwa labat a basta pamaakaran na estatistika odino akademikon paninteresan. Diad antokaman a kipapasen, lapud nalalanor so relasyon tayo ed Dios, agta makatunongan ya amtaen tayo so panmoria na Dios ed sayan pamaakaran? Sirin, anto so naaralan tayo ed Salita to, say Biblia, nipaakar ed saya?

No Panon so Impideneng na Dios ed Totoo Nensaman

Ngalngali 4,400 a taon lay apalabas, say interon dalin so biglan niyanep na makadesyang a delap. Agnalingwanan itan ya agawa, tan saray totoo ed sankamundoan so walaan na saray istorya nipaakar ed satan diad asasakbay ya awaran da. Anggaman nanduruma iray detalye, dakel so pamparehoan na sarayan istorya, laktip lay katuaan a pigpigaran totoo tan ayayep so niliktar.

Kasin saray akaliktar ed Delap et mapalpalar lambengat ya indibidual a nibanbanan niliktar ed kadederal? Ipapabitar na salaysay ed Biblia ya aliwan ontan so agawa. Makatantanda ya agpinakabatan na Dios so kada indibidual nipaakar ed onsabin Delap. Imbes, imbaga to itan ed si Noe, insan si Noe so amasakbay ed saray kapanaonan to nipaakar ed manasingger lan Delubio.​—Genesis 6:13-16; 2 Pedro 2:5.

 Say impakaliktar so nandependi ed impagmaliw dan kabiangan na sayan nankakasakey a grupo tan ed inkamabulos dan angawat ed panangidirehi na Dios a niiter ed si Noe. Anggan saray ayayep ed dalem na biong so akaliktar ed Delap lapud kabiangan ira ed sayan grupo. Niiter iray malinew a bilin ed si Noe a manggawa na matukoy iran uksoyan parad kipreserba na ayayep.​—Genesis 6:17–7:8.

Kayari na nilasus a taon, saray kapolian nen Noe panamegley nen Sem ya ilalak to so inaripen ed Ehipto. Ingen, say gagala na Dios et ibulos ira tan iyakar ira ed dalin ya insipan to ed laki ran si Abraham. Saya lamet so ag-imparungtal ed kada indibidual noagta imparungtal nin unona ed saramay apilin mangidaulo ed sikara​—si Moises tan say agi ton si Aaron. (Exodo 3:7-10; 4:27-31) Kayarin niliktar bilang grupo iray datin ariripen ed Ehipto, niiter ed sikara so Ganggan na Dios diad Palandey Sinai tan nagmaliw iran sakey a nasyon na Israel.​—Exodo 19:1-6.

Niliktar lambengat so indibidual iran Israelita lapud kabiangan ira ed sakey a grupon inletneg na Dios tan tinumbok da so panangidirehi na saray aturon manangidaulo ed sayan grupo. Anggan saray indibidual ya Ehipsio so inabuloyan a milimog ed sayan grupo a mapatnag ya aabobonan na Dios. Sanen tinmaynan iray Israelita ed Ehipto, akiulop ed sikara irayan indibidual, diad ontan et awalaan ira na ilalon makaawat na panamendisyon na Dios.​—Exodo 12:37, 38.

Insan, nen inmunan siglo, ginapoan nen Jesus so panagpulong a kimey to, a tinitipon to so totoo bilang babangatan to. Sikato so akideneng ed sikara bilang grupo, balet ta sikato met so maaron angimano ed saray indibidual unong ed saray pankaukolan da. Oniay inkuan nen Jesus ed 11 a matoor ya apostoles: “Sikayo so nansiansia ed siak ed saray inkatuktuksok; et manuro ak ed sikayo na sakey a panarian, a singa say Amak anuro ed siak.” (Lucas 22:28, 29) Diad saginonor, linmeksab so masanton espiritu na Dios ed saray babangatan sanen nandaragup ira bilang sakey a grupo.​—Gawa 2:1-4.

Ipapabitar na sarayan alimbawa a nensaman et lawas akidenengan na Dios iray totoo to bilang sakey ya organisadon grupo. Diad tua, say pigaran indibidual a personal ya akidenengan na Dios, salanti, si Noe, Moises, Jesus, tan arum nira, so inusar To pian mitalosan ed sakey a grupo a walaan na maapit ya ulopan. Anggapo so rason pian manisia ya anguman la so pidedeneng na Dios ed saray lingkor to natan. Siempre, saya so mamalesa na sananey a tepet: Kasin magenap la so pilimog ed anggan dinan a relihyon? Konsideraen tayo iyan makanan tepet diad ontumbok ya artikulo.

[Litrato ed pahina 4]

Say Dios so abayag lan midedeneng ed totoo to bilang sakey ya organisadon grupo