Nabendisyonan Iramay Mangiglogloria ed Dios

“Ondago ra a mangigalang ed arap mo, O Katawan; tan ligligaen da so ngaran mo.”​—SALMO 86:9.

1. Akin a nigloria tayo so Dios diad saray paraan a napalumbasan ni so nagawaan na saray andiay-bilay a pinalsa?

 SI Jehova so manepeg ya idayew na amin a pinalsa to. Anggaman saray andiay-bilay a pinalsa so andi-esel a mangiglogloria ed sikato, sikatayon totoo so walaan na abilidad a mankatunongan, mantalos, mangapresya, tan mandayew. Diad sikatayo sirin so pangibabagaan na salmista na: “Manggawa kayo na magaygayaga a tanol a ‘yapay ed Dios, amin yo daldalin: Kantaen yo so kagalangan na ngaran to: gawa yo a maligliga so dayew to.”​—Salmo 66:1, 2.

2. Siopara so onkikiwas ed ganggan ya igloria so ngaran na Dios, tan akin?

² Say karaklan ed katooan so agmamibidbir ed Dios odino mangiglogloria ed sikato. Balet, diad 235 a daldalin et ipapatnag na masulok ya anemiran milyon a Tasi nen Jehova a natetebek da iray “agnanengneng a kalidades” na Dios panamegley na saray bengatlan ginawa to tan “narerengel” da so andi-esel a panamaneknek na saray pinalsa. (Roma 1:20, NW; Salmo 19:2, 3) Diad panaaral da na Biblia, sikara so makapikakabat tan mangaaro ed si Jehova. Oniay impasakbay na Salmo 86:9, 10: “Amin na saray nasyones a ginawam ondago ra a mangigalang ed arap mo, O Katawan; tan ligligaen da so ngaran mo. Ta sika balbaleg ka, tan managgawa ka na pankelkelawan ira a bengatla: sika so Dios a bukbukor.”

3. Panon a ‘manlilingkor ed agew tan labi’ so “baleg ya ulop”?

³ Mipadpara so impaneskribe na Apocalipsis 7:9, 15 ed “sakey a baleg ya ulop” na saray managdayew a ‘panlilingkoran da so Dios ed agew tan labi ed templo to.’ Aliwan literal a kekerewen na Dios ed saray lingkor to so andi-tundan panangidayew ed sikato. Ingen ta saray mandadayew ed sikato et sakey a sankagloboan ya organisasyon. Kanian sano labi ed arum a daldalin, saray lingkor na Dios ed arum a parte na dalin so okupadon manpupulong. Kanian nibaga ya agbalot onseselek so agew parad saramay mangiglogloria ed si Jehova. Agmanbayag et “amin a bengatla a wala so panlinlinawa to” so onkelyaw a mangidayew ed si Jehova. (Salmo 150:6) Balet, kaleganan  ni, anto so nagawaan tayo bilang indibidual pian nigloria so Dios? Antoran angat so nayarin kidungetan tayo? Tan antoran bendisyon so manaalagar ed saramay mangiglogloria ed Dios? Bilang ebat, konsideraen tayo so sakey a salaysay ed Biblia nipaakar ed say Israelitan tribu na Gad.

Sakey ya Angat Nensaman

4. Anton angat so inkidungetan na tribu na Gad?

⁴ Sakbay ira a linmoob ed Insipan a Dalin, inkerew na saray membro na Israelitan tribu na Gad a manayam la ra ed lugar a walad bukig na Jordan, lapud marakep itan a pampastolan. (Numeros 32:1-5) Say panayam ditan et mankaukolan na panalona ed seryoso iran problema. Saray tribu a walad sagur so naprotektaan ed Patar na Jordan lapud sakey itan a natural a salimbeng manlapud saray onlulubak a sundalo. (Josue 3:13-17) Balet, nipaakar ed daldalin ed bukig na Jordan, inkuan na The Historical Geography of the Holy Land, nen George Adam Smith: “[Saratan] so plastado tan maawang, ya anggapo lawari so makasanib, diad maawang a patar na Arabia. Kanian sikara so lawas mainomay a lusoben na saray naeerasan a totoon manteteyengteyeng, a walaray angkabaleg a grupo ya onlulusob ed sikara ed kada taon pian walay panpastolan [da].”

5. Panon a pinaseseg nen Jacob iray kapolian nen Gad diad ikiwas da sano sikara so lusoben?

⁵ Panon a natalonaan na tribu na Gad so ontan ya agmanundan pananesdes? Pigaran siglo ni ed akadkauna et oniay impasakbay na laki ran si Jacob diad propesiya to sanen sikatoy magano lan ompatey: “Si Gad, sugbaan to naani sangkasundaloan; balet sikato ombangal naani ed saray mukor da.” (Genesis 49:19) No agtebeken a maong, singa makapasinagem iratan a salita. Balet diad katuaan to et saratan a salita so mankabaliksan na sakey a ganggan ya ombales iray taga-Gad. Pinaseguroan ira nen Jacob a no gawaen da itan, makapabaing ya onatras iray onlulusob ed sikara, a nausilan ira na saray taga-Gad.

Saray Angat ed Panagdayew Tayo Natan

6, 7. Panon a mipadpara so kipapasen na saray Kristiano natan ed samay tribu nen Gad?

⁶ Singa say tribu na Gad, nipapaarap iray Kristiano natan ed saray pananesdes tan pamapabelat na sistema nen Satanas; anggapo so mamilagron manalimbeng ed sikatayo diad pipuligesgesan ed saratan. (Job 1:10-12) Dakel ed sikatayo so nepeg a manalona ed saray pakadesdesan diad eskuelaan, pananap na pambilay, tan pamabaleg ed ananak. Wala met iray personal odino akindalem a nengneng na pakadesdesan. Arum so nepeg a mansungdo ed “sabit ed laman” lapud depekto ed laman odino sakit. (2 Corinto 12:7-10) Arum so maniirap lapud liknaan ya inkaandiay-kakanaan. “Saray mauges ya agew” na itatatken so nayarin mangamper ed saray maedad lan Kristiano diad panlingkor da ed si Jehova a walaan na kaksilan a singa nensaman.​—Eclesiastes 12:1.

 ⁷ Papanonotan itayo met nen apostol Pablo a sikatayo so “mitulot . . . sumpa ed saray mauges ya espiritu ed pasen a mangatatawen.” (Efeso 6:12) Sikatayo so naynay a nipapaarap ed “espiritu na mundo,” say espiritu na panagrebeldi tan inkabulok ed moral ya iyaalibansa nen Satanas tan saray demonyo to. (1 Corinto 2:12; Efeso 2:2, 3) Singa ed say matakot ed Dios a si Lot, sikatayo natan so nayarin nagogonigon ed imoral iran bengatla a totongtongen tan gagawaen na totoo. (2 Pedro 2:7) Sikatayo so nipapaarap met ed direktan panangataki nen Satanas. Si Satanas so mibabakal ed nakdaan na saray alanaan, a “manguunor ed ganggan na Dios, tan wala ed sikara so impantasi nen Jesus.” (Apocalipsis 12:17) Say ‘arum a karnero’ nen Jesus so nidudunget met ed panangataki nen Satanas diad panamegley na saray pananebel tan panamasegsegang.​—Juan 10:16.

Onsuko Odino Ombales?

8. Panon so ikiwas tayo ed saray panangataki nen Satanas, tan akin?

⁸ Anto so nepeg ya ikiwas tayo ed saray panangataki nen Satanas? Singa say tribu na Gad nensaman, nepeg itayon magmaliw a mabiskeg ed espiritual tan ombales itayo unong ed panangidirehi na Dios. Makapaermen ta arum so sinmuko la ed saray pakadesdesan ed bilay, ya apaulyanan da laray maespiritual a responsabilidad da. (Mateo 13:20-22) Oniay inkuan na sakey a Tasi no akin a dinmaiset so miaaral diad kongregasyon da: “Talagan kinmesaw laray agagi. Amin da et pirmi lan adetdetan.” On, saray totoo natan so walaan na dakel a rason pian nakesawan. Kanian magmainomay a moriaen so panagdayew ed Dios bilang sakey nin pakadetdetan, sakey a makapabelat ya obligasyon. Balet kasin makatunongan odino susto itan a panmoria?

9. Panon a say pangawit ed pako nen Kristo et manresulta ed pakainawaan?

⁹ Konsideraen pa no anto so imbaga nen Jesus ed dakel a totoo diad panaon to a nayarin naksawan met la ed saray pakadesdesan ed bilay: “Dago kayo’d siak, amin yon nasasagpotan tan nabebelatan, et ikdan ta kayoy pampainawa.” Kasin say labay ya ibaga nen Jesus et nagamoran so pakainawaan no ontunda so sakey ed panaglingkor to ed Dios? Diad pisunian et oniay inkuan nen Jesus: “Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo.” Say sakey a pako et gawa ed kiew odino metal a mamasarag ed too odino ayep a mangawit na ambelat ya aawiten. Akin, sirin, a labayen na siopaman ya awaten so ontan a pako? Agta “nabebelatan” itayo la? On, balet onia met so nabasa ed Griegon teksto: “Onsilong ka ed pakok tan misakbatan ed siak.” Isipen pa: Iyoopresi nen Jesus so tulong to pian nasakbat tayo so aawiten tayo! Agtayo nepeg a gawaen itan diad dilin biskeg tayo.​—Mateo 9:36; 11:28, 29, paimano’d-leksab na NW; 2 Corinto 4:7.

10. Antoray pansumpalan na saray sagpot tayon mangigloria ed Dios?

¹⁰ Sano sakbaten tayo so pako na inka-babangatan, sikatayo so mibakal ed si Satanas. “Onsumpa kayo ed Diablo, et sikato so onarawi ed sikayo,” so insipan na Santiago 4:7. Agkabaliksan na saya a mainomay itan a gawaen. Say panserbi ed Dios so mankaukolan na pirmin sagpot. (Lucas 13:24) Balet oniay isisipan na Biblia diad Salmo 126:5: “Saray mantanem ed lualua manani ra naani ed gayaga.” On, manlilingkor itayo ed maliket a Dios. Sikato so “mananumang ed saray mananap ed sikato,” tan bebendisyonan to iramay mangiglogloria ed sikato.​—Hebreos 11:6.

Igloria so Dios Bilang Manangipulong na Panarian

11. Panon ya onkanan depensa ed saray panangataki nen Satanas so pibiang ed lawak na ministeryo?

¹¹ Oniay ingganggan nen Jesus: “Onla kayo sirin, tan manggawa kayo na saray babangatan ed amin a nasyones.” Say panagpulong a kimey so manunan dalan pian niyapay tayo ed Dios so “bagat a panangidayew.” (Mateo 28:19; Hebreos 13:15) Say pakawalaan na ‘saray salisali a sinapinan na panangiparaan ed ebanghelyo na kareenan’ et sakey ya importantin kabiangan na “sankabukel a kinlong na Dios”​—say depensa tayo sumpad saray panangataki nen Satanas. (Efeso 6:11-15) Say pangidayew ed Dios diad lawak na ministeryo et sakey a maabig a paraan pian napabiskeg itayo ed pananisia tayo. (2 Corinto 4:13) Ontulong itan ed sikatayo pian niwaklit tayo ed kanonotan iray negatibon bengatla. (Filipos 4:8) Say pibiang ed lawak na ministeryo so mangiyabuloy  ed sikatayon manggayaga ed makapabiskeg a pililimog ed saray kaparan managdayew.

12, 13. Panon a nagunggonaan iray pamilya diad regular a pibibiang ed lawak na ministeryo? Iyilustra.

¹² Say panagpulong a kimey so makagunggona met ya aktibidad na pamilya. Siempre, nakaukolan na saray kalangweran so asimbang a panligliwaan. Balet, say panaon ya usaren na sankapamilyaan diad lawak na ministeryo so agnepeg a magmaliw a makapabelat. Nagawaan itan na atateng a mas makapaliket diad pangipasal da ed ananak da a magmaliw ya epektibo ed ministeryo. Agta panliketan na saray kalangweran iray bengatla no walay maabig a nagawaan da? Natulongan na atateng iray kalangweran da a nawalaan na liket ed ministeryo no ipatnag da ed sikara so inkasimbang, aliwan say pamaskar ed sikara a manggawa na agda nayarian.​—Genesis 33:13, 14.

¹³ Niarum ni, onelet so relasyon na pamilya no sankakaiba ira a mangidayew ed Dios. Ikonsidera pa so sakey ya agin bii a tinaynan na agmananisian masiken to tan walad pudir to iray limaran ananak to. Diad ontan et say agin bii so nipaarap ed angat a mantrabaho tan manlegpet ed ananak to. Kasin sikato so kinmesaw lan maong, ya imbaliwala to la so espiritual a pankaukolan na ananak to? Oniay nanonotan to: “Siak so maseet a manaaral na Biblia tan saray publikasyon na Biblia, insan panggugunaetan kon iyaplika so nababasak. Maparanay kon aawiten iray ananak ko ed aral tan diad panagkabkaabungan a ministeryo. Say resulta na impansagpot ko? Amin a limaran ananak ko so abautismoan.” Say sigpot a pibibiang ed ministeryo so makatulong met ed sikayo diad pamapabaleg yo’d ananak yo dia “ed kadudusa tan panamilin na Katawan.”​—Efeso 6:4.

14. (a) Panon a say Dios so nigloria na saray kalangweran diad eskuelaan? (b) Anto so makatulong ed saray tobonbalo pian agda “ibaing so ebanghelyo”?

¹⁴ Sikayoran kalangweran, no manaayam kayo ed bansa a mangiyaabuloy ed mapublikon panagpulong, kasin iglogloria yo so Dios diad pampulong ed eskuelaan, odino paamper kayo lapud takot ed too? (Uliran 29:25) Oniay insulat na sakey a 13-años a Tasi diad Puerto Rico: “Agkon balot imbaing so manpulong diad eskuelaan lapud amtak a saya so katuaan. Diad klase mi et naynay kon itagey so limak tan ibabagak so nanaaralan ko ed Biblia. No walay libren oras ko, siak so oonla ed librarya tan babasaen ko so libron Young People Ask.” * Kasin benendisyonan nen Jehova iray sagpot to? Oniay inkuan to: “No maminsan et mantepet ed siak iray kaklasek tan onkerew nira ingen na kopya na libro.” No masuyat kayon manggawa ed saya, nayarin nakaukolan yon paneknekan ed inkasikayo so “maong, tan makapaliket, tan nasnaspot a linawa na Dios” diad maseet tan personal a panagaral. (Roma 12:2) Sano kombinsido kayo la a katuaan so naaaralan yo, sikayo so agbalot ‘mangibaing ed ebanghelyo.’​—Roma 1:16.

Sakey a ‘Lukas a Puerta’ Parad Serbisyo

15, 16. Anton “baleg a puerta a mangitonton ed kimey” so nilooban na arum a Kristiano, tan antoran bendisyon so agamoran da?

¹⁵ Insulat nen apostol Pablo a walay nilukas ed sikato a “baleg a puerta a mangitonton ed kimey.” (1 Corinto 16:9, NW) Kasin aabuloyan na sirkumstansya yo so onloob ed kaaruman niran kimey? Alimbawa, say pibiang ed panag-regular odino auxiliary payunir so mangilalanor ed pangideboto na 70 odino 50 ya oras kada bulan diad panagpulong a kimey. Natural lambengat a pablien na saray kaparan Kristiano iray payunir lapud matoor a panaglingkor da.  Balet say panguusar da na dakel ya oras ed ministeryo so aliwan sengegan pian magmaliw ira a mas matalonggaring nen saray agagi ra. Imbes, babayuboan da so awawey ya impaseseg nen Jesus: “Ariripen kami, ya andi-kakanaan; ginawa mi so nepeg mi a gawaen.”​—Lucas 17:10.

¹⁶ Say panagpayunir so mankaukolan na dilin-disiplina, personal a panangorganisa, tan mabulos a pansakripisyo. Balet, makagunggonan tuloy iray bendisyon. “Say suston pangusar ed Salitay Dios a katuaan et peteg a bendisyon,” so inkuan na kalangweran a payunir a manngaray Tamika. “Sano manpayunir ka, mabetbet mon usaren so Biblia. Sano mankabkaabungan ak, nanonotan ko la iray teksto a matukoy ed kada unabung.” (2 Timoteo 2:15) Inkuan na payunir a manngaray Mica: “Say pakaimaton ed no panon ya aapektaen na katuaan so bilay na totoo et sakey nin alay abig a bendisyon.” Ontan met so imbaga na sakey a kalangweran a manngaray Matthew nipaakar ed liket ton “makanengneng ed ikamang na sakey a too diad katuaan. Anggapo lay makapangiter ni na onian nengneng na gayaga.”

17. Panon ya atalonaan na sakey a Kristiano iray negatibon liknaan to nipaakar ed panagpayunir?

¹⁷ Ninonot yo la kasi so manpayunir? Nayarin labay yo balet ta isipen yon agyo nasarag. “Walaray negatibon liknaan ko nipaakar ed panagpayunir,” so inaksobi na kalangweran ya agin bii a manngaray Kenyatte. “Inisip ko ya agko nasarag itan. Agko amtan iparaan iray introduksion ko odino mankatunongan unong ed Kasulatan.” Balet, inyasain na mamatatken so sakey ya eksperiensyadon payunir ya agin bii a mikimey ed sikato. “Makapaliket so pikimey ed sikato,” so nanonotan nen Kenyatte. “Lapud satan et nampayunir ak.” Diad panamaseseg tan panangipasal, nayarin labay yo met lay manpayunir.

18. Antoran bendisyon so nagamoran na saramay manmisionaryo?

¹⁸ Say panagpayunir so nayarin mangilukas ni na pankanawnawa parad arum niran pribilehyo ed serbisyo. Alimbawa, nayarin onkualipika so arum a sanasawa a nipasal ed panagmisionaryon kimey insan nibakin manpulong ed arum a bansa. Nepeg ya onadapta iray misionaryo ed balon bansa, a nayarin balon lenguahe, balon kultura, tan balo iran tagano. Balet agla naim-imano iray mairap a kipapasen no nagamoran laray bendisyon. Oniay inkuan nen Mildred, ya atalitali lan  misionaryo ed Mexico: “Agkon balot nagbabawian so desisyon ko a magmaliw a misionaryo. Pilalek ko la itan sanen ugaw ak ni.” Antoran bendisyon so nanggayagaan to? “Diad bansan binalegan ko, mairap so pananap na iyaralan na Biblia. Dia et walay anggad apatiran iyaaralan ko a nambabansag a ginmapo diad ministeryo!”

19, 20. Panon ya abendisyonan so dakel a manlilingkor ed Bethel, bilang international servants, tan nanaral ed Ministerial Training School?

¹⁹ Dakel a bendisyon so onsabi met ed saramay manlilingkor ed Bethel diad saray sangan opisina na saray Tasi nen Jehova. Oniay inkuan nen Sven, sakey a kalangweran ya agin laki a manseserbi diad Alemanya, nipaakar ed kimey to ed Bethel: “Ipasen kon say gagawaen ko et walaan na magnayon a kaimportantian. Nayarik komon ya ikana ed mundo iray dunong ko. Balet singa itan pandedeposito ed bangko a ngalngali la nalugi.” Tua, sakey a sakripisyo so panlingkor bilang andiay-sueldon boluntaryo. Balet inkuan nen Sven: “Kasabi yo ed ayaman yo, amta yo ya amin a bengatlan agawaan yo ed saman ya agew et parad si Jehova. Tan satan so mangiter ed sikayo na ‘agaylay abig’ a liknaan.”

²⁰ Nanggayagaan met na arum ya agagi so bendisyon diad panlilingkor da bilang international servant, a mankikimey ira ed panagpaalagey na sanga diad arum iran bansa. Oniay insulat na sakey a sanasawa a nanlingkor la ed waloran asainmin ed arum a bansa: “Alay abig na saray agagi dia. Makapaermen so ontaynan​—say komawalon pankanawnawa a nanermenan mi so iyalis mi. Agaylan abig so naeksperiensya mi!” Wadtan met so Ministerial Training School. Iyoopresi na satan so espiritual a panangipasal ed saray kualipikadon balolakin agagi. Oniay insulat na sakey a nangraduar: “Agko nibalikas so pisasalamat ko ed sikayo lapud satan ya alay abig ya eskuelaan. Wala ta ni so arum ya organisasyon a mansagpot na ontan pian mangipasal?”

21. Anton angat so kidudungetan na amin a Kristiano diad panlilingkor da ed Dios?

²¹ On, dakel nin puerta a mangitonton ed kimey so akalukas. Tua, maslak ed sikatayo so agmakapanserbi ed Bethel odino diad arum a bansa. Binidbir a mismo nen Jesus a saray Kristiano so mamawala na nanduruman karakel na “bunga” lapud nanduruma so kipapasen da. (Mateo 13:23) Say angat ed sikatayo sirin bilang Kristiano et say epektibon tuloy a panganamot ed kipapasen tayo​—say pakawalaan na sigpot a pibibiang ed serbisyo ed si Jehova anggad iyabuloy na saray sirkumstansya tayo. Sano gawaen tayo itan, iglogloria tayo si Jehova, tan napaseguroan itayo a sikato so napaliket. Ikonsidera pa si Ethel, sakey ya akulaw lan agi a walad nursing home. Naynay ton pupulongan iramay wadman a kaiba to tan sikatoy manpupulong panamegley na telepono. Anggaman ed saray limitasyon to, sikato so interon-kamarerwa diad panaglingkor to.​—Mateo 22:37.

22. (a) Diad anto niran kaaruman a paraan a nigloria tayo so Dios? (b) Anton alay abig a panaon so manatalaran ed sikatayo?

²² Balet, nodnonoten pa a say panagpulong et sakey labat a paraan pian nigloria tayo si Jehova. Diad pagmaliw tayon napanuliranan ed kondukta tan itsura sano wala itayo ed trabaho, eskuelaan, tan abung, napaliket tayo so puso nen Jehova. (Uliran 27:11) Oniay insipan na Uliran 28:20: “Say matoor a too narasagan ed saray bendisyon.” Nepeg tayo sirin a “mantanem na daakan” diad panlilingkor tayo ed Dios, lapud amta tayon manani itayo na dakel a bendisyon. (2 Corinto 9:6) No gawaen tayo itan, pribilehyo tayo so manbilay diad satan a makapaliket a panaon sano say “amin a bengatla a wala so panlinlinawa to” et mangigloria ed si Jehova a petepeteg a makanepegan ed satan!​—Salmo 150:6.

[Paimano ed leksab]

Kasin Natandaan Yo?

• Panon a saray totoo na Dios so manlilingkor ed si Jehova diad “agew tan labi”?

• Anton angat so nipaarap ed tribu na Gad, tan anto so ibabangat na satan ed saray Kristianon natan?

• Panon ya onkanan proteksion so lawak na ministeryo diad saray panangataki nen Satanas?

• Anton ‘lukas a puerta’ so nilooban na arum, tan antoran bendisyon so nanggayagaan da?

[Tepetepet Parad Panagaral]

[Litrato ed pahina 15]

Singa say impibakal na saray taga-Gad ed saray linmubak ya armada, nepeg a labanan na saray Kristiano iray panangataki nen Satanas

[Litrato ed pahina 17]

Panggagayagaan tayo so makapabiskeg a panlilimog diad lawak na ministeryo

[Saray litrato ed pahina 18]

Say panagpayunir so nayarin mangilukas ed puerta parad arum niran pribilehyo na serbisyo, a mangilaktip ed:

1. Panserbi bilang international servant

2. Panserbi ed Bethel

3. Panmisionaryo