‘Imbangat To Kamin Manrespeto ed Relihyon To’

NAAMTAAN na sakey a Tasi nen Jehova a taga ed luyag na Rovigo, Italya, a sikatoy walaan na tumor tan grabe lay kipapasen to. Kayari na aminpigan inka-ospital to, a kaleganan na saratan et kinerew ton sikatoy agsasaksakan na dala, sikatoy inasikaso na saray ners ed lokal a mangaasisti ed saray pasyente a walaay kanser dia ed abung.

Say inkabiskeg na pananisia tan say mabulos a pitutulongan na sayan 36 años a pasyente so anagyat a tuloy ed saray doktor tan ners ya anambal ed sikato. Antis a tuloy na impatey to ed kanser, nansulat so sakey ed saray ners ya angasikaso ed sikato diad magasin a parad ners nipaakar ed eksperiensya ra ed say pasyente a tinawag to na Angela.

“Maligligsa si Angela tan sikatoy determinadon manbilay. Amta to so nipaakar ed kipapasen to tan say graben sakit to, tan singa sikatayo met, sikatoy manaanap na solusyon, remedyo, odino tambal. . . . Sikami ran ners so kalkalnan akapikabat ed sikato. Agton balot kinontra so tulong mi. Diad kasunian to, say inkaprangka nen Angela so amainomay ed amin a ganagana. Talagan makapaliket so pangasikaso ed sikato, lapud amta mi a diad satan a panaon et napilimogan mi so sakey a matuan too tan nagunggonaan kamin amin. Amoria min tampol a say relihyon to so magmaliw a babeng ed panambal mi ed sakit to.” Ontan so opinyon to lapud moriaen ton kaukolan a saksakan na dala si Angela, balet agto inmabuloy ed satan.​—Gawa 15:28, 29.

“Bilang propesyonal ed panangasikaso ed bunigas, imbaga mi ed si Angela ya agkami onabuloy ed desisyon to, balet diad tulong to, atalosan mi no antoy kabaliksan na bilay ed sikato. Atalosan mi met no panon kaimportante ed sikato tan ed pamilya to so relihyon to. Agsinmuko si Angela. Agto nampadaeg ed sakit to. Sikatoy makpel. Labay toy manbilay, mipuligesgesan, tan mantultuloy a manbilay. Impaamta toy determinasyon to, say pananisia to. Sikato so walaay determinasyon a maslak et anggapo ed sikami, tan pananisia a diad biang mi et aliwan ontan kabiskeg. . . . Imbangat ed sikami nen Angela so kaimportantian na panrespeto ed relihyon to, sakey a bengatlan midumaan ed saray etika ed propesyon mi. . . . Panisiaan mi ya importantin tuloy so imbangat nen Angela ed sikami, lapud napipidenengan mi so amin a klase na too, amin a klase na kipapasen, tan amin a klase na relihyon, insan makaaral kami tan makapangiter na bengatla ed amin a napidenengan mi.”

Samay artikulo ed magasin so angidanet ed Code of Professional Ethics for Italian Nurses, a naaprobaan nen 1999, ya oniay inkuan to: “Gawaen na ners so kimey to, a sinononot ed saray estandarte na indibidual ed relihyon, etika, tan kultura, ontan met ed rasa tan sekso.” No maminsan, nayarin mairap a respetoen na saray ners tan doktor iray relihyoson talindeg na pasyente ra, kanian talagan papablien tan pisalsalamatan na pasyente iramay mabulos a manggawa ed satan.

Maalwar lan ninonot na saray Tasi nen Jehova iray desisyon dan mangilalanor ed panangasikaso ed bunigas tan panagpatambal da. Seryoso ran ikokonsidera so ibabaga na Kasulatan, tan singa nipanengneng ed kipapasen nen Angela, aliwa ran panatiko. (Filipos 4:5) Diad interon dalin, ondarakel so bilang na saray propesyonal ed panangasikaso ed bunigas a mabulos a manrespeto ed konsiensia na saray Tasin pasyente ra.