Say Angat Diad Panangipasal ed Anak Natan

SANEN aralem lay labi, manpaparaan la so makankayarian na restawran pian ikapot itan tan onsempet la. Kabekta et walay linmoob a duaran bii tan sakey ya ugaw insan ira nan-order na naakan. Lapud naknaksawan la, nibaga na makankayarian a kapot la so restawran, balet inmabuloy a serbian to ni ira. Legan a mantotongtong tan mamangan so bibii, say ugaw so nambatikbatik ed loob na restawran tan angipelag na saray biskwit insan to ginatin-gatinan iratan. Imbes a banoen na ina, inimisan to labat so ugaw. Sanen akaalis a siansia iray kustomer, saray dutak so kaukolan nin linisan na naksawan lan makankayarian.

Singa amta yo la, iyiilustra na sayan peteg ed bilay a situasyon ya aliwan maabig so kipapasal na ugugaw diad dakel a pamilya. Nanduruma so rason. Maabuloy so arum ya atateng a gawaen na ananak da so dilin panlabayan da, ya iisipen dan kaukolan ya ombaleg so ananak da a walaan na kawayangan. Odino lapud okupado lan tuloy so bilay da, nayarin agla mangigagana na panaon so atateng pian maalwar ya asikasoen tan ipasal so ananak da. Moriaen na arum ya ateng a sankaimportantian a bengatla so paneeskuela na anak, kanian iiter da so amin lawarin kawayangan ed anak da daput no atagey so grado to diad eskuelaan tan makaloob ed kabkabat a kolehyo.

Ingen, ibabaga na arum a kaukolan ya umanen iray estandarte na atateng tan sosyedad ed inkalapagan. Ikakatunongan da a nalalanor la so ugugaw ed nanduruman krimen tan say karawalan ed eskuelaan so ompapalalo ed kada agew. Kanian indanet na sakey a prinsipal ed eskuelaan na komalima anggad komawalon grado diad Seoul, Republika na Korea, a nepeg a manuna so pamaaligwas ed personalidad da. Oniay inkuan to: “Paaligwasen ni ya unona so maong ya ugali insan ipurek so pikakabat.”

Kaliktan na dakel ya atateng a makapan-kolehyo tan onasenso ed bilay so anak da, ingen ta ibabaliwala ra iray pasakbay. No sakey kan ateng, anton klase na inkatoo so labay mon pagmaliwan na anak mo? Sakey a wala la’d edad a walaan na pakatebek ed moral tan responsable? Sakey a makonsidera ed arum, a maong a miulop, tan walaan na positibon awawey? No ontan, ipangasin konsideraen so onsublay ya artikulo.