Say Walan Sankablian a Tawir

SANEN magano lan manampot so bilay to, nansulat so masiken lan apostol a si Juan: “Anggapo so babaleg a liket ko nen say saya, salanti say pakadngel ko a saray ana’ko manaakar ira ed katuaan.”​—3 Juan 4.

Say tutukoyen na matoor ya apostol et saray anak to ed espiritual. Balet, dakel ya atateng natan so mipakna ed saray salita na apostol. Sikaray makulin mansasagpot a pabalegen so ananak da “diad disiplina tan manametek-kanonotan nen Jehova,” tan panggagayagaan da natan so pakakanengneng ed angkabaleg lan ananak da a “mankukurang ed katuaan.” (Efeso 6:4, NW) Diad tua, say pangibangat na sakey ed saray anak to ed dalan a mamaarap ed maandon bilay et pakagamoran da na walan sankablian a tawir. On, lapud say maridios a debosyon, a lalanoren na satan so pambilay unong ed kaliktan nen Jehova ed saray Kristiano, et “wala ed sikato so sipan na sayan bilay a peles, tan say onsabi.”​—1 Timoteo 4:8.

Si Jehova, say ayadyarin Ama, so mamapablin tuloy ed saray matakot ed Dios ya atateng a manbabanikel a mangibangat ed ananak da na espiritual a bengatla. Sano onkiwas so ananak, napanggayagaan dan tuloy so panggegemtan na tuan panagdayew a kaiba so atateng da. Legan ya ontatakken iratan ya anak, makakatipon ira na alay abig iran pakanodnonotan nipaakar ed saratan ya eksperiensya. Naliketan so arum sano nanonotan da so inmunan impibiang da ed Teokratikon Eskuelaan Parad Ministeryo. * Odino nayarin nanonotan da so pirprimeron impangibasa ra na teksto ed Biblia diad panagkabkaabungan a ministeryo a kaiba so sakey ed saray ateng da. Panon dan nalingwanan so impakarengel da ed atateng da ya angibasa ed sikara na My Book of Bible Stories tan Listening to the Great Teacher? * Nanonotan ni nen Gabriel so bengatlan labalabay to: “Sanen apat-taon ko ni labat, siak so inagew-agew a kakansionan nen nanay ko legan a manluluto. Sankanonot ko ni tekep na aralem a liknaan so sakey a kanta ed Panarian. Diad kaunoran, tinmulong itan ed siak a natebek so kaimportantian na panaglingkor ed si Jehova.” Maseguron nanonotan yo met so balibalin kanta a tutukoyen nen Gabriel. Satan so numero 157 diad libron-panagkantaan a Mankanta na Saray Panangidayew ed si Jehova, ya apauloan na “Dayewen si Jehova Legan na Inkatobonbalo.”

Onia so gapo na kanta: “Ompaway ed sangi na ugugaw;/Panagdayew ed Dios so ikelyaw.” On, walaray ugugaw ya awalaan na pribilehyon milimog  ed si Jesus, tan maseguron sikatoy apaliket da lapud makarepresko tan matuan ugali ra. Inusar ni ingen nen Jesus so inkamabulos na ugugaw a paibangat bilang alimbawa a kaukolan ya aligen na papatumbok to. (Mateo 18:3, 4) Kanian wala so matukoy a pasen na ugugaw diad panagdayew ed si Jehova. Diad tua, oniay intuloy na saray liriko na kanta: “Ugugaw man Dios so pandayewan.”

Lapud napanuliranan a kondukta ra​—diad abung, diad eskuelaan, tan diad arum niran lugar​—dakel ya ugugaw so makapangigagalang ed Dios tan ed pamilya ra. Agaylan bendisyon so impakawalaan da na “Kristianon atateng a matua.” (Deuteronomio 6:7) Gagawaen na saray maridios ya ateng so ibabaga na Dios, a bilang maaron Ama et ibabangat to iray pinalsa to a mankurang ed dalan a nepeg dan pankurangan. Tan agaylan bendisyon so nagagamoran na atateng! Bilang resulta na pangibabangat da ed saray ugugaw ed pamilya ra, panggagayagaan dan tuloy so impakawalaan da na ‘anak a matulok tan mamapaliket ed sikara’! (Isaias 48:17, 18) Oniay inkuan nen Angélica, a manlilingkor natan ed sanga na saray Tasi nen Jehova ed Mexico: “Saray ateng ko so lawas nansagpot a mangiyaplika ed saray prinsipyo na Biblia. Lapud satan et alay abig so impanugaw ko. Siak so maliket.”

Saratan a Kristiano so mipakna a makana so pangasikason maong ed espiritual a tawir yo. Nayarin sikayoy tobonbalo a pinabaleg ed sakey a pamilya a walaan na saray tuan Makristianon estandarte. No ontan, oniay ipapaseseg ed sikayo na satan lanlamang a kanta: “Mansiansian malinis, tobonbalo.” Onsabi panaon a sikayo so mandesisyon lan bukor, kanian natan “si Jehova so panmatal’kan mo./Bangta kabantoga’y paliisan.”

No sikayoy lingon mangiyuuna na kabantogan ed bilay yo, anggapoy kakanaan na amin a panangipasal ed sikayo tan naderal iray iilaloan yo ed arapen. Say pampilalek ya ombantog so makapangitonton ed kaandi na inkamabantay na sakey. Arum so akilimog ed saray totoo, ya anggaman ompatnag a maomaong tan marakep so ugali ra et andian ira na interes ed saray Makristianon estandarte. Niyilustra itan ed si Tara, say manunan karakter diad video a Young People Ask​—How Can I Make Real Friends? Singa si Tara, siopaman a kalangweran a Kristiano a mililimog ed saraman so agmamapabli ed tuan panagdayew so makamoria ya agmanbayag et ‘deralen na mauges a kaulop so maong ya ugali,’ unong ya inkuan na kanta. Nakaukolan so andukey a panaon a pansagpot pian nabayuboan iray maong ya ugali, balet maganggano iratan a naderal.

Tua, aliwan mainomay so pambilay a mangipapatnag na panamagalang ed Dios. Anggaman ontan, unong ya intuloy na kanta, “no diad inkaugaw Dios nonoten,/Tan si Jehova so  daydayewen” ed espiritu tan katuaan, niletneg yo so malet a pundasyon parad tuan itatalona. Tan “diad itakken gamora’y gayaga.” Natebek yo a nagkalalo a lapud maaron panangasikaso nen Jehova, anggapo so makaamper ed sikayo ed panggawa na maptek ed imaton to. Satan so paraan pian ontakken a makalakal tan walaan na takot ed Dios. Nilikud ed satan, say makabat a panganamot ed Makristianon panamabaleg so mangiter ed sikayo na pankanawnawan ‘napaligsa so puso na Dios.’ Wala ta ni so babaleg a pribilehyo a niwala ed sakey a too?​—Uliran 27:11.

Sikayoran kalangweran sirin so lawas mannodnonot no panon kaimportante so pangipapasal ed sikayo nen Jehova tan saray Kristianon atateng yo. Komon ta say baleg a panangaro ra ed sikayo so mamakiwas ed sikayon gawaen so makapaliket ed imaton nen Jehova. Singa si Jesu-Kristo tan say matoor a kalangweran a si Timoteo, napaliket yo so mangatatawen ya Ama yo tan saray ateng yo. Tan no bilang ta magmaliw kayo met lan ateng, maseguron onabobon kayo ed imbaga nen Angélica, ya asalambit ed tagey: “No bilang ta nawalaan ak na anak, panseetan kon maong ya ipurek ed puso to so panangaro ed si Jehova manlapud inkaugaw, pian magmaliw itan a manangigiyan prinsipyo ed bilay to.” Peteg a say maptek a dalan a mangitonton ed maandon bilay so walan sankablian a tawir!

[Saray paimano ed leksab]