‘Ibangat Yo Iran Mangunor ed Amin a Bengatla ya Ingganggan Ko ed Sikayo’
‘Ibangat Yo Iran Mangunor ed Amin a Bengatla ya Ingganggan Ko ed Sikayo’
“Onla kayo sirin, tan manggawa kayo na saray babangatan . . . ibangat yo ran mangunor na amin a bengabengatla ya ingganggan ko ed sikayo.”—MATEO 28:19, 20.
1. Anto so apantongtongan na babangatan a si Felipe tan say lakin taga-Etiopia?
SAKEY a lakin taga-Etiopia so nambaroy a linma’d Jerusalem. Diman so pandadayewan to ed aaroen ton Dios, si Jehova. Mapatnag a papablien to met so apuyanan a Salitay Dios. Sanen sikatoy pasempet la ya akalugan ed karwahe to, babasaen to so kopya na saray sulat nen propeta Isaias sanen sikatoy nabet nen Felipe, sakey a babangatan nen Kristo. Oniay intepet nen Felipe ed Etiope: “Natalosan mo so babasaen mo?” Oniay inyebat na laki: “Panon so pakayarik, no anggapo so mangiwanwan ed siak?” Tinulongan nen Felipe iyan masimoon ya estudyante na Kasulatan anggad nagmaliw a babangatan nen Kristo.—Gawa 8:26-39.
2. (a) Diad anton paraan a makabaliksan so inyebat na Etiope? (b) Antoray tepet a konsideraen tayo a misiglaotan ed ganggan nen Kristo a manggawa na saray babangatan?
2 Makatantanda so inyebat na Etiope. Inkuan to: “Panon so pakayarik, no anggapo so mangiwanwan ed siak?” On, nakaukolan so mangiwanwan, sakey a mangitonton ed sikato. Iyiilustra na sayan mismon balikas so kaimportantian na espisipikon bilin ya inlaktip nen Jesus ed ganggan to a manggawa na saray babangatan. Anto itan a bilin? Pian naebatan itan, ituloy tayon konsideraen iray salita nen Jesus diad Mateo kapitulo 28. Inyapasakey na akaunan artikulo iray tepet ya akin? tan iner? Konsideraen tayo natan so duara nin tepet a misiglaotan ed ganggan nen Kristo a manggawa na saray babangatan—anto? tan kapigan?
‘Ibangat Yo Iran Mangunor ed Amin a Bengabengatla’
3. (a) Panon so pagmaliw na sakey a too a babangatan nen Jesu-Kristo? (b) Say panggawa na saray babangatan so mangilaktip ed pangibangat na anto?
3 Anto so nepeg tayon ibangat pian natulongan so arum a magmaliw a babangatan nen Kristo? Oniay ingganggan nen Jesus ed saray patumbok to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Kanian, nepeg tayon ibangat iray bengatlan ingganggan nen Kristo. * Balet, anto so ontulong pian naseguro tayon say too a nibangat ed saray ganggan nen Jesus so aglambengat magmaliw a babangatan noagta mansiansian ontan? Say importantin punto so nanengneng ed saray maalwar ya impanpili nen Jesus ed saray balikas. Imanoen ya agto lambengat imbagan: ‘Ibangat yo ira ed amin a bengatlan ingganggan ko ed sikayo.’ Noagta, inkuan ton: ‘Ibangat yo iran mangunor ed amin a bengatlan ingganggan ko ed sikayo.’ (Mateo 19:17) Anto so kabaliksan na satan?
4. (a) Anto so kabaliksan na pangunor ed sakey a ganggan? (b) Iyilustra no panon tayon nibangat so sakey a too a manumpal ed saray ganggan nen Kristo.
4 Say kabaliksan na pangunor ed ganggan et “itunos so gawa na sakey” ed sakey a ganggan—ya unoren odino sumpalen itan. Panon sirin so pangibangat tayo ed sakey a too pian unoren odino tuloken to iray ingganggan nen Kristo? Bueno, isipen pa no panon ya ibabangat na sakey ya instruktor ed panagmaneho so estudyante to pian ontumbok ed saray ley na trapiko. Nayarin ibangat to so nipaakar ed saray ley na trapiko ed saray estudyante to legan a wala ira’d paneeskuelaan da. Balet, pian nibangat iray estudyante to no panon so pangunor ed saratan a totontonen, nepeg ton iwanwan iray estudyante legan na aktual a panmamaneho ra tan legan na pansasagpot dan iyaplika so naaaralan da. Ontan met, sano ibangat tayo so Biblia ed saray totoo, ibangat tayo ed sikara iray ingganggan nen Kristo. Balet, nakaukolan tayo met ya iwanwan iray iyaaralan legan dan panggugunaetan ya iyaplika iray ganggan nen Kristo diad inagew-agew a kabibilay da tan ed ministeryo ra. (Juan 14:15; 1 Juan 2:3) Ta pian sigpot tayon nasumpal so ganggan nen Kristo a manggawa na saray babangatan, nakaukolan a magmaliw itayon managbangat tan manangiwanwan. Diad ontan a paraan, naalig tayo so alimbawa ya impatnag nen Jesus tan si Jehova.—Salmo 48:14; Apocalipsis 7:17.
5. Akin a nayarin masuyat so sakey ya iyaaralan tayo na Biblia a mangunor ed ganggan nen Kristo a manggawa na saray babangatan?
5 Say panangibangat ed arum a mangunor ed saray ganggan nen Jesus so mangilaktip ed panulong ed sikara ya ontulok ed ganggan a manggawa na saray babangatan. Parad arum ya iyaaralan tayo na Biblia, satan so mairap a kimey. Anggaman sikara so datin aktibon membro na sakey a relihyon na Kakristianoan, nayarin ag-ira imbangat na saray datin relihyoson lider da ya onla tan manggawa na saray babangatan. Prangkan aaksobien na saray lider na relihyon a no nipaakar ed panangibangat ed pulok da a man-ebanghelyo, sigpot a sinmaew iray relihyon na Kakristianoan. Oniay inkomento na sakey ya iskolar na Biblia a si John R. W. Stott nipaakar ed ganggan nen Jesus ya onla ed nanduruman pasen na mundo tan tulongan so amin a nengneng na totoo a magmaliw a babangatan: “Say insaew min mangunor ed labay ya ibaga na satan a ganggan so pirmin kakapuyan na saray ebanghelikon Kristiano diad kimey na panag-ebanghelyo natan.” Inyarum to: “Say tendensia mi et aliwan diad personal a paraan so pangiyaabawag mi ed mensahe mi. No maminsan et singa kami totoo a manbabando labat ed saray nalelener a totoo no antoy gawaen da bangta wala kami lambengat ed gilig na dayat. Agkami ontitiblong pian isalba ira. Antakot kamin nabasa.”
6. (a) Sano tutulongan so sakey ya iyaaralan na Biblia, panon tayon naalig so alimbawa nen Felipe? (b) Panon tayon nipatnag so panagpaga tayo sano onggapo lan manpulong so sakey ya iyaaralan na Biblia?
6 No walay iyaaralan tayo na Biblia a datin membro na relihyon ya ‘antakot a nabasa,’ nayarin sakey ya angat ed sikato so panalona ed takot to ya ontiblong ed danum, a singa panangibaga, pian unoren so ganggan nen Kristo a manggawa na saray babangatan. Nakaukolan to so tulong. Nakaukolan tayo sirin so magmaliw a maanos legan tayon inanabang ed sikato so klase na bilin tan panangiwanwan a mamaaralem ed pakatalos to tan mamakiwas ed sikato, a singa ed saray imbangat nen Felipe ya amalinew ed pakatalos na say Etiope tan amakiwas ed sikaton manpabautismo. (Juan 16:13; Gawa 8:35-38) Niarum ni, say pilalek tayon mangibangat ed saray iyaaralan tayo na Biblia a mangunor ed ganggan a manggawa na saray babangatan so mamakiwas ed sikatayon mikimey ed sikara ta pian niwanwan ira sano gagawaen da so primero iran kundang da diad pangipulong ed Panarian.—Eclesiastes 4:9, 10; Lucas 6:40.
“Amin a Bengabengatla”
7. Say pangibangat ed arum a ‘mangunor ed amin a bengatla’ so mangilaktip ed pangibangat ed sikara na antoran ganggan?
7 Agtayo lambengat ibabangat iray balon babangatan a manggawa met na saray babangatan. Binilin itayo nen Jesus ya ibangat so arum a ‘mangunor ed amin a bengabengatla’ ya ingganggan to. Satan so maseguron mangilaktip ed duaran sankatalonggaringan a ganggan—aroen so Dios tan aroen so kaparan too. (Mateo 22:37-39) Panon a nibangat so balon babangatan a mangunor ed saratan a ganggan?
8. Iyilustra no panon a nibangat so balon babangatan nipaakar ed ganggan ya ipatnag so aro.
8 Isipen pa lamet so ilustrasyon nipaakar ed manaaral a manmaneho. Legan a manmamaneho so estudyante diad karsada a kaibay instruktor to, aglambengat makaaral so estudyante diad italineng to ed instruktor noagta diad pangimano to met ed arum a drayber. Singa bilang, nayarin ipaimano na instruktor so sakey a drayber a mapangasin angipalugar ed sananey a drayber ya onlabas ed arapan to; odino sakey a drayber ya ikuyep to so silew na luganan to ta pian agnalaram so kaabet ton drayber; odino sakey a drayber a mabulos ya ontulong ed sakey a kabat to ya aderalan na luganan. Saratan ya alimbawa so mangibangat ed estudyante nipaakar ed makana iran leksion a nayarian ton iyaplika sano sikatoy manmamaneho. Ontan met, say balon babangatan a manbabaroy ed dalan na bilay so aglambengat makaaral ed manbabangat ed sikato, noagta makaaral met ed maabig iran ehemplo a nanengneng to ed kongregasyon.—Mateo 7:13, 14.
9. Panon a naaralan na balon babangatan so kabaliksan na pangunor ed ganggan ya ipatnag so aro?
9 Singa bilang, nayarin naobserbaan na sakey ya iyaaralan na Biblia so sakey a mansusulon ateng a pirmin mansasagpot ya onatendi ed Kingdom Hall kaiba to iray angkekelag nin ananak to. Nayarin naimano to so sakey a maneermen a too a matoor a miaaral anggaman ed pipupuligesgesan to ed depresyon, sakey ya akulaw lan balo a mansasamar ed arum niran maedad la pian ilugan to ira kada miaral ira ed kongregasyon, odino sakey a tin-edyer a mangiiban manlinis ed Kingdom Hall. Nayarin naimano na sakey ya iyaaralan so sakey a matatken ed kongregasyon a matoor a mangidadaulo ed lawak na serbisyo anggaman dakel iray responsabilidad to ed kongregasyon. Nayarin nakabat to so sakey a Tasi a baldado la tan apukok ed abung to balet ta panlalapuan na espiritual a panamaseseg ed amin ya ombibisita ed sikato. Nayarin naobserbaan na iyaaralan so sakey a sanasawa a nanggawa na pirmin pananguman ed bilay da ta pian nakomponi ra so maedad lan atateng da. Diad pakakaimano to ed saratan a mapangasi, matulong, tan nailaloan a Kristiano, say balon babangatan so makaaral ed alimbawa ra no anto so kabaliksan na pangunor ed ganggan nen Kristo ya aroen so Dios tan say kaparan too, nagkalalo la ed saray kapananisiaan. (Uliran 24:32; Juan 13:35; Galacia 6:10; 1 Timoteo 5:4, 8; 1 Pedro 5:2, 3) Diad ontan a dalan, kada membro na Kristianon kongregasyon so makayari—tan nepeg met a magmaliw a managbangat tan manangiwanwan.—Mateo 5:16.
“Angga ed Kasampotan na Mundo”
10. (a) Panon kabayag so pantultuloy tayon panggawa na saray babangatan? (b) Anton alimbawa so impatnag nen Jesus nipaakar ed pananumpal ed saray asainmin?
10 Anggad kapigan so nepeg tayon pantultuloy a panggawa na babangatan? Diad interon kasampotan na sistema na bengabengatla. (Mateo 28:20) Nayarian tayo kasin sumpalen iyan aspekto na ganggan nen Jesus? Bilang sankamundoan a kongregasyon, determinado itayon manggawa ed satan. Diad apalabas iran taon, maliket tayon inusar so panaon, biskeg, tan kaykayarian tayo pian anapen iramay “tinandaan ed bilay ya andi-anggaan.” (Gawa 13:48) Diad kaplesan, uusaren na saray Tasi nen Jehova so promedyon masulok a taloran milyon ya oras ed kada agew na taon diad panangipulong ed Panarian tan panaggaway-babangatan a kimey diad sankamundoan. Gagawaen tayo itan lapud tutumboken tayo so alimbawa nen Jesus. Oniay inkuan to: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Ontan met so masimoon a pilalek tayo. (Juan 20:21) Agtayo lambengat labay ya igapo so kimey a nimatalek ed sikatayo noagta labay tayon sumpalen itan.—Mateo 24:13; Juan 17:4.
11. Anto so agawa ed arum ed saray Kristianon agagi tayo, tan anto so nepeg tayon itepet ed inkasikatayo?
11 Balet, naermenan itayo no naimano tayo so arum ed saray kapananisiaan tayo a maletey la ed espiritual tan bilang resulta et tinmayer la ra odino tinmunda la ra ed panguunor ed ganggan nen Kristo a manggawa na babangatan. Wala kasi so nagawaan tayo pian natulongan ira a mamasimbalo ed pililimog da ed kongregasyon tan ituloy da so pibibiang ed panaggawa na saray babangatan? (Roma 15:1; Hebreos 12:12) Say paraan na impanulong nen Jesus ed saray apostol to sanen sikara so temporaryon linmetey so mangipabitar no anto so nagawaan tayo natan.
Ipatnag Tayo so Panangiyansakit
12. (a) Sakbay na impatey nen Jesus, anto so ginawa na saray apostol to? (b) Panon so impideneng nen Jesus ed saray apostol to anggaman ed impangipatnag da na seryoson kakapuyan?
12 Diad kasampotan na ministeryo nen Jesus ed dalin, sanen asingger la so ipatey to, sikato so ‘tinaynan, tan imbatikan’ na saray apostol to. Unong ya impasakbay la nen Jesus, sikara so ‘abuybuyak, balang sakey a too ed kayarian to.’ (Marcos 14:50; Juan 16:32) Panon so impideneng nen Jesus ed saray kaiba to a linmetey ed espiritual? Kayarin tuloy na inkioli to, oniay imbaga nen Jesus ed arum ed saray patumbok to: “Agkayo antakot; onla kayon mangibaga ed saray agagik ya ompikal iran onla ed Galilea, et nanengneng da ak diman.” (Mateo 28:10) Anggaman impatnag na saray apostol so seryoson kakapuyan, sikara nin siansia so tinawag nen Jesus ya ‘agagik.’ (Mateo 12:49) Agto ira intalirak. Diad onian paraan et impatnag nen Jesus so panangasi tan panamerdona, no panon ya ipapatnag iratan nen Jehova. (2 Arari 13:23) Panon tayon naalig si Jesus?
13. Panon tayon nepeg a moriaen iramay linmetey ed espiritual?
13 Nepeg a nawalaan itayo na pirmin panangiyansakit ed saramay tinmayer la odino tinmunda lan mibiang ed ministeryo. Siansian nanonotan tayo ni iray gawa na panangaro ya impatnag nensaman na saratan a kapananisiaan tayo—a nayarin diad loob na pigaran dekada. (Hebreos 6:10) Talagan nailiwan tayo so pipiulop ed sikara. (Lucas 15:4-7; 1 Tesalonica 2:17) Balet, panon tayon nipatnag so panangiyansakit tayo ed sikara?
14. Bilang pangalig ed si Jesus, panon tayon natulongan so sakey a maletey a too?
14 Binilin nen Jesus iray maneermen iran apostol ya onla ira ed Galilea tan sikato so napinengnengan da diman. Singa iimbitaan ira nen Jesus ya onatendi ed sakey a nikaduman pantitipon. (Mateo 28:10) Mipadpara natan, papasesegen tayo iramay maletey ed espiritual ya onatendi ed saray miting ed Kristianon kongregasyon, tan nayarin nakaukolan tayon ipaseseg itan ed sikara a maminpiga. Diad biang na saray apostol, walaray resulta ed impangimbita ed sikara, lapud “saray labinsakey a binangatan linma ra’d Galilea, angga ed palandey ya inturo nen Jesus ed sikara.” (Mateo 28:16) Malikeliket itayo sano ontan met so ikiwas na saray maletey diad maligsan impangimbita tayo ed sikara insan ituloy da so iyaatendi ra ed saray Makristianon pantitipon!—Lucas 15:6.
15. Panon tayon natumbok so alimbawa nen Jesus diad pangabrasa ed saray maletey ya onla ed pasen a pantitiponan tayo?
15 Panon so ikiwas tayo sano onsabi ed Kingdom Hall so sakey a maletey lan Kristiano? Bueno, anto so ginawa nen Jesus sanen anengneng to iray apostol to, a say pananisia ra so temporaryon linmetey, diad niganan pasen a pandaragupan da? “Si Jesus linma ed sikara tan akisalita ed sikara.” (Mateo 28:18) Agto lambengat ira ninengneng ed arawi noagta inasinggeran to ira. Isipen pa so inkarepreskoan na saray apostol sanen sikara so inasinggeran lan unona nen Jesus! Komon ta onkiwas tayo met lan unona tan maliket itayon abrasaen iray maletey ed espiritual a mansasagpot ya ompawil ed Kristianon kongregasyon.
16. (a) Anto so naaralan tayo ed paraan na impideneng nen Jesus ed saray patumbok to? (b) Panon tayon nipatnag so panmoria nen Jesus ed saray linmetey? (Nengnengen so paimano’d-leksab.)
16 Anto so ginawa ni nen Jesus? Unona, oniay inyabawag to: “Amin a pakauley niiter ed siak.” Komadua, sikato so angiter na asainmin: “Onla kayo sirin, tan manggawa kayo na saray babangatan.” Komatlo, oniay insipan to: “Wala ak a naynay ed sikayo.” Balet kasin naimano yo no anto so agginawa nen Jesus? Agto nantamian iray babangatan to lapud insaew tan panduaruwa ra. (Mateo 28:17) Kasin epektibo so paraan to? On. Agnambayag, saray apostol so ‘nambangat tan angipulong’ lamet ed maong a balita. (Gawa 5:42) Diad panumbok ed alimbawa nen Jesus ed no panon so pangipasen tan pantrato ed saray maletey la, naeksperiensya tayo met iray makapaligsay-puson resulta diad mismon kongregasyon tayo. *—Gawa 20:35.
“Wala Ak a Naynay ed Sikayo”
17, 18. Anto iray makapabiskeg a punto a wala ed saray salita nen Jesus a, “wala ak a naynay ed sikayo”?
17 Saray kaunoran a salita ed ganggan nen Jesus a “wala ak naynay ed sikayo,” so walaan na makapabiskeg a punto parad amin a mansasagpot a manumpal ed ganggan nen Kristo a manggawa na saray babangatan. Antokaman so isusumpa a gawaen na saray ombubusol ed kimey tayon mangipulong ed Panarian tan antokaman iray nengneng na panagpauges a pawalaen da sumpad sikatayo, anggapo so rason pian ontakot itayo. Akin? Si Jesus, say Lider tayo, a walaan na ‘amin a pakauley ed tawen tan dia ed dalin,’ so walad dapag tayo pian ontulong ed sikatayo!
18 Say insipan nen Jesus a “wala ak a naynay ed sikayo” so makapaligliwa met a tuloy. Legan tayon pambabanikelan so panumpal ed ganggan nen Kristo a manggawa na saray babangatan, naeksperiensya tayo iray panaon na liket tan panaon met na kaermenan. (2 Awaran 6:29) Arum ed sikatayo so nidunget ed makapaermen a panaon sano paneermenan tayo so impatey na inad-aro tayo ed bilay. (Genesis 23:2; Juan 11:33-36) Arum so manaanos ed itatakken da la, lapud onkakapuy lay bunigas tan biskeg da. (Eclesiastes 12:1-6) Nidudunget met so arum diad saray a panaon a dadaegen ira na liknaan na depresyon. (1 Tesalonica 5:14) Tan ondarakel ed sikatayo so mipupuligesgesan ed pirmin kairapan ed panagbilay. Anggaman ed saratan ya angat, ontatalona itayo ed ministeryo tayo lapud si Jesus so wala a “naynay” ed sikatayo, pati diad saray panaon na subok ed bilay tayo.—Mateo 11:28-30.
19. (a) Say ganggan nen Jesus a manggawa na saray babangatan so walaan na antoran bilin? (b) Anto so ontulong ed sikatayo pian nasumpal tayo so ingganggan nen Kristo?
19 Unong ed naimano tayo dia tan ed akadkaunan artikulo, malaknab so lalanoren na ganggan nen Jesus a manggawa na saray babangatan. Imbaga ed sikatayo nen Jesus no akin tan iner so nepeg a panumpalan tayo ed ganggan to. Imbaga to met ed sikatayo no anto so nepeg tayon ibangat tan no anggad kapigan so nepeg tayon panggawa ed satan. Tua, sakey ya angat so panumpal ed sayan malaknab a ganggan. Balet, lapud pakauley nen Jesus ya onsusuporta ed sikatayo tan ed kiwawala to ed dapag tayo, nayarian tayon sumpalen itan! Agta mipakna kayo ed saya?
[Saray paimano ed leksab]
^ par. 3 Ipapaimano na sakey a reperensya iray punton imbaga nen Jesus, “binyagan yo ra . . . ibangat yo ra,’ aliwan ‘binyagan yo ra tan ibangat yo ra.’ Kanian, say ganggan a bautismoan tan ibangat [ira] et “aliwan mapeget . . . a duaran mantumbokan a gawaen.” Imbes, “say panagbangat et tuloytuloy a proseso, a diad sakey a laknab et sakbay na pampabautismo . . . tan diad sakey a laknab et kayari na pampabautismo.”
^ par. 16 Naromog so kaaruman ya impormasyon no panon tayon moriaen tan tulongan iray maletey diad Say Panag-Bantayan na Pebrero 1, 2003, pahina 15-18.
Panon Yon Ebatan?
• Panon tayon ibangat so arum a mangunor ed ingganggan nen Jesus?
• Antoran leksion so naaralan na sakey a balon babangatan manlapud arum a membro na kongregasyon?
• Anto so nagawaan tayo pian natulongan iramay linmetey ed espiritual?
• Anton biskeg tan ligliwa so nagamoran tayo ed insipan nen Jesus a “wala ak a naynay ed sikayo”?
[Tepetepet Parad Panagaral]
[Saray litrato ed pahina 15]
Nakaukolan a magmaliw itayon managbangat tan manangiwanwan
[Saray litrato ed pahina 17]
Makaaral so balon babangatan na makana iran leksion manlapud alimbawa na arum