‘Onla Kayo, tan Manggawa na Saray Babangatan’

“Amin a pakauley niiter ed siak ed tawen tan dia ed dalin. Onla kayo sirin, tan manggawa kayo na saray babangatan.”​—MATEO 28:18, 19.

1, 2. (a) Anton asainmin so inter nen Jesus ed saray patumbok to? (b) Antoran tepet nipaakar ed saray ganggan nen Jesus so konsideraen tayo?

 AGEW ed saman na primabera diad Israel nen 33 K.P., tan nandaragup iray babangatan nen Jesus diad sakey a palandey ed Galilea. Ngalngali la ontokotok ed tawen so apaolin Katawan da balet ta wala ni so importantin bengatla ya imbaga to ed sikara. Walay asainmin ya inter nen Jesus ed sikara. Anto itan ya asainmin? Panon so inkiwas na saray babangatan ed satan? Tan panon ya onaplika itan ya asainmin ed sikatayo natan?

² Satan ya imbaga nen Jesus so nikurit ed Mateo 28:18-20: “Amin a pakauley niiter ed siak ed tawen tan dia ed dalin. Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.” Sinaglawi nen Jesus so nipaakar ed “amin a pakauley,” “amin a nasyones,” “amin a bengabengatla,” tan “naynay.” Satan a ganggan to a manasaglawi ed apatiran balikas so mamapalesa na importante iran tepet, a nayarin segeken ed saray salitan akin? iner? anto? tan kapigan? Sansakeyen tayo iratan a tepet. *

“Amin a Pakauley Niiter ed Siak”

3. Akin a nepeg tayon unoren so ganggan a manggawa na saray babangatan?

³ Unona, akin a nepeg tayon unoren so ganggan a manggawa na saray babangatan? Oniay inkuan nen Jesus: “Amin a pakauley niiter ed siak ed tawen tan dia ed dalin. Onla kayo sirin, tan manggawa kayo na saray babangatan.” Say salitan “sirin” so mangipapabitar ed manunan rason no akin a nepeg tayon unoren iyan ganggan. Say rason et si Jesus, ya angiter ed satan a ganggan, so walaan na “amin a pakauley.” Kaunongan kalaknab so pakauley to?

4. (a) Kaunongan kalaknab so pakauley nen Jesus? (b) Panon a say pakatalos tayo ed pakauley nen Jesus so mangapekta ed panmoria tayo ed ganggan a manggawa na saray babangatan?

⁴ Si Jesus so walaan na pakauley ed kongregasyon to, tan manlapu la’d 1914 et niiter ed sikato so pakauley ed kapkapangiletneg a Panarian na Dios. (Colosas 1:13; Apocalipsis 11:15) Sikato so arkanghel kanian sikatoy walaan na pakauley ed mangatatawen ya armada na nilasus milyon iran angheles. (1 Tesalonica 4:16; 1 Pedro 3:22; Apocalipsis 19:14-16) Inter la ed sikato nen Ama to so pakayarin maneral ed ‘amin a panag-ari, tan  amin a pananguley tan pakayari’ ya onsusumpa ed matunong iran prinsipyo. (1 Corinto 15:24-26; Efeso 1:20-23) Aliwa labat a saray mabilay so walad pakauley nen Jesus. Sikato met so “ukom ed saray mabilay tan inatey” tan sikato so inikdan na Dios na pakayarin mamaoli ed saray inaatey. (Gawa 10:42; Juan 5:26-28) Maseguron nepeg a moriaen ya importantin tuloy so ganggan ya inter na samay Sakey a naikdan na ontan kabaleg a pakauley. Kanian, sikatayo so marespeto tan mabulos a manguunor ed ganggan nen Kristo ya ‘onla tan manggawa na saray babangatan.’

5. (a) Panon so impangunor nen Pedro ed saray salita nen Jesus? (b) Say intulok nen Pedro ed saray bilin nen Jesus so angitonton ed anton bendisyon?

⁵ Diad kasakbayan na mangaraldalin a ministeryo to, makatantandan imbangat nen Jesus ed saray babangatan to a nagamoran da iray bendisyon no bidbiren da so pakauley to tan unoren da iray ganggan to. Oniay aminsan ya inkuan to ed si Pedro, a sakey a sumisigay: “Ontaew ka, ipelag yo so saray iket yo a pansigay.” Segurado si Pedro ya anggapo so naalan sira, kanian inkuan to ed si Jesus: “Katawan, nansagpot kami la a sanlabi, et anggapo so naala mi.” Balet, oniay mapaabeban inkuan nen Pedro: “Ingen lapu ed salitam ipelag ko so saray iket.” Sanen tinulok nen Pedro so ganggan nen Kristo, sikato so akala na ‘amayamay a sira.’ Lapud abigla si Pedro ed naimatonan to, sikato so “tinmalimukor ed arap nen Jesus, a kuan to, Onarawi ka ed siak, ta too ak a managkasalanan, O Katawan.” Balet inmebat si Jesus: “Agka antakot; manlapud natan mansigay ka na saray totoo.” (Lucas 5:1-10; Mateo 4:18) Anto so naaralan tayo ed sayan salaysay?

6. (a) Anto so iyiilustra na salaysay ed mamilagron impakala na sira nipaakar ed katutulok a kakaukolanen nen Kristo? (b) Panon tayon naalig si Jesus?

⁶ Inter nen Jesus ed si Pedro, Andres, tan arum niran apostol so asainmin a “magmaliw a sumisigay na totoo,” aliwan sakbay, noagta kayari na saman a makapakelkelaw ya impakala ra na sira. (Marcos 1:16, 17) Mapatnag, agkinaukolan nen Jesus so katutulok ya andiay malinew a rason. Imparungtal to ed sarayan lalaki so makakombinsin rason no akin a nepeg da so ontulok ed sikato. No panon a makapakelaw iray resulta na impangunor da ed ganggan nen Jesus ya ipelag da iray iket da, mangitonton met ed dakel a bendisyon so pangunor ed ganggan nen Jesus a ‘mansigay na totoo.’ Tinulok itan na saray apostol tekep na nagnap a pananisia. Oniay impanampot na salaysay: “Nen niyakar da ed dalin so saray baloto ra, tinaynan da ya amin, tan tinmumbok ira ed sikato.” (Lucas 5:11) Natan, legan tayon papasesegen so arum a mibiang ed panaggaway-babangatan a kimey, aaligen tayo si Jesus. Agtayo lambengat ipapagawa ed totoo so imbaga tayo ed sikara, noagta ipaparungtal tayo ed sikara so makakombinsin rason no akin a nepeg dan unoren so ganggan nen Kristo.

Makakombinse Iran Rason tan Duga Iran Motibo

7, 8. (a) Anto so pigaran Makasulatan a rason no akin ya ipupulong tayo so Panarian tan manggagawa itayo na babangatan? (b) Anton teksto so nagkalalo lan amakiwas ed sikayo a mantultuloy ed panagpulong a kimey? (Nengnengen met so paimano’d-leksab.)

⁷ Lapud bibidbiren tayo so autoridad nen Kristo, mibibiang itayo ed panangipulong ed Panarian tan panaggaway-babangatan a kimey. Anto niran Makasulatan a rason ed panggagawa tayo na satan a kimey so niiter tayo ed saramay labay tayon pakiwasen a manggaway maabig iran gawa? Ikonsidera tayo so onggendan iran inkomento na pigaran matoor a Tasi a nanlapud nanduruman bansa, tan imanoen tayo no panon a pepekderan na saray nisitan teksto iray argumento ra.

⁸ Si Roy, ya abautismoan nen 1951: “Sanen indedikak so inkasiak ed si Jehova, insipan ko a sikatoy lawas kon panlingkoran. Labay kon tooren so sipan ko.” (Salmo 50:14; Mateo 5:37) Si Heather, ya abautismoan nen 1962: “Sano nodnonoten ko so amin a ginawa nen Jehova parad siak, labay kon ipanengneng ed sikato so pisasalamat ko diad matoor a panlingkor ed sikato.” (Salmo 9:1, 9-11; Colosas 3:15) Si Hannelore, ya abautismoan nen 1954: “Kapag no wala itayo ed ministeryo, aantabayan itayo na saray anghel​—agaylan pribilehyo itan!” (Gawa 10:30-33; Apocalipsis 14:6, 7) Si Honor, ya abautismoan nen 1969: “Sano onsabi so panaon na panangukom nen Jehova, agko labay ya iyakusa na kakaabay ko a si Jehova  tan saray Tasi to so angibaliwala ed sikara, ya ikuan dan, ‘Agak balot apasakbayan!’” (Ezequiel 2:5; 3:17-19; Roma 10:16, 18) Si Claudio, ya abautismoan nen 1974: “Sano manpupulong itayo, sikatayo so ‘iimatonan na Dios’ tan ‘kaiba tayo si Kristo.’ Nodnonoten pa! Sano wala itayo ed ministeryo, panggagayagaan tayo so piulop ed saray maapit a Kakaaro tayo.”​—2 Corinto 2:17, NW.  *

9. (a) Anto so ipaparungtal na salaysay na eksperiensya nen Pedro tan saray arum nin apostol diad impansigay da, nipaakar ed dugan motibo diad pangunor ed si Kristo? (b) Anto so dugan motibo ed pangunor ed Dios tan ed si Kristo natan, tan akin?

⁹ Say salaysay nipaakar ed makatantandan impakala na sira so mangipatnag met ed kaimportantian na pakawalaan na dugan motibo ed pangunor ed si Kristo, salanti, say aro. Sanen imbaga nen Pedro ya, “Onarawi ka ed siak, ta too ak a managkasalanan,” ag-inmarawi si Jesus, nisay kinondena to si Pedro ed antokaman a kasalanan. (Lucas 5:8) Ag-anggan binalaw nen Jesus si Pedro lapud kerew ton arawian To. Imbes, si Jesus so mapangasin inmebat: “Agka antakot.” Say agmanepeg ya itakot so makapuy a motibo diad pangunor ed si Kristo. Imbes, inkuan nen Jesus ed si Pedro a sikato tan saray kakaiba to so magmaliw a mausa-usar bilang sumisigay na totoo. Natan et agtayo met uusaren so panagtaktakot odino mipara iran negatibon liknaan, a singa say panangonsiensia tan panamabaing pian paskaren so arum a mangunor ed si Kristo. Say interon-kamarerwan katutulok a nibase ed aro ed Dios tan ed Kristo so makapaliket ed si Jehova.​—Mateo 22:37.

“Manggawa Kayo na Saray Babangatan ed Amin a Nasyones”

10. (a) Anton detalye ed ganggan nen Jesus a manggawa na saray babangatan so amawala na mairap a kimey parad saray babangatan to? (b) Panon so inkiwas na saray babangatan ed ganggan nen Jesus?

¹⁰ Say komaduan nitepet tayo a mitunosan ed ganggan nen Kristo et, Iner so nepeg a panggawaan na kimey a panaggaway-babangatan? Oniay inkuan nen Jesus ed saray patumbok to: “Manggawa kayo na saray babangatan ed amin a nasyones.” Sakbay na ministeryo nen Jesus, inabrasa iray totoo na nasyones sanen linma ira ed Israel  pian manlingkor ed si Jehova. (1 Arari 8:41-43) Say manunaan a pinulongan nen Jesus a mismo et saray silalaman a Judio, balet diad saman et ingganggan to iray patumbok to ya onla ra ed totoo na amin a nasyones. Diad tua, say pansigayan, odino teritoryan pampulongan, na saray babangatan to so aglambengat nisentro ed melag a “linok”​—saray silalaman a Judio​—noagta nilaktip a tampol ed saman so interon “dayat” na katooan. Anggaman sayan pananguman so mairap a kimey parad saray babangatan, sikara so mabulos a tinmulok ed ganggan nen Jesus. Kulang a 30 taon kayari na impatey nen Jesus, nisulat nen apostol Pablo a nipupulong la so maong a balita, ya aliwa labat ed saray Judio, noagta dia ed “amin a pinalsa ed leksab na tawen.”​—Colosas 1:23.

11. Anton inlaknab na ‘saray pansisigayan’ so agawa manlapu la’d kasakbayan na koma-20 a siglo?

¹¹ Diad agano niran panaon, walay mipadparan inlaknab na teritoryan pampulongan. Diad kagapo na koma-20 a siglo, ‘saray pansisigayan’ so wala labat ed pigaran daldalin. Ingen, saray patumbok nen Kristo ed saman so angalig ed alimbawa na saray inmunan-siglon Kristiano tan magunaet dan pinalaknab so teritorya a pampupulongan da. (Roma 15:20) Diad kasakbayan na dekaday 1930, sikara so nanggawa na saray babangatan ed manga sanlasus a daldalin. Natan, ‘saray pansisigayan’ tayo so linmaknab la ed 235 a daldalin.​—Marcos 13:10.

“Manlapu ed Saray Amin a Pansasalita”

12. Anton angat so ipapabitar na propesiya a naromog ed Zacarias 8:23?

¹² Aliwa lambengat a say kaawang na teritorya so angat ed panaggawa na saray babangatan ed amin a nasyon noagta ontan met ed lenguahe. Oniay impasakbay nen Jehova panamegley nen propeta Zacarias: “Dia ed saraman ya agew nagawa naani a samploran lalaki ompeket ira naani, manlapu ed saray amin a pansasalita na saray nasyon, sikara naani ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) Diad mas malaknab a kasumpalan na sayan propesiya, say “Judio” so mangirerepresenta ed saray alanaan a Kristiano, bangta say “samploran lalaki” so mangirerepresenta ed “baleg ya ulop.” * (Apocalipsis 7:9, 10; Galacia 6:16) Sayan baleg ya ulop na saray babangatan nen Kristo so naromog la ed dakel a nasyon, tan unong ed inkuan nen Zacarias, sikara so mansalita na dakel a lenguahe. Kasin nipapatnag ed modernon-agew ya awaran na totooy Dios so ontan ya aspekto na inka-babangatan? On.

13. (a) Anto so walan agawa nipaakar ed saray lenguahe ed limog na modernon-agew a totoo na Dios? (b) Panon so inkiwas na matoor tan makabat ya aripen ed ombabaleg a pankaukolan na espiritual a tagano ed nanduruman lenguahe? (Ilaktip so kahon a “Saray Publikasyon Parad Saray Bulag.”)

¹³ Nen 1950 et Ingles so nisipor a lenguahe na manga 3 ed kada 5 a Tasi nen Jehova ed sankamundoan. Kasabi 1980, satan a ratio so anguman ed manga 2 ed kada 5, tan natan say nisipor a lenguahe na 1 labat ed kada 5 a Tasi et Ingles. Panon so inkiwas na matoor tan makabat ya aripen ed  sayan inkauman na kipapasen lapud aliwa labat ya Ingles so uusaren na dakel ya agagi? Angitarya ira na espiritual a tagano diad mas dakel nin lenguahe. (Mateo 24:45) Singa bilang, nen 1950 et nipalapag so literatura tayo ed 90 a lenguahe, balet natan et manga 400 lan lenguahe. Kasin walay resulta na sayan pinalaknab a panangasikaso ed totoon walaay nanduruman lenguahe? On! Walay promedyo na manga 5,000 a totoo a ‘nanlapud amin a pansasalita’ a nagmaliw a babangatan nen Kristo ed kada simba diad loob na sakey a taon! (Apocalipsis 7:9) Tan nantultuloy ni so indaak. Diad arum a daldalin et dakerakel so nasasayot na “saray iket”!​—Lucas 5:6; Juan 21:6.

Sakey a Makapatumang a Ministeryo​—Sarag Yo Kasi so Mibiang ed Satan?

14. Panon tayon natulongan iramay walad teritorya tayo a mansasalita na sankailin lenguahe? (Ilaktip so kahon a “Say Panguusar na Sign Language Diad Panaggaway Babangatan.”)

¹⁴ Diad dakel a daldalin ed Sagur, say insabi na saray dayo ed bansa so angitarok na angat diad panaggawa na saray babangatan ed totoo ed ‘amin a pansasalita.’ (Apocalipsis 14:6) Panon tayon natulongan iramay walad teritorya tayo a mansasalita na lenguahe a miduma ed sikatayo? (1 Timoteo 2:4) Singa panangibaga, nayarian tayon usaren so suston kagawaan ed panagsigay. Saratan a totoo so opresian na literatura diad lenguahe ra. No posible, sikara so pabisita yo ed sakey a Tasi a mansasalita na lenguahe ra. (Gawa 22:2) Mainomay la natan so panggawa ed saratan ya uksoyan, lapud dakel a Tasi so nanaral na arum a lenguahe nilikud ed lenguahe ran mismo ta pian natulongan iray sankaili a magmaliw a babangatan nen Kristo. Ipapatnag na saray report a makapatumang ya eksperiensya so itulong ed onian paraan.

15, 16. (a) Antoran alimbawa so mangiyilustra a makapatumang so itulong ed saramay mansasalita na sankailin lenguahe? (b) Antoran tepet nipaakar ed serbisyo ed lawak a walaray mansasalitay sankailin lenguahe so nayarin ikonsidera tayo?

¹⁵ Ikonsidera so duaran alimbawa ed Netherlands, a gagawaen so organisadon panangipulong ed Panarian diad 34 a lenguahe. Sakey a sanasawan Tasi so namboluntaryon linma tan nanggawa na babangatan diad limog na saray dayo a mansasalitay Polako. Alay abig so resulta na impansagpot da kanian apakiwas so asawan laki a mamawas ed sekular a trabaho to ta pian nawalaan ni kaaruman a sakey agew a bakasyon ed kada  simba parad panangiyaral na Biblia ed saramay interesado. Agnambayag, say sanasawa so akapangikondukta na masulok a 20 a panangiyaral na Biblia ed kada simba. Oniay inkuan da: “Malikeliket kami lapud ministeryo mi.” Mas naliliketan iramay manggagaway babangatan sano aapresyaen na saramay makakarengel ed saray katuaan na Biblia diad mismon lenguahe ra. Singa bilang, kaleganan na sakey ya aral ya inusar so salitan Vietnamese, walay masiken ya inmalagey tan kinmerew na permiso a mansalita. Tekep na saray lua ed mata to, oniay inkuanto ed saray Tasi: “Salamat ed sikayo lapud pansasagpotan yon aralen so mairap a lenguahe mi. Misalsalamat ak lapud naaralan ko so dakel ya alay abig a bengatla manlapud Biblia anggaman ed inkamasiken ko la.”

¹⁶ Agpankelawan sirin a natutumangan a maong iramay manlilingkor ed saray kongregasyon a mansasalita na sankaili iran lenguahe. Oniay inkuan na sanasawa a taga-Britanya: “Say ministeryo ed lawak a walaray mansasalita na sankailin lenguahe so sakey ed saray makapaliket a naeksperiensya mi ed loob na 40 taon a serbisyo mi ed Panarian.” Sarag yo kasin iyarunsa iray kipapasen yo ta pian makapibiang kayo ed sayan makapalikliket a ministeryo? No manaaral kayo ni ed eskuelaan, sarag yo kasi so manaral na sankailin lenguahe bilang preparasyon ed sayan nengneng na ministeryo? Say panggawa ed satan so nayarin mangitonton ed sika diad makapatumang a dalan na bilay a napnoy bendisyon. (Uliran 10:22) Akin kasi no itongtong yo itan ed saray atateng yo?

Uman-umanen Tayo Iray Metodo Tayo

17. Panon tayon nasabi so mas dakel a totoo diad teritorya na kongregasyon tayo?

¹⁷ Tua, ag-iyaabuloy na sirkumstansya na maslak ed sikatayo so pangipelag ed “saray iket” tayo diad saray teritoryan walaray mansasalita na sankailin lenguahe. Balet, nayarian tayon sabien so mas dakel nin totoo nen say kaplesan a gagawaen tayo diad teritorya na kongregasyon tayo. Panon? Uman-umanen tayo iray metodo tayo, aliwan say mensahe tayo. Diad dakel a lugar, ondarakel so bilang na totoo a manaayam ed saray guardiadon bilding. Dakel so anggapo ed ayaman da sano ondalaw itayo ed sikara legan na panagkabkaabungan a ministeryo tayo. Kanian nakaukolan tayon ipelag ‘iray iket’ tayo diad nanduruman oras tan diad nanduruman lugar. Diad onian paraan et aaligen tayo si Jesus. Nansagpotan ton akitongtongan so totoo ed nanduruman kipapasen.​—Mateo 9:9; Lucas 19:1-10; Juan 4:6-15.

18. Panon ya apaneknekan ya epektibo so panagpulong ed nanduruman kipapasen? (Ilaktip so kahon a “Panaggawa na Saray Babangatan Diad Limog na Saray Negosyante.”)

¹⁸ Diad arum a parte na mundo, say pampulong ed totoo inerman so pakaromogan ed sikara so importantin metodo ed panaggaway babangatan. Saray eksperiensyadon managgawa na babangatan so lalon mangiimano ed pakapampulong da diad nanduruman pasen. Nilikud ed pibibiang ed panagkabkaabungan a ministeryo, saray manangipalapag so manpupulong la natan diad saray airport, diad saray opisina, diad saray lakoan, paradaan, tundaan na saray bus, diad karsada, diad parki, diad gilig na dayat, tan inerman a pasen. Dakel ed agano niran bautismadon Tasi diad Hawaii so primeron akatongtong ed ontan iran lugar. Say panguman-uman tayo ed saray metodo tayo so ontulong pian nagnap tayon nasumpal so ganggan nen Jesus a manggawa na saray babangatan.​—1 Corinto 9:22, 23.

19. Antoran aspekto na ganggan nen Jesus ed sikatayo so singbaten ed ontumbok ya artikulo?

¹⁹ Say inter nen Jesus ya asainmin a manggawa na babangatan so aglabat angilaktip ed saray detalye no akin tan no iner so nepeg a panggawaan tayo ed satan a kimey noagta no anto met so nepeg ya ipulong tan anggad no kapigan so nepeg a pampulong. Sayan duaran aspekto na ingganggan nen Jesus ed sikatayo so konsideraen ed ontumbok ya artikulo.

[Saray paimano ed leksab]

Kasin Natandaan Yo?

• Antoray rason tan antoy motibo tayo ed pibibiang ed panangipulong ed Panarian tan panaggawa na saray babangatan?

• Anggad anton laknab so panusumpal na saray lingkor nen Jehova natan ed ingganggan nen Jesus a manggawa na saray babangatan ed totoo ed amin a nasyones?

• Panon tayon uman-umanen so ‘paraan na panagsigay’ tayo, tan akin ya ontan so nepeg tayon gawaen?

[Tepetepet Parad Panagaral]

[Kahon/Saray litrato ed pahina 10]

Saray Publikasyon Parad Saray Bulag

Si Albert et sakey a Kristianon matatken tan sigpot-panaon a ministro a manaayam diad Estados Unidos. Sikatoy sakey a bulag. Diad impangusar to na literatura na Biblia a walad Braille, sikatoy nagmaliw a mas epektibo diad ministeryo to, laktip laray kimey to bilang service overseer. Panon ton susumpalen so asainmin to ed kongregasyon?

Oniay inkuan nen James, a mangidadaulon manangasikaso: “Si Albert so epektibon tuloy a service overseer diad kongregasyon mi.” Kabiangan si Albert ed manga 5,000 a bulag diad Estados Unidos a diad inlabas na saray taon et akaawat na publikasyon na Biblia diad Ingles tan Español a Braille. Diad tua, manlapu la’d 1912 a manpatuloy, angitarya so matoor ya aripen a klase na masulok a sanlasus a nanduruman publikasyon ed Braille. Diad panguusar da ed modernon teknolohiya, saray imprintaan na saray Tasi nen Jehova so mamapawala na minilyon a pahina ed kada taon diad masulok a samploran lenguahe tan ibubunog iratan diad masulok a 70 a bansa. Wala ta iray kabat yon nayarin nagunggonaan ed saray publikasyon na Biblia ya intarya parad saray bulag?

[Kahon/Litrato ed pahina 11]

Say Panguusar na Sign Language Diad Panaggaway Babangatan

Nilibon Tasi ed sankamundoan, a kaiba so dakel a maseseg iran tobonbalo, so nanaral na sign language ta pian natulongan iray telek a magmaliw a babangatan nen Kristo. Bilang resulta, diad Brazil labat et walay abautismoan a 63 a telek diad apalabas a sakey taon tan 35 a telek a Tasi so manlilingkor la natan bilang sigpot-panaon ya ebanghelisador. Diad sankamundoan, wala so masulok a 1,200 a kongregasyon tan grupo a sign language. No say kaawang na sirkito so pantongtongan, say sirkito na sign-language ed Russia so sankabalegan a sirkito ed mundo, lapud sakopen to so interon Russia!

[Kahon ed pahina 12]

Panaggawa na Saray Babangatan Diad Limog na Saray Negosyante

Sanen binisita to iray negosyante diad pan-oopisinaan da, akatongtong na sakey a Tasi ed Hawaii so sakey ya executive na sakey a kompanya na transportasyon. Anggaman okupado, inmabobon so laki a paiyaralan na Biblia diad opisina to, ed loob na 30 minutos ed kada simba. Kada Mierkoles na kabuasan, ibabaga to ed saray staff to ya agda ni ikokonekta ed sikato iray tawag ed telepono pian agnadisturbo so panaaral da. Sakey nin Tasi ed Hawaii so mangiyaaral na Biblia ed akanggawa na sakey a paapigeran na sapatos, a maminsan ed sakey simba. Manaaral ira a mismo diad counter na puesto. Sano walay kustomer, ompireg ni so Tasi. No akaalis lay kustomer, ituloy da so panagaral.

Say executive tan say akanggawa na puesto so akatongtong lapud inanamot na saray Tasi so manpulong diad nanduruman lugar. Wala ta ni so naisip yo iran lugar ed teritorya na kongregasyon yo a nayarin nakatongtong so totoo a mairap a nasabi ed ayaman da?

[Litrato ed pahina 12]

Sarag yo kasi so manlingkor ed lawak a walaray mansasalita na sankailin lenguahe?