Sakey a Sulat Parad si Noe

“PINABLIN Noe, aminpigak lan abasa ed Biblia so nipaakar ed sika tan no panon mon impaalagey so biong ya akaliktaran mo tan say pamilyam legan na samay Delap.”

Ontan so gapo na sulat ya insubmiti na 15 años a bii a manngaran na Minnamaria dia ed kontis ed panagsulat parad saray estudyante a manedad na 14 anggad 21. Say kontis so inorganisa na serbisyo na koreo ed Finland, say Federation for Finnish Mother Tongue Teachers, tan Finnish Literature Society. Saray estudyante so kinaukolan a manggawa na sulat base ed sakey a libro. Nayarin say pangipatuloran et say autor na libro odino say karakter a wadtan. Saray managbangat so amili na 1,400 ed saray sulat na saray estudyante ra insan da impatulor ed saray hurado na kontis. Saray hurado so amili na sakey a sankarakpan ya essay, samploran onkomadua ed sankarakpan, tan samploran onkomatlo ed sankarakpan iran essay. Manliket si Minnamaria lapud say essay to so akaiba ed komatlon grupo.

Akin et si Noe, a nambilay manga 5,000 taon lay apalabas, so sinulatan na sayan tin-edyer ya estudyante a si Minnamaria? Oniay inkomento to: “Say primeron naisip ko et say Biblia. Kabisadok lan maong iray totoon asalambit ed Biblia. Dakel lan tuloy so abasak nipaakar ed sikara kanian singa la ra petepeteg ed siak. Apilik si Noe lapud say bilay to et makapainteres tan midumaan ed bilay ko.”

Sinampotan nen Minnamaria so sulat to ed si Noe ed oniaran salita: “Sika so siansia nin sakey ya ehemplo na pananisia tan katutulok. Say impanbilay mo so mamapaseseg ed amin a manbabasa na Biblia ya onkiwas unong ed pananisia ra.”

Sayan sulat na ugaw nin managbasa na Biblia et sakey a maabig ya alimbawa a say Biblia so peteg a “mabilay tan mabiskeg” ed saray totoo, ugaw man odino matakken.​—Hebreos 4:12.