Kasin Panliliketan Yo so “Ganggan nen Jehova”?

“Mapalar so too. . . [a] say gayaga to et wala ed ganggan nen Jehova.”​—SALMO 1:1, 2.

1. Akin a maliket itayo bilang lingkor nen Jehova?

 TUTULONGAN tan bebendisyonan nen Jehova iray matoor a lingkor to. Tua, nipapaarap itayo ed dakel a subsubok. Balet, panggagayagaan tayo met so puron liket. Agla itan pankelawan lapud panlilingkoran tayo so “maliket a Dios,” tan papawalaen na masanton espiritu to so gayaga ed kapusoan tayo. (1 Timoteo 1:11, NW; Galacia 5:22) Say gayaga et sakey a kipapasen na tuan liket a resulta na paniilalo odino pakakagamor na bengatlan maabig. Tan peteg ya itatarya ed sikatayo na mangatatawen ya Ama tayo so maong iran palangkap. (Santiago 1:17) Agpankelawan sirin no akin a maliket itayo!

2. Dinan iran salmo so singbaten tayo?

² Say liket et nipabitar a maong diad libro na Salmos. Singa bilang, satan so nipabitar ed Salmos 1 tan 2. Impasen na saray inmuunan patumbok nen Jesu-Kristo a say komaduan salmo et insulat na Ari na Israel a si David. (Gawa 4:25, 26) Inggapo na ag-angaranan ya angisulat ed unonan salmo so apuyanan a kanta to ed oniaran salita: “Mapalar so too ya agmanakar ed panangibangat na saray agmatunong.” (Salmo 1:1) Nanengneng tayo ed sayan artikulo tan ed ontumbok no panon ya itatarya na Salmos 1 tan 2 so rason pian manliket itayo.

Say Sekreto na Liket

3. Unong ed Salmo 1:1, anto so rason no akin a maliket so sakey a maridios a too?

³ Imparungtal na Salmo 1 no akin a maliket so sakey a maridios a too. Oniay inkanta na salmista sanen inter toray rason ed ontan a panliket: “Mapalar so too ya agmanakar ed panangibangat na saray agmatunong, nisay manalagey ed dalan na saray managkasalanan, nisay onyurong ed yurongan na saray managbalaw.”​—Salmo 1:1.

4. Anton napanuliranan a panagbilay so ginegemtan di Zacarias tan Elizabeth?

⁴ Pian talagan makapanliket, nepeg tayon tuloken iray matunong a kakaukolanen nen Jehova. Si Zacarias tan si Elizabeth, a walaan na maliket a pribilehyo diad impagmaliw dan atateng nen Juan a Managbautismo, so ‘matunong ed arap na Dios, a nanakar ira ya andiay pakabalawan dia ed saray amin a ganggan tan bilin na Katawan.’ (Lucas 1:5, 6) Maliket itayo no tumboken tayo so ontan met a kurang tan mapekder tayon ipulisay so ‘pankurang ed panangibangat na saray agmatunong’ odino paigiya ed agmaridios a bilin da.

5. Anto so ontulong ed sikatayo pian napaliisan so “dalan na saray managkasalanan”?

⁵ No ipulisay tayo so panag-isip na saray marelmeng, ag-itayo ‘onalagey ed dalan na saray managkasalanan.’ Diad tua, sikatayo so literal ya agnaromog ed panaayuyangan da​—diad saray pasen na imoral a panligliwaan odino ed lugar a kabkabat ya imoral. Panon to no atukso itayon miluyos ed saray managkasalanan diad agmakasulatan a kondukta ra? Manpikasi itayo parad tulong na Dios pian makakiwas itayo unong ed saray salita nen apostol Pablo: “Agkayo miulop ed  pako a duma na saray agmananisia, ta anto so piulopan na katunongan ed kaugsan? Odino anto so piulopan na silew ed bilunget?” (2 Corinto 6:14) No manmamatalek itayo ed Dios tan ‘maralus so puso’ tayo, ipulisay tayo so awawey tan estiloy-kabibilay na saray managkasalanan tan nawalaan itayo na malinis a motibo tan pilpilalek, a walaan na ‘pananisian aliwan kunkunwari.’​—Mateo 5:8; 1 Timoteo 1:5.

6. Akin a nepeg itayon manalwar sumpad saray managbalaw?

⁶ Pian napaliket si Jehova, seguradon agtayo “onyurong ed yurongan na saray managbalaw” odino managludlurey. Balbalawen na arum so pagmaliw a maridios, balet diad sarayan “kaunoran ya agew,” mabetbet a napapaneknekan a saray datin Kristiano a nan-apostata so nagkalalon managmudmora diad paraan na panagludlurey da. Pinasakbayan nen apostol Pedro iray kapananisiaan: “Inararok ira, . . . amtaen so saya ya unona, a dia ed kaunoran ya agew onsabi so saray managlurey a pati panaglurey, a manakar ira’d dilin lawan da, tan kuanen da: Iner so kawalaan na sipan ed idateng to? Ta nanlapu la ed saman so agew ya inkaplag da’d ugip na atateng, ganagana a bengatla, ontutuloy a singa nen gapo na inkapalsa.” (2 Pedro 3:1-4) No agtayon balot “onyurong ed yurongan na saray managbalaw,” napaliisan tayo so desyang ya onsabi ed sikara.​—Uliran 1:22-27.

7. Akin a nepeg tayon ipapuso iray salita ed Salmo 1:1?

⁷ No agtayo ipapuso so manangilukas iran salita na Salmo 1, nabalang tayo so espiritualidad ya abayuboan tayo diad panaaral tayo na Kasulatan. Diad tua et lalon onuges ni so kipapasen tayo. Say unonan kundang a nayarin pakapelagan tayo et sano tumboken tayo so simbawa na marelmeng. Insan sikatayo so nayarin naynay lan milimog ed sikara. Diad saginonor, nayarin magmaliw tayo la ingen ya andiay-pananisian apostata a managbalaw. Mapatnag, say pikakaaro ed saray marelmeng so makapangipaslep na agmaridios ya awawey ed sikatayo tan makaderal ed relasyon tayo ed si Jehova a Dios. (1 Corinto 15:33; Santiago 4:4) Komon ta agtayon balot abuloyan itan a nagawa ed sikatayo!

8. Anto so ontulong ed sikatayo pian niyapasakey tayo so kanonotan tayo ed saray maespiritual a bengatla?

⁸ Say pikakasi so ontulong ed sikatayon mangiyapasakey na kanonotan tayo diad saray maespiritual a bengatla tan agtayo makapiulop ed saray marelmeng. Oniay insulat nen Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” Impaseseg na apostol so panmorekdek ed saray bengatlan matua, seryoson pannonotan,  matunong, maralus, maabig, walaan na maong a dengel, masimpit, tan nidaydayew. (Filipos 4:6-8) Onkiwas itayo unong ed simbawa nen Pablo tan agtayon balot iyaabeba so inkasikatayo diad pangalig ed saray mauges.

9. Anggaman papaliisan tayo so marelmeng iran agamil, panon tayon natulongan so amin a nengneng na totoo?

⁹ Anggaman ipupulisay tayo iray marelmeng ya agamil, mataktikan pupulongan tayo so arum, a singa ed impanpulong nen apostol Pablo ed Romanon Gobernador a si Felix “nipaakar ed katunongan, tan say dangka, tan say pangukom ya onsabi.” (Gawa 24:24, 25; Colosas 4:6) Ipupulong tayo so maong a balita na Panarian ed amin a nengneng na totoo, tan tratratoen tayo ira ed maabig a paraan. Matalek itayo a saramay “suston nikiling ed andi-anggaan a bilay” so magmaliw a mananisia tan panliketan da so ganggan na Dios.​—Gawa 13:48, NW.

Panliliketan To so Ganggan nen Jehova

10. Anto so ontulong ed sikatayo pian mabayag a nipaslep ed kanonotan tan puso tayo iray naaralan tayo legan na personal a panagaral tayo?

¹⁰ Nipaakar ed maliket a too, onia ni so kaaruman ya inkuan na salmista: “Say gayaga to wala ed ganggan nen Jehova; tan diad ganggan to mandalepdep [“ibeswat ton basaen,” NW] ed agew tan labi.” (Salmo 1:2) Bilang lingkor na Dios, say ‘gayaga tayo et walad ganggan nen Jehova.’ No posible, kaleganan na personal a panagaral tan panagdalepdep tayo, nayarin “ibeswat” tayon basaen itan. No gawaen tayo itan legan a babasaen tayo so antokaman a kabiangan na Kasulatan, mabayag iratan a nipaslep ed kanonotan tan puso tayo.

11. Akin a nepeg tayon basaen so Biblia ed “agew tan labi”?

¹¹ Papasesegen itayo na “matoor tan makabat ya aripen” ya inagew-agew tayon basaen so Biblia. (Mateo 24:45) Lapud pirawat tayo a lalon nakabisado so mensahe nen Jehova parad katooan, manepeg a basaen tayo so Biblia “ed agew tan labi”​—on, anggano diad pankanawnawan ag-itayo makaugip lapud arum a rason. Oniay impaseseg ed sikatayo nen Pedro: “Pampilalekan yo komon, a singa saray kapangiyanak ya ugugaw, so gatas a maespiritu ya andian na saol to a mamabaleg ed sikayo ed kilalaban.” (1 Pedro 2:1, 2) Kasin panliliketan tayo so inagew-agew a panagbasa na Biblia tan panagdalepdep ed Salita tan gagala na Dios kada labi? Ontan so ginawa na salmista.​—Salmo 63:6.

12. Anto so gawaen tayo no panggagayagaan tayo so ganggan nen Jehova?

¹² Say magnayon a liket tayo so akadepende ed panggayaga tayo ed ganggan na Dios. Satan so ayadyari tan matunong, tan wala so baleg a tumang no tuloken itan. (Salmo 19:7-11) Oniay insulat nen babangatan a Santiago: “Siopaman a manimano ed ayadyarin katunongan, say katunongan na pankanawnawa, tan mansiansia’d tan, sikato so bangta aliwa a maililingwan a dumerengel, mananumpal ingen ed gawa, sayan too mapalar naani ed gawa to.” (Santiago 1:25) No talagan panggagayagaan tayo so ganggan nen Jehova, ag-onlabas so sakey ya agew ya agtayo akapangikonsidera na maespiritual iran bengatla. On, napakiwas itayo a ‘mansukimat ed saray aralem a bengatla na Dios’ tan iyuna tayo ed bilay iray intereses na Panarian.​—1 Corinto 2:10-13; Mateo 6:33.

 Sikato so Magmaliw a Singa Kiew

13-15. Diad anton pantalos a magmaliw itayon singa kiew a nitanem ed gilig na manag-agus a subol na danum?

¹³ Bilang kaaruman a panangideskribe ed maptek a too, oniay inkuan na salmista: “Sikato [so] mipara ed sakey a kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga; tan antokaman a gawaen to ombuna.” (Salmo 1:3) Singa met ed amin ya ag-ayadyarin totoo, sikatayo a manlilingkor ed si Jehova so makakaeksperiensya na saray kairapan ed bilay. (Job 14:1) Nayarin susungdoan tayo so panamasegsegang tan nanduruma niran subok a nisesengeg ed pananisia tayo. (Mateo 5:10-12) Balet, diad tulong na Dios et nasusungdoan tayo irayan subok, a singa sakey a masalompapak a kiew a makayarin onsuba ed makmaksil iran dagem.

¹⁴ Say sakey a kiew a nitanem ed gilig na onaagus a danum so agbalot namagaan ed ampetang a panaon odino legan na kelang. No matakot itayo ed Dios, say biskeg tayo so manlalapud ag-onsaew a Subol​—si Jehova a Dios. Nanilalo si Pablo ed Dios parad tulong kanian nibaga ton: “Nayarian ko a gawaen so ganagana ed saman [si Jehova] so mamabiskeg ed siak.” (Filipos 4:13) Sano nigigiya itayo tan napapabiskeg itayo ed espiritual panamegley na masanton espiritu nen Jehova, ag-itayo nalenes, a magmaliw ya andiay bunga odino inatey ed espiritual. Magmaliw itayon mabunga ed serbisyo ed Dios tan nipatnag tayo met so bunga na espiritu to.​—Jeremias 17:7, 8; Galacia 5:22, 23.

¹⁵ Diad impangusar to ed porma na Hebreon salita a nipatalos a “mipara,” inusar na salmista so sakey a panangiyaliling (simile). Impankompara to so duaran bengatla a mandumaan, anggaman walay panparehoan dan sakey a kalidad. Mandumaan so totoo tan kakiewan, balet mapatnag a say inkasalompapak na sakey a kiew a nitanem ed gilig na manag-agus a subol na danum so angipanonot ed salmista nipaakar ed espiritual a kaligenan na saramay ‘manggagayaga ed ganggan nen Jehova.’ No panggayagaan tayo so ganggan na Dios, saray agew tayo so magmaliw a singa kabayag na pambilay na sakey a kiew. Diad tua, makapambilay itayo ed ando lan ando.​—Juan 17:3.

16. Akin tan panon itayon onaligwas odino ‘ombuna ed antokaman a gawaen tayo’?

¹⁶ Diad maptek a pankukurang tayo, tulongan itayo nen Jehova a makapansungdo ed saray subok tan kairapan. Magmaliw itayon maliket tan mabunga ed serbisyo ed Dios. (Mateo 13:23; Lucas 8:15) ‘Antokaman so gawaen tayo et ombuna’ odino onaligwas lapud say manunan gagala tayo et say panggawa na linawa nen Jehova. Lapud lawas ontatalona iray gagala to tan panliliketan tayo iray ganggan to, onaligwas itayo ed espiritual. (Genesis 39:23; Josue 1:7, 8; Isaias 55:11) Tua itan anggaman nidunget itayo ed saray kairapan.​—Salmo 112:1-3; 3 Juan 2.

Singano Onaaligwas Iray Marelmeng

17, 18. (a) Diad anto so angiyalilingan na salmista ed saray marelmeng? (b) Anggaman onaaligwas iray marelmeng diad materyal a paraan, akin ya andian ira na magnayon a kaligenan?

¹⁷ Agaylay pidumaan na kipapasen na marelmeng ed kipapasen na matunong! Nayarin diad sakey a panaon et ompatnag ya onaaligwas iray marelmeng ed materyal a paraan, balet ag-ira onaaligwas ed espiritual. Nipabitar itan ed saray kaaruman a salita na salmista: “Saray agmatunong ag-ira ontan, noag say singa ra taep ya itekkiab na dagem. Kanian saray agmatunong ag-ira onalagey naani ed panangukom, et saray makasalanan ag-ira onalagey ed muyong na saray matunong.” (Salmo 1:4, 5) Imanoen pa so ibabaga na salmista a “saray agmatunong ag-ira ontan.” Say labay ton ibaga et aliwa iran singa saray maridios a totoo, a niyaliling ed mabunga tan mapaot iran kakiewan.

¹⁸ Anggaman onaaligwas ed materyal iray marelmeng, sikara so andian na magnayon a kaligenan. (Salmo 37:16; 73:3, 12) Singa ira samay agmakatunongan a mayaman a laki a sinaglawi nen Jesus ed sakey ya ilustrasyon sanen sikatoy atepetan a mandesidi nipaakar ed sakey a tawir. Oniay imbaga nen Jesus ed saramay wadman: “Nengnengen yo, et manlikas kayo ed amin a  kaagapan; ta say bilay na too andi ed karakel na saray bengatla a bebembenan to.” Inyilustra nen Jesus iyan punto diad impangikuan ton say dalin na sakey a mayaman a too so amawala na dakel ya ani kanian implano to so pangigeba ed saray kamalir to tan angipaalagey na babaleg a kamalir a pangisimpenan na amin na saray maabig a kayarian to. Insan implano na too so mangan, oninum, tan manliket ed inkasikato. Balet oniay inkuan na Dios: “Sika makulangkulang, natan a labi nakerew ed sika so kamarerwam; et saray bengatla ya intadiam, siopa naani makankayarian ed sikara?” Pian nidanet so punto to, oniay inyarum nen Jesus: “Ontan so mantipon na kayamanan nipaakar ed sikato, et aliwa a mayaman dia ed Dios.”​—Lucas 12:13-21.

19, 20. (a) Deskribien so kadaanan a proseso ed panag-ilik tan panagtaep. (b) Akin a niyaliling ed taep iray marelmeng?

¹⁹ Saray marelmeng et “aliwa a mayaman dia ed Dios.” Lapud satan, anggapo so seguridad tan kaligenan da a singa say taep, say maimpis ya ubak na saray bukel na ilik. No naani la so ilik nensaman, awiten da itan ed panag-ilikan, sakey a patar a pasen a kaslakan a walad niyatagey a lugar. Ditan et walay ipasagar na ayayep a walaan na makdem a bato odino balatyang a ngipengipen ed tapew na saray ilik pian natemek iray dawa tan naubakan iray bukel. Insan, suklaren iratan na panagtaep tan ibuntok itan ed dagem. (Isaias 30:24) Napelag iray bukel ed dalin, bangta ipalir na dagem iray dayami tan taep. (Rut 3:2) Sano ayakayak la so ilik, nayari la itan ya isimpen odino gilingen. (Lucas 22:31) Balet anggapo lay taep na satan.

²⁰ No panon a saray bukel na ilik so napelag ed dalin tan natipon bangta nipalir so taep, ontan met so pansiansia na saray matunong tan kaandi na saray marelmeng. Balet, seguradon panliketan tayo ya agla manbayag et magnayon lan naandi iratan a managgaway-mauges. No naandi la ra, nabendisyonan a tuloy iray totoo a manggagayaga ed ganggan nen Jehova. On, diad kaunoran et saray matulok a totoo so makaawat na langkap na Dios a bilay ya andi-anggaan.​—Mateo 25:34-46; Roma 6:23.

Say Abenditon “Dalan na Saray Matunong”

21. Panon ya “amta [nen Jehova] so dalan na saray matunong”?

²¹ Nansampot so unonan salmo ed sarayan salita: “Si Jehova amta to so dalan na saray matunong; ingen ta say dalan na saray agmatunong natawtaw.” (Salmo 1:6) Panon ya ‘amta [na Dios] so dalan na saray matunong’? Bueno, no  gegemtanen tayo so maptek a kurang, makaseguro itayon iimanoen na mangatatawen ya Ama tayo so maridios a panagbilay tayo tan momoriaen to itayo bilang naabobonan iran lingkor to. Insan, nayarian tayo tan nepeg tayon ipaawit ed sikato so amin a kapagaan tayo tekep na kombiksion a sikato so peteg a mangiyaansakit ed sikatayo.​—Ezequiel 34:11; 1 Pedro 5:6, 7.

22, 23. Anto so nagawa ed saray marelmeng tan ed saray matunong?

²² Say “dalan na saray matunong” so mansiansia ed ando lan ando, balet natigway iray agmamasimbalon marelmeng a totoo lapud ambelat a panangukom nen Jehova. Tan say “dalan,” odino kurang na bilay da, so mangangga a kaiba ra. Makapankompiyansa itayo ed kasumpalan na saray salita nen David: “Wala ni so daiset, et say bagel onandi: on, imanom so pasen to, et onandi. Ingen ta saray mauyamo tawiren da naani dalin: tan manliket ira a dili ed inkadaakan na kareenan. Say matunong tawiren to so dalin tan manayam diman lawas.”​—Salmo 37:10, 11, 29.

²³ Agaylan liket tayo no napribilihyoan itayon manbilay ed paraison dalin sano naandi laray marelmeng! Panggayagaan sirin na saray mauyamo tan matunong so tuan kareenan lapud sikara so lawas manggagayaga ed “ganggan nen Jehova.” Balet, sakbay itan a nagawa, nepeg a nipaakseb so ‘ganggan nen Jehova.’ (Salmo 2:7a) Say ontumbok ya artikulo so ontulong ed sikatayo pian naamtaan tayo no anto itan a ganggan tan no anto so kabaliksan na satan ed sikayo tan ed interon sankatooan.

Panon Yon Ebatan?

• Akin a maliket so sakey a maridios a too?

• Anto so mangipatnag a panliliketan tayo so ganggan nen Jehova?

• Panon a say sakey a too et magmaliw a singa mabunabunan kiew?

• Panon a midumaan so dalan na saray matunong ed dalan na saray marelmeng?

[Tepetepet Parad Panagaral]

[Litrato ed pahina 11]

Ontulong ed sikatayo so pikakasi pian ag-itayo makapiulop ed saray marelmeng

[Litrato ed pahina 12]

Akin a say matunong a too et singa sakey a kiew?