Antoy Mangiiter ed Bilay na Tuan Kabaliksan?

SANEN atepetan si Jesse, a mantaon na 17 ya estudyante ed haiskul, nipaakar ed kabaliksan na bilay, oniay inyebat to: “Sambot mo lay manliket, anggad mabilay ka ni.” Sananey so panmoria nen Suzie. Oniay inkuan to: “Say talagan papanisiaan kon kabaliksan na bilay et no antoy labay mon pagmaliwan na satan.”

Nanumamengan mo ta la so nipaakar ed kabaliksan na bilay? Wala tay saksakey a gagala parad amin a katooan? Odino susto si Suzie, a say kabaliksan na bilay et no anto labat lay labay tayon pagmaliwan na satan? Anggano panon lay inkaaligwas na teknolohiya na sosyedad tayo, walay wadtan ed utel na liknaan tayo a mamipirawat ed kabaliksan na bilay. Walaray panaon ed bilay tayo a maslak ed sikatayo so manuumameng, ‘Akin et wadia itayo?’

Nanggunaetan na modernon siensia ya ebatan itan a tepet. Antoy resulta? “Diad proseso na ebolusyon et sipor lan anggapoy kabaliksan na pagmaliw a mabilay,” so inkuan nen David P. Barash, sakey a propesor na sikolohiya tan zoology. Parad saray biologon manisia ed ebolusyon, saray mabilay a palsa so walaan lambengat na saksakey a gagala: say pambilay tan pamarakel. Kanian, onia so insuheri nen Propesor Barash: “Diad sayan maaw-awang ya uniberso ya andian na gagala tan anggapoy panangiyansakit ed totoo, responsabilidad na totoo so mangiter na kabaliksan ed bilay tayo diad panggawa na bulos, ninonot, tan ginagala iran desisyon.”

Say Lapuan na Kabaliksan tan Gagala

Kasin ontan labat la sirin so bilay, a balang sakey so manggawa lay labay to? Imbes a paulyan itayon manteyengteyeng ed uniberso ya andiay gagala odino getma, abayag lan imparungtal na Biblia a wadia itayo parad sakey a gagala. Aliwan resulta na kibanbana so inkiwala tayo. Nipakabat ed sikatayo a say Manamalsa so abayag ya angiparaan ed dalin sakbay a panayaman na too. Anggapo so nibanbana labat. Sineguro to ya amin a bengatla et “maong.” (Genesis 1:31; Isaias 45:18) Akin? Lapud walay gagala na Dios parad too.

Balet, makapainteres ta ag-inggeter na Dios so arapen na kada indibidual, balanglan diad madibinon isasalet odino diad biolohikal a proseso. Anggaman naapektoan itayo ed saray atawir ed ateng, sikatayo so manunan makakontrol ed saray kiwas tayo. Amin tayo so bulos a mamili na dilin kurang tayo ed bilay.

Anggaman makapampili so balang sakey ed sikatayo no anto so gawaen tayo ed bilay, sakey a lingo so pangipuera ed Manamalsa tayo ed saray plano tayo. Diad tua, nalmoan na dakel a say peteg a kabaliksan tan gagala na bilay et nisiglaot ed relasyon ed Dios. Nipabitar so makanan siglaotan ed baetan na Dios tan say gagala na bilay tayo diad personal a ngaran na Dios, Jehova, a literal a mankabaliksay, “Pagmaliwen To.” (Exodo 6:3; Salmo 83:18) Kabaliksan na satan ya itutultuloy ton sumpalen so antokaman ya insipan to tan naynay ton gawaen so gagala to. (Exodo 3:14; Isaias 55:10, 11) Nonoten pa  itan. Say ngaran a Jehova so sakey a garantiya ed sikatayon amin a sikato so orihinal tan andi-anggaan a Lapuan na makabkabaliksan a gagala.

Say pamidbir lambengat ed kiwawala na Dios et walaan lay baleg ya epekto ed panmoria na sakey ed bilay. Oniay inkuan nen Linet, a mantaon na 19: “Ipaparungtal ed siak na amin a nanenengneng kon mararakep a pinalsa nen Jehova tan say gagala na saratan, a siak met so apalsa lapud sakey a rason.” Oniay inyarum nen Amber: “No ibaga na arum ya agda amta no wala kasi Dios, misalsalamat ak ta siak amtak. Saray mismon pinalsa nen Jehova so mamaneknek ed kiwawala to.” (Roma 1:20) Siempre, importante so pamidbir ed kiwawala na Manamalsa, balet sananey nin pamaakaran so pamayubo na maong a relasyon ed sikato.

Pikakaaro ed Dios

Makatulong lamet so Biblia ed saya. Saray manangilukas a kapitulo na satan so angitaryay malinew ya ebidensya a si Jehova a Dios so sakey a maaron Ama. Singa bilang, agto pinalsa si Adan tan Eva pian paulyan a manpalbeng nipaakar ed sikato. Imbes, sikatoy regular a mitatalosan ed sikara. Agto ra pinaulyanan ed Eden pian makauley laran bukor legan ton aasikasoen so arum iran bengatla. Imbes, inikdan to ira na espisipikon giya nipaakar ed sankaabigan a panagbilay. Inikdan to ira na makapnek a kimey, tan inyuksoy to so nipaakar ed tuloytuloy a kibangat da. (Genesis 1:26-30; 2:7-9) Agta ontay ilaloan mo ed sakey a makayari, tan maaron ateng? Natan, nonoten pa no antoy kabaliksan na satan. Oniay inkuan nen Denielle: “Say pakaamta a pinalsa nen Jehova so dalin tan denesinyo to itayon walaan na kapasidad a manggayaga ed pinalsa to so angipabitar ed siak a labay to itayon manliket.”

Nilikud ni ed satan, singa ed sakey a maaron ama et labay nen Jehova ya amin ya anak to so nawalaan na personal a relasyon ed sikato. Nipaakar ed saya, oniay impaseguro na Gawa 17:27: “[Sikato so] wala ed ag-arawi ed sinansakey ed sikatayo.” Antoy epekto na satan? Oniay inkuan nen Amber: “Say impakapikabat ko ed si Jehova so angipaseguro ed siak ya agak balot manbukbukor. Anggan antoy nagawa, walan walay naasinggeran ko.” Niarum ni, legan mon nakakabat si Jehova, naromog mon sikatoy mapangasi, maalas, tan maomaong. Makapanilalo ka ed sikato. Inkuan nen Jeff: “Sanen nagmaliw a maapit a kaarok si Jehova, amtak ya anggapo lay arum a mas akaparaan ya ontulong ed siak.”

Makapaermen, dakel la ray agmaabig a bengatlan nibabaga nipaakar ed si Jehova. Sikato kunoy sengegan na pirmin paniirap na totoo tan pikewet a kagagawa ed relihyon. Pigara ed saray sankagrabian a kaugsan ya agawa ed awaran na too so intetel ed sikato. Balet oniay impaliwawa na Deuteronomio 32:4, 5: “Kaptekan so saray amin a dalan to. . . . Mauges so ginawa ra ed sikato, sikara ag to’ra anak, Sikato so akabalawan da.” Obligasyon tayo sirin so panusisa a mismo ed saray katuaan.​—Deuteronomio 30:19, 20.

Nasumpal so Gagala na Dios

Balet, anggano antoy desidien tayo, anggapoy bengatlan makaamper ed sigpot a panumpal na Dios ed saray gagala to ed sayan dalin tan ed katooan. Nepeg a nonoten a sikato so Manamalsa. Anto sirin itan a gagala? Tinukoy itan nen Jesus ed Sermon to ed Palandey sanen inkuan to: “Mapalar iray mauyamo: ta tawiren day dalin.” Diad saginonor, impaamta to ed apostol ton si Juan a determinadoy Dios a ‘mamagbag ed saray mamabagbag ed dalin.’ (Mateo 5:5; Apocalipsis 11:18) Lapud si Jesus et kaiba na Dios legay impamalsa, kabat ton manlapu la’d gapo et gagala la na Dios a manayam ya andi-anggaan so ayadyarin pamilya na too diad paraison dalin. (Genesis 1:26, 27; Juan 1:1-3) Tan agmanguuman so Dios. (Malaquias 3:6) Oniay insipan nen Jehova: “Petepeteg, singa ninonot ko, ontan so nagawa; et singa pinegdat ko, ontan so mansiansia naani.”​—Isaias 14:24.

Diad panaon tayo, inletneg la nen Jehova so pundasyon na nankakasakey a komunidad a nibase, aliwan diad agum tan inkasiblet a singa kasmak ed sayay mundo tayo natan, noagta  diad aro ed Dios tan ed kakaabay. (Juan 13:35; Efeso 4:15, 16; Filipos 2:1-4) Sakey itan a komunidad na saray bulos-linawan indibidual a peteg ya interesadon manumpal ed gagala ra​—say pangipulong ed maong a balita na Panarian sakbay a manampot iyan sistema na bengabengatla. (Mateo 24:14; 28:19, 20) Diad masulok a 230 a daldalin, masulok lan anemiran milyon a Kristiano so saniiban mandadayew ed maaro, tan nankakasakey ya impanaagi ed sankamundoan.

Ikdan Moy Kabaliksan so Bilay Mo

No manaanap ka na mas makabaliksan a bilay, nepeg mon kabaten ya iimbitaan ka nen Jehova a miulop ed saray totoo to​—say “matunong a nasyon” to​—natan la. (Isaias 26:2) Nayarin panumamengan mo balet, ‘Panon kasi kabibilay ed sayan Kristianon komunidad? Labay kon talaga kasi so magmaliw a kabiangan na satan?’ Imanom no antoy ibabaga na pigaran kalangweran:

Quentin: “Say kongregasyon so salimbengan ko ed mundo. Lapud namomoriak a kabiangan si Jehova ed bilay ko, atulongan ak a natebek so kiwawala to tan labay ton manliket ak.”

Jeff: “Say kongregasyon so sankaabigan lan pasen a laen ko pian napaseseg. Wadtan iray agagik a mangiiter na suporta tan komendasyon. Kabiangan la ran talaga ed saray kanayon ko.”

Linet: “Agnikompara so liket no nanengneng moy sakey a toon angawat na katuaan na Biblia tan nandesisyon a manlingkor ed si Jehova. Saya so mangiiter ed siak na agaylan inkapnek ed bilay.”

Cody: “Anggapoy kakanaan na bilay ko no anggapoy Jehova. Agko la amtay arapen ko a singa saray arum a sasalien dan amin pian naromog so liket, anta anggapo met. Imbes, si Jehova so angiter ed siak na mabmablin pribilehyo a nawalaan na relasyon ed sikato, tan satan so mangiiter na kabaliksan ed bilay ko.”

Akin ya agmansukimat a mismo? Namoriam a diad iyapit mo ed Manamalsam, si Jehova a Dios, naromog moy peteg a kabaliksan na bilay.

[Saray litrato ed pahina 31]

Say relasyon ed Dios so mangiter na kabaliksan ed bilay tayo

[Picture Credit Lines ed pahina 29]

NASA photo