Bayuboan so Singa-kriston Panmoria Nipaakar ed Inkatalonggaring

“Siopaman a labay toy magmaliw a baleg ed sikayo sikato naani managlingkor yo.”​—MATEO 20:26.

1. Anto so panmoria na mundo nipaakar ed inkatalonggaring?

 AKAALAGEY so 18-metros katagey ya estatua nen Faraon Amenhotep III diad asingger ed kadaanan a syudad na Ehipto a Thebes (modernon-agew a Karnak), a ngalngali 500 kilometro ed abalaten na Cairo. Melmelanting so sakey a too no ikompara toy inkasikato ed sayan abalbaleg ya imahen. Sayan monumento, a maseguron impaalagey pian takotan so mananguley, so sakey a simbolo na panmoria na mundo nipaakar ed inkatalonggaring, salanti, say pangipabidbir na sakey ed inkasikato a maimpluensya anggad posible tan pangipalikna ed arum a sikaray abebbeba.

2. Anton ehemplo so impatnag nen Jesus ed saray patumbok to, tan antoran tepet so nakaukolan tayon itepet ed inkasikatayo?

² Ikompara iyan panmoria nipaakar ed inkatalonggaring diad panmoria ya imbangat nen Jesu-Kristo. Anggaman sikato so “Katawan tan Managbangat” ed saray patumbok to, imbangat nen Jesus ed sikara a say inkatalonggaring so nagamoran labat diad panlingkor ed arum. Diad kaunoran lan agew na bilay to diad dalin, impatnag nen  Jesus so kabaliksan na imbangat to diad impanguras to ed saray sali na babangatan to. Agaylan mapaabeban gawa na panagserbi! (Juan 13:4, 5, 14) Manlingkor odino panlingkoran​—dinan so makapasagyat ed sikayo? Kasin papawalaen ed sikayo na ehemplo nen Kristo so pilalek a magmaliw a mapaabeba a singa sikato? Usisaen tayo sirin so panmoria nen Kristo nipaakar ed inkatalonggaring a midumaan ed panmoria na kaslakan ed mundo.

Paliisan so Panmoria na Mundo Nipaakar ed Inkatalonggaring

3. Antoran alimbawa ed Biblia so mangipapatnag ed mauges a nansumpalan na saramay nampilalek ed panangigloria na totoo?

³ Dakel so alimbawa ed Biblia a mangipapatnag a say panmoria na mundo nipaakar ed inkatalonggaring so mansumpal ed kadederal. Isipen pa so nipaakar ed maimpluensyan si Haman, a bantog ed maarin korte na Persia legan na panaon nen Ester tan Mardokeo. Say impanpilalek a maong nen Haman ed gloria so nansumpal ed kababaingan tan impatey to. (Ester 3:5; 6:10-12; 7:9, 10) Komusta met so mapaatagey a si Nabucodonosor, a naatapis legan na kapantokan na pakayari to? Say pikewet a panmoria to nipaakar ed inkatalonggaring so nibalikas ed oniaran salita: “Aliwa ta a saya so baleg a Babilonia a sikato so impaalagey ko a nipaakar ed maari a palasyo, ed biskeg na pakapanyarik tan nipaakar ed gayaga na kaatageyan ko?” (Daniel 4:30) Insan wadtan met so mapangtan si Herodes Agripa I, ya angawat ed agmanepeg a panangigloria ed sikato imbes ya igloria to so Dios. Sikato so “inatey tan kinan na saray bigis.” (Gawa 12:21-23) Lapud agda inapresya so panmoria nen Jehova nipaakar ed inkatalonggaring, sarayan lalaki so makapabaing a naandi ed pakayari!

4. Siopa so lapuan na mapaatagey ya awawey na mundo?

⁴ Manepeg labat ya usaren tayo so bilay tayo ed paraan a kigalangan tan panrespetoan ed sikatayo. Ingen, aanamoten na Diablo iyan pilalek diad pangiyaalibansa to na mapaatagey ya awawey, a pakapatnagan ed dili iran ambisyon to. (Mateo 4:8, 9) Agbalot lilingwanan a sikato so “dios na sayan panaon,” tan sikato so determinadon mangiyalibansa ed panag-isip to diad dalin. (2 Corinto 4:4; Efeso 2:2; Apocalipsis 12:9) Lapud amta ra so lapuan na satan a panag-isip, papaliisan na saray Kristiano so panmoria na mundo ed inkatalonggaring.

5. Kasin saray agawaan, inkabantog, tan kayamanan so mangigarantiya ed magnayon a liket? Ipaliwawa.

⁵ Iyaalibansa met na Diablo so sakey a panmoria a say pagmaliw a bantog ed mundo, galgalangen na totoo, tan pakawalaan na dakel a kayamanan et seguradon manresulta ed maliket a bilay. Tua kasi itan? Kasin saray agawaan, inkabantog, tan kayamanan so mangigarantiya ed bilay a napnoy liket? Papasakbayan itayo na Biblia ya ag-itayo papapalikdo ed ontan a panag-isip. Oniay insulat nen makabat ya Arin Solomon: “Anengneng ko so amin a kimey tan balang mabmaabig a gawa, a nipaakar ed saya say too sibletan na kaabay to. Saya met sikato so kaapaan tan panguusil ed dagem.” (Eclesiastes 4:4) Dakel ya indibidual ya angitalaga na bilay da pian nagamoran so inkaprominente ed sayan mundo so angiter na paneknek ed katuaan na satan a pinuyanan a simbawa na Biblia. Sakey lan alimbawa et nipaakar ed sakey a too a tinmulong a nandesinyo, nanggawa, tan angisali ed spacecraft ya inusar na too a linma ed bulan. Oniay nanonotan to: “Nanseet ak a maong tan nagmaliw ak ya eksperto ed ginawak. Ingen ta satan so maapa, odino anggapoy kakanaan,  diad pakagamor ko na magnayon a liket tan kareenan na nonot.” * Say minumundon ideya nipaakar ed inkatalonggaring, balanglan satan so diad lawak na negosyo, isport, odino panagligliwaan, so agmangigarantiya ed magnayon a liket.

Nagamoran so Inkatalonggaring Diad Panserbi ed Arum Lapud Aro

6. Anto so mangipatnag a si Santiago tan Juan so walaan na lingon panmoria nipaakar ed inkatalonggaring?

⁶ Ipaparungtal na sakey ya ebento ed bilay nen Jesus no anto so lalanoren na peteg ya inkatalonggaring. Nambaroy si Jesus tan saray babangatan to a paarap ed Jerusalem parad Paskua nen 33 K.P. Sanen paarap la ra diman, duara ed kakapinsan nen Jesus, si Santiago tan Juan, so angipatnag na makapuy a panmoria nipaakar ed inkatalonggaring. Diad panamegley na ina ra, oniay inkerew da ed si Jesus: “Ibilin mo komon a sarayay duaran ana’ko makayurong ira komon, sakey ed nikawanan a limam, tan say sakey ed nikawigi a limam, dia ed panarian mo.” (Mateo 20:21) Diad limog na saray Judio, say iyurong ed nikawanan odino nikawigi so impasen a baleg a kagalangan. (1 Arari 2:19) Si Santiago tan Juan so maambisyon a nanggegemtan ed dederlengen a tuloy iran posisyon. Labay dan nagamoran irayan posisyon na autoridad. Amta nen Jesus no anto so walad kanonotan da tan inanamot ton peteken so lingon panmoria ra ed inkatalonggaring.

7. Panon a deneskribe nen Jesus so paraan a mansumpal ed peteg ya inkatalonggaring na Kristiano?

⁷ Amta nen Jesus a diad sayan mundo a mangiyaalibansa na inkamapaatagey, say too ya ipapasen a matalonggaring et samay mangokontrol tan mangigaganggan ed arum tan naala ton tampol so labay to. Balet diad limog na papatumbok nen Jesus, say mapaabeban panlingkor ed arum so estandarte a pakadeterminaan na inkatalonggaring. Inkuan nen Jesus: “Siopaman a labay toy magmaliw a baleg ed sikayo sikato naani managlingkor yo. Tan siopaman a labay toy unaan ed sikayo sikato naani aripen yo.”​—Mateo 20:26, 27.

8. Anto so kabaliksan na pagmaliw a managlingkor, tan antoran tepet so nayarin itepet tayo ed inkasikatayo?

⁸ Say Griegon salita a nipatalos a “managlingkor” diad Biblia so manutukoy ed samay makuli tan maseet a manlilingkor ed arum. Imbangat nen Jesus ed saray babangatan to so importantin leksion: Say panmando ed totoo pian gawaen iray bengatla et agto pagmaliwen so sakey a matalonggaring, imbes diad panserbi ed arum lapud aro. Tepetan yo pay inkasikayo: ‘Panon kasi so ikiwas ko sano siak si Santiago odino si Juan? Kasin atalosan kon maong a say peteg ya inkatalonggaring  so nagamoran diad panserbi ed arum, ya aro so pinagka-motibo?’​—1 Corinto 13:3.

9. Anton alimbawa so impatnag nen Jesus diad impideneng to ed arum?

⁹ Impabitar nen Jesus ed saray babangatan to a say estandarte na mundo nipaakar ed inkatalonggaring so midumaan ed estandarte ya impatnag to. Agton balot impatnag so mapaatagey ya awawey ed saramay nanserbian to odino impalikna ed sikara ya abebbeba ira. Amin a klase na totoo​—lalaki, bibii, tan ugugaw, mayaman, mairap-bilay, tan maimpluensya, ontan met ed saray kabkabat a managkasalanan​—so agnasisikig a milimog ed sikato. (Marcos 10:13-16; Lucas 7:37-50) Mabetbet et agmakankaanos so totoo ed saramay walaan na limitasyon. Duma balet si Jesus. Anggaman no maminsan et saray babangatan to so bengatbengat tan mankokolkol, sikato so maanos ya angibangat ed sikara, ya impatnag to ed sikara a sikato so peteg a mapaabeba tan mauyamo.​—Zacarias 9:9; Mateo 11:29; Lucas 22:24-27.

10. Panon a napatnagan ed interon impanbilay nen Jesus so masakripisyon impanlingkor to ed arum?

¹⁰ Say agmasiblet ya alimbawa na sayan matalonggaring ya Anak na Dios so angipatnag ed peteg a kabaliksan na inkatalonggaring. Si Jesus so aglinma diad dalin pian panlingkoran noagta pian manlingkor ed arum, a pinaabig to so “nambabangil a sakisakit” tan imbulos to iray totoon kokontrolen na saray demonyo. Anggaman sikato so naksawan tan kinaukolan to so manpainawa, lawas ton inyuna iray pankaukolan na arum, a nanggunaetan ton ligliwaen so arum. (Marcos 1:32-34; 6:30-34; Juan 11:11, 17, 33) Say aro to so amakiwas ed sikaton ontulong ed arum a totoo diad espiritual a paraan, a nambaroy na nilasus a kilometro diad marabok iran karsada pian ipulong so maong a balita na Panarian. (Marcos 1:38, 39) Anggapoy duaruwa ya impasen nen Jesus ya importantin tuloy so panlingkor ed arum.

Aligen so Kapaabebaan nen Kristo

11. Antoran kalidad so kinaukolan parad saray agagin aturon manlingkor bilang manangasikaso ed kongregasyon?

¹¹ Diad pansamposampot na dekaday 1800, nidanet so manepeg ya awawey a nepeg a bayuboan na saray Kristianon manangasikaso sanen apili iray lalakin manlingkor bilang ombiabiahen manangilaman pian mangitarya ed saray pankaukolan na totoo na Dios. Unong ed Zion’s Watch Tower na Setyembre 1, 1894, say aanapen et lalakin “mauyamo”​—ta pian ag-ombaleg so ulo ra . . . , a walaan na mapaabeban kanonotan ya agmangitatandoro ed inkasikara, noagta si Kristo​—ya agmangibabalikas ed dilin pikakabat da, noagta say Salita to a simpli tan mapuersa.” Malinew, agbalot nepeg a dampoten na saray tuan Kristiano so responsabilidad pian napenek so personal ya ambisyon da odino pian ombantog ira, magmaliw a maimpluensya, tan nawalaan na kontrol ed arum. Sinononot so mapaabeban manangasikaso a saray responsabilidad to so mangisakop ed “maong a gawa,” aliwan say atagey a posisyon a kigloriaan ton mismo. (1 Timoteo 3:1, 2) Amin a mamatatken tan ministeryal a lingkor so nepeg a manbanikel ed mapaabeban panlingkor da ed arum tan mangidaulo ira ed sagradon panaglingkor, a mangiletneg ira na maabig  ya ehemplo ya aligen na arum.​—1 Corinto 9:19; Galacia 5:13; 2 Timoteo 4:5.

12. Antoray nayarin itepet ed dili na saramay manadampot ed saray pribilehyo diad kongregasyon?

¹² Oniay kaukolan ya itepet ed dili na siopaman ya agin laki a manadampot ed saray pribilehyo: ‘Kasin aanamoten ko iray pankanawnawa pian panlingkoran so arum, odino walaan ak na tendensian panlingkoran na arum? Mabulos ak kasin manggawa na makatulong iran kimey anggaman agnaimano na arum?’ Alimbawa, nayarin mabulos a manpaliwawa so sakey a malangwer a laki diad Kristianon kongregasyon balet nayarin masuyat ya ontulong ed saray maedad la. Nayarin panliketan to so milimog ed responsable iran lalaki ed kongregasyon ingen ta masuyat a mibiang ed panagpulong a kimey. Nepeg ya oniay itepet na ontan a malangwer a laki ed inkasikato: ‘Kasin interesado ak labat ed saray aspekto na panaglingkor ed Dios a pamidbiran tan pangirayewan ed siak? Kasin panggugunaetan koy magmaliw a bantog?’ No panggunaetan tayoy nawalaan na personal a kigloriaan tayo, seguradon agtayo aaligen so ehemplo nen Jesus.​—Juan 5:41.

13. (a) Panon ya akaapekta ed arum so mapaabeban alimbawa na sakey a manangasikaso? (b) Akin a nibaga a say kapaabebaan, odino pakawalaan na kaabebaan na nonot, so aliwan dilin-panlabay labat na sakey a Kristiano?

¹³ Sano panggunaetan tayon aligen so kapaabebaan nen Kristo, napakiwas itayon manlingkor ed arum. Konsideraen pa so alimbawa na sakey a manangasikaso na sona a manguusisa ed kikukurang na sakey ed saray sangan opisina na saray Tasi nen Jehova. Anggaman okupado so eskedyul to tan ambelat so responsabilidad to, sayan manangasikaso so tinmulong ed sakey a malangwer ya agin laki a naiirapan a mangiyeksakto ed saray setting na makinan panag-istapler na saray libro tan magasin. “Mandinayew ak a maong!” so nanonotan na agin laki. “Imbaga to ed siak ya onman met a makina so papaandaren to sanen sikatoy malangwer nin manlilingkor diad Bethel, tan nanonotan to no panon kairap so pangiyeksakto ed saray setting na makina. Sikato so akikimey ed siak diad satan a makina ed andukey a panaon anggaman dakerakel so importante nin gawaen to. Talagan pandinayewan ko iman.” Sayan gawa na kapaabebaan so nanonotan nin siansia na saman ya agi, a sakey la natan a manangasikaso ed sakey ed saray sangan opisina na saray Tasi nen Jehova. Komon ta agtayon balot ipapasen so inkasikatayo ya atagtagey pian gawaen iray bengatlan abebbeba odino importante itayon tuloy pian gawaen iray ordinaryon kimey. Imbes, nepeg ya agamilen tayo so ‘kaabebaan na nonot.’ Aliwa itan a dilin-panlabay labat. Kabiangan itan na ‘balon inkatoo’ a nepeg ya agamilen na sakey a Kristiano.​—Filipos 2:3; Colosas 3:10, 12; Roma 12:16.

No Panon a Naalig so Panmoria nen Kristo Nipaakar ed Inkatalonggaring

14. Panon a makatulong ed sikatayo so pandalepdep ed relasyon tayo ed Dios tan ed kapara tayon too pian nabayuboan so suston panmoria ed inkatalonggaring?

¹⁴ Panon itayon nawalaan na suston panmoria nipaakar ed inkatalonggaring? Sakey lan paraan et say pandalepdep ed relasyon tayo ed si Jehova a Dios. Say inkatalonggaring, pakapanyari, tan kakabatan to, so mangiyaatagey a tuloy ed sikato nen saray gagawaen na makabos a totoo. (Isaias 40:22) Say pandalepdep ed relasyon tayo ed kaparan totoo so ontulong met ed sikatayo a makabayubo ed kapaabebaan na nonot. Alimbawa, nayarin mas matalonggaring itayo nen say arum ed pigaran lawak, balet ta mas matalonggaring ira nen say sikatayo diad saray mas importantin aspekto na bilay, odino saray Kristianon agagi tayo so walaan na saray kalidad ya anggapo ed sikatayo. Diad tua, dakel ed saray mabli ed imaton na Dios so aliwan prominente lapud mauyamo tan mapaabeban ugali ra.​—Uliran 3:34; Santiago 4:6.

15. Panon ya ipapatnag na katooran na totoo na Dios ya anggapo so rason na sakey a too a manliknan atagtagey ni nen saray arum?

¹⁵ Saray eksperiensya na saray Tasi nen Jehova ya asubok lapud pananisia ra so matukoy  a mangiyilustra ed sayan punto. Mabetbet et saramay ipapasen na mundo ya ordinaryo so mansiasiansian matoor ed Dios diad silong na mangapuy-apoy iran subok. Say pandalepdep ed saratan ya alimbawa so ontulong ed sikatayon mansiansian mapaabeba tan mangibangat ed sikatayo ya ‘agnononoten so inkasikatayon dili ya atagtagey nen say kanepegan tayon nonoten.’​—Roma 12:3. *

16. Panon a nabayuboan na amin ya agagi diad kongregasyon so inkatalonggaring bilang pangalig ed ehemplo nen Jesus?

¹⁶ Amin a Kristiano, malangwer tan maedad la, so nepeg a manggunaet a mamayubo ed panmoria nen Kristo nipaakar ed inkatalonggaring. Diad kongregasyon, walaray nankakapigan kimey a nepeg a gawaen. Agkayon balot maniimbel no walay ompatnag ya abebbeban kimey ya ipagawa ed sikayo. (1 Samuel 25:41; 2 Arari 3:11) Atateng, kasin papasesegen yo iray ananak tan tin-edyer yo a maliket a mankimey ed antokaman ya asainmin a niiter ed sikara, balanglan diad Kingdom Hall, diad asamblea, odino pankombensionan? Kasin nanenengneng da kayo a mankikimey na saray abeban trabaho? Nanonotan nin siansia na sakey ya agin laki, a manseserbi natan diad sankamundoan iran hedkuarter na saray Tasi nen Jehova, so ehemplo na atateng to. Inkuan to: “Say panmoria ra ed kimey a panaglinis ed Kingdom Hall odino pankombensionan so angipurek ed siak ya importante itan. Mabetbet ira a manboboluntaryon manggawa na saray kimey a makagunggona ed kongregasyon odino ed saray agagi, anggan panon lay inkaabeba na saratan a kimey. Satan ya awawey so akatulong ed siak pian mabulos kon awaten so antokaman a trabaho dia ed Bethel.”

17. Diad antoran paraan a magmaliw a bendisyon iray mapaabeban bibii ed loob na kongregasyon?

¹⁷ Nipaakar ed panangiyuna ed pankaabigan na arum imbes a dili tayo, walaan itayo na alay abig ya alimbawa nen Ester, a nagmaliw a reyna na Empiryo na Persia nen koma-liman siglo K.K.P. Anggaman manaayam ed sakey a palasyo, sikato so mabulos a mangirisga ed bilay to nisesengeg ed totoo na Dios, ya onkikiwas a mitunosan ed linawa To. (Ester 1:5, 6; 4:14-16) Antokaman so kipapasen na panagbilay da, nayarian na saray Kristianon bibii natan ya ipatnag so awawey a singa si Ester diad pamaseseg ed saray naeermenan, ibisita ed saray mansasakit, pibiang ed panagpulong a kimey, tan pitulongan ed saray mamatatken. Agaylan bendisyon iray mapaabeban agagin bibii diad kongregasyon!

Saray Bendisyon ed Singa-Kriston Inkatalonggaring

18. Antoran gunggona so nagamoran no ipatnag so singa-Kriston inkatalonggaring?

¹⁸ Dakel so nagamoran yon gunggona sano pansiansiaen yo so singa-Kriston panmoria nipaakar ed inkatalonggaring. Say mabulos a panlingkor ed arum so mamaliket ed sikara tan ed sikayo. (Gawa 20:35) Diad mabulos tan magunaet a pankimey yo parad saray agagi yo, lalo da kayon aroen. (Gawa 20:37) Mas importante, momoriaen nen Jehova so gagawaen yon pangiyalibansa ed pankaabigan na kapara yo iran Kristiano bilang makapaliket a bagat ed sikato.​—Filipos 2:17.

19. Anto so nepeg a determinado tayon gawaen nipaakar ed singa-Kriston panmoria ed inkatalonggaring?

¹⁹ Kada sakey ed sikatayo so nakaukolan a man-usisa ed dilin puso to tan mangitepet na: ‘Kasin itotongtong ko labat so nipaakar ed pamayubo ed singa-Kriston panmoria nipaakar ed inkatalonggaring, odino maseet kon iyaaplika itan?’ Mabitar so liknaan nen Jehova ed saray mapaatagey. (Uliran 16:5; 1 Pedro 5:5) Komon ta napatnagan ed saray kiwas tayo a panliliketan tayon aligen so panmoria nen Kristo nipaakar ed inkatalonggaring, balanglan diad loob na Kristianon kongregasyon, diad pamilya, odino diad inagew-agew a pidedeneng tayo ed kaparan totoo​—a gawaen ya amin parad kigloriaan tan kirayewan na Dios.​—1 Corinto 10:31.

[Saray paimano ed leksab]

Kasin Nipaliwawa Yo?

• Akin a nepeg tayon ipulisay so panmoria na mundo nipaakar ed inkatalonggaring?

• Panon a momoriaen nen Jesus so inkatalonggaring?

• Panon a naalig na saray manangasikaso so kapaabebaan nen Kristo?

• Anto so makatulong ed sikatayon nabayuboan so singa-Kriston inkatalonggaring?

[Tepetepet Parad Panagaral]

[Kahon ed pahina 17]

Siopa so Walaan na Singa-Kriston Inkatalonggaring?

Samay labay toy panlingkoran odino samay mabulos a manlingkor ed arum?

Samay labay toy ombantog odino samay mangaawat na abeba iran trabaho?

Samay mangiyaatagey ed inkasikaton dili odino samay mangiyaatagey ed arum?

[Litrato ed pahina 14]

Abalbaleg ya imahen nen Faraon Amenhotep III

[Litrato ed pahina 15]

Amta yo kasi no anto so angitonton ed inkaplag nen Haman?

[Saray litrato ed pahina 16]

Kasin maimano kayo ed saray pankanawnawan makapanlingkor ed arum?