“Maliket Min Ibagay, ‘On!’”

NEN agano ni et akaawat na sulat so sanga na saray Tasi nen Jehova ed Nigeria ya oniay ibabaga na kabiangan na satan:

“Say anak min si Anderson et inatey nen manedad na 14. Antis na impatey to, sikatoy mamapabaleg na duaran manok. Kaliktan ton ilako iratan insan ipawit so nanlakoan ed sangan opisina bilang kontribusyon ed sankamundoan a panagpulong a kimey. Balet ta sikatoy inatey antis nin alako iratan.

“Lapud satan a pilalek to, sikami ya atateng to so amabaleg ed saray manok insan mi inlako iratan. Ipawit mi iyay kuarta a pinagkakontribusyon nen Anderson. Lapud sipan nen Jehova, matalek kami a magano la​—maganggano la​—a napinengnengan mi lamet si Anderson. Maliket min ibagay, ‘On!’ no bilang ta tepeten to no sinumpal mi so pilalek na puso to. On, mailalo kami ya aliwa labat a si Anderson so napinengnengan mi ed arapen noagta pati saray ‘sankabalgan a lurem na saray tasi’ a napaoli.”​—Hebreos 12:1; Juan 5:28, 29.

Singa nipabitar ed sayan sulat, say pananisia nipaakar ed kioli so sakey ya ilalon mamapabiskeg ed saray tuan Kristiano. Agaylan liket so naeksperiensya na saray minilyon a pamilya sano sikara, singa ed pamilya nen Anderson, so mangabet ed saray inad-aro ra a naandi lapud kabusol a patey!​—1 Corinto 15:24-26.

Itatarya na Biblia iyan makatambayon ilalo a kioli bilang sakey ed saray makapakelaw a bengatlan magano lan nagawa ed matunong a balon mundo ed uley na Panariay Dios. (2 Pedro 3:13) Oniay inkuan na Biblia sanen tinukoy na satan so nipaakar ed gawaen na Dios ed saray totoo ed satan a panaon: “Punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”​—Apocalipsis 21:4.