Say Salita nen Jehova et Mabilay

Saray Pabitar ed Libro na Numeros

SANEN akapaway la ray Israelita diad Ehipto, sikaray inorganisa bilang sakey a nasyon. Ag-abayag kayari na satan, sikaray makaloob la komon ed Insipan a Dalin, balet ta sinmaew ira. Imbes, sikaray kinaukolan a manteyengteyeng ed loob na manga apataplon taon diad “abalbaleg tan makapataktakot a kalawakan.” (Deuteronomio 8:15) Akin? Ibaga ed sikatayo na maawaran a salaysay ed libro na Biblia a Numeros no anto so agawa. Nepeg a satan so mangipurek ed sikatayo a nakaukolan so itulok ed si Jehova a Dios tan panrespeto ed saray manangilaman to.

Lapud insulat itan nen Moises diad kalawakan tan diad saray Patar na Moab, saknapen na libro na Numeros so peryodo na 38 a taon tan 9 bulan​—manlapud 1512 K.K.P. ya anggad 1473 K.K.P. (Numeros 1:1; Deuteronomio 1:3) Inaon so ngaran na satan ed amiduan impanbilang ed populasyon na Israel, a ginawa ed baetan na 38 a taon. (Kapitulo 1-4, 26) Naapag ed taloran seksion so salaysay. Isasalaysay na unonan parte iray ebenton agawa ed Palandey Sinai. Kokobrian na komaduan parte iray agawa legan na impanteyengteyeng na Israel diad kalawakan. Tan say unor a seksion so manisingbat ed agawgawa diad saray Patar na Moab. Legan mon babasaen iyan salaysay, nayarian mon tepetan so inkasika: ‘Anto so naaralan ko ed sarayan ebento? Kasin walaray prinsipyo ed sayan libro a makagunggona ed siak natan?’

DIAD PALANDEY SINAI

(Numeros 1:1–10:10)

Agawa so primero ed duaran impanbilang legan a wala ni’d leksab na Palandey Sinai iray Israelita. Saray lalakin mantaon na 20 a patagey, nilikud ed saray Levita, so walaan na dagup a bilang a 603,550. Mapatnag a ginawa so impanbilang parad militar iran gagala. Say dagup a bilang na totoo ed interon kampamento, a kabiangan iray bibii, ugugaw, tan saray Levita, so nayarin masulok a taloran milyon.

Kayari na impanbilang, saray Israelita so akaawat na saray bilin nipaakar ed saray uksoyan ed panagmartsa, saray detalye nipaakar ed kimkimey na saray Levita tan panaglingkor ed tabernakulo, saray totontonen nipaakar ed panagkuarantina, tan saray ganggan nipaakar ed saray kaso na panag-imon tan impansamba na saray Nazareo. Lugan na kapitulo 7 so impormasyon nipaakar ed impangiyapay na saray pangulo na tribu a misiglaotan ed inagurasyon na altar, tan sisingbaten na kapitulo 9 so impanselebra ed Paskua. Say duypo so akaawat met na saray bilin nipaakar ed pangiletneg tan pamagbag ed kampamento.

Makasulatan Iran Tepet a Naebatan:

2:1, 2​—Antoray akapaliber a “panamidbiran” odino tanda a nepeg a pankampamentoan na saray grupo na taloran-tribu diad kalawakan? Agdeneskribe na Biblia no anto irayan tanda. Balet, saratan so ag-impasen a sagradon simbolo odino ag-inikdan na relihyoson kabaliksan. Kinmana iray tanda parad praktikal a gagala​—pian tulongan so sakey a too a makaromog na dugan pasen to diad kampamento.

5:27​—Anto so kabaliksan na ‘ikebet na ulpo’ na sakey ya asawan bii ya akikalugoran? Inusar dia so terminon “ulpo” pian tukoyen iray organo ed panag-anak. (Genesis 46:26) Say ‘ikebet’ na satan so mangisusuheri ed ikapuy na saratan ya organo, diad ontan et imposible la so panlukon.

Saray Leksion Parad Sikatayo:

6:1-7. Nepeg a paliisan na saray Nazareo so produkton gawa ed ubas tan amin a mabayanin iinumen, a mankaukolan na pangiburi ed sikaran dili. Nepeg dan parukeyen so buek da​—sakey a tanda na panagpasakop ed si Jehova, no panon a saray bibii so nepeg a manpasakop ed kaasawaan odino kaamaan da. Nepeg a mansiansian malinis iray Nazareo diad iyarawi ra ed  dinanman a bangkay, pati ed bangkay na maapit a kanayon da. Nipatnag na saray sigpot-panaon a lingkor natan so espiritu na dilin-panagsakripisyo no nipaakar ed pangiburi ed sikaran dili tan pampasakop ed si Jehova tan ed uksoyan to. Arum ya asainmin so nayarin mangilanor ed iyakar ed arawin lugar, a nayarin mairap odino imposible so onsempet parad ponpon na sakey a maapit a kapamilya.

8:25, 26. Ta pian naseguro a saray makayarin lalaki so napabtangan na serbisyo bilang Levita, tan lapud ikokonsidera so edad da, saray mamasiken so kinaukolan a manretiro ed obligadon panaglingkor. Balet, nayarian day manboluntaryon ontulong ed arum a Levita. Anggaman anggapo so panagretiro ed pagmaliw a manangiyabawag na Panarian natan, say prinsipyo na sayan ganggan so mangibabangat ed sikatayo na makanan leksion. No agla nasumpal na sakey a Kristiano so pigaran obligasyon lapud inkatakken to la, nayarian toy mibiang ed sakey a nengneng na serbisyo ya iyabuloy na biskeg to.

IMPANTEYENGTEYENG DIAD KALAWAKAN

(Numeros 10:11–21:35)

Sanen inmatagey a siansia so lurem a walad toktok na tabernakulo, saray Israelita so nanmartsa a paarap ed desierto iran patar na Moab, kayari na 38 a taon tan sakey odino duaran bulan. Nayarin makagunggona ed sika so panonton na rota ra ed mapa diad pahina 9 na brosyur a “See the Good Land,” ya impalapag na saray Tasi nen Jehova.

Legan iran mamapaarap ed Kadesh, diad Kalawakan na Paran, sikara so amitlon nanreklamo. Anampot so primero sanen angidapo si Jehova na apoy pian ulamen so pigara ed saray totoo. Say komadua et sanen inmey-ey iray Israelita parad karne, tan si Jehova so angitarya na sikling. Nanreklamo si Miriam tan si Aaron sumpad si Moises a lapud satan et temporaryon akating si Miriam.

Legan iran mankakampamento ed Kadesh, angibaki si Moises na 12 lalaki a man-espiya diad Insipan a Dalin. Pinmawil ira kayari na 40 agew. Lapud sinisia na saray totoo so mauges a balita na samplora ed saray espiya, kinaliktan dan tupaken si Moises, Aaron, tan saray matoor ya espiya a si Josue tan Caleb. Indapo nen Jehova so salot ed totoo, balet sinmalet si Moises, tan inyabawag na Dios a sikaray manteyengteyeng diad kalawakan ed loob na 40 a taon​—ya anggad inatey iraman so kabiangan a binilang.

Angiter si Jehova na kaaruman iran totontonen. Si Core tan arum ni ra so nanrebelde ed si Moises tan Aaron, balet inulam na apoy iray rebelde odino sikaray inakmon na dalin. Diad tinmumbok ya agew et nanmeremere so duypo sumpad si Moises tan Aaron. Bilang resulta, 14,700 so inatey diad sakey a salot ya indapo nen Jehova. Pian nipakabat ya amili so Dios na atagey a saserdote, pinarosas to so baston nen Aaron. Insan initer nen Jehova so kaaruman iran ganggan nipaakar ed saray obligasyon na Levita tan say panaggogol ed totoo. Inyanino na say impangusar ed dapol na ambalangan-baka so panaggogol ed panamegley na bagat nen Jesus.​—Hebreos 9:13, 14.

Pinmawil ed Kadesh iray anak na Israel, a diman inatey si Miriam. Nanreklamo lamet so duypo sumpad si Moises tan Aaron. Antoy makasengeg? Anggapo so  danum. Lapud sinmaew si Moises tan Aaron a mamasantos ed ngaran nen Jehova sanen sikatoy mamilagron angitarya na danum, sikaray ag-akaloob ed Insipan a Dalin. Pinmikal so Israel manlapud Kadesh, tan inatey si Aaron diad Palandey Hor. Legan iran manliliberliber diad Edom, kinmesaw iray Israelita tan nanreklamo ira ed Dios tan si Moises. Angibaki si Jehova na saray maditan uleg pian dusaen ira. Sinmalet lamet si Moises, tan ingganggan na Dios ed sikato a manggawa na uleg a gansa tan ipeket to itan ed sakey a palitek ta pian onabig iraman so aketket diad inengneng da ed satan. Iyaanino na uleg so inkipasak nen Jesu-Kristo parad magnayon a pakagunggonaan tayo. (Juan 3:14, 15) Tinalo na Israel iray Ari na Amorita a si Sihon tan Og tan kinayarian da iray dalin da.

Makasulatan Iran Tepet a Naebatan:

12:1​—Akin a nanreklamo si Miriam tan Aaron ed si Moises? Say peteg a rason na impanreklamo ra et mapatnag a say pilalek nen Miriam parad babaleg a pakayari. Sanen akiulop ed si Moises so asawa ton si Sefora diad kalawakan, nayarin nampaga si Miriam ompan sikatoy agla bidbiren bilang biin walaan na autoridad diad kampamento.​—Exodo 18:1-5.

12:9-11​—Akin a si Miriam lambengat so akating? Maseguro a sikato so angigaulo ed panagreklamo tan tinangguyor toy Aaron a minonong ed sikato. Impatnag nen Aaron so dugan awawey diad impangipatua to ed lingo to.

21:14, 15​—Anto so libro ya asalambit dia? Tutukoyen na Kasulatan so nanduruman libro ya angaonan na saray managsulat na Biblia. (Josue 10:12, 13; 1 Arari 11:41; 14:19, 29) Say alimbawa na satan a libro et say ‘libro na saray Impibakal nen Jehova.’ Lugan na satan so maawaran a salaysay na saray impibakal na totoo nen Jehova.

Saray Leksion Parad Sikatayo:

11:27-29. Angitarya si Moises na ekselentin ehemplo nipaakar ed no panon so nepeg ya ikiwas tayo sano say arum so makaawat na saray pribilehyo ed panaglingkor ed si Jehova. Imbes a sikatoy manimon a mananap na dilin kigloriaan to, nanliket si Moises sanen ginmapon nampropeta si Eldad tan Medad.

12:2, 9, 10; 16:1-3, 12-14, 31-35, 41, 46-50. Iilaloan nen Jehova a respetoen na saray mandadayew ed sikato so autoridad ya inter to.

14:24. Say makatulong pian naresistian iray minumundon pananesdes a manggawa na mauges et say pamayubo ed “sananey ya espiritu,” odino awawey na kanonotan. Nepeg ya ag-itan mipara ed espiritu na mundo.

15:37-41. Say nikaduman palagaygay ed saloy na kawes na saray Israelita so ginetman mangipanonot a sikaray nibiig a totoon mandayew ed Dios tan mangunor ed saray ganggan to. Agta nepeg met a sikatayoy manbilay unong ed saray estandarte na Dios tan ipatnag tayon biig itayo manlapud mundo?

DIAD SARAY PATAR NA MOAB

(Numeros 22:1–36:13)

Legan a mankakampamento iray anak na Israel diad desierto na saray patar na Moab, sikaray nagmaliw a sesga ed saray Moabita. Kanian inupaan nen Balak, ya Ari na Moab, si Balaam pian ayewen iray Israelita. Balet pinaskar nen Jehova  si Balaam a papalaren ira. Diad ontan et inusar iray bibiin Moabita tan Midianita pian ayaten iray lalakin Israelita ed imoralidad tan idolatriya. Bilang resulta, pinatey nen Jehova so 24,000 a managgaway-mauges. Tinmundan siansia so salot sanen impatnag nen Phinehas ya agto aabuloyan a walay milalaslasan ed kinen Jehova.

Ipaparungtal na komaduan impanbilang ed populasyon ya inatey laray lalaki a nibilang ed primero, nilikud ed si Josue tan si Caleb. Si Josue so tinuro ya onsalat ed si Moises. Inawat na saray Israelita iray totontonen parad nanduruman panangiyapay tan saray bilin nipaakar ed panagsamba. Say baley na Israel so binmales met ed saray Midianita. Say tribu na Ruben, Gad, tan say kapalduan tribu na Manases so nanayam diad bukig na Ilog Jordan. Binilin so Israel ya ombeltang ira ed Jordan tan kayarianen da so dalin. Inggetar iray malinew a ketegan na dalin. Say tawir so nadetermina panamegley na pipapalaran. Niiter ed saray Levita so 48 a syudad, tan 6 ed saraya so kinmanan syudad a salimbengan.

Makasulatan Iran Tepet a Naebatan:

22:20-22​—Akin a dinmalang so sanok nen Jehova ed si Balaam? Imbaga la nen Jehova ed si propetan Balaam ya agto nepeg ya ayewen iray Israelita. (Numeros 22:12) Balet, linma so propeta a kaiba iray bataan nen Balak a getma ran ayewen so Israel. Kinaliktan nen Balaam a paliketen so ari na Moabita tan makaawat na tumang manlapud sikato. (2 Pedro 2:15, 16; Judas 11) Anggaman apaskar si Balaam a papalaren so Israel imbes ya ayewen to, nanggunaetan to nin siansia so pabor na ari diad impangisuheri ton usaren iray bibiin mandadayew ed si Baal pian ayaten iray lalakin Israelita. (Numeros 31:15, 16) Kanian, say rason ed insanok na Dios sumpad si propetan Balaam et say andiay-prinsipyon inkaagum to.

30:6-8​—Nayarian kasi na Kristianon asawan laki ya ibaliwala iray samba na asawa to? No nipaakar ed saray samba, si Jehova so midedeneng natan ed saray sinansakey a mandadayew ed sikato. Alimbawa, say dedikasyon ed si Jehova et sakey a personal a samba. (Galacia 6:5) Anggapo so autoridad na asawan laki ya ibaliwala odino kanselaen itan a samba. Balet, say asawan bii so nepeg ya agmangisamba na bengatlan onsumlang ed Salitay Dios odino ed saray obligasyon to ed masiken to.

Saray Leksion Parad Sikatayo:

25:11. Agaylan abig ya alimbawa na inkaseseg ed panagdayew ed si Jehova so inletneg nen Phinehas parad sikatayo! Agta say pilalek a pansiansiaen so kalinisan ed kongregasyon so mamakiwas ed sikatayon ipakabat ed Kristianon mamatatken so antokaman ya amta tayon graben imoralidad?

35:9-29. Say katuaan a say agsigagagalan akapatey so kaukolan ya ontaynan ed abung to tan ombatik ed syudad a salimbengan ed loob na sakey a peryodo na panaon so mangibabangat ed sikatayo a say bilay et sagrado tan nepeg tayon respetoen itan.

35:33. Say dalin a dinutakan na nipaagus a dala na andiay kasalanan so nasakbongan lambengat panamegley na dala na saramay amaagus ed satan. Agaylan matukoy a deralen nen Jehova so marelmeng sakbay ton pagmaliwen so dalin a sakey a paraiso!​—Uliran 2:21, 22; Daniel 2:44.

Mapuersa so Salita na Dios

Nepeg tayon ipatnag so panagrespeto ed si Jehova tan ed saraman so tinuro ton nawalaan na responsabilidad diad limog na totoo to. Say libro na Numeros so lalon mangipapabitar ed sayan katuaan. Agaylan importantin leksion a pansiansiaen so kareenan tan pankakasakey diad loob na kongregasyon natan!

Ipapatnag na saray ebenton nisalaysay diad Numeros ya agaylan inomay a napelag ed gawan-mauges iramay mangibabaliwala ed espiritualidad da, a singa say panagmeremere, imoralidad, tan idolatriya. Arum ed sarayan alimbawa tan leksion manlapud sayan libro na Biblia so onkanan pangibasiyan parad lokal iran pankaukolan a parte ed Service Meeting diad kongregasyon na saray Tasi nen Jehova. On, “say salita na Dios sikatoy mabilay tan mabiskeg” odino walaan na puersa ed bilay tayo.​—Hebreos 4:12.

[Litrato ed pahina  24, 25]

Diad panamegley na mamilagron lurem ed tagey na tabernakulo, indirehi nen Jehova so pamaalagey tan pamagbag ed kampamento na Israelita

[Saray litrato ed pahina 26]

Si Jehova so makanepegan na katutulok tayo tan iilaloan ton respetoen tayo iray manangilaman to