Binusol ya Anggapo so Makasengeg

“Binusol da ak ya anggapo so makasengeg.”​—JUAN 15:25.

1, 2. (a) Akin a mankelaw so arum sano mumudmoraen iray Kristiano, balet akin et ag-itayo nepeg a nasurprisa ed ontan a panagsalita? (b) Dinan a pantalos ed salitan ‘pambusol’ so konsideraen tayo ed sayan artikulo? (Nengnengen so paimano’d-leksab.)

 PANGGUGUNAETAN na saray Tasi nen Jehova so manbilay unong ed saray prinsipyon nidatak ed Salitay Dios. Bilang resulta, panggagayagaan da so maabig a reputasyon diad dakel a daldalin. Balet, no maminsan et sikara so papaugesen. Alimbawa, oniay nanonotan ni na sakey ya opisyal na gobierno ed syudad na St. Petersburg, Russia: “Nireport ed sikami a saray Tasi nen Jehova et sakey a klase na maamot a sekta tan mamapatey ed saray ugugaw tan ed inkasikaran dili.” Balet kayari na impikimey to ed saray Tasi nen Jehova diad sakey ya internasyonal a kombension, oniay inkomento na satan lanlamang ya opisyal: “Say anengneng ko et normal, maimis a totoo . . . Marendeen tan maulimek ira, tan manaaroan ira.” Inyarum to ni: “Agkon talaga natalosan no akin a saray totoo et manbabaga na katilaan nipaakar ed sikara.”​—1 Pedro 3:16.

² Agpanliketan na saray lingkor na Dios so naakusaan bilang managgaway-mauges, ingen ta agmanurprisa ed sikara sano mansalita iray totoo sumpad sikara. Oniay impasakbay nen Jesus ed saray patumbok to: “No say mundo busolen to kayo, amta yo a binusol to ak ya akauna nen sikayo. . . . Nagawa so saya, pian nasumpal so salita ya akasulat ed ganggan da, Binusol da ak ya anggapo so makasengeg.” * (Juan 15:18-20, 25; Salmo 35:19; 69:4) Oniay akadkauna lan imbaga to ed saray babangatan to: “No say ama na sankaabungan inngaran da na Beelzebub nagkalalo a tawagen da [met na ontan] so saray kabaley” odino sankaabungan to. (Mateo 10:25) Natatalosan na saray Kristiano a say pansungdo ed ontan a panagpabanday et kabiangan na “panamairapan a kiew” ya inawat da sanen nagmaliw ira a patumbok nen Kristo.​—Mateo 16:24, NW.

3. Kaunongan kalaknab a napasegsegang iray tuan managdayew?

³ Say panamasegsegang ed saray tuan managdayew so abayag lan nagagawa, sanen panaon ni nen “Abel a matunong.” (Mateo 23:34, 35) Mabetbet la itan a nagagawa. Inkuan nen Jesus a saray patumbok to so ‘gulaen naani na amin a katooan’ nisesengeg ed ngaran to. (Mateo 10:22) Niarum ni, insulat nen apostol Pablo ya amin a lingkor na Dios​—sikatayon amin​—so nepeg a manilalo a napasegsegang. (2 Timoteo 3:12) Anto so makasengeg ed satan?

Say Pansesengegan na Agmakatunongan a Panagbusol

4. Panon ya ipaparungtal na Biblia so pansesengegan na amin ya agmakatunongan a panagbusol?

⁴ Ipaparungtal na Salitay Dios a manlapu la’d gapo et wala so agnanengneng a manangisugsog. Ikonsidera pa so inaayep ya impamatey ed inmunan too a walaan na pananisia, si Abel. Ibabaga na Biblia a say managpatey ya agi to, si Cain, so nanlapu odino “betang na maramsak,” si Satanas a Diablo. (1 Juan 3:12) Impatnag nen Cain so awawey nen Satanas, tan sikatoy inusar na Diablo a manumpal ed marelmeng iran gagala to. Ipaparungtal met na Biblia so betang nen Satanas ed mauge-uges ya impangataki ed si Job tan si Jesu-Kristo. (Job 1:12; 2:6, 7; Juan 8:37, 44; 13:27) Malinew ya ipapabitar na Apocalipsis so pansesengegan na panamasegsegang ed saray patumbok nen Jesus, a kuanto: “Say Diablo asingger lay pangiyan  to ed arum ed sikayo ed panangipangawan, pian nasali kayo.” (Apocalipsis 2:10) On, si Satanas so pansesengegan na amin ya agmakatunongan a panagbusol ed totoo na Dios.

5. Akin et bubusolen nen Satanas iray tuan managdayew?

⁵ Anto so rason no akin a bubusolen nen Satanas iray tuan managdayew? Diad sakey a pakana ya angipabitar ed pirmin panagpaatagey to, inangatan nen Satanas so “Ari ya andi angga,” si Jehova a Dios. (1 Timoteo 1:17; 3:6) Insuppiat to a say Dios so mapegpeget ed panuuley to ed saray pinalsa to tan saray manseserbi ed si Jehova et aliwan malinis so motibo ra, a gagawaen lambengat itan na totoo lapud sinisiblet a gagala. Imbaga nen Satanas a no sikatoy naabuloyan a manubok ed totoo, sarag ton pabenegen so amin manlapud panaglingkor ed Dios. (Genesis 3:1-6; Job 1:6-12; 2:1-7) Diad impamauges to ed si Jehova bilang managlames, matila, tan lawas onsasaew, nanggunaetan nen Satanas so ompasen met bilang soberanon manuley. Kanian pirmi so sanok to ed saray lingkor na Dios lapud pampipirawat ton nadayew.​—Mateo 4:8, 9.

6. (a) Panon itayon nalalanor ed isyu nipaakar ed inkasoberano nen Jehova? (b) Panon itayon natulongan na pakatalos ed sayan isyu pian napansiansia tayo so integridad tayo? (Nengnengen so kahon, pahina 16.)

⁶ Kasin natetebek mo so epekto na sayan isyu ed bilay mo? Bilang lingkor nen Jehova, nayarin amoriam la ya anggaman nakaukolan so masimoon a pansagpot diad panumpal ed linawa na Dios, malaklaknab iray nagunggona ed panggawa ed satan. Balet, anto so gawaen mo no say sirkumstansyam ed bilay et mamapairap, a makapaot-ot ni ingen, ed sika legan mon uunoren iray ganggan tan prinsipyo nen Jehova? Tan panon to no singano anggapo so nagugunggonam ed panlilingkor mo ed si Jehova? Isipen mo kasi ya anggapo lay kakanaan na pantultuloy mon manserbi ed si Jehova? Odino kasin say panangarom ed si Jehova tan aralem ya apresasyon mo ed saray alay abig a kalidad to so mamakiwas ed sikan mantultuloy a mankurang ed amin a daladalan to? (Deuteronomio 10:12, 13) Diad impangiyabuloy to ed si Satanas a mangidapo ed sikatayo na kairapan, amin tayo so inikdan nen Jehova na pankanawnawan mangiter na personal ya ebat tayo ed angat nen Satanas.​—Uliran 27:11.

‘Sano Balawen Kayo na Totoo’

7. Anto so sakey a taktika ya uusaren na Diablo pian ombeneg itayo ed si Jehova?

⁷ Konsideraen tayo natan a mas detalyado so sakey ed saray masilib a taktikan uusaren nen Satanas pian napekderan so akusasyon to​—say pangikakana to na tila iran panagpabanday. Si Satanas so tinawag nen Jesus bilang say “ama na tila.” (Juan 8:44) Say pangaran a Diablo, a mankabaliksay “Managpauges,” so mangipapabidbir ed satan bilang say manunaan a managpauges ed Dios, ed makagunggonan salita to, tan ed masanton ngaran to. Uusaren na Diablo iray panangipasagilig, palson akusasyon, tan sigpot a katilaan pian suppiaten so inkasoberano nen Jehova, tan uusaren to met irayan taktika pian paugesen iray matoor a lingkor na Dios. Diad pamapabanday to ed sarayan Tasi, sarag ton pagmaliwen a mas mairap a sungdoan so mairap lan subok.

8. Panon a pinabanday nen Satanas si Job, tan anto so epekto na satan?

⁸ Konsideraen pa so agawa ed si Job, a say ngaran to et mankabaliksay “Puntirya na Pambusol.” Niarum ni ed ginawa to pian naandi so panagbilay, ananak, tan bunigas nen Job, imparungtal nen Satanas si Job a singa sakey a managkasalanan kanian sikato so dudusaen na Dios. Anggaman sikato so rerespetoen a maong, si Job so minudmora na saray mismon kakanayon tan maapit a kakaaro to. (Job 19:13-19; 29:1, 2, 7-11)  Niarum ni, diad panamegley na saray palson managliligliwa, nanggunaetan nen Satanas a ‘buyaken si Job ed saray salita,’ ya impasagilig to nin unona a sikatoy akagawa na ambelat a kasalanan insan direktan kinondena bilang managgaway-mauges. (Job 4:6-9; 19:2; 22:5-10) Agaylan makapadismaya itan ed si Job!

9. Panon so impangiparungtal ed si Jesus a singa sakey a managkasalanan?

⁹ Bilang say manunan manangitandoro ed inkasoberano nen Jehova, say Anak na Dios so nagmaliw a manunan puntirya na pambusol nen Satanas. Sanen linma si Jesus diad dalin, nanggunaetan nen Satanas a deralen so espiritualidad to, ya imparungtal ton si Jesus et singa sakey a managkasalanan, a singa ginawa to ed si Job. (Isaias 53:2-4; Juan 9:24) Sikato so tinawag na totoo a managbuanges tan masiba tan inkuan da a sikatoy ‘walaan na demonyo.’ (Mateo 11:18, 19; Juan 7:20; 8:48; 10:20) Sikato so palson inakusaan na panag-ayew. (Mateo 9:2, 3; 26:63-66; Juan 10:33-36) Satan so angonigon ed si Jesus, lapud amta ton mangitarok itan na agmakatunongan a kababaingan ed Ama to. (Lucas 22:41-44) Diad kaunoran, si Jesus so impasak bilang naayew a kriminal. (Mateo 27:38-44) Diad impamasiansia to ed naspot ya integridad, sinungdoan a maong nen Jesus so masumpan pananalita odino ‘isusumlang na saray managkasalanan.’​—Hebreos 12:2, 3.

10. Panon a nagmaliw a puntirya nen Satanas iray nakekeraan ya alanaan diad moderno iran panaon?

¹⁰ Diad modernon panaon, saray nakekeraan ya alanaan a patumbok nen Kristo so nagmaliw met a puntirya na panagbusol na Diablo. Si Satanas so adeskribe bilang manag-akusa odino “manangidalem na saray agagi [nen Kristo] . . . a sikato so manangidalem ed sikara ed arap na Dios tayo ed agew tan labi.” (Apocalipsis 12:9, 10) Manlapu la nen sikatoy apagit ed tawen tan nipangaw ed kaliberliber na dalin, pinaloor nen Satanas iray sagpot ton mangiparungtal ed saray agagi nen Kristo bilang totoon ipungpungit ed komunidad. (1 Corinto 4:13) Diad arum a bansa, sikara so pinauges bilang mapeligron sekta, a singa impanawag ed saray inmunan-siglon Kristiano. (Gawa 24:5, 14; 28:22) Singa naimano tayo la ed gapo, sikara so pinauges panamegley na palson propaganda ra. Ingen, “lapu ed galang tan kaekalan na galang, lapu ed mauges a dengel tan maong a dengel,” saray alanaan ya agagi nen Kristo, a susuportaan na kakaiba ran “arum a karnero,” so mapaabeban manggugunaet a ‘mangunor ed ganggan na Dios, tan wala ed sikara so impantasi nen Jesus.’​—2 Corinto 6:8; Juan 10:16; Apocalipsis 12:17.

11, 12. (a) Anto so nayarin pansesengegan na saray panagpabanday a kidudungetan na saray Kristiano? (b) Diad antoran dalan a nayarin agmakatunongan a manirap so sakey a Kristiano lapud pananisia to?

¹¹ Siempre, aliwan amin a panagpabanday a naeeksperiensya na balang sakey a lingkor na Dios et “nisengeg ed katunongan.” (Mateo 5:10) Say arum a problema et nayarin epekto na agtayo inkayadyari. Anggapo so nikadkaduman agawaan tayo sano ‘dia ed pankakasalanan tan katamtampal tayo et akapantepel itayo.’ Balet, “makapaliket” ed imaton nen Jehova no say sakey a Kristiano et “nagogonigon tan mantepel na ag-onkatunongan a panamairap, nisesengeg ed konsiensia to ed arap na Dios.” (1 Pedro 2:19, 20) Diad silong na antoran sirkumstansya a nayarin nagawa itan?

¹² Arum so namamaltrato lapud ag-ira mibibiang ed agmakasulatan iran kustombre ed ponpon. (Deuteronomio 14:1) Saray Tasin tobonbalo so naynay a pupuntiryaen na ansasakit iran salita lapud panguunor da ed moral iran estandarte nen Jehova. (1 Pedro 4:4) Arum a Kristianon atateng so papaugesen bilang “mapaulyan” odino “maabuso” lapud talindeg dan agmangusar na dala diad panagpatambal ed ananak da. (Gawa 15:29) Saray Kristiano so balbalawen na kakanayon tan kakaabay da lapu lambengat ed impagmaliw dan lingkor nen Jehova. (Mateo 10:34-37) Amin da so mangaalig ed padron ya inletneg na saray propeta tan si Jesus a mismo sanen sikaray agmakatunongan a papairapen.​—Mateo 5:11, 12; Santiago 5:10; 1 Pedro 2:21.

Pansungdo ed Panagpabanday

13. Anto so makatulong pian napansiansia tayo so espiritual ya inkasimbang tayo sano nidunget itayo ed pirmin panagpabanday?

¹³ Sano nidunget itayo ed pirmin panagpabanday lapud pananisia tayo, nayarin nadismaya itayo, a singa ed si propeta Jeremias, tan nalikna tayo ya agtayo la makapantultuloy a manlingkor  ed Dios. (Jeremias 20:7-9) Anto so makatulong ed sikatayo pian mansiansia so inkasimbang tayo ed espiritual? Panggunaetan a moriaen so pamaakaran unong ed punto de bista nen Jehova. Momoriaen to iramay nansiansian matoor ed silong na subok bilang mananalo, aliwan bilang biktima. (Roma 8:37) Salien yo pan ilitrato ed kanonotan yo iramay angitandoro ed inkasoberano nen Jehova anggaman ed amin a panagbalaw ya imbunton ed sikara na Diablo​—lalaki tan bibii a singa si Abel, Job, say ina nen Jesus a si Maria, tan arum niran matoor nensaman, ontan met ed saray kapara tayon lingkor ed modernon panaon. (Hebreos 11:35-37; 12:1) Dalepdepen so impanmatoor da. Satan a baleg a grupo na saray matoor so manasagyat ed sikatayo a miulop ed sikara diad impanbiktorya ra a nigana labat ed saramay manaeg ed mundo lapud pananisia ra.​—1 Juan 5:4.

14. Panon itayon napabiskeg na masimoon a pikakasi pian mansiansian matoor?

¹⁴ No ‘dakerakel iray [makapagonigon a] kanonotan ed loob tayo,’ sarag tayo so ontupleg ed si Jehova diad masimoon a pikakasi, tan sikatayo so tambayoen tan pabiskegen to. (Salmo 50:15; 94:19) Ikdan to itayo na kakabatan a nakaukolan tayo pian natalonaan so subok tan natulongan itayon mansiansian akasentro ed baleg ya isyu, say inkasoberano nen Jehova, a sengegan na agmakatunongan a panaggula ed saray lingkor to. (Santiago 1:5) Si Jehova so makapangiter met na “deen na Dios, a talonaan ton amin a pakatalos.” (Filipos 4:6, 7) Sayan inter na Dios a kareenan so ontulong ed sikatayon mansiansian kalmado tan determinado diad arap na pirmin pakadesdesan, ya agpadadaeg ed panduaruwa odino takot. Diad panamegley na espiritu to, nayarian nen Jehova a tulongan itayo ed antokaman ya iyabuloy ton onsabi ed sikatayo.​—1 Corinto 10:13.

15. Anto so makatulong ed sikatayo pian napaliisan tayo so pagmaliw a maingongot sano maniirap itayo?

¹⁵ Anto so makatulong ed sikatayo pian ag-itayo maningongot ed saramay mamubusol ed sikatayo ya andiay sengegan? Tandaan a saray manunan onsusumpa ed sikatayo et si Satanas tan saray demonyo. (Efeso 6:12) Anggaman say arum a totoo et sikakabat tan sigagagalan mamapasegsegang ed sikatayo, dakel ed saramay onsusumpa ed totoo na Dios so manggagawa ed satan lapud inka-ignorante odino lapud susugsogan ira na arum. (Daniel 6:4-16; 1 Timoteo 1:12, 13) Kaliktan nen Jehova ya “amin a totoo” so nawalaan na pankanawnawan ‘nilaban tan ondago ra ed pakapikabat ed katuaan.’ (1 Timoteo 2:4) On, arum a datin onsusumpa et Kristianon agagi tayo la natan bilang resulta na impakaimaton da ed maong a kondukta tayo. (1 Pedro 2:12) Niarum ni, makaaral itayo ed alimbawa na ilalak nen Jacob a si Jose. Anggaman nanirap a maong si Jose nisesengeg ed saray agagi to ed ama, sikara so agto nan-imbelan na sakit na linawa. Akin ya andi? Lapud atebek to ya inmaneobra nen Jehova so pamaakaran, ya imamaneobra To iray ebento ta pian nasumpal so gagala To. (Genesis 45:4-8) Nayarin iyabuloy met nen Jehova so antokaman ya agmakatunongan a panirap pian nigloria so ngaran to.​—1 Pedro 4:16.

16, 17. Akin ya ag-itayo nepeg a magmaliw mapagpaga ed saray sagpot na sumusumpa a mangamper ed panagpulong a kimey?

¹⁶ Nakaukolan ya agtayo pampagaan a maong no walay panaon a singa ontatalona iray onsusumpa diad pangaamper da ed kiyalibansa na maong a balita. Yayakayaken la natan nen Jehova iray nasyon diad panamegley na englobon panagtasi, tan ondaragsa iray makaparoyroyon bengatla. (Aggeo 2:7) Si Jesu-Kristo, say Maabig a Pastol, so angikuan: “Saray karnerok dengelen da so boses ko, et kabat ko ra, tan ontumbok ira ed siak. Et iter ko ed sikara so maando a bilay; . . . tan anggapo so manamsam ed sikara ed limak.” (Juan 10:27-29) Saray masanton anghel so nalalanor met ed baleg ya espiritual a panag-ani. (Mateo 13:39, 41; Apocalipsis  14:6, 7) Kanian, agmakaamper ed gagala na Dios so antokaman ya ibaga odino gawaen na saray onsusumpa.​—Isaias 54:17; Gawa 5:38, 39.

¹⁷ Mabetbet a say epekto na pansasagpot na saray onsusumpa so ompupuliktar ed sikara. Diad sakey a komunidad ed Aprika, dakel a makapasinagem a katilaan so kinmayat nipaakar ed saray Tasi nen Jehova, kalaktip lay katilaan a mandadayew ira ed Diablo. Lapud saya, kapagno ondalaw iray Tasi, si Grace so ombatik ed beneg na abung to tan onamot anggad onalis la ra. Sakey ya agew et inala na pastor na relihyon to so sakey ed saray publikasyon tayo tan imbaga to ed amin ya inmatendi ya agda babasaen itan lapud pansengegan itan na itaynan da ed pananisia ra. Saya so nansengegan na impangusisa nen Grace. Diad tinmumbok ya indalaw na saray Tasi, imbes ya onamot et sikatoy akitongtong ed sikara tan akaawat na publikasyon bilang kopya to. Ginmapo so panangiyaral na Biblia, tan nen 1996 et sikato so abautismoan. Si Grace natan so manguusar la ed panaon to pian mananap ed arum a nayarin walaan na lingon impormasyon nipaakar ed saray Tasi nen Jehova.

Pabiskegen so Pananisia Yo Natan

18. Akin a nakaukolan a pabiskegen so pananisia tayo sakbay ya onlesa iray pirmin subok, tan panon tayon nagawaan itan?

¹⁸ Lapud anggan kapigan et sarag nen Satanas so biglan onataki panamegley na agmakatunongan a panaggula, importante a pabiskegen tayo so pananisia tayo natan. Panon tayon nagawaan itan? Oniay inkuan na sakey a report manlapud sakey a bansa a napapasegsegang so totoo nen Jehova: “Sakey a bengatla so nagmaliw a mabitabitar: Saramay walaan na maabig ya espiritual a rotina tan walaan na aralem ya apresasyon ed katuaan na Biblia so andian na problema ed pansiansia ran mapekder sano onsabi iray subok. Balet saramay walad ‘maabig a kipapasen’ ya onsasaew ed saray miting, aliwan regular ed lawak na serbisyo, tan mikokompromiso ed angkelag  iran isyu so mabetbet a napelag ed ‘mangapuy-apoy’ a subok.” (2 Timoteo 4:2) No naiimano yo iray aspekto a nakaukolan yo so manpaaligwas, pansagpotan yon tampol a gawaen itan.​—Salmo 119:60.

19. Anto so nagagawaan na panmamatoor na saray lingkor na Dios anggaman ed agmakatunongan a panggula ed sikara?

¹⁹ Say katooran na saray tuan managdayew a napapairap lapud panggula nen Satanas et mabilay a paneknek ed kaptekan, inkakanepegan, tan inkatunong na inkasoberano nen Jehova. Say katooran da so mamapaliket ed Dios. Anggaman saray totoo so naynay a mamabalaw ed sikara, samay sakey a gagalangen ed tagey na dalin tan tawen et “agto ra ibaing, a sikato so manngaran na Dios da.” On, nipaakar ed amin na saratan a matoor, manepeg a nibagan: “Say mundo aliwan sikatoy makana ed sikara.”​—Hebreos 11:16, 38.

[Paimano ed leksab]

Kasin Nipaliwawa Yo?

• Anto so rason no akin ya agmakatunongan a gugulaen iray tuan managdayew?

• Panon ya inusar nen Satanas so panagpabanday pian buyaken so integridad nen Job tan si Jesus?

• Panon itayon papabiskegen nen Jehova pian mansiansian mapekder ed panaggula nen Satanas?

[Tepetepet Parad Panagaral]

[Kahon/Litrato ed pahina 16]

Atebek Da so Peteg ya Isyu

Oniay imbaga na sakey ed saray Tasi nen Jehova diad Ukraine, ya insebel ditan so kimey a panangipulong ed Panarian diad loob na masulok a 50 taon: “Say situasyon ya inkidungetan a mismo na saray Tasi nen Jehova so nepeg ya aglabat determinaen diad paraan na impantrato ed sikami na arum a totoo. . . . Susumpalen labat na maslak ed saray opisyal so trabaho ra. Sanen anguman so gobierno, sananey lamet so sinuportaan na saray opisyal, balet ta nansiansia kami. Minoria mi a say talagan pansesengegan na problema tayo et niparungtal la ed Biblia.

“Agmi ipapasen so inkasikami ya inosente lambengat a biktima na saray managlames a totoo. Say akatulong ed sikami pian mansungdo et say malinew a pakatalos ed isyu a pinalesa ed hardin na Eden​—say isyu nipaakar ed kanepegan na Dios a manuley. . . . Tinmalindeg kami ed isyu lapud saray interes na Soberano na uniberso, ya aliwa labat a parad personal iran interes na totoo. Mas malaknab lay impakatalos mi ed peteg iran isyu a nalalanor. Saya so amabiskeg ed sikami tan tinmulong pian napansiansia mi so integridad mi anggaman ed mair-irap iran sirkumstansya.”

[Litrato]

Si Victor Popovych, ya inaresto nen 1970

[Litrato ed pahina 13]

Siopa so walad benegan na panagpabanday ya inkidungetan nen Jesus?

[Saray litrato ed pahina 15]

Si Job, Maria, tan saray lingkor na Dios ed modernon panaon, a singa si Stanley Jones, so angitandoro ed inkasoberano nen Jehova