Kasin Nakaukolan so Maabig a Simbawa?

NATAN et dakel so manisia a sarag dan ibiig so maong manlapud mauges tan sikara so walaan na kanepegan a manggawa na antokaman a labay da. Ibabaga na arum ya amin lawarin bengatla et nayari basta mamaliket itan ed sakey a too. Pirmin naaapektoan so panamaley tan bilay na pamilya, a saratan so abayag lan ipapasen bilang pundasyon ed sosyedad na too.​—Genesis 3:5.

Konsideraen pa si Verónica, * a manaayam ed Mexico. Oniay inkuan to: “Antis a tuloy na koma-15 ya anibersaryo na kasal mi, inkuan ed siak na masiken ko a sikatoy walaan na relasyon ed sananey a bii. Inkuan ton agto nataynan iyan bii lapud saya so mas ugaw tan sikatoy mas maliket ed sikato. Abigla ak diad impakamorian agko lan balot nakaiba so sankaapitan a kaarok. Dati et iisipen kon say ipatey na inad-aro tayo so sankagrabian lan sengegan na ot-ot. Balet parad siak, mas ansakit so pikakalugoran lapud agko lambengat abalang so toon inad-arok noagta sikatoy mantutultuloy a manggagawa na saray bengatlan makapasakit ed siak.”

Imanoen met so kipapasen na sakey a lakin 22 años a sian la ed asawa to tan walaan na ilalak a laki balet agmabulos a mangawat ed saray responsabilidad to bilang ama. Say ina to so iilaloan ton manlegpet ed sikaran san-ama. No ag-iter na ina to so amin a kerew to, sikatoy man-abusado tan ayewen to so ina to, a singano sakey ya ugaw ya andian na kalakal. Pakaskasi so ina to lapud satan a maruksan awawey.

Aliwa lan nikaduma irayan kaso. Ondarakel la so legal a pansisian tan pandidiborsio diad inerman a pasen. Dakel ya ugugaw so tataynanan ed abung na sakey ed saray ateng da pian  mangigapo na balon bilay. Arum a kalangweran so naandian lay panagrespeto ed arum, pati ed saray ateng da, tan walaan na kondukta a ngalngalin agnaisip diad apalabas iran kailalakan. Say seksual a panag-eksperimento, lingon panag-usar ed druga, panangataki na saray kalangweran, tan pamapatey na saray ugugaw ed saray managbangat odino atateng da so kasmak la natan diad dakel a bansa. Tan nayarin naiimano yo ya aliwa labat a say panamabaleg ed ugaw tan say panamaley so naaapektoan ed mundo natan.

Legan tayon naiimatonan irayan pananguman, nayarin panuumamengan tayo no anto la so agawa ed sosyedad. No talagan sarag na totoo ya ibiig so maong manlapud mauges, akin a siansia nin agnaresolbi so dakdakel a problema? Kasin wala so pankaukolan parad maabig a simbawa? Kasin wala so panlapuan na ontan a makagunggonan simbawa, samay peteg a napanmatalkan? Anggaman dakel so mangibabaga a manisia ira ed Dios tan ed nisulat a Salita to, ompapatnag ya ag-iya mangaapekta ed saray desisyon da. Balet antoray nagunggona tayo sano anapen tan awaten tayo so simbawan manlalapud Dios? Konsideraen tayo itan diad ontumbok ya artikulo.

[Paimano ed leksab]