Nadngel na Saray Totoon Tubo ed Mexico so Maong a Balita

NEN Nobyembre 10, 2002, nantitipon so sakey a grupo na Mixe, totoon tubo ed Mexico, diad San Miguel, Quetzaltepec. Sakey itan a baley diad marakdakep ya abalaten ya estado na Oaxaca. Inmatendi so grupo diad distriton kombension na saray Tasi nen Jehova. Say pantok na programa ed kabuasan so sakey a drama ed Biblia.

Sanen arengel iray primeron balikas ed drama ed Biblia, asurprisa iray dumerengel. Sikara so nantipak tan akalua so dakel ed sikara. Impresenta so drama diad lenguahen Mixe! Kasumpal na satan, dakel so angibalikas na aralem ya apresasyon da ed sayan ag-inilaloan a palangkap. “Diad inmunan pankanawnawa et atalosan ko so drama. Satan so anenyeg ed liknaan ko,” so inkuan na sakey a bii. Oniay inkuan na sananey nin bii: “Nayarian ko la natan so ompatey a maliket lapud siak so inabuloyan nen Jehova a makarengel ed drama diad mismon lenguahek.”

Say agawa ed satan a kabuasan so kabiangan na pirmin impansagpot na saray Tasi nen Jehova ed Mexico diad agano ni pian nipasabi so maong a balita na Panarian ed saray totoon tubo ditan.​—Mateo 24:14; 28:19, 20.

Dinengel nen Jehova Iray Pikakasi

Masulok lan 6,000,000 so totoon tubo ed Mexico​—a magenap lan manibukel ed sakey a bansa ra, a walaan na dakel a kultura tan 62 a nanduruman lenguahe. Labinlima ed saratan a lenguahe so uusaren na masulok a 100,000 a totoo kada lenguahe. Masulok a 1,000,000 a totoon tubo ditan so agmakapansalita na Español, say opisyal a lenguahe ed Mexico. Tan dakel ed saramay makapansalita na Español so mas mainomay a makaaral na katuaan ed Biblia diad dilin lenguahe ra. (Gawa 2:6; 22:2) Arum so abayag lan manaaral na Biblia tan matoor ya onaatendi ed saray Makristianon miting, balet dagdaiset so natatalosan da. Kanian abayag da lan ipipikasi a niwala komon so mensahe na katuaan diad dilin salita ra.

Pian naarap itan ya angat, say sangan opisina na saray Tasi nen Jehova ed Mexico so angiyarunsa nen 1999 a gawaen iray miting ed kongregasyon diad saray lokal a lenguahe. Aporma met iray grupo na managpatalos. Kasabi taon 2000, impresenta so drama ed distriton kombension diad salitan Maya tan diad pigara nin lenguahe ed saginonor.

Say tinmumbok a kundang et say pangipatalos ed saray katulongan ed panagaral ed Biblia na saray Tasi nen Jehova. Unona, say brosyur ya Enjoy Life on Earth Forever! so impatalos ed Huave, Maya, Mazateco, Totonac, Tzeltal, tan Tzotzil. Dakel nin publikasyon so insublay, a kabiangan lay regular ya edisyon na Ministeryo Tayo ed Panarian ed Maya. Ginapoan met so panangirekord ed pigaran publikasyon diad audiocassette. Pian nibangat iray totoo a tubo ditan a manbasa tan mansulat diad dilin lenguahe ra, say brosyur ya Apply Yourself to Reading and Writing so intukoy pian nausar ed lokal. Say literatura na Biblia so peles a papawalaen ed 15 a lokal iran lenguahe, tan dakel niran publikasyon so pawalaen.

 “Gagawaen Da so Amin a Sagpot”

Aliwan mainomay so kimey a panagpatalos. Say sakey a rason et dagdaiset so sekular a literatura a nipapalapag ed lokal iran lenguahe ed Mexico. Diad maslak a kipapasen et mairap ya anapen iray diksionaryo. Ontan met, dakdakel so dialekto ed arum ed saray lenguahe. Alimbawa, dia lambengat ed lenguahen Zapotec et ag-onkulang ed limaran nanduruman dialekto so uusaren. Nandudumaan a tuloy irayan dialekto lapud saramay mansasalita na Zapotec a manlalapud nanduruman lugar so agmakapantatalosan.

Niarum ni, diad saray lugar ya anggapo iray niletneg ya estandarte parad sakey a lenguahe, saray managpatalos so kaukolan a mangiletneg na dili ran estandarte. Mankaukolan iya na malaknab a panag-aral tan panagkonsulta. Agpankelawan a diad primero et alikna na dakel ed sikara so singa alikna met nen Élida, a kabiangan ed grupo na Huave! Oniay nanonotan to: “Sanen atawag ak diad sangan opisina na saray Tasi nen Jehova ed Mexico pian mangipatalos, duara so aliknak​—liket tan kebbiew.”

Kaukolan met ya aralen na saray managpatalos iray dunong ed panagkompyuter, panangiyeskedyul, tan saray metodo ed panagpatalos. Talagan makapaangat so kimey parad sikara. Anto so nalilikna ra nipaakar ed satan? Oniay inyebat nen Gloria, a kabiangan ed grupo na Maya: “Agnadeskribe so liket mi diad pibibiang min mangipatalos ed saray publikasyon na Biblia ed Maya, say dilin lenguahe mi.” Tan oniay inkomento na manangasikaso diad Translation Department nipaakar ed saray managpatalos: “Talagan pirmi so pampilalek dan niwala iray publikasyon na Biblia diad dilin lenguahe ra kanian gagawaen da so amin a sagpot pian naarap so angat.” Kasin makagunggona itan?

“Salamat, Jehova!”

Mapatpatnag a bebendisyonan nen Jehova so kimey diad lokal a teritorya. Dinmakel iray onaatendi diad saray Makristianon miting tan asamblea. Alimbawa, nen 2001 et nantitipon so 223 a Tasin mansasalitay-Mixe pian selebraan so Memoryal na impatey nen Kristo. Ingen, say dagup a bilang na inmatendi et 1,674​—pitora tan kapalduan danay na bilang na saray Tasi!

Nasipor la natan na arum a totoo a natalosan so naaawat dan katuaan. Nanonotan ni nen Mirna so eksperiensya to sakbay a ginawa iray miting ed Maya. Inkuan to: “Siak so abautismoan kayari na taloy bulan ya impanaral ko ed Biblia. Amtak a siak so nepeg a nabautismoan, balet aksobien ko ya agko atalosan a maong iray katuaan ed Biblia unong ed paraan a nepeg ko iratan a natalosan. Say amtak a rason et lapud Maya so inugawan kon lenguahe, tan agko natalosan a maong so Español. Abayag ni insan ko atalosan a maong so katuaan.” Natan, sikaran sanasawa so maliket a kabiangan ed grupo na managpatalos ed Maya.

Parad amin diad saray kongregasyon, makapaliket a tuloy so pakaawat ed saray publikasyon diad dili ran lenguahe. Sanen niparungtal so kapkapangipatalos a brosyur ya Enjoy Life on Earth Forever! ed Tzotzil, satan so inagpit ed pagew na sakey a biin agano nin onaatendi ed saray Makristianon miting tan inkuan to: “Salamat, Jehova!” Ipapanengneng na saray report a dakel ya iyaaralan na Biblia so maples ya  onaaligwas anggad pampabautismo, saray inaktibon manangipalapag so magmamaliw ya aktibo lamet, tan desidido la natan so dakel a Kristianon agagin lalaki a mangawat na saray responsabilidad diad kongregasyon. Mas mabulos la so arum ya unabung a mangawat tan manaral ed literatura na Biblia a walad dilin lenguahe ra.

Singa bilang, sakey a Tasin bii so linman mangiyaral na Biblia, balet anggapo ed abung so iyaaralan to. Sanen inmasingger ed puerta so asawan laki, inyopresi na agi ya ibasa ed sikato so brosyur. “Agak interesado,” so inyebat to. Imbaga na agi ed sikato diad salitan Totonac a wala la’d lenguahe ra so brosyur. Sanen nadngel itan na laki, ingguyor to so bangko tan yinmurong. Legan ya ibabasa itan ed sikato na agi, naynay ton ibabagan, “Tua ‘tan. On, tua ‘tan.” Natan et sikatoy onaatendi la ed saray Makristianon pantitipon.

Diad Yucatán, walay sakey a Tasi a sumpa so masiken to ed katuaan tan no maminsan et sikatoy poponitien to kasempet ton miaral. Sanen ginapoan iray pantitipon ed Maya, inimbitaan na agin bii so masiken to. Sikatoy linma tan nanggayagaan ton maong iratan. Natan et sikato lay regular ya onaatendi ed saray miting, manaaral na Biblia tan, agto met la poponitien so akulaw to.

Imbaga na sakey a lakin mansasalitay Totonac ed duaran Tasi a sikatoy agnin balot nampikasi lapud imbaga ed sikato na pari na Katoliko a saray pikakasin Español labat so dedengelen na Dios. Diad tua, kaukolan to nin bayaran so pari pian ipikasian iramay mansasalita na Totonac. Impaliwawa na saray Tasi a dedengelen na Dios  iray pikakasi ed amin a lenguahe, tan inyopresi ra ed sikato so brosyur a Totonac, a satan so malikeliket ton inawat.​—2 Awaran 6:32, 33; Salmo 65:2.

“Kualtsin Tajtoua”

Lapud aliketan ira ed sarayan pananguman, dakel a manangipalapag na Panarian so manggugunaet a manaral ed lokal a lenguahe odino mamaaligwas ed pikakabat da ed satan. Onia so gagawaen a mismo na manangasikaso na sirkito a manlilingkor ed limaran kongregasyon a mansasalitay Nahuatl diad amianen a Puebla. Oniay insalaysay to: “Saray ugugaw a datin nauugip diad saray miting so alerto tan ontatalineng lan maong sano manpaliwawa ak ed Nahuatl. Kayari na sakey a miting, inasinggeran ak na sakey ya apat-taon ya ugaw a laki tan inkuan to: ‘Kualtsin tajtoua’ (balibali so panagsalita yo). Satan so angipalikna ed siak a makagunggonan tuloy so impansagpot ko.”

On, say lawak a manguusar na lokal a lenguahe so peteg ya “amputi la ran maparaan ed panag-ani,” tan pirmin napapaseseg so amin a mibibiang ed satan. (Juan 4:35) Si Roberto, a nansagpot a mangorganisa ed saray grupo na managpatalos, so anegek ed satan ed oniaran salita: “Sakey a makatantandan eksperiensya so pakanengneng ed saray luan manag-agus ed kalupaan na saray agagi lapud liket da legan a tatalinengen da so katuaan diad dilin lenguahe ra tan natatalosan da itan. Agak la makasalita no nodnonoten ko itan.” Seguradon naliliketan met so puso nen Jehova lapud natutulongan irayan masimoon a totoo ya ondapag ed Panarian.​—Uliran 27:11.

[Kahon ed pahina 10, 11]

Kabaten so Pigara ed Saray Managpatalos

● “Imbangat ed siak na atateng ko so katuaan sanen makatanda ak la. Makapaermen, ta nen mantaon ak na 11, inmekal so tatay ko ed Kristianon kongregasyon. Kayari na duay taon, tinaynan kami nen nanay ko. Bilang panguloan ed limaran sanaagi, kaukolan kon sakbaten iray responsabilidad nen nanay ko, anggaman siak so maneeskuela ni.

“Sikami so maaron sinuportaan na saray agagi, balet ta mairap so bilay. Aminsan et nanumameng ak: ‘Akin a nagagawa iya ed siak? Ugaw ak nin tuloy!’ Satan so atalonaan ko diad tulong lambengat nen Jehova. Kapangraduar ko ed haiskul, nagmaliw ak a sigpot-panaon a ministro, tan akatulong itan a maong ed siak. Sanen aporma so grupo na managpatalos ed Nahuatl, siak so naimbitaan a magmaliw a kabiangan ed satan.

“Akapawil la natan so tatay ko diad kongregasyon, tan saray yugtan kon lalaki tan bibii so manlilingkor la ed si Jehova. Talagan makagunggona so pansiansian matoor ed si Jehova. Sikatoy daakan a mamebendisyon ed pamilyak.”​—Alicia.

● “Nampaliwawa so sakey a Tasin kaklasek nipaakar ed lapuan na bilay. Anggapo ak ed saman tan mapaga ak nipaakar ed eksaminen mi, kanian kinerew ko ed sikato ya ipaliwawa to’d siak iman a leksion mi. Naynay kon panuumamengan no akin ya ompapatey so totoo. Sanen inopresian to ak na libron Creation * tan panagaral ed Biblia, satan so inawat ko. Nandinayew ak a tuloy ed gagala tan panangaro na Manamalsa.

“Kasumpal kon naneskuela, awalaan ak na pankanawnawan manbangat na duaran lenguahe, Epañol tan Tzotzil. Balet kakaukolanen na satan ya onarawi ak, pian mangalay kaaruman ya edukasyon diad saray sampot-simba, tan nasaew ko iray Makristianon miting. Kanian, siak lay nantrabaho bilang manag-asinta na laryo. Agbalot agustoan na tatay ko, ya aliwan Tasi, so desisyon ko. Diad saginonor, sanen manlilingkor ak bilang payunir a ministro, naorganisa so sakey a grupo a mangipatalos ed literatura na Biblia ed Tzotzil. Siak so apakiwas a mibiang ed satan.

“Naiimanok a saray agagi tayo so misalsalamat tan napapagalangan lapud pamapawala na saray publikasyon ed dilin lenguahe ra. Satan so makapalikliket. Moriaen kon siak so apribilehyoan a tuloy ed impakawalaan ko na onian asainmin.”​—Humberto.

● “Sanen mantaon ak na anemira, tinaynan kami nen nanay ko. Sanen siak so tin-edyer, say tatay ko so impaiyaralan na Biblia ed saray Tasi nen Jehova. Sakey ya agew, inyopresi ed siak na sakey ya agin bii ya iyaralan to ak na Biblia a mangilaktip ed pananimbawa ed saray kalangweran. Bilang sakey a tin-edyer ya anggapoy ina, minoriak a satan so peteg a nakaukolan ko. Siak so abautismoan diad edad a 15.

“Nen 1999, say tatay ko so pinatey na saray mauges a totoo a malabay a manamsam ed dalin to. Siak so agonigon a maong. Siak so akalikna na graben depresyon tan liknaen kon agko la nayarian so manbilay. Balet naynay kon ipipikasi ed si Jehova a pabiskegen to ak. Siak so pinaseseg a maong na ombiabiahen manangasikaso tan say asawa to. Ag-abayag et nagmaliw ak a regular payunir.

“Aminsan et naimanok so pigara a manaakar ed loob na anemiran oras pian narengel labat so 20-minuto a paliwawa ed Totonac, anggaman say arum lan kabiangan na miting et Español, ya agda natalosan. Kanian, siak so aliketan sanen naimbitaan ak a mangipatalos ed saray publikasyon ed Biblia ed Totonac.

“Nensaman et ibabagak ed si tatay ko a labay koy manlingkor diad sangan opisina na saray Tasi nen Jehova. Inkuan to ed siak ya aliwan mainomay itan parad sakey ya ugaw a marikit a singa siak. Maseguron sikatoy manliket a maong sano onoli ed bilay tan naamtaan ton siak so akapanlingkor ditan, bilang manangipatalos ed literatura na Biblia diad lenguahe mi!”​—Edith.

[Paimano ed leksab]

[Litrato ed pahina 9]

Saray kabiangan ed grupo na managpatalos ed Tzotzil so manisingbat ed sakey a salitan mairap ya ipatalos