Naksawan Balet ta Ag-ontatayer
Naksawan Balet ta Ag-ontatayer
“Si Jehova, a Manamalsa ed saray sampot na dalin, . . . so mangiter na pakayari ed makapuy; et saman so andian na pakapanyari sikato so parakelen to na biskeg.”—ISAIAS 40:28, 29.
1, 2. (a) Anton makapasagyat ya imbitasyon so ninatnat ed amin a malabay a mangagamil na puron panagdayew? (b) Anto so nayarin mangipaarap na seryoson kapeligroan ed espiritualidad tayo?
BILANG babangatan nen Jesus, kabkabisado tayo so makapasagyat ya imbitasyon to: “Dago kayo’d siak, amin yon nasasagpotan tan nabebelatan, et ikdan ta kayoy pampainawa. . . . Say pakok mainomay, tan anlemew so awit ko.” (Mateo 11:28-30) Nitatarya met ed saray Kristiano ‘iray panaon na painawa a manlapu ed arap na Katawan.’ (Gawa 3:19) Maseguron naeksperiensya yo lan mismo so makaparepreskon epekto na pakakaaral ed saray katuaan na Biblia, pakakawalaan na masnag ya ilalo ed arapen, tan pangiyaaplika ed saray prinsipyo nen Jehova ed bilay yo.
2 Ingen, panapanaon et nakekesawan so liknaan na arum ed saray mandadayew ed si Jehova. Diad arum a kipapasen et temporaryo labat iratan a panaon na pakadismaya. Diad arum a panaon et mantutultuloy ni so liknaan a naksawan. Diad ilabas na panaon, nayarin liknaen na arum a makapabelat la iray Kristianon responsabilidad da imbes a makarepresko iratan a singa insipan nen Jesus. Say ontan iran negatibon liknaan so nayarin mangipaarap na seryoson kapeligroan ed relasyon na sakey a Kristiano ed si Jehova.
3. Akin ya insimbawa nen Jesus so naromog ed Juan 14:1?
3 Sakbay a tuloy na impangerel tan impamatey ed si Jesus, oniay inkuanto ed saray babangatan to: “Agnagonigon so puso yo. Manisia kayo ed Dios, manisia kayo met ed siak.” (Juan 14:1) Imbaga nen Jesus iratan a salita lapud asingger lan nidunget iray apostol ed makapasinagem iran ebento. Saya so tumbokan na ilesa na panamasegsegang. Amta nen Jesus a saray apostol to so nagapol makasengeg ed pirmin pakadismaya. (Juan 16:1) No agnakontrol, say panermen so mamaletey ed espiritualidad da tan pansengegan na pakaandi na panagmatalek da ed si Jehova. Nagawa met itan ed saray Kristiano natan. Say manbayag a pakadismaya so pansengegan na pirmin panag-ermen, tan nayarin nabelatan so kapusoan tayo. (Jeremias 8:18) Nayarin onletey so akindalem ya inkatoo tayo. Diad onian pakadesdesan, nayarin onkapuy so liknaan tan espiritualidad tayo, a nabalang tayo ni ingen so pilalek tayon mandayew ed si Jehova.
4. Anto so makatulong ed sikatayo pian napansiansia tayon agnakesawan so piguratibon puso tayo?
4 Talagan matukoy so simbawa na Biblia: “Yatol [“alwaran,” NW] mo so pusom ed amin a seet; ta manlapu ed sikato so saray agus na bilay.” (Uliran 4:23) Say Biblia so mangiyoopresi na praktikal a simbawa a makatulong ed sikatayon manalwar ed piguratibon puso tayo manlapud saray pakadismayaan tan pakakesawan ed espiritual. Balet, unona, nakaukolan tayon ibiig so sengegan na ikekesaw tayo.
Say Inkakristiano et Aliwan Makapairap
5. Anton ompapatnag a pansumlangan so niwala nipaakar ed pagmaliw a Kristianon babangatan?
5 Tua, say pagmaliw a Kristiano et mankaukolan na pirmin pansagpot. (Lucas 13:24) Onia ni ingen so inkuan nen Jesus: “Anggan siopa ya agto awiten so krus [“panamairapan a kiew,” NW] to, tan ontumbok ed siak, agnayari a sikato so babangatan ko.” (Lucas 14:27) Saratan a salita so nayarin ompatnag a misumlangan ed balikas nen Jesus nipaakar ed anlemew tan makarepreskon pako to, balet diad tua et anggapo so pansumlangan.
6, 7. Akin a nibaga ya aliwan makapakesaw so nengneng na panagdayew tayo?
6 Say pangisekar a maong tan panagsagpot, anggaman makapakesaw ed pisikal, so makapnek tan makarepresko sano gawaen itan lapud maabig a gagala. (Eclesiastes 3:13, 22) Tan anto ni so magmaong a sengegan nen say panginabang na alay abig iran katuaan na Biblia ed kapara tayon totoo? Ontan met, napalumbasan so pipupuligesgesan tayon manbilay unong ed atagey iran estandarte na Dios no ikompara ed saray gunggona a panggagayagaan tayo a resulta na satan. (Uliran 2:10-20) Anggan sano napasegsegang, ipasen tayon kagalangan so panirap nisesengeg ed Panarian na Dios.—1 Pedro 4:14.
7 Say pako nen Jesus so talagan makaparepresko, nagkalalo la sano ikompara itan ed espiritual a kabilungetan a kawalaan na saramay mansiasiansian nisilong ed pako na palson relihyon. Say Dios so walaan na matamoy a panangaro ed sikatayo tan agto igaganggan ed sikatayo so agtayo nayarian. “Saray ganggan [nen Jehova] aliwa ran ambelat.” (1 Juan 5:3) Unong a nidatak ed Kasulatan, say tuan Inkakristiano so aliwan makapairap. Malinew, say nengneng na panagdayew tayo so agpansengegan na ikesaw tan pakadismaya.
“Ikaindan Tayo so Amin a Pakakabelatan”
8. Anto so mabetbet a pansesengegan na pakakesawan ed espiritual?
8 Say antokaman a pakakakesawan tayo ed espiritual so mabetbet ya epekto na kaaruman a belat ya ipapasakbat ed sikatayo na sayan abulok a sistema na bengabengatla. Lapud “say sankamundoan mandukdukol ed kaugsan,” sikatayo so apaliberan na negatibo iran impluensya a nayarin mamakapuy ed sikatayo tan maneral ed inkasimbang tayo bilang Kristiano. (1 Juan 5:19) Magmaliw a komplikado tan naderal so rotina tayo bilang Kristiano lapud saray ag-importante iran gegemtan. Sarayan kaaruman a belat so nayarin makapadetdet ed sikatayo tan mamairap ni ingen ed sikatayo. Matukotukoy, sikatayo so sisimbawaen na Biblia ya “ikaindan tayo so amin a pakabelatan.”—Hebreos 12:1-3.
9. Panon itayon nabelatan ed saray materyal a gegemtan?
9 Singa bilang, say inka-okupado na mundo nipaakar ed inkabantog, kuarta, panligliwaan, panagpasyar ed nanduruman lugar, tan arum niran materyal a gegemtan so nayarin mangimpluensya ed panag-isip tayo. (1 Juan 2:15-17) Nagmaliw a komplikado so bilay na arum ed saray inmunan-siglon Kristiano lapud impanggegemtan day kaykayamanan. Oniay impaliwawa nen apostol Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang. Ta say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum, abalbalang ira ed pananisia, tan atalos ira na dakel a kaermenan.”—1 Timoteo 6:9, 10.
10. Anto so naaralan tayo nipaakar ed kaykayamanan manlapud ilustrasyon nen Jesus nipaakar ed managtanem?
10 Sano nalikna tayo a nakekesawan tan nadidismaya itayo la diad panlilingkor tayo ed Dios, aliwa kasin say makasengeg et naookupaan la na materyal iran gegemtan so espiritualidad tayo? Nayarin tudtua itan, unong ya impabitar na ilustrasyon nen Jesus nipaakar ed managtanem. Inkompara nen Jesus ‘iray kapagaan na mundo, tan say panamalingo na saray kayamanan, tan saray pankaliket ed arum a bengabengatla’ ed saray sabit ya ‘onloob ed nonot tan leneren da’ so bini na salitay Dios ed kapusoan tayo. (Marcos 4:18, 19) Kanian oniay insimbawa ed sikatayo na Biblia: “Nabulos kayo komon a manlapu ed aro na pilak, panliketan yo so bengatla a wala ed sikayo: ta sikaton dili imbaga to: Agtaka naani taynan, tan agtaka naani ikaindan.”—Hebreos 13:5.
11. Panon tayon naekal iray bengatla a makapabelat ed sikatayo?
11 No maminsan, say mangogotgot ed kabibilay tayo et aliwan say panggegemtan ed mas dakel a bengatla noagta say gagawaen tayo ed saray bengatlan wala la’d sikatayo. Arum so kinmapuy ed liknaan da lapud grabe iran problema ed bunigas tan impatey na saray inad-aro, odino arum niran makapagonigon a problema. Amoria ra a nakaukolan so panapanaon a panggawa na saray pananguman. Denesidi na sakey a sanasawa ya itunda la so arum iran paboriton aktibidades da tan agtanton importante iran proyekto ra. Talagan inusisa ran amin iray bengatla tan literal dan binalkot so amin ya uusaren da ed saratan a proyekto tan impireg da iratan. Panapanaon, nagunggonaan itayo no nodnonoten tayon maong iray gagawaen tan kaykayarian tayo, ya ekalen so amin ya agnakaukolan a pabelat ta pian ag-itayo nakesawan tan onkapuy.
Importante so Pagmaliw a Makatunongan tan Masimpit
12. Anto so nepeg tayon bidbiren nipaakar ed dilin kalilingoan tayo?
12 Saray dilin kalilingoan tayo, anggan angkekelag iratan a bengatla, so kalkalnan mangotgot ed kabibilay tayo. Talagan tua iray salita nen David: “Saray kasulitan ko tinmundas ira ed tagey na ulok: ambelat ira a tuloy ed siak a singa sakey ya ambelat a sasakbaten.” (Salmo 38:4) Mabetbet et walaray praktikal a pananguman a mamalemew ed saray pirmin pakabebelatan tayo.
13. Panon a makatulong ed sikatayo so pagmaliw a makatunongan pian nawalaan na asimbang a panmoria ed ministeryo tayo?
13 Papasesegen itayo na Biblia a bayuboan so “aralem a kakabatan tan kalakal.” (Uliran 3:21, 22) Unong ed ibabaga na Biblia: “Say kakabatan a wala a manlapu ed tagey, . . . masimpit” odino makatunongan. (Santiago 3:17) Isipen na arum a nadedesdes iran mipalyagan ed gagawaen na arum diad Kristianon ministeryo. Balet, oniay bilin ed sikatayo na Biblia: “Balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato. Ta balang sakey taroken to naani so awi’ton dili.” (Galacia 6:4, 5) Tua, say maabig ya ehemplo na saray kaparan Kristiano so mamaseseg ed sikatayon manlingkor ed si Jehova ed interon puso, balet say praktikal a kakabatan tan inkamakatunongan so ontulong ed sikatayo a mangiletneg ed realistiko iran kalat unong ed dilin sirkumstansya tayo.
14, 15. Panon tayon nipatnag so praktikal a kakabatan diad pangasikaso ed pisikal tan emosyonal iran pankaukolan tayo?
14 Makatulong so pagmaliw tayon makatunongan anggan ed saray aspekton ompatnag ya agtanto importante pian napaliisan tayo so liknaan a nakekesawan. Singa bilang, kasin babayuboan tayo so asimbang iran ugali a makana ed maong a pisikal a bunigas tayo? Konsideraen tayo so alimbawa na sakey a sanasawa a manlilingkor ed sakey ed saray sangan opisina na saray Tasi nen Jehova. Naeksperiensya ra so kaimportantian na praktikal a kakabatan pian napaliisan so ikesaw. Oniay inkuan na asawan bii: “Anggan panon lay karakel na kimey mi, panggugunaetan mi so naugip ed parehon oras ed labi. Naynay kami met a mane-ehersisyo. Saya so talagan akatulong ed sikami. Naamtaan mi met iray limitasyon mi, tan gagawaen mi iray bengatla unong ed satan. Agmi ikokompara so inkasikami ed saramay ompatnag a maksil a naynay.” Kasin naynay itayon mamangan na masustansia iran kakanen tan magenap so painawa tayo? Say makatunongan a pangasikaso ed bunigas tayo so mamakepa ed pakababanalan tayo ed emosyon tan espiritual.
15 Arum ed sikatayo so walaan na nikadkaduma iran pankaukolan. Singa bilang, sakey a Kristianon agin bii so nanlingkor ed sigpot-panaon a ministeryo ed pigaran mairap ya asainmin. Sikato so awalaan na seryoson problema ed bunigas, a singa say kanser. Anto so akatulong ed sikato pian natalonaan to iray makapagonigon a situasyon? Inkuan to: “Importante ed siak so pakawalaan na panaon parad mareen a pannonot. No lalon nadedetdetan tan nababanalan ak, lalon nakaukolan ko iray mareen a panaon a manbukbukor ak sano manbabasa tan manpapainawa ak.” Say praktikal a kakabatan tan abilidad a manisip so ontulong ed sikatayon mangibiig tan mamenek ed saray pankaukolan tayo pian napaliisan so ikesaw ed espiritual.
Papabiskegen Itayo nen Jehova a Dios
16, 17. (a) Akin ya importantin tuloy so pangasikaso ed espiritual a bunigas tayo? (b) Anto so nepeg tayon ilaktip ed inagew-agew a rotina tayo?
16 Siempre, say pangasikaso ed espiritual a bunigas so importantin tuloy. Sano walaan itayo na maapit a relasyon ed si Jehova a Dios, nayarin nakesawan itayo ed pisikal, balet ag-itayon balot ontayer a mandayew ed sikato. Si Jehova so “mangiter na pakayari ed makapuy; et saman so andian na pakapanyari sikato so parakelan to na biskeg.” (Isaias 40:28, 29) Si apostol Pablo, a personal ya akaeksperiensya ed katuaan na sarayan salita, so angisulat: “Agkami onkapuy; et anggan say too mi ed paway onderal, say too mi ed loob ombalo ya inagew-agew.”—2 Corinto 4:16.
17 Imanoen so balikas ya “inagew-agew.” Kabaliksan na saya a minabang itayo ed saray probisyon nen Jehova ed inagew-agew. Sakey a misionaryo a matoor a nanlingkor ed loob na 43 a taon, so nipaarap ed panapanaon a pisikal ya inkakesaw tan inkadismaya. Balet sikato so agtinmayer. Inkuanto: “Impasal ko so ombangon a masakbay kanian antis ak ya onggapo ed antokaman a kimey ko, walay panaon kon manpikasi ed si Jehova tan manbasa na Salita to. Sayan inagew-agew a rotina so akatulong ed siak a mansungdo anggad natan.” Talagan makapan-ilalo tayo ed manamabiskeg a pakayari nen Jehova no maparanay itayo, on, no “inagew-agew” itayon manpikasi ed sikato tan mandalepdep ed matalonggaring iran kalidad tan sipasipan to.
18. Anton ligliwa so itatarya na Biblia parad saray matoor a maedad la odino masakit la?
18 Saya so nagkalalo lan makatulong ed saramay nadidismaya lapud inkatakken tan pansasakit da la. Saratan so nayarin maneermen, aliwan lapud ikokompara day inkasikara ed arum, noagta lapud ikokompara da ni so inkasikara ed datin nagagawaan da. Agaylan makaligliwa a naamtaan a papagalangan nen Jehova iray maedad la! Ibabaga na Biblia: “Say ubanan ya ulo sikato so balanget na gayaga; naromog ed dalan na inkatunong.” (Uliran 16:31) Amta nen Jehova iray limitasyon tayo tan papablien ton tuloy so interon-puson panagdayew tayo anggaman ed saray kaleteyan tayo. Tan saray maabig ya agawaan tayo la so mabitar a nirekord ed kanonotan na Dios. Oniay ipapaseguro ed sikatayo na Kasulatan: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.” (Hebreos 6:10) Agaylan liket tayo ta walad limog tayo iramay nansiansian matoor ed si Jehova ed loob na dakel lan dekada!
Ag-onsusuko
19. Panon itayon nagunggonaan ed pagmaliw ya okupado ed panggawa na maabig?
19 Dakel so manisia a say maparanay tan impasyan pisikal a kimey so mamakepa ed pakakakesawan. Mipadpara, say regular a kimey ed espiritual so makatulong pian napakepa so antokaman iran pakakabanalan tayo ed emosyon tan espiritual. Ibabaga na Biblia: “Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil. Ontan sirin, unong a wala so kiambegya manggawa itayo na maabig ed saray amin, nagkalalo ed saray kaamong na pananisia.” (Galacia 6:9, 10) Imanoen pa iray balikas a “manggawa na maabig.” Mankabaliksan itan na ikiwas tayo. Say panggawa na maabig ed arum so talagan makatulong pian ag-itayo ontayer ed panlilingkor tayo ed si Jehova.
20. Pian nalabanan so pakakadismaya, siopa so agtayo piulopan?
20 Misunian, say pililimog tan pikimey ed totoo ya agmangingalngalep ed saray ganggan na Dios so magmaliw a makapakesaw a pabelat. Oniay ipapasakbay ed sikatayo na Biblia: “Say bato ambelat, tan say buer nasimbang; balet say sanok na maatiw sikato so ambelat nen sikara a dua.” (Uliran 27:3) Pian nadaeg tayo so pakakadismaya tan pakakakesaw, nepeg tayon paliisan so piulop ed saramay walaan na negatibon panag-isip tan walaan na tendensian mantetel tan mankritiko ed arum.
21. Panon itayon magmaliw a makapabiskeg ed arum diad saray Makristianon miting?
21 Saray Makristianon miting et probisyon nen Jehova a mangiter ed sikatayo na espiritual a biskeg. Ditan et wala so alay abig a pankanawnawa pian makapanpapasesegan so balang sakey ed sikatayo tekep na makarepreskon panangibangat tan panlilimog. (Hebreos 10:25) Amin ed kongregasyon so nepeg a manbanikel a magmaliw a makapabiskeg sano mankokomento ed saray miting odino mibibiang ed programa diad plataporma. Saramay mangidadaulo bilang managbangat so nagkalalo lan responsablin magmaliw a makapabiskeg ed arum. (Isaias 32:1, 2) Anggaman wala so pankaukolan a mamilin odino mamaat, say tonada na pananimbawa so nepeg a makarepresko. (Galacia 6:1, 2) Say aro tayo ed arum so talagan makatulong ed sikatayon ag-ontayer a manlingkor ed si Jehova.—Salmo 133:1; Juan 13:35.
22. Anggaman ed ag-ayadyarin inkatoo tayo, akin a nayarin makapanpakpel itayo?
22 Say pandayew ed si Jehova diad sayan panaon na anggaan so mangilalanor ed kimey. Tan agnipuera iray Kristiano ed saray epekto na pakakakesaw na nonot, kaermenan, tan makapadesdes iran kipapasen. Say ag-ayadyarin inkatoo tayo et lupok, a singa ed banga. Ingen, oniay inkuan na Biblia: “Wala so sayan kayarian tayo ed baso a pitek, pian say sankatageyan ya inkabaleg na pakayari kien komon na Dios, ya agmanlapu ed sikatayo.” (2 Corinto 4:7) On, nakesawan itayo, balet ag-itayon balot ontayer odino onsuko. Imbes, ‘ibaga tayo a mataletalek, Say Katawan sikato so mananulong ko.’—Hebreos 13:6.
Antikey a Panrepaso
• Anto so pigara ed saray makapabelat a bengatla a nayarian tayon ekalen?
• Panon itayon makapibiang ed ‘panggawa na maabig’ ed saray kapara tayon Kristiano?
• Panon itayon papabiskegen nen Jehova sano nakekesawan odino nadidismaya itayo?
[Tepetepet Parad Panagaral]
[Litrato ed pahina 23]
Amta nen Jesus a say manbayag a pakadismaya so mangonigon ed saray apostol to
[Litrato ed pahina 24]
Arum so angitunda ed pigaran paboriton aktibidades tan ag-importante iran proyekto ra
[Litrato ed pahina 26]
Anggaman ed limitasyon tayo, papablien a tuloy nen Jehova so interon-puso a panagdayew tayo