Pakaromog ed Sankaabigan a Simbawa

PETEG a makapaliket so matalonan panagbilay. Say maabig a simbawa tan say pilalek ya onkiwas unong ed satan so manuna iran nakaukolan ed pakagamor na ontan a klase na bilay diad sayan magulon mundo. Balet, aliwan naynay a mabulos so totoo ya ontalineng ed makagunggonan simbawa. Dakel so mangibabaga a say too so nepeg a manbilay unong ed saray dilin panlabayan to. Diad tua, ipapabitar na salaysay na Biblia a si Satanas, say sankaunaan a sinmumpa ed inkasoberano na Dios, so angiproponi na inka-independente ed inmunan totoo. Unong ed Genesis 3:5, oniay inkuan to ed si Eva: “Amta na Dios a dia ed agew a pangan yo ed [kiew a pakaamtaan na maong tan mauges], nalukasan so saray mata yo ed satan, et singa kayo Dios, ya amta yo so maong tan mauges.”

Kasin kayari na satan et matalonan nambilay si Adan tan Eva, ya anggapo iray graben nansumpalan, bilang inggiya lambengat na saray dilin opinyon da? Andin balot! Sikaray adismayan tampol ed saray resulta na pangipapangaya ran amta ra so maong tan mauges. Sikaray makatunongan ya impulisay na Dios tan ginmapo ran nambilay ed kairapan bilang ag-ayadyari tan inatey ira diad kaunoran. (Genesis 3:16-19, 23) Say ipapatey so mangaapekta ed sikatayon amin. Oniay ibabaga na Biblia: “Say kasalanan linmoob ed mundo lapu ed sakey a too [si Adan], tan say patey lapu ed kasalanan; et say patey ed satan linma ed amin a too, ta amin nankasalanan.”​—Roma 5:12.

Anggaman walaray graben nansumpalan na desisyon di Adan tan Eva, dakel nin siansia so agnakombinsi a makabat so pangiyaplika ed simbawa na Nanggawa ed too. Balet, ibabaga na Biblia a satan so ‘impuyan na Dios tan maabig,’ odino makagunggona, tan makatulong itan ed sikatayo pian ‘anggapo so pankulangan tayo, a nabangatan tayon maong ed amin a gawa a maabig.’ (2 Timoteo 3:16, 17) Seguradon mas maliket itayo no unoren tayo so simbawa ed Biblia. Diad bilay na pamilya so manunan kiyaplikaan na saya.

 Katooran ed Panamaley

Unong ed Biblia, ginetma na Dios a magmaliw a permanente so panamaley. (Genesis 2:22-24; Mateo 19:6) Niarum ni, ibabaga na Kasulatan a nepeg a “say dukolan andi komon so tilol to,” a mankabaliksan a sayan impankasakey so nepeg ya agnarutakan na seksual a pirerelasyonan ed ag-asawa. (Hebreos 13:4) Balet, maseguron kabat yo a sayan estandarte so agnakakapet na dakel a sanasawa natan. Niyugali la na arum a totoo so pikarinyoan ed saray indibidual ya agda asawa diad pantratrabahoan da. Arum so mantitila ed saray kapamilya ra ta pian nakaiba ra so kabit da. Tataynanan ni ingen na arum so asawa ra pian miamong ed mas ugaw a kapareha, ya ikakatunongan dan diad ontan a paraan et nalikna ran mas ugaw tan mas maliket ira, a singa agawa ed kaso nen Veronica, ya asalambit ed inmunan artikulo.

Anggaman kuan, say determinasyon a paliketen so dili antokaman iray pansumpalan so agmamawala na magnayon a liket. Napaneknekan itan nen Ronald. Lapud matalek a napaaligwas toy bilay to, tinaynan to so asawa to pian mangigapo na balon pamilya ed bii a maamot ton piaamongan ed loob la na anem taon tan duara lay anak to ed sikato. Balet, ag-abayag kayari ton pinultot so panamaley to, sikatoy tinaynanan na bii to! Diad kaunoran, si Ronald so akiamong ed saray ateng to. Deneskribe toy situasyon to bilang “makapabanday.” Sakey labat itan ya alimbawa. Say ontan ya awawey ya ilololot na masiblet a pilpilalek so sengegan na indakerakel na saray kaso na diborsyo tan nabubuyak a pamilya, a manreresulta ed paniirap na dakerakel ya indibidual​—mamatakken man odino ugugaw.

Diad biek a dapag, say pangunor ed simbawa na Biblia so manresulta ed tuan liket. Ontan so kipapasen nen Roberto, ya angikuan: “Diad tulong na simbawa na Biblia, agnaandi’d siak so asawak. Agtayo nagamoran so tuan liket no patukso itayo ed siopaman ya agtayo asawa, anggaman ompatnag a makaparoyroyo itan a too. Tinmulong ed siak so impanaral ko ed Biblia pian pablien so akulaw ko, a kaibak diad loob na dakerakel lan taon.” Say simbawa na Biblian “agyo paulyan so anggan siopa a mangagamil a sililiput sumpa ed asawa na inkaugaw to” so manunan akatulong ed bilay nen Roberto. (Malaquias 2:15) Diad anto niran pamaakaran a nagunggonaan itayo ed simbawa na Dios?

Panamabaleg ed Ananak Tayo

Diad apalabas iran dekada et nagmaliw lan popular so ideyan saray ateng so agnepeg a mangigetar na dakel a panameget diad pamabaleg ed ananak da. Singano makatunongan so pangiyabuloy ed ananak a mandesisyon a bukor ed no panon ira a mannonot tan onkiwas. Say gagala et pian agnitantan so iyaaligwas da. Diad arum a lugar et nileletneg ni ingen iray agtanto organisadon sistema na edukasyon, a saray estudyante  so makapandesidi met no kasin atendian da iray klase odino andi tan makapampili ra no kaunongan karakel a panagligliwaan odino panangibangat so awaten da. Say totontonen na ontan ya eskuelaan et “abuloyan so ugugaw a mangibalikas ed amin a nalilikna ra ya aghuhusgaan odino pibabalian na sakey a wala la’d edad.” Natan, walaray mananimbawa ed walna na too a siansia nin manusuppiat ed saray gunggona na panangipaakseb na pigaran nengneng na panagdisiplina, anggan diad saray kipapasen a moriaen na ateng a nakaukolan so pangiter na maaron disiplina.

Anto so resulta? Dakdakel so totoo a manisian say malukak iran metodo ed panamabaleg ed anak so mangiiter ed ugugaw na alablabas a kawayangan. Momoriaen dan saya so sengegan na idarakel na krimen tan panangusar ed druga. Imparungtal na sakey a surbi diad Estados Unidos a ngalngali 70 porsiento ed saray tinepetan so maniisip a saray ugugaw tan kalangweran so agtanto nabibilin na saray ateng da. Diad panggugunaet dan ipaliwawa iray paltogan ed eskuelaan tan arum niran makapasinagem a krimen a gagawaen na saray tin-edyer, dakel so manetetel ed “inkamapaulyan na ateng.” Tan anggano aliwan ontan kagrabe iray resulta, sasagmaken na atateng tan ugugaw iray ampait a resulta na lingon paraan na panamabaleg ed anak.

Anto so ibabaga na Biblia nipaakar ed saya? Say simbawa na Kasulatan et nepeg ya agamilen na ateng so autoridad da tekep na aro tan inkapekder. Oniay ibabaga na Biblia: “Say inkaatiw nisinger ed puso na ugaw; balet say panaklay na panangibangat mangiyarawi ed sikato.” (Uliran 22:15) Siempre, say panagdisiplina na ateng so nepeg ya itukoy ed saray sirkumstansya. Say inkauyamo, dangka, tan konsiderasyon so nepeg a mamanlong ed antokaman a panagdisiplina. Kanian tanda itan na panangaro. Say pangagamil na atateng ed autoridad da diad maaron paraan, aliwan maruksa, so sankaabigan a panlapuan na itatalona.

Walaray naiimanon maabig a resulta diad pangiyaaplika ed satan a simbawa. Oniay inkuan nen Arturo, sakey a 30-años a laki ed Mexico ya aganggano nin nankasal: “Impurpurek nen tatay ko ed sikamin sanaagi a sikara nen nanay ko so walaan na autoridad ed pamilya. Ag-iran balot masuyat a manisiplina ed sikami. Ingen, naynay a walay panaon dan mitongtong ed sikami. Natan ta wala ak la’d edad, papablien ko so maligen a bilay a panggagayagaan ko, tan bidbiren ko a resulta iya na maabig ya impangiwanwan ed siak.”

Anamoten so Sankaabigan a Simbawa

Lugan na Salita na Dios, say Biblia, so sankaabigan a simbawan parad katooan. Say panangiwanwan  na satan so aliwa labat a parad interon pamilya. Satan so mangikinlong ed sikatayo diad dakel a paraan lapud ibabangat itayo na satan no panon itayon onkiwas diad sakey a mundo a maslak a totoo so agmabulos a mangawat a say matalonggaring a Lapuan na kakabatan so nepeg a mangigiya ed bilay da parad dilin pankaabigan da.

Oniay impaseguro nen Jehova a Dios, ya Amalsa ed katooan, panamegley nen salmistan si David: “Bilinen ta ka tan ibangat ta ka ed dalan a nepeg mo a laen: simbawaen ta ka a sinenengneng so matak ed sika.” (Salmo 32:8) Naisip yo ta no anto so kabaliksan na pangiimano na Manamalsa ed sikatayo ta pian nipaliis itayo ed saray kapeligroan? Balet, oniay itepet na kada sakey ed sikatayo: ‘Kasin siak so mapaabeban mangawat ed mananalimbeng a panangiwanwan nen Jehova?’ Oniay maaron ibabaga ed sikatayo na Salita To: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.”​—Uliran 3:5, 6.

Nakaukolan so sagpot tan inkaseet pian nakabatan si Jehova, ingen nagawaan itan na katooan diad panamegley na Biblia. Say irerekomenda to a dalan na bilay et ‘walaan na sipan na sayan bilay a peles, tan say onsabi.’ Sankaabigan a tuloy itan a dalan no nodnonoten iray gunggona ya iyoopresi na satan.​—1 Timoteo 4:8; 6:6.

No nasasagyat ka ed aralem a pakatalos ya iyoopresi na Biblia tan ed saray bendisyon a resulta na pambilay a mitunosan ed satan, gawaen sirin a manuna ed bilay mo so pambasa tan pandalepdep ed Salita na Dios. Say panggawa ed satan so ontulong ed sikan natalonaan iray angat natan tan antokaman ya onsabi ed arapen. Niarum ni, naaralan mo so nipaakar ed ilalon pambilay ed balon mundo na Dios, ya amin so nibangat la nen Jehova tan magmaliw a daakan so kareenan da.​—Isaias 54:13.

[Litrato ed pahina 5]

Say simbawa na Biblia so mamaelet ed bedber na panamaley

[Saray litrato ed pahina 6]

Say simbawa na Biblia so basiyan parad maabig a direksion, ingen ag-isisiblet na satan so panliket

[Saray litrato ed pahina 7]

Saramay mangiyaaplika ed simbawa na Biblia so makapanggayaga ed asimbang a panagbilay