“Satan so Sankaabigan lan Nagawa ed Sikayo”

SI Alexis et sakey ya ugaw a lakin limay taon a taga-Morelia, Mexico, a saray ateng to so iyaaralan na Biblia tan onaatendi ed miting na saray Tasi nen Jehova. Sanen inmatendi iran sankapamilyaan diad asamblea, naimatonan to so sakey a demostrasyon nipaakar ed panagpulong ed kaabungan. Tampol ton nilingaw so ama to insan to intepet, “Daddy, Daddy, akin et agka manpupulong?” Oniay inyebat na ama to: “Manaaral ak ni labat pian makapanpulong ak.” Oniay maligsan inyebat nen Alexis: “Daddy, satan so sankaabigan lan nagawa ed sikayo.”

Atebek na sayan ugaw a kaukolan a sikatoy onkiwas a mitunosan ed pikakabat to ed si Jehova. Lapud kaamong to’d abung iray pigaran ugugaw nin kapinsan to, sikatoy nampikasi ni ed si Jehova insan intongtong to ed sikara so nanaaralan to ed My Book of Bible Stories diad tulong na saray ateng to. Anggaman agni amta nen Alexis so manbasa, kabkabisado to lay karga na libro lapud saray litrato a mangiyiilustra ed saray istorya. Imbaga to ni ingen a labay ton laen iray totoo ed kaabungan da pian inabang ed sikara so nanaaralan to nipaakar ed saray gagala na Dios.

Petepeteg, nayarian na ugaw tan matakken ya itunos so bilay da ed no antoy iilaloan ed sikara nen Jehova, “say Santo,” tan sirin et nagawaan so sankaabigan ed amin a kimey, say pantasi ed saray nasyon nipaakar ed sikato. (Isaias 43:3; Mateo 21:16) Anggapoy duaruwan satan so sankaabigan lan nagawa ed sakey a too.