Si Jehova so ‘Biskeg Tayo ed Magulon Panaon’

“Say kilalaban na saray matunong sikato so manlapu ed Jehova: sikato so biskeg da ed panaon na gulo.”​—SALMO 37:39.

1, 2. (a) Anto so impikasi nen Jesus nisesengeg ed saray babangatan to? (b) Anto so linawa na Dios ed totoo to?

 SI Jehova et makapanyarin-amin. Sikato so walaan na pakayarin manalimbeng ed saray matoor a mandadayew ed sikato diad antokaman a paraan a kaliktan to. Nayarian to ni ingen a literal ya isian so totoo to manlapud mundo tan iyan to ira ed maligen tan mareen a kaliberliber. Balet, nipaakar ed saray babangatan to, onia so impikasi nen Jesus ed mangatatawen ya Ama to: “Agko pikasi ya ekalen mo ra ed mundo, noag ingen ilaban mo ra ed mauges.”​—Juan 17:15.

² Denesidi nen Jehova ya agto itayo ‘ekalen ed mundo.’ Imbes, linawa to a manayam itayo ed limog na amin a totoo ed sayan mundo ta pian niyabawag ed sikara so mensahe to nipaakar ed ilalo tan ligliwa. (Roma 10:13-15) Balet, unong ya impabitar nen Jesus ed pikakasi to, nipapaarap itayo ed ‘mauges a sakey’ lapud manbibilay itayo ed sayan mundo. Saray matungangan katooan tan marelmeng ya espiritun puersa so pansesengegan na pirmin ot-ot tan egagel, tan agnipuera iray Kristiano ed gonigon.​—1 Pedro 5:9.

3. Anton peteg a nagawa so kipaarapan na anggan saray matoor a mandadayew ed si Jehova, balet anton ligliwa so naromog tayo ed Salitay Dios?

³ Diad silong na saratan a subok, natural lambengat so pakalikna na pakadismaya. (Uliran 24:10) Lugan na rekord na Biblia so dakerakel a salaysay nipaakar ed saray matoor ya akaeksperiensya na gonigon. “Amayamay so pakapaermenan na matunong,” so kuan na salmista, “balet si Jehova iliktar to ya ipaway ed saraya ya amin.” (Salmo 34:19) On, anggan say “matunong” so makakaeksperiensya met na agmarakep iran bengatla. Singa say salmistan David, no maminsan et nayarin ‘onkapkapuy itayo tan naranel a tuloy.’ (Salmo 38:8) Ingen, makaligliwan naamtaan a “si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.”​—Salmo 34:18; 94:19.

4, 5. (a) Mitunosan ed Uliran 18:10, anto so nepeg tayon gawaen ta pian makaawat itayo na proteksion na Dios? (b) Anto so pigaran espisipikon kundang a nagawaan tayo pian nagamoran so tulong na Dios?

⁴ Mitunosan ed pikakasi nen Jesus, si Jehova so peteg a manbabantay ed sikatayo. Sikato so  ‘biskeg tayo ed magulon panaon.’ (Salmo 37:39) Inusar na libron Uliran so miparan balikas sanen inkuanto: “Say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.” (Uliran 18:10) Sayan teksto so mangipaparungtal ed manunan katuaan nipaakar ed matamoy a panangiyansakit nen Jehova ed saray pinalsa to. Iyoopresi na Dios so proteksion nagkalalo la ed saray matunong a totoon magunaet a manaanap ed sikato, a singano ombabatik itayo ed mabiskeg ya ilang pian onsalimbeng.

⁵ Sano nidunget itayo ed makapagonigon iran problema, panon itayon makagamor na proteksion nen Jehova? Konsideraen tayo so taloran importantin kundang a nagawaan tayo ta pian nagamoran so tulong nen Jehova. Unona, nepeg tayoy onkerew na tulong ed mangatatawen ya Ama tayo panamegley na pikakasi. Komadua, nepeg itayon paigiya ed masanton espiritu to. Tan komatlo, nepeg itayon manpasakop ed uksoyan nen Jehova diad pilimog ed saray kaparan Kristiano a mamakepa ed pakakagonigon tayo.

Say Pakayari na Pikakasi

6. Panon a momoriaen na saray tuan Kristiano so pikakasi?

⁶ Say pikakasi so irerekomenda na pigaran eksperto ed bunigas bilang pantambal ed depresyon tan pakakadetdetan. Anggaman tua ya onkepa so pakakadetdetan tayo diad mareen a pandalepdep ya atekepan na pikakasi, ontan met so nayarin nalikna tayo no narengel tayo iray tanol odino uni na saray pinalsa odino anggan say pampamasahe ed beneg. Agleleglemewen na saray tuan Kristiano so pikakasi bilang pamaabig lambengat na liknaan. Momoriaen tayo so pikakasi bilang mapagalang a pitatalosan ed Manamalsa. Lalanoren na pikakasi so debosyon tan panagmatalek tayo ed Dios. On, say pikakasi so kabiangan na panagdayew tayo.

7. Anto so kabaliksan na manpikasi tekep na kompiyansa, tan panon itayon natulongan na saratan a pikakasi pian natalonaan tayo so kagogonigon?

⁷ Saray pikakasi tayo so nepeg a natekepan na liknaan na kompiyansa, odino panagmatalek, ed si Jehova. Oniay insulat nen apostol Juan: “Saya so katalkan tayo ed sikato, a no mankerew itayo na bengatla unong ed linawa to, sikato dengelen to itayo.” (1 Juan 5:14) Si Jehova, say Supremon Persona, say alenleneg a tua tan makapanyarin-amin a Dios, so peteg a mangiiter na nikaduman panangimano ed masimoon iran pikakasi na saray mandadayew ed sikato. Makaligliwa so pakaamta labat a sikatayo so dedengelen na maaron Dios tayo sano ibebesngaw tayo ed sikato iray kapagaan tan problema tayo.​—Filipos 4:6.

8. Akin ya agbalot nepeg ya ombaing odino manliknan anggapoy kakanaan iray matoor a Kristiano sano onasingger ed si Jehova diad pikakasi?

⁸ Saray matoor a Kristiano so agbalot nepeg ya ombaing, manlikna ya ag-ira makana, odino andian na kompiyansa sano onasingger ira ed si Jehova. Tua, sano nadismaya itayo ed inkasikatayon dili odino dakerakel so problema tayo, nayarin nawalaan itayo na tendensian agtampol onasingger ed si Jehova diad pikakasi. Diad saratan a kipapasen, nepeg tayon nodnonoten a si Jehova et “maparaan naani panangasi [to] ed saray  maermen a totoo to” tan sikato so “manligliwa ed saray abeban linawa.” (Isaias 49:13; 2 Corinto 7:6) Diad saray panaon na kaermenan tan gonigon et nagkalalo lan nakaukolan tayo so matalek ya ikerew na tulong ed mangatatawen ya Ama tayo bilang say salimbengan tayo.

9. Anto so betang na pananisia ed iyaasingger tayo ed Dios diad pikakasi?

⁹ Pian sigpot a nagunggonaan ed pribilehyo na pikakasi, nepeg a walaan itayo na peteg a pananisia. Ibabaga na Biblia a “say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) Say pananisia et aliwa lambengat a panisia a wala so Dios. Say tuan pananisia so mangilalanor ed mabiskeg a panisia ed pakayari tan pilalek na Dios a manumang ed itutulok tayo ed sikato. “Saray mata na Katawan wala ed saray matunong tan saray layag to imatleken to so pikakasi ra.” (1 Pedro 3:12) Magmaliw a makabkabaliksan so pikakasi tayo sano sinononot itayo lawas ed maaron panagpaga nen Jehova ed sikatayo.

10. Anto so nepeg a nengneng na pikakasi tayo ta pian nagamoran tayo so espiritual a tulong nen Jehova?

¹⁰ Dedengelen nen Jehova iray pikakasi tayo sano ibalikas tayo iratan tekep na nagnap a puso. Oniay insulat na salmista: “Inmakis ak ed tibukel a pusok; ebatan mo ak, O Jehova.” (Salmo 119:145) Aliwan singa saray ritualistikon pikakasi ed dakel a relihyon, saray pikakasi tayo et aliwa lambengat a rotina odino palawpaw. Sano manpikasi itayo ed si Jehova tekep na intero odino ‘tibukel a puso’ tayo, saray salita tayo so napno na kabaliksan tan gagala. Kayari na saratan a masimoon a pikakasi, nalikna tayo so inawa lapud ‘ipapaawit tayo ed si Jehova so awit tayo.’ Unong ed isisipan na Biblia, “sikato bembenan to” itayo.​—Salmo 55:22; 1 Pedro 5:6, 7.

Say Espiritu na Dios so Mananulong ed Sikatayo

11. Anto so sakey a paraan ya eebatan itayo nen Jehova sano mantultuloy itayon ‘onkerew’ na tulong to?

¹¹ Si Jehova et aliwa labat a Dumerengel na pikakasi noagta oneebat met ed saratan. (Salmo 65:2) Oniay insulat nen David: “Dia ed agew na gonigon ko; ontawag ak ed sika: ta sika ebatan mo ak.” (Salmo 86:7) Unong ed satan, pinaseseg nen Jesus iray babangatan to ya ‘onkerew’ a naynay na tulong ed si Jehova lapud say ‘Ama a mangatatawen’ so ‘mangiter na espiritu santo ed saray onkerew ed sikato.’ (Lucas 11:9-13) On, say aktibon puersa na Dios so onkakana bilang mananulong, odino managligliwa, ed totoo to.​—Juan 14:16.

12. Panon a makatulong ed sikatayo so espiritu na Dios sano ompatnag a makapabelat la iray problema?

¹² Anggano nidunget itayo ed saray subok, say espiritu na Dios so mangipagamor ed sikatayo na “sankatageyan ya inkabaleg na pakayari.” (2 Corinto 4:7) Si apostol Pablo, a nansungdo ed dakel iran makapadetdet a situasyon, so matalek ya angikuan: “Nayarian ko a gawaen so ganagana ed saman so mamabiskeg ed siak.” (Filipos 4:13) Ontan met, nalilikna na dakel a Kristiano natan so kapapasimbalo na espiritual tan emosyonal a biskeg da bilang ebat ed saray pikakasi ra. Mabetbet et magmaliw lan alemlemew iray makapagonigon a problema kayari tayon naawat so tulong na espiritu na Dios. Lapud satan ya inter na Dios a biskeg, nayarian tayon ibaga so singa inkuan na apostol: “Naeletan kami ed balang diking et agkami nairapan; manduaruwa kami, et agnaekal so panilalo mi. Nausil-usilan et ag-akaindan; gineba et agkami abagbag.”​—2 Corinto 4:8, 9.

13, 14. (a) Panon a pinaneknekan nen Jehova a sikato so biskeg tayo panamegley na nisulat a Salita to? (b) Panon ya akatulong ed sikayon mismo so impangiyaplika ed saray prinsipyo na Biblia?

¹³ Pinuyanan tan pinansiansia met na masanton espiritu so nisulat a Salita na Dios parad pankaabigan tayo. Panon ya apaneknekan a si Jehova et biskeg ed magulon panaon diad panamegley na Salita to? Sakey lan paraan et say pangiter na satan ed sikatayo na praktikal a kakabatan tan abilidad a manisip. (Uliran 3:21-24) Ipapasal na Biblia so pakayari na panag-isip tayo tan mamapaaligwas ed pakayari tayon mankatunongan. (Roma 12:1) Diad regular a panagbasa tan panagaral ed Salitay Dios, katekep lay panangiyaplika ed satan, nawalaan itayo na ‘pakayarin manebek pian nibiig so duga tan aliwa.’ (Hebreos 5:14, NW) Nayarin naeksperiensya yo lan mismo no panon kayon atulongan na saray prinsipyo na Biblia a manggawa na  makabat iran desisyon sanen nidunget kayo ed kairapan. Say Biblia so mangiiter ed sikatayo na makabat a panag-isip a makatulong ed sikatayon naromog so praktikal iran solusyon ed makapagonigon iran problema.​—Uliran 1:4.

¹⁴ Itatarya ed sikatayo na Salitay Dios so sananey nin lapuan na biskeg​—say ilalo ed kilalaban. (Roma 15:4) Ibabaga ed sikatayo na Biblia ya agmansiansia lawas iray mauges a bengatlan nagagawa. Temporaryo so antokaman iran kairapan a sasagmaken tayo. (2 Corinto 4:16-18) Walaan itayo na ‘ilalo ed bilay ya andi-angga a say Dios, ya agto nayari manburi, insipan ton akauna nen saray panaon na saray nilasus a taon.’ (Tito 1:2) No manliket itayo ed satan ya ilalo, a sinononot itayo lawas ed masnag ya arapen ya isisipan nen Jehova, makapansungdo itayo ed kairapan.​—Roma 12:12; 1 Tesalonica 1:3.

Say Kongregasyon​—Sakey a Pakapatnagan na Aro na Dios

15. Panon a saray Kristiano et magmaliw a bendisyon ed arum?

¹⁵ Say sakey nin probisyon nen Jehova a makatulong ed sikatayo diad panaon na gonigon et say pililimog ed loob na Kristianon kongregasyon. Oniay ibabaga na Biblia: ‘Say kaaro mangaro ed amin a panaon, tan sakey ya agi a nianak nipaakar ed kasumlangan.’ (Uliran 17:17) Papasesegen na Salitay Dios so amin diad loob na kongregasyon pian manpapagalangan tan manaaroan ed balang sakey. (Roma 12:10) “Anggapo komon so siopan too a mananap na kaabigan ton dili, noag say kaabigan na kapara ton too,” so insulat nen apostol Pablo. (1 Corinto 10:24) Say pakawalaan na ontan ya awawey so makatulong ed sikatayo pian imanoen ya unona iray pankaukolan na arum imbes a saray subsubok ed sikatayon mismo. Sano tulongan tayo so arum, agtayo lambengat ira natutulongan noagta panggayagaan tayo met so liket tan inkapnek, a mamalemew ed saray mismon pakabebelatan tayo.​—Gawa 20:35.

16. Panon a magmaliw a makapabiskeg so kada sakey a Kristiano?

¹⁶ Saray matakken ed espiritual iran lalaki tan bibii so walaan na importantin betang diad pamabiskeg ed arum. Ta pian napabiskeg so arum, gagawaen day inkasikara a mainomay ya asinggeran tan lawas akaparaan. (2 Corinto 6:11-13) Say kongregasyon so peteg a nagunggonaan sano ipanaon na amin so pangomenda ed saray kalangweran, pamabiskeg ed balo iran mananisia, tan pamaseseg ed saramay manasagmak na depresyon. (Roma 15:7) Say inaagin aro so ontulong met ed sikatayo pian napaliisan so espiritu na panag-inap ed balang sakey. Ag-itayo bengatbengat a mannonot a tanda na espiritual a kaleteyan so paniirap na sakey. Matukoy so impamaseseg nen Pablo ed saray Kristiano a ‘mansalita a makatambayo ed apunaw a puso.’ (1 Tesalonica 5:14, NW) Ipapabitar na Biblia ya anggan saray matoor a Kristiano so makasagmak na gonigon.​—Gawa 14:15.

17. Antoray pankanawnawa tayo pian napaelet so bedber na Kristianon impanaagi?

 ¹⁷ Saray Makristianon miting so alay abig a pankanawnawa pian naligliwa tan napaseseg tayo so balang sakey. (Hebreos 10:24, 25) Sayan maaron pidedeneng ed balang sakey so aglambengat nipatnag ed saray miting ed kongregasyon. Imbes, aanapen met na totoo na Dios iray pankanawnawan mibiang ed makagunggonan pililimog. Sano onlesa iray makapagonigon a kipapasen, akaparaan itayon mantutulongan lapud akaletneg la so malet a bedber na pankakaaro. Oniay insulat nen apostol Pablo: “Anggapo so pansisian ed laman, noag saray kabiangan wala so dili a panagpaga ra ed sakey tan sakey. Tan no nairapan so sakey a kabiangan, amin a kabiangan miirap ira ed sikato; odino sakey a kabiangan so napagalangan, amin day kabiangan mililiket ira ed sikato.”​—1 Corinto 12:25, 26.

18. Anton tendensia so nepeg tayon paliisan sano maneermen itayo?

¹⁸ No maminsan, sano maneermen itayo et nayarin anggapo lay ganas tayon milimog ed saray kaparan Kristiano. Nepeg tayon labanan so ontan a liknaan ta pian agtayo nikibot ed inkasikatayon dili so ligliwa tan tulong a nayarin iyopresi na saray kapananisiaan. Oniay ipapasakbay ed sikatayo na Biblia: “Say onsian anapen to so dili a pilalek to, tan misangsangan sumpa ed amin ya aralem a kakabatan.” (Uliran 18:1) Saray agagi tayo et probisyon na Dios pian nipatnag to so panangasikaso ed sikatayo. No bidbiren tayo itan a maaron probisyon, makaromog itayo na pakainawaan ed panaon na gonigon.

Pansiansiaen so Positibon Awawey

19, 20. Panon a makatulong ed sikatayo so Kasulatan pian niwaklit iray negatibon kanonotan?

¹⁹ Sano onlesa so pakadismayaan tan kaermenan, magmainomay so pannonot na negatibo iran bengatla. Singa bilang, sano manasagmak ira na kairapan, arum so nayarin manduaruwa ed dilin espiritualidad da, ya isipen dan say paniirap da et tanda na agpanangabobon na Dios. Balet, tandaan a si Jehova et agmanusubok ed siopaman panamegley na saray “mauges” a bengatla. (Santiago 1:13) “[Say Dios] agmamairap a malikeliket, agmet mamaermen ed saray anak na totoo,” so kuan na Biblia. (Tagleey 3:33) Diad pisunian, si Jehova so nanaermenan a maong sano napapairap iray lingkor to. ​—Isaias 63:8, 9; Zacarias 2:8.

²⁰ Si Jehova so “Ama na saray panangasi tan Dios na ami’ ligliwa.” (2 Corinto 1:3) Asikasoen to itayo, tan itandoro to itayo ed dugan panaon. (1 Pedro 5:6, 7) Napansiansia tayo so positibon awawey tan manliket tayo ni ingen no sinononot itayo lawas ed panangaro na Dios ed sikatayo. Oniay insulat nen Santiago: “Agagik ira, ibilang yo ya amin a liket no napelag kayo ed nambabangil a katuksoan.” (Santiago 1:2) Akin? Oniay ebat to: “Ta no asali la, awaten to so balanget na bilay ya insipan na Katawan ed saray mangaro ed sikato.”​—Santiago 1:12.

21. Antokaman so kairapan ya aarapen tayo, anton panamaseguro so iiter na Dios ed saramay manmamatoor ed sikato?

²¹ Singa ed impasakbay la nen Jesus ed sikatayo, sagmaken tayo so kairapan ed mundo. (Juan 16:33) Balet isisipan na Biblia ya anggapo so “kairapan, o say kaermenan, o say panangusil, o say eras, o say inkalakseb-labos, o say kaatapan” a mangisian ed sikatayo manlapud aro nen Jehova tan aro na Anak to. (Roma 8:35, 39) Agaylan makaligliwan naamtaan a temporaryo lambengat so antokaman a gonigon ya aarapen tayo! Kaleganan balet na pantatalaran tayo ed anggaan na kairapan na totoo, say maaron Ama tayo, si Jehova, so mangaasikaso ed sikatayo. No onkerew itayo na proteksion to, sikato so napaneknekan a “sakey ya atagey ya ilang ya onkana ed saray apasegsegang, sakey ya atagey ya ilang ed panaon na gulo.”​—Salmo 9:9.

Anto so Naaralan Tayo?

• Anto so nepeg ya ilaloan na saray Kristiano legan dan manbibilay ed sayan marelmeng a mundo?

• Panon a napaneknekan a makapabiskeg iray masimoon a pikakasi tayo sano nidudunget itayo ed saray subok?

• Panon a magmaliw a mananulong so espiritu na Dios?

• Anto so nagawaan tayo pian makapantutulongan so balang sakey ed sikatayo?

[Tepetepet Parad Panagaral]

[Litrato ed pahina 18]

Nepeg tayon anapen si Jehova a singano ombabatik itayo pian onsalimbeng ed sakey a mabiskeg ya ilang

[Saray litrato ed pahina 20]

Saray matakken ed espiritual so manguusar ed amin a pankanawnawa pian komendaan tan pasesegen so arum