Idayew so Dios “Dia ed Sakey a Sangi”

‘Dia ed sakey a sangi et irayew so Dios tan Ama na Katawan tayo a Jesu-Kristo.’​—Roma 15:6.

1. Anton leksion nipaakar ed panresolbi ed pandurumaan na panmoria so innabang nen Pablo ed saray kapananisiaan to?

 ALIWAN parepareho iray pipilien odino panlabayan na amin a Kristiano. Ingen, nepeg a mankakasakey a mankurang so amin a Kristiano diad dalan a mamaarap ed bilay. Kasin posible itan? On, no agtayo gawaen a baleg ya isyu iray melag a pandurumaan. Sakey itan a leksion ya innabang nen apostol Pablo ed saray kapananisiaan to nen inmunan siglo. Panon ton impaliwawa iyan importantin punto? Tan panon tayon niyaplika natan so pinuyanan a simbawa to?

Say Kaimportantian na Kristianon Pankakasakey

2. Panon ya indanet nen Pablo so pankaukolan parad pankakasakey?

² Amta nen Pablo a makana so pankakasakey na saray Kristiano, tan sikatoy angiter na maabig a simbawa pian tulongan iray Kristiano a manaanosan ed sakey tan sakey dia ed aro. (Efeso 4:1-3; Colosas 3:12-14) Anggaman kuan, kayari ton inletneg so dakel a kongregasyon tan binisita so arum diad loob na masulok a 20 taon, amta to a mairap a napansiansia so pankakasakey. (1 Corinto 1:11-13; Galacia 2:11-14) Kanian pinaseseg to iray kapananisiaan to a manaayam ed Roma: “Say Dios na anos tan ligliwa yabuloy to komon . . . [a] dia ed impankakasakey yo dia ed sakey a sangi so pangirayew ed Dios tan Ama na Katawan tayo a Jesu-Kristo.” (Roma 15:5, 6) Natan, nepeg tayo met ya irayew si Jehova a Dios “dia ed sakey a sangi” bilang nankakasakey a grupo na totoo to. Komusta itayo ed sayan pamaakaran?

3, 4. (a) Antoray nanduruman abenegan na saray Kristiano ed Roma? (b) Panon a makapanlingkor ed Dios iray Kristiano ed Roma “dia ed sakey a sangi”?

³ Dakel a Kristiano ed Roma so maapit a kakaaro nen Pablo. (Roma16:3-16) Anggaman nanduruma so nanlapuan da, inawat nen Pablo so amin ya agagi to bilang “inaro na Dios.” Insulat to: “Misalamat ak ed Dios ko, lapu ed si Jesu-Kristo nipaakar ed sikayo ya amin, ta say pananisia yo nibawag ed sankamundoan.” Malinew, saray taga-Roma so napanuliranan diad dakel a paraan. (Roma 1:7, 8; 15:14) Kaleganan na satan, say pigaran membro na kongregasyon so walaan na mandurumaan a panmoria ed pigaran pamaakaran. Lapud nanduruma iray nanlapuan tan kultura na saray Kristiano natan, say panaral ed pinuyanan a simbawa nen Pablo no panon a resolbien iray pandurumaan so makatulong ed sikara a mansalita “dia ed sakey a sangi.”

⁴ Diad Roma et walaray mananisian Judio tan Gentil. (Roma 4:1; 11:13) Arum a Judion Kristiano so mapatnag ya agni tinmunda ed pangaagamil da na pigaran kustombre ya inunor da nensaman ed silong na Mosaikon Ganggan, anggaman nepeg ya amoria ra komon ya agla nakaukolan iratan ya agamil parad kilalaban. Diad biek a dapag, inawat na pigaran Judion Kristiano a say bagat nen Kristo so angibulos la ed sikara manlapud saray panameget ya uunoren da sakbay iran nagmaliw a Kristiano. Bilang resulta, inuman da so pigaran personal ya ug-ugali tan ag-agamil da. (Galacia 4:8-11) Siansia ni, amin da so “inaro na Dios,” unong ya impabitar nen Pablo. Amin da so makapangidayew ed Dios “dia ed sakey a sangi” no pansiansiaen da so dugan awawey na kanonotan da ed sakey tan sakey. Nayarin walaan itayo met natan na nanduruman panmoria ed pigaran pamaakaran, kanian nepeg a maalwar tayon imanoen no panon ya impaliwawa nen Pablo iyan importantin prinsipyo.​—Roma 15:4.

 “Manaakoan Kayo”

5, 6. Akin a walaray pandurumaan ed panmoria diad kongregasyon na Roma?

⁵ Diad sulat nen Pablo ed saray taga-Roma, sinaglawi to so sakey a kipapasen a mandurumaan iray opinyon. Insulat to: “Say sakey a too wala so pananisia to a mangan ed amin a bengatla: balet say sakey a makapuy, mangan na pisipising.” Akin ya ontan? Bueno, dia ed Mosaikon Ganggan et agnayarin kanen so karne na baboy. (Roma 14:2; Levitico 11:7) Balet ta naandi lay epekto na satan a Ganggan sanen inatey si Jesus. (Efeso 2:15) Insan, kayari na talora tan kapalduan taon manlapud samay impatey nen Jesus, imbaga na sakey ya anghel ed si apostol Pedro a dia ed punto de bista na Dios et anggapo so tagano a nepeg ya ipasen a marutak. (Gawa 11:7-12) Lapud sankanonot da irayan katuaan, nayarin minoria na pigaran Judion Kristiano a sarag da lay mangan na karne na baboy​—odino mangan na arum nin tagano a nisebel ed Ganggan.

⁶ Balet, anggan say panisip labat a mangan ed saraman a datin marutak a tagano et maseguron makapadimla la ed arum a Judion Kristiano. Nayarin agnapaliisan so pakaopendi na saratan a sensitibon indibidual sano nanengneng da iray Judion agagi ra ed Kristo a mamangan na ontan a tagano. Sakey ni, nayarin awetwet so pigaran Gentil a Kristiano, a diad relihyoson abenegan da et anggapon balot iray pananebel ed panangan da, sano walay siopaman a mangisuppiat nipaakar ed tagano. Siempre, aliwan mauges no paliisan na sakey so pigaran tagano, daput no agto ipipilit a say ontan ya ipapaliis et nakaukolan pian nagamoran so kilalaban. Siansia ni, say panduruma na panmoria so nayarin nanlapuan na sangsangan ed loob na kongregasyon. Kaukolan a manalwar iray Kristiano ed Roma a say ontan iran pandurumaan so agmangamper ed sikaran mangidayew ed Dios “dia ed sakey a sangi.”

7. Antoray mandumaan a panmoria nipaakar ed panagngilin na sakey ya espisyal ya agew kada simba?

⁷ Angiter si Pablo na komaduan alimbawa: “Say sakey a too manunan pablien to so sakey ya agew nen say sakey: say sananey pampaparaen to ya amin so agew.” (Roma 14:5a) Dia ed Mosaikon Ganggan, agnayari so mantrabaho diad agew na Sabaton. Anggan say pambaroy so pepegetan a maong diad satan ya agew. (Exodo 20:8-10; Mateo 24:20; Gawa 1:12) Balet sanen inekal so Ganggan, anggapo la iratan a pananebel. Siansia ni, walaray Judion Kristiano a masuyat a manggawa na antokaman a kimey odino manbaroy  na arawi diad satan ya agew a datin ipapasen da a sagrado. Anggan sanen nagmaliw la ran Kristiano, nayarin inggana ra so komapito ya agew a para labat ed espiritual iran gagala, anggaman diad imaton na Dios et andian la na epekto so Sabaton. Kasin nalilingo ra ed gagawaen da? Andi, daput no agda ipipilit a say panngilin na Sabaton et kakaukolanen na Dios. Kanian, lapud ikokonsidera nen Pablo so konsiensia na saray Kristianon agagi to, oniay insulat to: “Paulyan na balang sakey ya agmanduaruwa ed kalakal ton dili.”​—Roma 14:5b.

8. Anggaman nayarian dan ikonsidera so konsiensia na arum, anto so agnepeg a gawaen na saray Kristiano ed Roma?

⁸ Balet, anggaman maliket si Pablo ya amaseseg ed saray agagi to ya anosan da iraman so mipupuligesgesan ed saray pamaakaran na konsiensia, binaat to iraman so mamipilit ed saray kapananisian da a nakaukolan iran manpasakop ed Mosaikon Ganggan pian nagamoran da so kilalaban. Alimbawa, manga 61 K.P. et insulat nen Pablo so libro na saray Hebreos, sakey a mapuersan sulat parad saray Judion Kristiano a malinlinew a mangipapaliwawa ya andian lay kakanaan so pampasakop ed Mosaikon Ganggan lapud walaan la na mas matalonggaring ya ilalo iray Kristiano a nibase ed dondon bagat nen Jesus.​—Galacia 5:1-12; Tito 1:10, 11; Hebreos 10:1-17.

9, 10. Anto so agnepeg a gawaen na saray Kristiano? Ipaliwawa.

⁹ Unong a naimano tayo la, inkatunongan nen Pablo a say panduruma ed panagpili et aliwan sesga ed pankakasakey daput no anggapo so malinew ya isusumlang ed saray Makristianon prinsipyo. Kanian, oniay intepet nen Pablo ed saray Kristiano a mas makapuy so konsiensia ra: “Akin ya ukomen mo so agim?” Tan oniay intepet to ed saramay mas mabiskeg (nayarin saraman so aabuloyan na konsiensia ra a mangan na pigaran tagano a datin insebel ed silong na Ganggan odino mantrabaho diad agew na Sabaton): “Akin et pabpabandayen mo so agim?” (Roma 14:10) Unong ed si Pablo, saray Kristiano a mas makapuy so konsiensia ra so agnepeg a mangondena ed agagi ra a walaan na mas malaknab a panmoria. Diad biek a dapag, agnepeg a mudmoraen na saray mabiskeg a Kristiano iramay indibidual a makapuy ni so konsiensia ra diad pigaran aspekto. Amin so nepeg a manrespeto ed susto iran motibo na arum tan agda “nononoten so [inkasikaran] dili ya atagtagey nen say kanepegan a nonoten.”​—Roma 12:3, 18.

¹⁰ Impaliwawa nen Pablo so balansin panmoria ed onian paraan: “Say mangan aleg a pabandayen to so agmangan; et say agmangan, aleg ya ukomen to so mangan: ta say Dios inawat to.” Niarum ni, oniay inkuan to: “Si Kristo met inako to itayo, [ya] onkana ed gloria na Dios.” Lapud parehon aakoen na Dios tan si Kristo so mabiskeg tan makapuy, nepeg a nawalaan itayo met na ontan ya awawey tan ‘manaakoan itayo.’ (Roma 14:3; 15:7) Siopa so makatunongan a manuppiat ed satan?

 Say Panaaroan na Sanaagi so Mamapawala na Pankakasakey Natan

11. Anton nikaduman situasyon so niwala ed panaon nen Pablo?

¹¹ Diad sulat to ed saray taga-Roma, sinaglawi nen Pablo so sakey a nikaduman situasyon. Aganggano nin inekal ed saman nen Jehova so sakey a sipanan tan angiletneg na balo. Arum so naiirapan ya onadapta. Anggapo la natan so ontan ya eksakton kipapasen, balet nayarin onlesa no maminsan iray miparan isyu.

12, 13. Antoray pigaran kipapasen a nipatnag na saray Kristiano natan so panrespeto ed konsiensia na saray agagi ra?

¹² Alimbawa, nayarin say sakey a Kristianon bii so datin membro na sakey a relihyon a mangidadanet ed simplin panangawes tan panag-ayos. Sanen inawat to so katuaan, nayarin sikatoy naiirapan ya onadapta ed ideyan aliwan sebel so pansulong na masimpit tan makolor a kawes diad matukoy iran okasyon odino kabkaabigan a pangusar na makeup. Lapud anggapo so nalalanor a prinsipyo na Biblia, agmanepeg a piliten na siopaman itan a Kristianon bii a sumlangen so konsiensia to. Diad biek a dapag, bidbiren to ya agto nepeg a balawen iray Kristianon bibii a mangiyaabuloy ed konsiensia ra a mangusar ed saratan a bengatla.

¹³ Konsideraen so sananey nin alimbawa. Nayarin binmaleg so sakey a Kristianon laki dia ed kaliberliber ya ag-aabuloyan so panag-inum na alak. Sanen akabatan to la so katuaan, naaralan to so panmoria na Biblia a say alak et regalo na Dios tan nayarin usaren ed kabkaabigan a paraan. (Salmo 104:15) Inawat to itan a panmoria. Balet, lapud abenegan to, denesidi to ya agton balot oninum na de-alkohol ya iinumen, balet agto krikritikoen iraman so oniinum na kabkaabigan ed saratan. Diad ontan et iyaaplika to iray salita nen Pablo a: “Tumboken tayo so saray bengatla a manggawa na kareenan, tan saray bengatla a kipaalageyan na sakey tan sakey ed sikatayo.”​—Roma 14:19.

14. Diad antoran kipapasen a niyaplika na saray Kristiano so prinsipyo na simbawa nen Pablo ed saray taga-Roma?

¹⁴ Onlelesa so arum iran situasyon a nakaukolan ya iyaplika so prinsipyo na simbawa nen Pablo ed saray taga-Roma. Say Kristianon kongregasyon so tugyopen na dakel ya indibidual, tan nanduruma so panlabayan da. Kanian, nayarin mandurumaan so panlabayan da​—alimbawa, diad panangawes tan panag-ayos. Siempre, indatak na Biblia iray malinew a prinsipyo ya unoren na amin a masimoon a Kristiano. Anggapo ed sikatayo so nepeg a mangisulong na kawes ya akulastay odino man-ayos na buek ya agmasimpit odino diad paraan a mangipabidbir a sikatayoy naiimpluensyaan na mundo. (1 Juan 2:15-17) Tandaan na saray Kristiano a diad amin a panaon, anggan sano manrerelaks et ministros ira a mangirerepresenta ed Soberano na Uniberso. (Isaias 43:10; Juan 17:16; 1 Timoteo 2:9, 10) Balet, diad dakel ya aspekto et amayamay iray manepeg a napanpilian na saray Kristiano. *

Paliisan a Nigapol so Arum

15. Kapigan a nayarin paliisan na sakey a Kristiano so pangagamil na kanepegan to, parad pakagunggonaan na agagi?

¹⁵ Wala ni so importantin prinsipyo ya impaimano ed sikatayo nen Pablo diad simbawa to ed saray taga-Roma. No maminsan, say sakey a Kristiano a walaan na nipasal a maong a konsiensia so nayarin mandesidi ya agmanggawa ed sakey a bengatla ya aliwa met a mauges. Akin? Lapud momoriaen to a say pangegemtan to ed satan a kurang so makaopendi ed arum. Anto so nepeg tayon gawaen diad ontan a kipapasen? Oniay inkuan nen Pablo: “Maong so agpangan na asalian, tan agyinum na alak, o manggawa na antokaman a tiroran na agim, o pakalamesan to, o pakakapuyan to.” (Roma 14:14, 20, 21) Sirin, “sikatayo a mabiskeg nepeg tayo a sungdoan so kaleteyan na makapuy, tan aleg a paliketen tayo so inkasikatayo a dili. Balang sakey ed sikatayo paliketen to komon so kapara ton too ed kaabigan to ed kipaalagey.” (Roma 15:1, 2) No naopendi so konsiensia na kapara tayon Kristiano lapud gagawaen tayo, say panangaro ed agi tayo so mamakiwas ed sikatayon magmaliw a makonsidera tan limitaan tayo iray panlabayan tayo. Say sakey ya alimbawa na saya et nayarin say iyinum na saray de-alkohol. Nayarian na sakey a Kristiano so oninum na  daiset ya alak. Balet no say panggawa to ed satan et mangigapol ed kaiba to, agto ipilit iray kanepegan to.

16. Panon tayon nipatnag so konsiderasyon ed saramay walad teritorya tayo?

¹⁶ Nayarin iyaplika met iyan prinsipyo diad pidedeneng tayo ed saray totoo ed paway na Kristianon kongregasyon. Alimbawa, nayarin manaayam itayo ed sakey a lugar ya ibabangat na manunaan a relihyon iray patumbok na satan a moriaen so sakey ya agew ed simba bilang agew na painawa. Lapud satan, ta pian agnigapol iray kakaabay tan agnaamper so panagpulong a kimey, sikatayo so agmanggawa anggad posible na antokaman a kimey diad satan ya agew a mangopendi ed kakaabay tayo. Diad sananey a kipapasen, nayarin say sakey a mayaman a Kristiano so onalis pian manlingkor diad lugar na saray totoon mairap-bilay a babaleg ditan so pankaukolan. Nayarian ton ipatnag so konsiderasyon ed saray balon kakaabay to diad pankawes na simpli odino diad pambilay na mas simpli anggaman nayarian toy manbilay na mas komportable.

17. Akin a makatunongan ya ikonsidera tayo so arum diad saray panagpili tayo?

¹⁷ Makatunongan ya ilaloan iramay “mabiskeg” a manggawa na ontan iran pananguman? Bueno, nonoten pa iyan ilustrasyon: Legan itayon manmamaneho, abantag tayo a walaray ugugaw a mapeligron manggagalaw diad gilig na karsada. Kasin mapmaples itayo nin siansia a manmaneho lapud ta kanepegan tayoy manggawa ed satan? Andi, sikatayo so mantantan pian agtayo natalapos iray ugugaw. No maminsan et nakaukolan so ontan ya inkamabulos a mantantan, odino mamalugar, diad pisisiglaotan tayo ed saray kapananisiaan tayo odino ed arum a totoo. Nayarin gagawaen tayoy bengatlan kanepegan tayo. Anggapo so nalalanor iran prinsipyo ed Biblia. Anggaman kuan, no makaopendi itayo ed arum odino napasakitan tayo iramay mas makapuy so konsiensia ra, say Makristianon panangaro so managdag ed sikatayon onkiwas a maalwar. (Roma 14:13, 15) Mas importante so pamasiansia na pankakasakey tan pangiyalibansa ed intereses na Panarian nen say pangagamil ed saray dilin kanepegan tayo.

18, 19. (a) Diad pangipatnag na konsiderasyon ed arum, panon tayon naalig so alimbawa nen Jesus? (b) Diad antoran pamaakaran ya onkiwas itayon amin a walaan na sigpot a pankakasakey, tan anto so singbaten diad onsublay ya artikulo?

¹⁸ Sano ontan so gawaen tayo, aaligen tayo so sankaabigan ya ehemplo. Oniay inkuan nen Pablo: “Si Kristo met agto pinaliket so inkasikaton  dili; noag ingen unong na nisulat: Saray pamabpabanday na mamabanday ed sika, naplag ira ed siak.” Si Jesus so mabulos ya angisakripisyo ed bilay to parad sikatayo. Seguradon mabulos itayo met a mangisakripisyo ed pigaran kanepegan tayo no makatulong itan ed saramay “makapuy” pian mangidayew ed Dios a mikasakey ed sikatayo. Peteg a say pagmaliw a maanos tan mabunlok ed saray Kristianon mas makapuy so konsiensia ra​—odino boluntaryon panlimita ed saray panlabayan tayo tan agpangipilit ed saray kanepegan tayo​—so pakapatnagan na “miparan awawey na kanonotan a walad si Kristo Jesus.”​—Roma 15:1-5.

¹⁹ Anggaman mandurumaan iray panmoria tayo ed saray pamaakaran ya anggapo iray nasusumlang a Makasulatan a prinsipyo, sikatayo so sigpot a mankakasakey nipaakar ed panagdayew. (1 Corinto 1:10) Singa bilang, napatnagan so ontan a pankakasakey diad reaksion tayo ed saramay onsusumpa ed tuan panagdayew. Say Salita na Dios so manutukoy ed saratan ya onsusumpa bilang sankaili tan mamapasakbay itan ed sikatayo a manalwar ed “boses na saray sankaili.” (Juan 10:5) Panon tayon nabidbir iratan a sankaili? Panon so nepeg tayon ikiwas ed sikara? Sarayan tepet so konsideraen diad onsublay ya artikulo.

[Paimano ed leksab]

Panon Yon Ebatan?

• Akin ya aliwan makapasesga ed pankakasakey so pakawalaan na mandurumaan a panmoria ed personal iran pamaakaran?

• Bilang Kristiano, akin a nepeg tayon ipatnag so maaron konsiderasyon ed sakey tan sakey?

• Anto so pigaran paraan a niyaplika tayo natan so simbawa nen Pablo nipaakar ed pankakasakey, tan anto so mamakiwas ed sikatayon gawaen itan?

[Tepetepet Parad Panagaral]

[Litrato ed pahina 9]

Say simbawa nen Pablo nipaakar ed pankakasakey so makana ed kongregasyon

[Litrato ed pahina 10]

Saray Kristiano so nankakasakey anggaman nanduruma so nanlapuan da

[Litrato ed pahina 12]

Antoy nepeg a gawaen na sayan drayber?