Istorya ed Bilay

Makapnek tan Maliket a Bilay Lapud Mabulos a Panagsakripisyo

UNONG ED SALAYSAY DI MARIAN TAN ROSA SZUMIGA

“Mangibagat ak ed sika a sankamabulosan,” so inyabawag na Salmo 54:6. Sayan balikas so pinagkatema na bilay di Marian Szumiga tan say akulaw ton si Rosa, a manaayam ed Pransya. Sikara so agano nin angisalaysay na pigara ed saray importantin kabiangan na andukey, tan makapnek a bilay da ed serbisyo ra ed si Jehova.

MARIAN: Say atateng ko et Romanon Katoliko a nanlapud Polandiya. Si Tatay et mapaabeban too. Agton balot akapanaral. Balet, legan na inmunan guerra mundial, naaralan to so manbasa tan mansulat bangta sikatoy walad saray kinotkot a panamotan. Si Tatay et matakot ed Dios, balet naynay a sikatoy nadidismaya ed simbaan.

Walay inkagawa ya agton balot nalingwanan. Sakey ya agew kaleganan na bakal, sakey a pari so binmisita ed pangkat di Tatay. Sanen walay bomba a sinmabog ed asingger ed sikara, kinmuyat so pari, ya insiplat to so kulintas a krus ed kabayo to pian ombatik itan. Abigla si Tatay lapud inusar na sakey a “mangilalaman” ed Dios so sakey a “masanto” a kagawaan pian makabatik labat. Anggaman ed saratan a naeksperiensya to tan ed naimatonan ton makapatalagnaw iran epekto na bakal, aglinmetey so pananisia nen Tatay ed Dios. Sikato so mabetbet a misasalamat ed Dios no sikatoy maligen a makasempet manlapud bakal.

“Melag a Polandiya”

Nen 1911, inasawa nen amak so sakey a bii ed kabangibang a baryo. Say ngaran to et Anna Cisowski. Kayarin tuloy na bakal, nen 1919, si Tatay tan Nanay so tinmaynan ed Polandiya tan  linma ira ed Pransya, a nantrabahoan nen Tatay bilang managminas na karbon. Nianak ak nen Marso 1926 diad Cagnac-les-Mines, abalaten-sagur a Pransya. Kayari na satan, nanayam iray atateng ko ed komunidad na saray Polako diad Loos-en-Gohelle, ya asingger ed Lens diad mamaamianen a Pransya. Say panadero et Polako, say matadero et Polako, tan say pari diman et Polako. Agpankelawan no akin a tinawag itan a lugar bilang Melag a Polandiya. Akibiang iray atateng ko ed saray kimey na komunidad. Naynay a mangoorganisa si Tatay na saray palabas, a mangilaktip ed sakey a drama, musika, tan kansionan. Sikato so naynay met a misisingbatan ed pari, balet ta sikatoy agnapepenek sano say ebat lan lanang na pari et, “Dakerakel so misteryo.”

Sakey ya agew nen 1930, walay duaran bii a tinmoktok ed puerta mi. Estudyante ira na Biblia, bilang tawag ed saray Tasi nen Jehova nensaman. Say amak so akala na Biblia ed sikara, a pigay taon lan pipilaleken ton nabasa. Sikara nen Nanay so magunaet met a nambasa ed saray publikasyon a nibase ed Biblia sanen inmalis la iramay bibii. Nandinayew a maong so atateng ko ed abasa ra ed saratan a publikasyon. Anggaman ed okupadon bilay da, ginapoan na atateng ko so inmatendi ed saray pantitipon ya inyuksoy na saray Estudyante na Biblia. Say pisisingbatan na pari ed atateng ko et mas pinmetang anggad sinmabi so agew a pinagyaw to ira a no mantultuloy iran milimog ed saray Estudyante na Biblia, agto la awaten so atsik a si Stéphanie ed katekismo. “Agyo pampapagaan itan,” so inkuan nen Tatay. “Manlapu la’d natan, say ana’kon bii tan arum niran ananak ko so mila ed sikami diad saray pantitipon na saray Estudyante na Biblia.” Inmekal ed simbaan si Tatay, tan diad kasakbayan na 1932 et abautismoan iray atateng ko. Diad saman, wala lambengat so ngalngali 800 a manangipalapag na Panarian diad Pransya.

Rosa: Saray atateng ko et nanlapud Hungary tan, singa say pamilya nen Marian, et nanayam ira ed amianen na Pransya pian mantrabaho ed minas na karbon. Nianak ak nen 1925. Nen 1937, sakey ed saray Tasi nen Jehova, si Auguste Beugin, odino Papa Auguste bilang tawag mi ed sikato, so angiter na The Watchtower ed atateng ko diad lenguahen Hungarian. Naninteres ira ed saray magasin, balet anggapo ed sikara so nagmaliw a Tasi nen Jehova.

Anggaman ugaw ak ni ed saman, apakiwas so pusok ed abasak ed The Watchtower, tan say manugang nen Papa Auguste, a si Suzanne Beugin, so personal a tinmulong ed siak. Sikato so inabuloyan na atateng ko a mangitagar ed siak diad saray miting. Diad saginonor, sanen ginmapo ak lan mantrabaho, say iyaatendik ed kada Simba so amaingongot ed amak. Anggaman sikato so maong met a too, oniay inreklamo to, “Diad interon simba et anggapo ka la dia, tan diad kada Simba et miaaral ka ni!” Balet ta nantultuloy ak. Kanian sakey ya agew et oniay inkuan ed siak nen amak, “Manbalkot ka la tan taynan ka la dia!” Lablabi la ed saman. Siak so 17 taon ni  labat, tan agko amta no iner so laen ko. Say nakar ko et diad abung di Suzanne, a manak-akis ak. Akiayam ak ed kien di Suzanne ed loob na sakey simba sakbay ya imbaki nen Tatay so atsik a mangisempet ed siak. Sipor ak lan mabaing, balet say punto a nibalikas ed 1 Juan 4:18 so akatulong ed siak ya ontalindeg a mapekder. Inkuan na satan a teksto a “say ayadyarin aro ipaliis to so takot.” Nen 1942 et abautismoan ak.

Sakey a Mablin Tawir

Marian: Siak so abautismoan nen 1942, a kabansag ko iray atsik a di Stéphanie tan Mélanie tan say kuyak a si Stéphane. Diad ayaman mi, akasentro so bilay na pamilya mi ed Salitay Dios. No wala kami ed lamisaan, basaen nen Tatay so Biblia ed sikami diad Polako. Sikami so nilabilabin ontatalineng ed atateng mi legan dan isasalaysay iray eksperiensya ra ed panangipulong na Panarian. Sarayan makapabiskeg ed espiritual iran panaon so angibangat ed sikami a lalon mangaro ed si Jehova tan manmatalek ed sikato. Lapud nagmaliw lan masakit so amak, sikatoy tinmunda lan nantrabaho, balet sikato so nantultuloy ya angasikaso ed sikami diad espiritual tan materyal a paraan.

Lapud wala lay malaem a panaon nen Tatay, maminsan ed kada simba et iyaaralan to na Biblia iray tobonbalo ed kongregasyon mi diad lenguahen Polako. Diman ko naaralan so manbasa na Polako. Pinaseseg met nen Tatay iray kalangweran ed arum niran paraan. Aminsan sanen binmisita ed kongregasyon mi si Brother Gustave Zopfer, ya angasikaso nensaman ed kimey na saray Tasi nen Jehova ed Pransya, inorganisa nen Tatay so sakey a grupo na komakansion tan kontudo-kawes a drama na Biblia nipaakar ed ponsia nen Arin Belsasar tan say sulat ed padir. (Daniel 5:1-31) Say Daniel ed drama et betang nen Louis Piéchota, a diad saginonor et mapekder a tinmalindeg sumpad saray Nazi. * Onia so kipapasen ya abangonan min ananak da. Naimatonan mi iray atateng mi a lawas okupado ed espiritual iran pamaakaran. Natan et amoriak no anto so mablin impatawir ed sikami na atateng mi.

Sanen tinmerak so Guerra Mundial II nen 1939, asebelan so panagpulong a kimey na saray Tasi nen Jehova ed Pransya. Diad aminsan ya inkagawa et sinukisok so baryo mi. Amin a kaabungan so pinaliberan na saray sundalon Aleman. Nanggawa si Tatay na nalukwab a datal ed pananginan na kawes mi, tan inyamot mi ditan so nanduruman publikasyon na Biblia. Balet, walay pigaran kopya na bokletan Fascism or Freedom ya akakarga ed drower a pananginan na saray kubyertos. Inyamot iratan a tampol nen Tatay diad bulsa na dyakit ya akasabit ed pasilyo. Duaran sundalo tan sakey a polis a Pranses so nansukimat ed abung mi. Mannerbiyos kamin maniimaton. Sakey ed saray sundalo so nansukimat ed saray kawes ya akasabit ed pasilyo, insan sikatoy linmoob ed kawalaan min kusina, a sankabembenan to iray bokleta. Ninengneng to kami, inggaton to iray bokleta ed lamisaan, tan intuloy toy nanbokitkit. Inalak a tampol iray bokleta tan inkargak ed drower a nansukimatan la na saray sundalo. Aglan balot tinepet na sundalo no kawalaan na saramay bokleta​—singano alingwanan to la iratan!

Inloob ed Sigpot-Panaon a Serbisyo

Nen 1948, denesidik so manlingkor ed si Jehova a sigpot-panaon bilang payunir. Kayari na pigaran agew, akaawat ak na sulat manlapud sangan opisina na saray Tasi nen Jehova ed Pransya. Lugan na sulat so sakey ya asainmin parad siak a manlingkor bilang payunir ed kongregasyon na Sedan, asingger ed Belgium. Manliket iray atateng ko sanen sineryosok so panaglingkor ed si Jehova ed onman a paraan. Anggaman kuan, impurek nen Tatay a say panagpayunir et aliwan panagbakasyon. Impasyan kimey itan. Balet, inkuan to a lukas a naynay so abung to parad siak tan nailaloan ko so tulong to no walaray problemak. Anggaman anggapoy dakel a kuarta na atateng ko, insaliwan da ak na balon bisikleta. Wala ni’d siak so resibo na saman a bisikleta, tan sano nengnengen ko itan et makanangis ak. Inatey si Tatay tan Nanay nen 1961, balet saray makabat a salita nen Tatay so  siansian natandaan ko; pinaseseg da ak tan niligliwa da ak ed saray taon na impanlingkor ko.

Say sakey nin amaseseg ed siak et say 75 años a Kristianon agin bii diad kongregasyon na Sedan a manngaray Elise Motte. Legan na tiagew, bibisekletaen ko so kabangibang iran baryo pian manpulong, tan man-tren si Elise pian ibaan to ak. Balet, sakey ya agew et nanwelga iray mekaniko na tren, tan agmakasempet si Elise. Say alenleneg a solusyon a naisip ko et ilason ko la ed bisikletak tan ipatnubang ko ed abung da​—ya aliwan komportablen paraan a kalulugan. Kaimbuasan et angawit ak na kutson tan sinamar koy Elise ed abung da. Sikatoy agla nantren, tan lapud akagimper ni na kuarta, sikatoy akasaliw na ampetang ya iinumen mi legan na panangugto. Siopa so manisip a say bisikletak et onkanan publikon luluganan?

Dakel Ni Iran Responsabilidad

Nen 1950, siak so akerew a manlingkor bilang manangasikaso na sirkito ed interon mamaamianen a Pransya. Lapud 23 años ko ni labat ed saman et takot so primeron aliknak. Abaloan ko et alingo labat so sangan opisina. Dakerakel iray tepet ko: “Kualipikado ak kasi ed kimey diad espiritual tan pisikal a paraan? Panon ak a makaadapta ed nanduruman pampundoan ed kada simba? Sakey ni, manlapu la’d edad ya anemira, wala lay deperensya na matak a tinawag na divergent strabismus. Lapud saya, gilabot so sakey a matak. Mapaga ak a naynay ed satan, ya aburido ak no anto so reaksion na arum. Maong ta, diad saman ya inkagawa et akaawat ak na dakel a tulong manlapud si Stefan Behunick, sakey a nangraduar ed eskuelaan na misionaryo ed Gilead. Si Brother Behunick so apatakyas manlapud Polandiya lapud panagpulong a kimey to tan niasain lamet ed Pransya. Say inkakpel to so talagan pandinayewan ko. Sikato so walaan na aralem a respeto ed si Jehova tan ed katuaan. Iisipen na arum a sikato so estrikto ed siak, balet dakel so naaralan ko ed sikato. Say inkakpel to so akatulong ed siak pian ombiskeg so kompiyansak.

Lapud kimey ed sirkito, nanggayagaan ko so pigaran alay abig iran eksperiensya ed lawak na serbisyo. Nen 1953, siak so akerew ya ondalaw ed sakey a Mr. Paoli, a manaayam ed abalaten na Paris tan nansuskribe na The Watchtower. Akapankabat kami, tan naamtaan ko a sikato manaya et nanretiro lan sundalo tan asagyat ed The Watchtower. Imbaga to ed siak a kayari ton binasa so sakey ya artikulo nipaakar ed Memoryal na impatey nen Kristo ed apalabas ya isyu, sinelebraan ton bukor so Memoryal tan sanlabin nambasa na Salmos. Sanngarem kamin nantongtong. Sakbay ak ya onalis, nantongtongan min agano so nipaakar ed bautismo. Diad saginonor et angipawit ak ed sikato na imbitasyon ya onatendi ed sirkiton asamblea mi, a ginawa ed kasakbayan na 1954. Sikato so inmatendi, tan akaiba ed 26 a totoon nampabautismo ed saman ya asamblea si Brother Paoli. Saray eksperiensya a singa saya so amaliket ed siak.

Rosa: Nen Oktubre 1948, ginmapo ak a nampayunir. Kayarik a nanserbi diad Anor, ya asingger ed Belgium, siak so niasain ed Paris, kaiba so sananey nin payunir, si Irène Kolanski (natan et Leroy). Nanayam kami ed melag a kuarto ed Saint-Germain-des Près ed sentro na syudad. Lapud  binmaleg ak ed probinsya, mandinayew ak a tuloy ed saray Parisian. Inisip ko ya amin da et sopistikado tan intelihente. Balet ta naamtaan ko diad pampupulong ko ed sikara a mipara met ira ed arum a totoo. Mabetbet kamin paalisen na manbabantay ed puerta na bilding, tan mairap so mangigapo na panangiyaral na Biblia. Anggaman ontan, walaray totoo ya angawat ed mensahe mi.

Legan na sakey a sirkiton asamblea nen 1951, sikami nen Irène so ininterbio nipaakar ed panagpayunir mi. Bitla yo no siopay nan-interbio? Sakey a malangwer a manangasikaso na sirkito a manngaran na Marian Szumiga. Akapankabat kami la nensaman, balet kayari na saman ya asamblea et nansulatan kami. Dakel so pampadparaan mi nen Marian, a kalaktip lay parehon taon na impanpabautismo mi tan taon na impanpayunir mi. Balet, sankaimportantian et labay min dua so mansiansia ed sigpot-panaon a serbisyo. Kanian kayari na sipipikasin impannonot, nankasal kami nen Hulyo 31, 1956. Diad satan a kundang, ginmapo ak lamet ed balon dalan na kabibilay. Kinaukolan kon ipasal so inkasiak bilang asawa tan kaiba nen Marian diad kimey ed sirkito, a mankabaliksan na pampundo ed nanduruman abung ed kada simba. Diad primero et mair-irap, balet walaray makapaliket a tuloy a mantatalaran ed sikami.

Sakey a Makapnek a Bilay

Marian: Diad loob na dakel a taon et sikami so apribilehyoan ya ontulong ed panangiparaan ed pigaran kombension. Nagkalalo lan agko nalingwanan so kombension ya agawa nen 1966, diad Bordeaux. Diad saman a panaon, nisebel so kimey na saray Tasi nen Jehova ed Portugal. Kanian say programa na asamblea so imparungtal met ed Portuges pian nagunggonaan iramay Tasi a makakar ed Pransya. Sinmabi so nilasus ed saray Kristianon agagi tayo a nanlapud Portugal, balet say problema et no iner so pampundoan da. Lapud saray Tasi ed Bordeaux et andian na magenap a kuarto ed kaabungan da, angabang kami na ag-uusaren a sinean  pian usaren a pampundoan. Inekal min amin so yurongan, tan inusar mi so kurtina ed plataporma pian pankadduaen so hall, sakey a parad agagin lalaki tan samay sakey et parad agagin bibii. Nanggawa kami na amesan tan urasan, angikarga kami na dayami ed datal a semento, tan sinakbongan mi itan na canvas. Makakaliket so amin ed sayan uksoyan.

Kayari na saray sesyon na kombension, bibisitaen mi iray agagi ed pampupundoan da. Alay dakep na kipapasen. Apaseseg kami ed saray eksperiensya ra anggaman ed impansungdo ra ed taotaon na isusumpa! Sanen onalis la ra kayari na asamblea, akalua kamin amin.

Sinmabi so sananey nin pribilehyo duay taon ni ed asasakbay, nen 1964, sanen akerew ed siak a manlingkor bilang manangasikaso na distrito. Nanisip ak lamet no kasin kualipikado ak ed sayan kimey. Balet inkuan ko ed inkasiak a no kinerew na saramay walaan na responsabilidad ya awaten ko so asainmin, mapatnag ya inisip da a nayarian ko itan a sumpalen. Maabig ya eksperiensya so panlingkor a maapit ed arum niran ombiabiahen manangasikaso. Dakel so naaralan ko ed sikara. Dakel ed sikara so walaan na peteg ya alimbawa na inkaanos tan inkaseet, saray kalidad ya importante ed imaton nen Jehova. Amoriak a no mananos itayo, amta nen Jehova no iner so kawalaan tayo.

Nen 1982 et kinerew met ed sikami na sangan opisina ya asikasoen so melag a grupo na 12 a Polakon manangipalapag ed Boulogne-Billancourt, diad saray ketegan na Paris. Makapasurprisa iman. Amtak iray teokratikon termino ed Polako, balet nairapan ak a manibukel na estansa. Ingen, say kaabigan tan mabulos a pitutulongan na saratan ya agagi so akatulong a maong ed siak. Natan, wala la so ngalngali 170 a manangipalapag ed saman a kongregasyon, a kalaktip lay ngalngali 60 a payunir. Diad saginonor, sikami nen Rosa so binmisita met ed saray grupo tan kongregasyon a Polako diad Austria, Denmark, tan Alemanya.

Anguman Iray Sirkumstansya

Kabiangan la na bilay mi so ombisita ed nanduruman kongregasyon, balet lapud onleletey lay bunigas ko et kinaukolan mi so ontunda ed ministeryo bilang ombiabiahen manangasikaso nen 2001. Akaromog kami na sakey ya apartment ed baley na Pithiviers, a panaayaman na yugtan kon si Ruth. Say sangan opisina so mapangasin anuro ed sikami bilang espisyal payunir a walaan na kakaukolanen ya oras a mitukoyan ed kipapasen mi.

Rosa: Say primeron taon kayari na intunda mi ed kimey ed sirkito so mairap a tuloy parad siak. Pirmi so pananguman kanian singa anggapoy kakanaan ko. Insan oniay inkuan ko ed inkasiak, ‘Nayarian ko nin usaren so panaon tan biskeg ko diad epektibon paraan diad panserbik bilang payunir.’ Natan, siak so maliket a mikikimey ed arum niran payunir ed kongregasyon mi.

Lawas Kamin Inasikaso nen Jehova

Marian: Pisalamatan kon tuloy si Jehova lapud si Rosa so kaibak ed loob na apalabas a 48 a taon. Diad amin na saraman a taon ed panagbiahen kimey, baleg so nitulong to ed siak. Anggapo so nadngelan ko ed sikato a, “Komon ta manpainawa ta la ed sayan kimey tan onligen ta la ed dilin abung ta.”

Rosa: No maminsan et walay mangibaga ed siak ya, “Aliwan normal so panagbilay yo. Naynay kayon miaayam ed arum.” Balet anton talaga so “normal a panagbilay”? Mabetbet et napapaliberan kami na dakel iran bengatla a nayarin magmaliw a babeng ed panggegemtan mi ed espiritual iran kimey. Say talagan nakaukolan mi labat et say komportable a dukolan, sakey a lamisaan, tan arum niran manunan nakaukolan. Bilang payunir et samet labat so materyal a kayarian  mi, ingen wala la’d sikami so amin a nakaukolan pian nasumpal mi so linawa nen Jehova. No maminsan et tetepetan da ak, “Anto so gawaen yo no matakken kayo la ya anggapoy abung yo tan pension yo.” Bilang ebat, aonen ko iray salita ed Salmo 34:10: “Saray mananap ed Jehova ag-ira naukolan naani na anto a maong a bengatla.” Lawas kamin inasikaso nen Jehova.

Marian: On! Diad tua, dakerakel so impalabo ed sikami nen Jehova a mas ni nen say nakaukolan mi. Singa bilang, nen 1958, siak so apilin mangirepresenta ed sirkito mi diad internasyonal a kombension ed New York. Balet, anggapoy kuarta ya isaliw mi na ticket parad si Rosa. Sakey a labi et inderew ed sikami na sakey ya agin laki so sobren asulatan na “New York.” Say akakargan regalo so nausar mi pian nakaibak si Rosa ed biahe!

Sikami nen Rosa so andian a balot na pagbabawian nipaakar ed saray taon na impanserbi mi ed si Jehova. Anggapo so naandi ed sikami balet agamoran mi so amin a bengatla​—sakey a makapnek tan maliket a bilay ed sigpot-panaon a serbisyo. Si Jehova et alay abig a Dios. Naaralan mi so manmatalek a maong ed sikato, tan lalon inmaralem so panangaro mi ed sikato. Arum ed saray Kristianon agagi tayo so akasagmak na ipapatey lapud katooran da. Balet, manisia ak a diad ilabas na dakel a taon et nayarian met na sakey a too a kalkalnan isakripisyo so bilay to. Satan so pambabanikelan mi nen Rosa anggad natan, tan satan so determinado min gawaen ed arapen.

[Paimano ed leksab]

[Litrato ed pahina 20]

Si François tan si Anna Szumiga tan saray ananak dan si, Stéphanie, Stéphane, Mélanie, tan Marian nen manga 1930. Akatoon ed bangko si Marian

[Litrato ed pahina 22]

Tagey: Panangiyopresi na saray publikasyon na Biblia diad lakoan ed Armentières, mamaamianen a Pransya, nen 1950

[Litrato ed pahina 22]

Kawigi: Si Stefan Behunick a kaiba toy Marian nen 1950

[Litrato ed pahina 23]

Rosa (arawin kawigi) a kaiba to so kaulop ton payunir a si Irène (mikapat manlapud kawigi), a mangipapakabat ed sakey ya asamblea nen 1951

[Litrato ed pahina 23]

Si Marian tan Rosa diad samay agew sakbay na kasal da

[Litrato ed pahina 23]

Say manunan luganan ya uusaren nensaman diad saray ibibisita ed sirkito et bisikleta