Manalwar ed “Boses na Saray Sankaili”

“Agda tumboken so sankaili ingen sikatoy ibatikan da, ta agda kabat so boses na saray sankaili.”​—JUAN 10:5.

1, 2. (a) Antoy reaksion nen Maria sanen sikatoy tinawag nen Jesus ed ngaran, tan anton akadkauna lan balikas nen Jesus so mangiyilustra ed sayan ebento? (b) Anto so mamaapit ed sikatayo ed si Jesus?

 NAIMANO nen apaolin Jesus so bii a manal-alagey ed abay na anggapoy kargan lubok to. Kabkabat to so bii. Sikato si Maria Magdalena. Ngalngali duay taon ed asasakbay et sikato so pinaabig nen Jesus manlapud inkaselepan na demonyo. Manlapu la’d saman et sikatoy akiulop-ulop ed si Jesus tan ed saray apostol, ya inasikaso to iray inagew-agew a pankaukolan da. (Lucas 8:1-3) Balet, nannangis tan pirmin nanermen si Maria, lapud anengneng toy impatey nen Jesus insan abalang so bangkay to! Kanian oniay inkuan nen Jesus: “Bii, akin et mannangis ka? Siopa so anapen mo? Et diad impangisip to a sikato so managtanaman, kuanto ed sikato, Katawan, no sikato so inalam dia, ibagam ed siak no iner so anginan mo ed sikato, tan sikato so alaen ko naani.” Insan inkuan nen Jesus: “Maria!” Tampol ya abidbir to so kabisado ton paraan na pitotongtong nen Jesus ed sikato. “Managbangat!” so maliket ton inkuan. Tan sikato so nilakap to.​—Juan 20:11-18.

² Iyiilustra na sayan salaysay diad makapatenyeg a paraan so akadkauna lan imbaga nen Jesus. Diad impangikompara to ed inkasikato ed managpastol tan ed saray patumbok to bilang karnero, inkuan to a tawagen na managpastol so dilin karnero to ed ngaran da tan kabat da so boses to. (Juan 10:3, 4, 14, 27, 28) On, singa say karnero a kabat to so managpastol to, abidbir met nen Maria so Pastol to, si Kristo. Tua met itan ed saray patumbok nen Jesus natan. (Juan 10:16) No panon a say makatebek a pakarengel na karnero et mamaapit ed sikato ed pastol to, natulongan tayo met na espiritual a pakatebek tayo pian maapit itayon makapankurang unong ed saray bakat na Maabig a Pastol tayo, si Jesu-Kristo.​—Juan 13:15; 1 Juan 2:6; 5:20.

3. Anto so pigaran tepet ya ipapanonot na ilustrasyon nen Jesus nipaakar ed kasimpukokan?

³ Balet, unong ed satan met lanlamang ya  ilustrasyon, say pakasarag na karnero a mangibiig ed saray boses na totoo so ontulong pian naamtaan to no kasin saman a boses et kaaro odino kabusol to. Satan so importantin tuloy lapud walaray masilib ya onsusumpa ed sikatayo. Siopa ira? Panon so ikukurang da? Panon tayon naprotektaan so inkasikatayo? Pian naamtaan itan, nengnengen tayo no anto ni so imbaga nen Jesus ed ilustrasyon to nipaakar ed kasimpukokan.

‘Say Ag-Onloob ed Pinto’

4. Unong ed ilustrasyon nipaakar ed managpastol, siopa so tutumboken na saray karnero, tan siopa so agda tutumboken?

⁴ Inkuan nen Jesus: “Say onloob ed pinto sikato so pastol na saray karnero. Sikato so ilukasan na bantay pinto, tan saray karnero dengelen da so boses to, et tawagen to so saray karnero to ed dilin ngaran da, tan sikara so ipaway to. Et sano nipaway to so amin a kien to, sikatoy onla ed unaan da, et saray karnero sikatoy tumboken da, ta sikara kabat da so boses to. Et agda tumboken so sankaili ingen sikatoy ibatikan da, ta agda kabat so boses na saray sankaili.” (Juan 10:2-5) Imanoen ya amitlon inusar nen Jesus so salitan “boses.” Amiduan sinalita to so nipaakar ed boses na managpastol, balet diad komatlon danay et tinukoy to so “boses na saray sankaili.” Anton nengneng na sankaili so tutukoyen nen Jesus?

5. Akin ya agtayo paparawesen so klase na sankaili ya asalambit ed Juan kapitulo 10?

⁵ Agsisingbaten nen Jesus so klase na sankaili a labay tayon parawesen​—sakey a salita a diad orihinal a lenguahe na Biblia et mankabaliksan na “panangaro ed saray sankaili.” (Hebreos 13:2) Diad ilustrasyon nen Jesus, say sankaili odino estranghero et aliwan sakey ya inimbitaan a bisita. Sikato so “ag-onloob ed pinto na panangipukokan ed saray karnero, ingen onkalab ed sananey a dalan.” Sikato so “matakew tan tulisan.” (Juan 10:1) Siopa ta so inmunan sinalambit ed Salitay Dios a nagmaliw a matakew tan tulisan? Si Satanas a Diablo. Naromog tayo so ebidensya ed libro na Genesis.

Sanen Inmunan Nadngelan so Boses na Sankaili

6, 7. Akin a si Satanas et manepeg a tawagen a sankaili tan matakew?

⁶ Dedeskribien na Genesis 3:1-5 no panon a primeron nadngelan ed dalin so boses na sakey a sankaili. Inkuan na salaysay ya inasinggeran nen Satanas so primeron bii, si Eva, diad panamegley na uleg tan kinatongtong to ed makapalikdon paraan. Tua, diad sayan salaysay et si Satanas so aliwan literal a tinawag a “sankaili.” Anggaman kuan, ipapatnag na saray kiwas to diad dakel a dalan a singa sikato imay sankaili ya adeskribe ed ilustrasyon nen Jesus a nikurit ed Juan kapitulo 10. Konsideraen so pigaran pampadparaan.

⁷ Insalaysay nen Jesus ya aasinggeran na sankaili iray biktimaen to ed loob na kasimpukokan diad masilib a paraan. Ontan met, agmaparungtal ya inasinggeran nen Satanas so biktima to diad impangusar to na uleg. Sayan masilib a paraan so angiwalwal no siopan talaga si Satanas​—sakey a masilib a manangataki. Niarum ni, getma na sankaili ed kasimpukokan a takewan so makankayarian ed saray karnero. Diad tua, sikato so mas mauges ni nen say matakew, lapud say getma to et ‘mamatey tan mamagbag.’ (Juan 10:10) Mipadpara, si Satanas et sakey a matakew. Diad impamalikdo to ed si Eva, sinamsam to so katooran nen Eva ed Dios. Niarum ni, si Satanas so angitarok met na ipapatey ed saray totoo. Kanian, sikato so manamatey.

8. Panon a pinikewet nen Satanas iray salita tan motibo nen Jehova?

⁸ Say panamalikdo nen Satanas so apatnagan ed paraan na impamikewet to ed saray salita tan motibo nen Jehova. Oniay intepet to ed si Eva: “Say Dios inkuan to, Agkayo mangan ed anggan anto a kiew na tanamanan?” Nankuankuanan si Satanas a sikato so abigla, a singano imbaga ton: ‘Panon a say Dios et magmaliw ya ontanlan agmakatunongan?’ Inyarum to ni: “Amta na Dios a dia ed agew a pangan yo ed saman, nalukasan so saray mata yo ed satan.” Imanoen pa iray salita ton: “Amta na Dios.” Singa ibabaga nen Satanas ya: ‘Amtak no anto so kabat na Dios. Amtak iray motibo to, tan mauges iratan.’ (Genesis 2:16, 17; 3:1, 5) Makapaermen ta ag-inarawian di Eva tan Adan so boses na sayan sankaili. Imbes, sikara so dinmengel ed satan tan nansumpal ed impanirap da tan ed saray ilalak da.​—Roma 5:12, 14.

9. Akin a nepeg tayon ilaloan a narengelan natan so boses na saray sankaili?

⁹ Uusaren nen Satanas so mipadpara iran metodo  pian palikdoen so totoo na Dios natan. (Apocalipsis 12:9) Sikato so “ama na tila,” tan ananak to iramay mipadpara ed sikato a manasalin mamalikdo ed saray lingkor na Dios. (Juan 8:44) Imanoen tayo so pigaran paraan a narerengelan natan so boses na sarayan sankaili.

No Panon a Narerengelan Natan so Boses na Saray Sankaili

10. Anto so sakey a dalan a narerengelan so boses na saray sankaili?

¹⁰ Makapalikdo iran panagkatunongan. Oniay inkuan nen apostol Pablo: “Agkayo sirin payakar dia tan diman ed saray nambabangil a bangat.” (Hebreos 13:9) Anto iratan a klase na bangat? Lapud nayarian da itayon ‘iyakar dia tan diman’ odino ibalang, mabitar a say tutukoyen nen Pablo et saray bangat a mamaletey ed inkabalanse tayo ed espiritual. Siopa so mangibabalikas ed saratan a midumaan a bangat? Oniay imbaga nen Pablo ed sakey a grupo na saray Kristianon mamatatken: “Dia ed sikayo met lanlamang wala ra so onalagey naani a totoon mansalita na saray bengatlan mabanday, pian tangguyoren da so saray binangatan ya ontumbok ed sikara.” (Gawa 20:30) On, singa met ed panaon nen Pablo, walaray indibidual natan a datin kabiangan na Kristianon kongregasyon a manasalin mangibalang ed saray karnero diad pansasalita ra na “saray bengatlan mabanday” odino pikewet​—aliwan puron katuaan tan sigpot a katilaan. Unong ed impangibalikas ed satan nen apostol Pedro, uusaren da iray “kunkunwarin salita”​—saray salitan ompatnag a katuaan balet ta diad tua et andiay kakanaan a singa kunkunwari odino peke a kuarta.​—2 Pedro 2:3.

11. Panon ya inwalwal na saray salita a naromog ed 2 Pedro 2:1, 3 so metodo tan getma na saray apostata?

¹¹ Inwalwal ni nen Pedro iray metodo na saray apostata diad impangikuan ton “mangiloob [ira] ed maamot na inka-erehes [odino saray sekta] a pakaderalan.” (2 Pedro 2:1, 3) No panon a say matakew ed ilustrasyon nen Jesus nipaakar ed kasimpukokan so “ag-onloob ed pinto na panangipukokan ed saray karnero, ingen onkalab ed sananey a dalan,” ontan met so maamot ya iyaasingger na saray apostata ed sikatayo. (Galacia 2:4; Judas 4) Anto so getma ra? Inyarum nen Pedro: “Gawaen da kayo a panagka-tagilako ra” odino anamoten da kayo. On, antokaman so nayarin ikatunongan na saray apostata, say peteg a getma na saray onloloob et ‘mantakew, tan mamatey, tan mamagbag.’ (Juan 10:10) Manalwar ed ontan iran sankaili!

12. (a) Panon a say pipiulop tayo so mangipaarap ed sikatayo ed boses na saray sankaili? (b) Anto so panulibayan na saray taktika nen Satanas tan taktika na saray sankaili natan?

¹² Makaderal iran kaulop. Say boses na saray sankaili so nayarin narengelan diad panamegley na saramay nakakaulop tayo. Saray mauges a pipiulop so nagkalalo lan mapeligro ed saray tobonbalo. (1 Corinto 15:33) Tandaan a say pinuntirya nen Satanas et si Eva​—say mas malangwer tan agtanton eksperiensyado ed inmunan sanasawa. Sikato  so kinombinse nen Satanas a si Jehova so agmakatunongan a mamepeget ed kawayangan nen Eva, anta diad tua et katilaan so ibabaga nen Satanas. Inaro nen Jehova iray pinalsa ton totoo tan sinononot ed pankaabigan da. (Isaias 48:17) Mipadpara natan, sikayoran tobonbalo so panggugunaetan a tangguyoren na saray sankaili a say kawayangan yo et agmakatunongan a pepegetan na Kristianon atateng yo. Panon kayon naapektaan ed saratan a sankaili? Oniay inaksobi na sakey a Kristianon marikit: “Walay panaon a linmetey so pananisiak lapud saray kaklasek. Naynay dan ibabaga ya estrikton maong tan agmakatunongan so relihyon ko.” Ingen ta say tua et inaro kayo na atateng yo. Kanian sano tatangguyoren kayo na saray kaklase yo ya agpanmatalekan iray atateng yo, agkayo papapalikdo a singa si Eva.

13. Anton makabat a kurang so tinumbok nen David, tan anto so sakey a paraan a sikatoy naalig tayo?

¹³ Nipaakar ed makaderal iran kaulop, oniay inkuan nen salmistan David: “Agak akiyurong ed saray matitila a totoo, nisay akiyurong ak ed saray mansimpisimpitan.” (Salmo 26:4) Kasin naimano yo lamet so walna a kaslakan ya ipapatnag na saray sankaili? Iyaamot da so inkasikara​—a singa pangiyaamot nen Satanas ed pakabidbiran ed sikato diad impangusar to ed sakey ya uleg. Natan, arum ya imoral a totoo so mangiyaamot ed pakabidbiran ed sikara tan ed tuan getma ra diad panguusar da na Internet. Diad saray chat room, walaray mapalikdon wala la’d edad a mangipapakabat ed inkasikara bilang tobonbalo pian napatitan kayo. Sikayoran kalangweran, ipangasi yoy manalwar a maong ta no andi et naderal so espiritualidad yo.​—Salmo 119:101; Uliran 22:3.

14. No maminsan, panon ya ipapalapag na media so boses na saray sankaili?

¹⁴ Palso iran akusasyon. Anggaman makatunongan so arum ed saray balita na media nipaakar ed saray Tasi nen Jehova, no maminsan et aabuloyan da iray agmakatunongan a boses na saray sankaili pian ibrodkas iratan. Singa bilang, diad sakey a bansa et walay katilaan a nikuan ed sakey a report a sinuportaan na saray Tasi so uley nen Hitler legan na Guerra Mundial II. Diad sananey a bansa, sakey a report so angakusa ed saray Tasi a dederalen da iray simbaan. Diad pigaran bansa, inakusaan na media iray Tasi ya agda ipapatambal iray ananak da tan gagagalaen da met a konsintien iray graben kasalanan a ginawa na saray kapananisiaan da. (Mateo 10:22) Anggaman ontan, sikatayo so personal a kabkabat na masimoon a totoo tan bibidbiren da a palso iratan ya akusasyon.

15. Akin ya agmakabat so panisia ed amin a bengatlan nipaparungtal ed media?

¹⁵ Anto so nepeg tayon gawaen sano nipaarap itayo ed saray akusasyon ya ikakayat na boses na saratan a sankaili? Nepeg tayon talinengen so simbawa na Uliran 14:15: “Say karaklan manisia ed balang salita; balet say masimpit a too nengnengen to a maong so laen to.” Agmakabat  so panisia a katuaan so amin a bengatlan nipaparungtal ed media. Anggaman agtayo pansususpetsaan so amin a sekular ya impormasyon, bibidbiren tayo a “say sankamundoan [so] mandukdukol ed kaugsan.”​—1 Juan 5:19.

‘Salien Yo Iray Apuyanan a Balikas’

16. (a) Panon ya iyiilustra na awawey na literal a karnero so katuaan na saray salita nen Jesus a naromog ed Juan 10:4? (b) Anto so ipapaseseg na Biblia a gawaen tayo?

¹⁶ Balet, panon tayon naseguro no midedeneng itayo ed sakey a kaaro odino kabusol? Bueno, imbaga nen Jesus a tumboken na saray karnero so pastol da lapud “kabat da so boses to.” (Juan 10:4) Aliwan say literal ya itsura na pastol so mamakiwas ed saray karnero ya ontumbok ed sikato noagta say boses to. Insalaysay na sakey a libron manisingbat nipaakar ed saray daldalin ya asalambit ed Biblia ya aminsan et inkuan na sakey a bisita a nabidbiran na saray karnero so pastol da diad kawes to, aliwan diad boses to. Inmebat so sakey a pastol a say boses so nabidbir na saray karnero. Pian napaneknekan itan, sikato so akisalatan na kawes ed bisita. Sanen akasulong la ed bisita so kawes na managpastol, tinawag to so karnero balet ta ag-ira dinmago. Agda kabat so boses to. Ingen, sanen sikara so tinawag na pastol, anggaman sananey so akasulong ed sikato, tampol ya inmasingger ed sikato iray karnero. Kanian, nayarin say itsura na sakey et singa managpastol, balet parad saray karnero, ag-itan mamaneknek a sikaton talaga imay pastol da. Singa uusisaen ni na saray karnero so boses na ontatawag ed sikara, ya ikokompara da itan ed boses na managpastol da. Ontan met so ibabaga na Salitay Dios a gawaen tayo​—“salien yo so saray espiritu [“apuyanan a balikas,” NW] no kien ira na Dios.” (1 Juan 4:1; 2 Timoteo 1:13) Anto so ontulong ed sikatayo pian nagawaan itan?

17. (a) Panon tayon nakabisado so boses nen Jehova? (b) Anto so nagawaan tayo no walaan itayoy pikakabat ed si Jehova?

¹⁷ Tua, no lalon malinew so pikabat tayo ed boses, odino mensahe nen Jehova, lalon nibiig tayo so boses na sakey a sankaili. Ipapabitar na Biblia no panon tayon nabayuboan so ontan a pikakabat. Oniay ibabaga na satan: “Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato.” (Isaias 30:21) Satan a “salita” a walad benegan tayo so manlalapud Salitay Dios. Diad kada pambasa tayo ed Salitay Dios, singano dedengelen tayo so boses na Baleg a Pastol tayo, si Jehova. (Salmo 23:1) Kanian, no nagkalalo tayon aaralen so Biblia, lalo tayon nakabisado so boses na Dios. Satan a maapit a pikakabat so ontulong met ed sikatayo pian nibiig a tampol so boses na saray sankaili. ​—Galacia 1:8.

18. (a) Anto so lalanoren na pikabat ed boses nen Jehova? (b) Unong ed Mateo 17:5, akin a nepeg tayon tuloken so boses nen Jesus?

¹⁸ Anto so lalanoren ni na pikabat ed boses nen Jehova? Nilikud ed pandengel, lalanoren na satan so pangunor. Imanoen lamet so Isaias 30:21. Oniay iyaabawag na Salitay Dios: “Saya so Dalan.” On, diad panagaral na Biblia, dedengelen tayo iray panangidirehi nen Jehova. Oniay sinmublay ya ingganggan to: “Ondalan kayo ed sikato.” Labay nen Jehova a sikatayoy onkiwas unong ed narerengelan tayo. Kanian, diad pangiyaplika tayo ed naaaralan tayo, nipatnag tayo ya agtayo lambengat dedengelen so boses nen Jehova noagta uunoren tayo itan. (Deuteronomio 28:1) Say pangunor ed boses nen Jehova so mankabaliksan met na pangunor ed boses nen Jesus, lapud ipapagawa itan ed sikatayo nen Jehova. (Mateo 17:5) Anto so ipapagawa ed sikatayo nen Jesus, say Maabig a Pastol? Ibabangat to itayon manggawa na saray  babangatan tan panmatalekan so “matoor tan makabat ya aripen.” (Mateo 24:45; 28:18-20) Say pangunor ed boses to so mankabaliksan na bilay ya andi-anggaan. ​—Gawa 3:23.

“Sikatoy Ibatikan Da”

19. Anto so nepeg ya ikiwas tayo ed boses na saray sankaili?

¹⁹ Panon sirin so nepeg ya ikiwas tayo ed boses na saray sankaili? Diad paraan ya ikikiwas na saray karnero. Inkuan nen Jesus: “Agda tumboken [a balot] so sankaili ingen sikatoy ibatikan da.” (Juan 10:5) Nankadua so reaksion tayo. Unona, ‘agtayo tumboken’ so sankaili. On, sikatayo so determinadon mangipulisay ed estranghero. Diad tua, diad salitan Griego ya inusar ed Biblia, saray salitan ‘agdan [balot]’ so mangipapatalos ed mapuersan paraan na panangibalikas na pangipulisay ed satan a lenguahe. (Mateo 24:35; Hebreos 13:5) Komadua, ‘ombatik’ itayo, odino ompaliis itayo manlapud sikato. Manepeg labat ya ontan so ikiwas ed saramay mangibabangat na sumlang ed boses na Maabig a Pastol.

20. Panon so ikiwas tayo sano nipaarap itayo ed (a) mapalikdo iran apostata, (b) makaderal iran kaulop, (c) agmakatunongan iran report na media?

²⁰ Kanian, sano nipaarap itayo ed saramay mangibabalikas na apostata iran ideya, labay tayon gawaen no anto so ibabaga na Salitay Dios: “Imanoen yo so saray makasengeg na kasiansian tan sengeg na katiroran sumpa ed bangat ya inaral yo: tan arawian yo ra.” (Roma 16:17; Tito 3:10) Ontan met, labay na saray Kristianon tobonbalo a nipapaarap ed saray kapeligroan na makaderal iran kaulop ya iyaplika so simbawa nen Pablo ed malangwer a Timoteo: “Taynan ka ed saray ib-ibeg ya inuugaw.” (2 Timoteo 2:22; 4:3-5) Tan sano nipaarap ed palso iran akusasyon na media, nodnonoten tayo so kaaruman a bilin nen Pablo ed si Timoteo: “Sikara [saramay ondengel ed boses na saray sankaili et ipaarap da] so pandengel da ed saray labilabir. Et ingen sika manpaga ka ed saray ami-amin a bengatla.” (2 Timoteo 2:22; 4:3-5) Anggan panon lay inkalamoyot na boses na saray sankaili, taynanan tayo so amin a maneral ed pananisia tayo.​—Salmo 26:5; Uliran 7:5, 21; Apocalipsis 18:2, 4.

21. Anton tumang so manatalaran ed saramay mangipupulisay ed boses na saray sankaili?

²¹ Diad pangipulisay ed boses na saray sankaili, onkikiwas iray Kristianon alanaan na espiritu ed saray salita na Maabig a Pastol a naromog ed Lucas 12:32. Oniay imbaga ed sikara nen Jesus: “Agkayo antakot, daiset a papastolan; ta kaliktan na Ama yo ya iter ed sikayo so panarian.” Ontan met, say ‘arum a karnero’ so magunaet a mantatalaran ya ondengel ed saray salita nen Jesus: “Gali dia, sikayo bendito nen Amak, tawiren yoy panarian ya imparaan ed sikayo a nanlapu ed inletneg na mundo.” (Juan 10:16; Mateo 25:34) Agaylan makapaligsay-puson tumang so manatalaran ed sikatayo no ipulisay tayo so “boses na saray sankaili”!

Kasin Nanonotan Yo?

• Panon a matukoy ed si Satanas so deskripsion ed sankaili ya asalambit ed ilustrasyon nen Jesus nipaakar ed kasimpukokan?

• Panon a narerengelan natan so boses na saray sankaili?

• Panon tayon nibiig so boses na saray sankaili?

• Anto so nepeg ya ikiwas tayo ed boses na saray sankaili?

[Tepetepet Parad Panagaral]

[Litrato ed pahina 15]

Abidbir nen Maria si Kristo

[Litrato ed pahina 16]

Say sankaili so masilib ya onaasingger ed saray karnero

[Litrato ed pahina 18]

Panon so ikiwas tayo ed boses na saray sankaili?