No Anton Talaga so Nakaukolan Pian Magmaliw a Maliket

SI Jehova, say maliket odino “bendito a Dios,” tan si Jesu-Kristo, “say maliket tan saksakey a Makapanyarin Manuley,” so mas makaamta nen say siopaman no antoy nakaukolan pian magmaliw a maliket. (1 Timoteo 1:11; 6:15, NW) Kanian, agla pankelawan a naromog so tombok ed pagmaliw a maliket diad Salita na Dios, say Biblia.​—Apocalipsis 1:3; 22:7.

Diad bantog a Sermon nen Jesus diad Palandey, indatak to iray nakaukolan ed pagmaliw a maliket. Inkuan to: “Maliket iramay” (1) sinononot ed espiritual a pankaukolan da, (2) maneermen, (3) mauyamo, (4) naeerasan tan napepegaan ed katunongan, (5) mapangasi, (6) maralus a puso, (7) mareereen, (8) napapasegsegang nisengeg ed inkatunong, tan (9) napabpabanday tan napapasegsegang nisengeg ed sikato.​—Mateo 5:3-11, NW. *

Kasin Susto Iray Imbalikas nen Jesus?

Say inkamatua na arum ed saray imbalikas nen Jesus so nakaukolan ni ya ipaliwawa. Siopay makapangiburi a say toon mauyamo, mapangasi, tan mareen a papakiwasen na maralus a puso et lalon maliket nen say toon masanok, magulo, andian na panangasi?

Balet nayarin panumamengan tayo no panon a nibagan maliket iray totoon naeerasan tan napepegaan  ed katunongan odino maneermen. Saratan ya indibidual so walaan na realistikon panmoria ed saray kipapasen ed mundo. Sikara so ‘mansibek tan manakis lapu ed amin a kadimlaan a nagagawa’ ed panaon tayo. (Ezequiel 9:4) Aliwan satan a mismo so panlalapuan na liket da. Anggaman ontan, sano naaralan da so gagala na Dios a mangitarok ed matunong iran kipapasen diad dalin tan inkahustisya ed saray napapairap, say liket da so agmangangga.​—Isaias 11:4.

Lapud panangaro ra ed inkatunong, saray indibidual so mannanangis ed mabetbet ya isasaew dan manggawa na maptek. Diad ontan, sikara so sinononot ed espiritual a pankaukolan da. Saray ontan a totoo so mabulos a paiwanwan ed Dios lapud momoriaen da a sikato lambengat so makatulong ed totoo pian natalonaan day kakapuyan da.​—Uliran 16:3, 9; 20:24.

Saray totoon maneermen, naeerasan tan napepegaan ed katunongan, tan sinononot ed espiritual a pankaukolan da so mikabat ed kaimportantian na pakawalaan na maabig a pisisiglaotan ed Manamalsa. Makapaliket so maabig a pisisiglaotan ed too, balet mas lalon makapaliket so maabig a pisisiglaotan ed Dios. On, saramay masimoon a mangaaro ed maptek tan mabulos a mangawat ed panangiwanwan na Dios, so peteg a nibagan maliket.

Balet, nayarin mairap mon panisiaan a magmaliw a maliket so sakey a napapasegsegang tan nababalaw. Ingen, talagan tua itan, lapud si Jesus a mismo so angibaga ed satan. Kanian, anto so kabaliksan na saray salita to?

Napapasegsegang Balet Maliket​—Panon ya Ontan?

Imanoen ya ag-imbaga nen Jesus a say pakabalaw tan kapasegsegang a mismo so mangitonton ed liket. Oniay impangibaga to: “Mapalar iray apasegsegang la nisengeg ed katunongan, . . . sano balawen da kayo’y totoo, tan pasegsegangen da kayo . . . nisengeg ed siak.” (Mateo 5:10, 11) Kanian manliket lambengat so sakey a too no sikatoy nababalaw lapud impagmaliw ton patumbok nen Kristo tan lapud pangitutunos to ed bilay to ed matunong iran prinsipyo ya imbangat nen Jesus.

Saya so iyiilustra na agawa ed saray inmuunan Kristiano. Saray membro na Sanhedrin, atagey a korte na saray Judio, so ‘nampatawag ed saray apostol, tan kayari da ran nilewet et imbilin da ed sikara ya agla ra mansalita dia ed ngaran nen Jesus, insan da ra imbulos.’ Panon so inkiwas na saray apostol? “Sikara siri’ pinmaway ed arap na singbatan, a malikeliket ira lapud kinmana ra a nantepel na baing ed ngaran nen Jesus. Et inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.”​—Gawa 5:40-42; 13:50-52.

Lalon impalinew nen apostol Pedro so pansiglaotan na pakabalaw tan panliket. Insulat to: “No napabpabanday kayo ed ngaran nen Kristo, mapalar kayo, ta say espiritu na gloria tan espiritu na Dios dia ed sikayo so panayaman da.” (1 Pedro 4:14) On, say panirap na sakey a Kristiano lapud panggagawa to na matunong, anggaman pirmi itan a paniirap, so makapaliket ed sikato sano naamtaan ton nagamoran to so espiritu na Dios. Panon a nisiglaot so liket ed espiritu na Dios?

Saray Gawa na Laman Odino Bunga na Espiritu?

Say masanton espiritu na Dios so mansiansia lambengat ed saraman so ontutulok ed Dios bilang manuley da. (Gawa 5:32) Ag-iiter nen Jehova so masanton espiritu to ed saraman so mangaagamil na “saray gawa na laman.” Kabiangan ed saratan a gawa so ‘pikakalugoran, karutakan, kaalakan na laman, pididios ed saray talintao, panag-anito, pambubusolan, pankokolkol, imon, sanok, pansesepakan, inkaapag-apag, saray pamipikewet ed pananisia, saray sibletan, pampapateyan, panagbuanges, panduroypo, tan saray miulibay ed saraya.’ (Galacia 5:19-21) Tua a sankapatnagan lan tuloy iray “gawa na laman” diad mundo natan. Ingen, saramay mangaagamil ed saratan so agnawalaan na puro tan permanentin liket. Imbes, say pangagamil ed saratan a bengatla so manderal ed maabig a pisisiglaotan na sakey ed saray kapamilya, kakaaro, tan saray kabkabat to. Sakey ni, ibabaga na Salitay Dios a saramay ‘manggagawa  ed sarayan nengneng agda natawir so nanarian na Dios.’

Diad pidumaan, say Dios so mangiiter na espiritu to ed saraman so mamabayubo ed “bunga na espiritu.” Saray kalidad a manitibukel ed sayan bunga et say “aro, gayaga, deen, kasungdoan, kaabigan, kamaongan, sisia, kaumildian, dangka.” (Galacia 5:22, 23, NW) Sano ipapatnag tayo irayan kalidad, papawalaen tayo iray kipapasen parad mareen a pisisiglaotan ed arum tan ed Dios, a manresulta ed tuan liket. (Nengnengen so kahon.) Nagkalalon importante, diad pangipatnag na aro, kaabigan, kamaongan, tan arum niran maridios a kalidad, napaliket tayo si Jehova tan nawalaan itayo na maliket ya ilalon manbilay ya andi-anggaan diad matunong a balon mundo na Dios.

Nayarin Pilien so Panliket

Sanen masimoon a nanaral na Biblia si Wolfgang tan si Brigitte, sakey a sanasawan manaayam ed Alemanya, dakel so materyal a kaykayarian da ya ipapasen na totoo a nakaukolan pian magmaliw a maliket. Sikara so malangwer ni tan mabunigas. Ankabli iray kawekawes da, manaayam ira ed marakdakep ya abung, tan walaan ira na maaligwas ya anapan. Okupado ira ed pangegemtan na dakel a materyal iran bengatla, ingen ag-itan angiter ed sikara na tuan liket. Balet, sinmabi panaon, si Wolfgang tan si Brigitte so nanggawa na importantin desisyon. Sikaray angigana na dakel a panaon tan nansagpot ira pian nagegemtan so espiritual iran bengatla tan nananap ira na saray paraan pian lalon onapit ira ed si Jehova. Say desisyon da so angitonton ed impanguman na awawey da diad kaunoran, a bilang resulta et apakiwas iran mamasimpli ed bilay da tan nanlingkor ira bilang payunir, odino saray ebanghelisador na Panarian a manguusar na dakel ya oras. Natan et sikaray boluntaryon manlilingkor diad sangan opisina na saray Tasi nen Jehova ed Alemanya. Sakey ni, sikaray manaaral na sakey a lenguahe ed Asia ta pian natulongan da iray sankaili a manaral na katuaan a naromog ed Salitay Dios, say Biblia.

Kasin aromog na sayan sanasawa so tuan liket? Oniay inkuan nen Wolfgang: “Nanlapu la’d impangegemtan mi ed espiritual iran bengatla, sikami so mas maliket tan naeksperiensya mi so pirmin inkapnek. Say sigpot-puson panlilingkor mi ed si Jehova so amaelet ed relasyon mi bilang sanasawa. Walaan kami nensaman na maliket a panamaley, balet saray obligasyon tan pilpilalek mi so angiguyor ed sikami  ed nandumaan a direksion. Natan et sikami so mankaiban mangegemtan na parehon kalat.”

Anto so Nakaukolan Pian Magmaliw a Maliket?

Diad antikey a panangibaga: Paliisan iray “gawa na laman,” tan bayuboan so “bunga na espiritu [na Dios].” Pian magmaliw a maliket, kaukolan a pampirawatan na sakey so nawalaan na maapit a pisisiglaotan ed Dios. Say toon manggugunaet a nagamoran itan so ontukoy ed deskripsion nen Jesus nipaakar ed sakey a maliket a too.

Sirin, agka nalilingon mangibaga ya agmo nagamoran so liket. Tua a diad kaplesan et nayarin maletey so bunigas mo odino wala ni ingen iray problemam ed loob na panamaley yo. Nayarin anggapo lay posibilidad a nawalaan ka na anak, odino naiirapan kan mananap na matalonan propesyon. Nayarin andian ka na dakel a kuarta ya aliwan singa dati. Anggaman kuan, manpakpel ka; wala ni so ilalom! Say uley na Panarian na Dios so manresolbe ed saratan a problema tan dakel ni ra. On, agla manbayag et sumpalen nen Jehova a Dios so sipan to ya imbalikas na salmista: “Say panarian mo sikato so maando a panarian, . . . sika buskagen mo so limam, tan peneken mo so saray pilalek na ami’ bengatlan mabilay.” (Salmo 145:13, 16) Unong a napaneknekan na minilyon a lingkor nen Jehova ed sankamundoan, say pannodnonot lawas ed sayan makaligliwan sipan nen Jehova so pirmin mamaliket ed sika natan.​—Apocalipsis 21:3.

[Paimano ed leksab]

[Kahon/Litrato ed pahina 6]

Saray Nakaukolan Pian Magmaliw a Maliket

Say aro so managdag ed arum a mangaro met ed sika.

Say gayaga so mamabiskeg ed sika pian natalonaan mo iray problema.

Say deen so ontulong ed sikan napansiansia so pisisiglaotan mo ya andian na kolkolan.

Say kasungdoan odino andukey a panagtepel so ontulong ed sikan mansiansian maliket anggan sano nipaarap ka ed subok.

Say kaabigan so mamakiwas ed arum ya onapit ed sika.

No ipapatnag mo so kamaongan, napakiwas so arum ya ontulong ed sika sano nakaukolan mo itan.

Say pananisia so mangipaseguro ed sika ed maaron panangiwanwan na Dios.

Say kaumildian et pagmaliwen ton kalmado so liknaan, nonot, tan laman mo.

Say dangka so mankabaliksan ya ondaiset iray pakalingoan mo.

[Saray litrato ed pahina 7]

Pian nagamoran so liket, nakaukolan mon peneken iray espiritual a pankaukolan mo