No Panon a Natalonaan so Inkadismaya
No Panon a Natalonaan so Inkadismaya
KASIN nadidismaya ka? Ontan so nalilikna na dakel a totoo diad sayan panaon na agpakaseguro tan kolkolan. Nadidismaya iray arum lapud anggapoy trabaho ra. Aanosan na arum so resulta na inka-aksidente. Wala met iray arum a mipupuligesgesan ed saray problema ed pamilya, graben sakit, odino kaermenan.
No nadidismaya ka, iner so pakaromogan moy tulong? Minilyon ed interon mundo so akaromog la na ligliwa diad panagbasa ed Salitay Dios, say Biblia. Apaseguroan ira ed saray salita nen apostol Pablo ya angikuan: “Bendito so Dios tan Ama na Katawan tayon Jesu-Kristo, say Ama na saray panangasi tan Dios na ami’ ligliwa, a sikato so manligliwa ed sikatayo ed amin a panermenan tayo.” (2 Corinto 1:3, 4) Akin ta no basaen iya tan say arum niran bersikulo ed mismon Bibliam? Say panggawa ed satan so ‘manligliwa ed pusom tan mamabiskeg ed sika.’—2 Tesalonica 2:17, NW.
Makatulong met so pilimog ed saramay manseserbi ed si Jehova pian natalonaan so inkadismaya. Oniay inkuan na Uliran 12:25: “Say kabelatan ed puso na too mamatuek ed sikato; balet say maong a salita mamagayaga ed sikato.” Sano onatendi itayo ed saray Makristianon miting, narengelan tayo itan a “maong a salita” a “masamit ed kamarerwa, tan kasil ed saray pukel.” (Uliran 16:24) Akin ya ag-atendian so miting ed Kingdom Hall na saray Tasi nen Jehova pian naeksperiensyam a mismo so makapabiskeg ya epekto na satan?
Nagunggonaan ka met ed pakayari na pikakasi. No nadadaeg ka la na saray pakakaaburidoan ed bilay, ibalikas mon amin so naliliknam ed say ‘Dumerengel na pikakasi.’ (Salmo 65:2) Mas natalosan itayo na Manamalsa tayo, si Jehova a Dios, nen say inkasikatayon dili. Makapanilalo itayo ed tulong to. Oniay isisipan ed sikatayo na Salita to: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.” (Salmo 55:22) On, “saray manalagar ed Jehova pasimbaloen to so biskeg da.”—Isaias 40:31.
Initer la nen Jehova a Dios so mabiskeg iran probisyon ya ontulong ed sikatayon natalonaan so inkadismaya. Kasin usaren mo iratan?