Say Panaanap ed Liket

DIAD apalabas a pigaran taon, saray totoo ed Alemanya, Estados Unidos, Gran Britanya, tan Pransya, so tinepetan na, “Anto so nakaukolan pian magmaliw a maliket?” Diad saraman so ininterbio, 89 porsiento so angikuan a nakaukolan so maabig a bunigas; 79 porsiento so analambit ed makapenek a panamaley odino ulopan na sanasawa; 62 porsiento so angibagan saray tumang ed inkaateng; tan 51 porsiento so nanisip a nakaukolan so matalonan propesyon pian magmaliw a maliket. Tan anggaman kaslakan lan ibabangat na karaklan a totoo ya agmangipaseguro na liket so kuarta, 47 porsiento ed saraman so tinepetan so kombinsido a panlapuan itan na liket. Anto kasi so ipaparungtal na saray detalye?

Unona, imanoen pa so ipapasen a pansiglaotan na kuarta tan liket. Impatnag na sakey a surbi diad sanlasus a sankayamanan a totoo ed Estados Unidos a mas maliket iray totoo ed inkalapagan nen say sikara. Niarum ni, anggaman ngalngalin adoble so materyal a kaykayarian na dakel a totoo diad Estados Unidos diad apalabas a taloran dekada, aliwa iran maliket a singa ed dati, unong ed saray eksperto ed mental a bunigas. Diad tua, oniay imbaga na sakey a report: “Diad loob na satan met lanlamang a panaon, dinmakerakel so bilang na saray manasagmak na depresyon. Amitlon danay a dinmakel iray manbibikkel a walad katayatdang. Adoble so bilang na saray mandidiborsio.” Diad manga 50 a nanduruman bansa, nalmoan na saray managsukimat a nanaral ed pansiglaotan na kuarta tan liket ya agnasaliw na kuarta so liket.

Niarum ni, panon kaimportante parad panliket iray bengatla a singa say maabig a bunigas, makapenek a panamaley, tan matalonan propesyon? Bueno, no talagan nakaukolan irayan bengatla pian magmaliw a maliket, panon la iramay minilyon a totoo ya andian na maabig a bunigas tan amin na saramay andian na makapenek a panamaley? Panon to iramay sanasawa ya anggapoy anak da tan saray amin a lalaki tan bibii ya andian na matalonan propesyon? Kasin amin da so nigana la ed agmaliket a bilay? Tan kasin say ipapasen a liket na saramay walaan natan na maabig a bunigas tan makapenek a panamaley et naandi no anguman so situasyon da?

Kasin Susto so Panaanapan Tayo na Liket?

Kaliktan na balang sakey so magmaliw a maliket. Ag-iya pankelawan lapud say Amalsa ed too so deneskribe a “bendito [“maliket,” NW] a Dios,” tan say too so pinalsa a kaulibay na Dios. (1 Timoteo 1:11; Genesis 1:26, 27) Kanian, natural lambengat ya anapen na totoo so liket. Balet, namomoria na dakel a say panamasiansia ed liket et aliling toy pangakop ed buer​—a main-inomay a nabalasubos.

 Balet, kasin alablabas lay panaanap na arum a totoo ed liket? Ontan so padesir na sakey a pilosopo nipaakar ed sosyedad na too a si Eric Hoffer. Oniay inkuan to: “Say panaanap ed liket et sakey ed saray manunan lapuan na kaermenan.” Talagan tua itan no aliwan susto so panaanapan tayo na liket. No ontan, seguradon nadismaya odino onsaew itayo. Say panggugunaet ya onyaman; panseseet ya ombantog odino paderleng; pangegemtan na saray kalat ed politika, sosyedad, odino ekonomya; odino basta pambilay a niyapasakey ed dili tan temporaryon pamepenek ed dilin pilpilalek so agbalot makapaliket. Agpankelawan a walaray angawat ed mansumlangan a panmoria na sakey ya autor ya angikuan: “No ag-itayo la komon manggunaet a magmaliw a maliket sikatayo komon so malikeliket”!

Makatantanda a say surbi ya asaglawi diad gapo na sayan artikulo so angipabitar met ya 4 ed 10 a totoo so manisia a say liket et manresulta ed panggawa na maong tan panulong ed arum. Tan 1 ed kada 4 a tinepetan so angidanet a wala so kaimportantian na pananisia tan relihyoson kombiksion ed pagmaliw a maliket. Mapatnag, nakaukolan tayon usisaen a maong no anton talaga so nakaukolan pian magmaliw a peteg a maliket. Ontulong ed sikatayo so onsublay ya artikulo pian nagawaan itan.

[Saray litrato ed pahina 3]

Ipapasen na dakel a say kuarta, makapenek a bilay na pamilya, odino matalonan propesyon so tombok ed pagmaliw a maliket. Kasin onabobon ka?